ნეტგაზეთი • RU

ახალი ტურისტული ბილიკი ხულოში – კოტიჯვარის გადმოსახედი

ხულოს მუნიციპალიტეტის სოფელ ჩაოში, „კოტიჯვარზე“, იმ ადგილზე, საიდანაც მდინარე აჭარისწყალის ხეობის ხედი იშლება, ახალ ტურისტულ ბილიკს და გადმოსახედს მოაწყობენ. პროექტს ხულოს მუნიციპალიტეტის მერია მთავრობის მიზნობრივი ტრანსფერის დაფინანსებით ახორციელებს.

სასეირნო ბილიკთან ერთად უნდა მოეწყოს თანამედროვე არქიტექტურის მქონე ინფრასტრუქტურა: ფანჩატური, გარეგანათება და მოსასვენებელი სკამები.

ტურისტული ბილიკის მშენებლობა სოფელ ჩაოში / ფოტო: ხულოს მერია

 პროექტი მიმდინარე წლის სექტემბერში უნდა დასრულდეს და ჯამში 154 438 ლარი დაიხარჯება.
სამუშაოებს ტენდერში გამარჯვებული კომპანია შპს „ალსოფი“ შეასრულებს. კომპანიის მფლობელი და ხელმძღვანელი ანზორ აბაშიძეა.

სოფელი ჩაო აჭარისწყალის ხეობაში, ვაშლოვნის თემში მდებარეობს. სოფელი ზღვის დონიდან 1 120 მეტრ სიმაღლეზეა და დაბა ხულოდან 6 კილომეტრითაა დაშორებული.

ვაშლოვნის თემი აერთიანებს სოფლებს: ქვემო და ზემო ვაშლოვანს, სხანდარას, ჩაოს, შურმულსა და თაგოს.

ტურისტული ბილიკის მშენებლობა სოფელ ჩაოში / ფოტო:ხულოს მერია

სამუშაოების შესყიდვაზე ტენდერი ხულოს მუნიციპალიტეტს 166 320 ლარით ჰქონდა გამოცხადებული.

ხულოს სოფელ ჩაოში 166 ათას ლარად გადმოსახედი – ახალი ტურისტული ადგილი მოეწყობა

ნეტგაზეთის მასალების სხვა გამოცემებში გადაბეჭდვის წესი
ავტორი