ნეტგაზეთი • RU

რუსეთი უკრაინაში 1960-იანი ეპოქის რაკეტებს იყენებს – ბრიტანეთის დაზვერვა

დიდი ბრიტანეთის დაზვერვის უახლესი ცნობებით, 10 ივნისის მდგომარეობით, რუსეთის ძალებს სევეროდონეცკის სამხრეთით მნიშვნელოვანი წინსვლა არ ჰქონიათ. ქალაქში გრძელდება ქუჩის ბრძოლები და ორივე მხარე სერიოზულ დანაკარგებს განიცდის.

„რუსეთი ერთდროულად იყენებს არტილერიასა და ავიაციას, რათა  უკრაინელთა თავდაცვა გაარღვიოს,“ – მიუთითებს უწყება დღევანდელ განახლებაში და ყურადღებას ამახვილებს იმ შეიარაღებაზე, რომელსაც რუსეთი უკრაინაზე თავდასხმისთვის იყენებს.

დაზვერვის ინფორმაციით, აპრილის შემდეგ, რუსულმა ბომბდამშენებმა, სახმელეთო სამიზნეების გასანადგურებლად, გამოიყენეს ათობით 1960-იანი ეპოქის KH-22 ხომალდსაწინააღმდეგო რაკეტა (NATO-ს სახელწოდება – AS-4 KITCHEN).

„ეს 5.5. ტონიანი რაკეტები, თავის დროზე, შეიქმნა ავიამზიდების გასანადგურებლად, ბირთვული ქობინის (რაკეტის საბრძოლო თავი) დახმარებით. ჩვეულებრივი ქობინით სახმელეთო შეტევებში გამოყენებისას, ეს რაკეტები ძალიან არაზუსტია და იწვევს მნიშვნელოვან ნგრევას და მსხვერპლს მშვიდობიან მოსახლეობაში“, – აღნიშნავს დიდი ბრიტანეთის დაზვერვა.

უწყების ვარაუდით, რუსეთს არ ჰყოფნის უფრო ზუსტი, თანამედროვე რაკეტები და ამიტომაც იყენებს შეიარაღების ასეთ არაეფექტიან სისტემებს. იმ ფონზე, როდესაც უკრაინის საჰაერო თავდაცვის სისტემა წარმატებით იგერიებს რუსეთის ტაქტიკურ თვითმფირნავებს და მათ ქვეყნის დიდი ტერიტორიის დამობმვის საშუალებას არ აძლებს.

გაერთიანებული სამეფოს თავდაცვა უკრაინაში მიმდინარე მოვლენებზე სადაზვერვო ცნობარსყოველდღიურად აქვეყნებს. 10 ივნისის პოსტში, დიდი ბრიტანეთის დაზვერვა გამოთქვამდა შეშფოთებას, რომ ოკუპირებულ მარიუპოლს ქოლერის ეპიდემია ემუქრება.

მთავარი ფოტო: Tu-22M Kh-22 ხომალდსაწინააღმდეგო რაკეტებით/ფოტო: militarywatchmagazine.com

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.