ბათუმის მუნიციპალური ინსპექციის ინფორმაციით, ქალაქის სამარშრუტო ხაზებზე მოძრავ მიკროავტობუსებში, მგზავრობის ტარიფის თვითნებური მატებისთვის, პასუხისმგებელი შპს-ების დაჯარიმება ყოველდღიურად ხორციელდება და 2022 წლის 1-ლი იანვრიდან 14 იანვრამდე პერიოდში, სანებართვო პირობების დარღვევის ფაქტზე, უკვე 36 სამართალდარღვევის ოქმია შედგენილი.
ბათუმში სამარშრუტო მიკროავტობუსით მგზავრობა ოფიციალურად ისევ 50 თეთრი ღირს. თუმცა, ბევრი მძღოლი მგზავრებს 70 თეთრს ახდევინებს.
—
სამარშრუტო მიკროავტობუსებით მგზავრობის ფასის დარეგულირება ერთ-ერთი საკითხია, რომლის გამოც ბათუმის საკრებულოში ოპოზიცია მერიის შესაბამის სამსახურებთან ერთად სამუშაო ჯგუფის შექმნას და საკრებულოს შეკრებას ითხოვს.
„ვიცით, რომ ქალაქში მძღოლებმა სამარშრუტო მიკროავტობუსებით მგზავრობის ტარიფები, მართალია უკანონოდ, მაგრამ გააძვირეს. ამ ტარიფებთან დაკავშირებით არის სამსჯელო. საკრებულოს აქვს გადაწყვეტილება მისაღები მერიასთან ერთად, რომ ეს უკანონობა აღიკვეთოს და გამოსავალი ინახოს – დაკმაყოფილდნენ როგორც მძღოლები, ასევე მოსახლეობაც იყოს კმაყოფილი.“ – აცხადებს ოპოზიცია.
მუნიციპალურ ხაზებზე მოძრავ მიკროავტობუსებში მგზავრობის ტარიფს ქალაქის საკრებულო განსაზღვრავს, მაგრამ ბათუმში ახალი მოწვევის საკრებულო ვერ იკრიბება. საკრებულომ ვერც ახალი თავმჯდომარე აირჩია.
საკრებულო რომც შეიკრიბოს, მგზავრობის ტარიფის ცვლილების შესაბამისი პროექტით მას მერიამ უნდა მიმართოს.
მერიის სატრანსპორტო სამსახურში „ბათუმელებს“ უთხრეს, რომ კომპანიებმა, რომლებიც მგზავრთა გადაყვანას ემსახურებიან სამარშრუტო მიკროავტობუსებით, მგზავრობის ტარიფის 80 თეთრამდე გაზრდის მოთხოვნით 2021 წლის დეკემბერში მიმართეს.
ამ თემაზე ვრცლად:
https://batumelebi.netgazeti.ge/news/383762/
