Batumelebi

შემოსავლების სამსახურის ცნობით, მიმდინარე წლის 22-25 აგვისტოს სარფის საბაჟოზე მებაჟე ოფიცრებმა ეჭვის საფუძველზე, უცხო ქვეყნის მოქალაქეების როგორც ფიზიკური ასევე, ბარგის/ხელბარგის დეტალური დათვალიერების შედეგად, მალულად განთავსებული დიდი ოდენობით არადეკლარირებული ოქროს (საერთო წონა: 402,08 გრამი) საიუველირო ნაკეთობები გამოავლინეს.

არადეკლარირებული საქონლის საერთო საბაჟო ღირებულებამ ჯამში 47 214,18 ლარი შეადგინა. აღნიშნულ საბაჟო-გამშვებ პუნქტზე, მებაჟე ოფიცრების მიერ კიდევ ერთი კანონდარღვევის ფაქტი გამოვლინდა – უცხო ქვეყნის მოქალაქეს საზღვარზე არადეკლარირებული 40 000 აშშ დოლარი და ოქროს საიუველირო ნაკეთობები (წონა: 328.46 გრამი) შემოჰქონდა.

უწყების ცნობით, კანონდამრღვევი მოქალაქეების საქმის მასალები, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.

პრემიერმა ირაკლი კობახიძემ ე.წ. დელეგატების წარდგენის შემდეგ თქვა, რომ საარჩევნოდ პარტიის ფანდრაიზინგი მას ევალება. ეს იგივეა, რაც არჩევნებზე პიარისთვის დასახარჯი ფულის შეგროვება. პრემიერმა განგვიმარტა ისიც, რომ „მთელ მსოფლიოში“ ასე ხდება.

შემოწირულობა ერთხელაც თუ გადაავლებთ თვალს, მიხვდებით, რომ აგვისტოში ყველაზე მეტი ფული პარტიისთვის ირაკლი კობახიძეს აჭარაში შეუგროვებია, ეს თანხა ნახევარ-მილიონზე მეტია. ერთი თვალის გადავლებით მიხვდებით იმასაც, რომ „ოცნების“ სასარგებლოდ ძირითადად ის იხდის, ვინც დიდ ფულს აკეთებს ტენდერებიდან, მშენებლობიდან და ასე შემდეგ.

აგვისტოს მონაცემებს თუ შევისწავლით, მათი უმეტესობა სამშენებლო კომპანიის მფლობელია.

8 აგვისტოს „ალიანს ჯგუფის“ დამფუძნებლის, გია ბიწაძის შვილმა, თემურ ბიწაძემ „ოცნებას“ 45 000 ლარი შესწირა, მმართველი პარტიის ანგარიშზე მან  გასული წლის ბოლოსაც გადარიცხა 40 000 ლარი. საერთო ჯამში საქართველოს პარლამენტის არჩევნებისთვის მმართველი პარტიის ანგარიშის შესავსებად თემურ ბიწაძემ 85 000 ლარი გაიღო. თემურ ბიწაძე თავადაც რამდენიმე სამშენებლო კომპანიის დამფუძნებელი, თანამფლობელი და ხელმძღვანელია.

იმავე დღეს „ოცნებას“ 58 000 ლარი შესწირა „ალიანსის“ ფინანსურმა დირექტორმა დავით ბალაძემ. 2023 წლის დეკემბერში კი მას „ოცნების“ ანგარიშზე 60 000 ლარი აქვს შეტანილი. დავით ბალაძე „ოცნების“ შემწირველია 2019 წლიდან, ამ დროიდან 2024 წლის ჩათვლით მან „ოცნებას“ 258 000 ლარი შესწირა.

დავით ბალაძე აჭარის ყოფილი ფინანსთა მინისტრია. ერთ-ერთი კომპანიის დირექტორად ზაურ ფუტკარაძის დანიშვნის შემდეგ ის მეორე ყოფილი მინისტრია, რომელიც „ალიანსისთვის“ მუშაობს.

8 აგვისტოს „ოცნების“ ანგარიშზე 58 000 ლარი შეიტანა „ალიანსის“ კიდევ ერთმა პარტნიორმა და თანამესაკუთრემ, ბესიკ ჟღენტმა. გასული წლის ბოლოს მან ასევე შესწირა „ოცნებას“ 60 000 ლარი. ბესიკ ჟღენტს „ოცნებისთვის“ თანხა 2020-2021 წლებშიც შეუწირია, ჯამში 120 000 ლარი.

2024 წლის 8 აგვისტოს „ოცნებას“ 60 000 ლარი შესწირა ზურა ნასყიდაშვილმა, ის შპს „ატმ – ანბანის კოშკის მენეჯმენტის“ ერთ-ერთი მფლობელი და დირექტორია, ამ კომპანიას ბათუმის ანბანის კოშკი მართვაში აქვს გადაცემული. ზურა ნასყიდაშვილი ხელმძღვანელობს შპს „მზიური დეველოპმენტს“, რომელმაც მახინჯაურში, ზღვასთან ახლოს მრავალფუნქციური კომპლექსი ააშენა. ის კიდევ რამდენიმე კომპანიის მფლობელი და თანამფლობელია.

„ოცნებას“ 60 000 ლარი შესწირა ბიზნესმენმა ჯუმბერ ზოიძემ. ის რამდენიმე სამშენებლო კომპანიის დამფუძნებელი და მფლობელია. მმართველ პარტიას 60 000 ლარი შესწირა მისმა პარტნიორმა თამაზ ბექაიამაც. 40 000 ლარი შესწირა ასევე  „ოცნებას“ ჯუმბერ ზოიძის კიდევ ერთმა პარტნიორმა დავით დუმბაძემ, ის შპს „ჯეილან ჯორჯიას“, შპს „ტექნიკ სერვისის“ და სხვა კომპანიების დამფუძნებელი და თანამფლობელია. ოცნებას 15 000 ლარი შესწირა ალექსანდრე ბაღათურიამ, ისიც ჯუმბერ ზოიძის პარტნიორია.

2 აგვისტოს ნუკრი დოლიძემ „ოცნებას“ 58 000 ლარი შესწირა. ის შპს „ბონდი 2009“-ის დამფუძნებელი და ერთ-ერთი მფლობელია. ეს კომპანია სახელმწიფო უწყებების მაღალბიუჯეტიან ტენდერებს იგებს. ნუკრი დოლიძე შპს „მონოლითი 2005“-ის და კიდევ რამდენიმე კომპანიის დამფუძნებელი და თანამფლობელია.

ის იყო ბათუმის 2007-2010 წლების საკრებულოს წევრი  „ერთიანი ნაციონალური მოძრაობიდან“. სწორედ ამ დროიდან იწყება მისი კომპანიების სახელმწიფო სტრუქტურებთან თანამშრომლობის ისტორიაც. მისი შვილი ლევან დოლიძე კი ბათუმის საკრებულოს წევრია „ოცნებიდან.“

„ოცნებას“ 60 000 ლარი შესწირა ბიზნესმენმა რამინ დავითაძემ, ლაშა ზოიძემ კი მმართველ პარტიის ანგარიშზე 50 000 ლარი შესწირა, ჯემალ და ომარ ბოლქვაძეებმა ოცნებას 25-25 000 ლარი შეწირეს.

„ოცნებას“ 60 000 ლარი შესწირა „ელთ ბილდინგის“ მფლობელმა ელგუჯა თურმანიძემ. მან ახალი ბულვარის მიმდებარედ რამდენიმე მასშტაბური სამშენებლო პროექტი დაასრულა, რამდენიმეს კი ახლა აშენებს.

25 ივლისს „ოცნებას“ 50 000 ლარი შესწირა თენგიზ პეტრიძემ, ბათუმის ყოფილი მერის, ყოფილმა მოადგილემ. ის ახლა გია ჭყონიას ერთ-ერთი კომპანიის დირექტორია.

თავად გია ჭყონიამ კი, რომელიც პრემიერ ირაკლი კობახიძის ინფორმაციით „ოცნების“ გამსვლელ სიაში იქნება, მმართველ პარტიას 2024 წელს 50 000 ლარი, გასული წლის ნოემბერში კი 60 000 ლარი შესწირა. საერთო ჯამში 2016 წლიდან დღემდე გიორგი ჭყონიას 460 000 ლარი აქვე შეწირული „ოცნებისთვის“.

გია ჭყონიამ 335-მილიონიანი შემოსავალი მიიღო ტენდერებიდან – მან მთავრობას ჩარტერი დაუფინანსა.

19 აგვისტოს ბიზნესმენმა გელა გაბაიძემ „ოცნებას“ 50 000 ლარი შესწირა, ის დიდი ხანია, რაც სამშენებლო ბიზნესშია. ის არის „ტერასა ბათუმის“, „ბლექ სი ტერასას“ და კიდევ რამდენიმე კომპანიის დამფუძნებელი და თანამფლობელი. გელა გაბაიძემ 60 000 ლარი „ოცნებას“ გასული წლის ნოემბერშიც შესწირა. 2021 წელს კი 10 000 ლარი შეუწირია მმართველი პარტიისთვის.

30 000 ლარი შესწირა „ოცნებას“ შპს ინსტრა-ბათუმის დირექტორმა დალი ჯიჯავაძემ. ის არის ასევე შპს ბლექ სი ფერის და კიდევ რამდენიმე კომპანიის თანამფლობელი და ხელმძღვანელი.

2023 წლის 7-8 დეკემბერს მმართველი პარტიის ანგარიშზე „ნოვას“ პარტნიორებმა საერთო ჯამში 300 000 ლარი შეიტანეს.

გასული წლის ბოლოს „ოცნებას“ 60 000 ლარი შესწირა აკაკი სონგულიამ, ისიც „ალიანსის“ პარტნიორია. 2011 წლამდე სონგულია საქართველოს ფინანსთა სამინისტროს შემოსავლების სამსახურის ფოთის რეგიონული ცენტრის უფროსის თანამდებობაზე მუშაობდა. „ალიანსში“ 2016 წლიდან გამოჩნდა. „ოცნების“ მხარდაჭერა კი ცოტა ადრე, 2014 წელსაც ფულადი შენატანით, 20 000 ლარით გამოხატა.

2023 წლის ბოლოს „ოცნებას“ თანხები „ალიანსის“ მენეჯმენტში დასაქმებულებმაც შესწირეს. გასული წლის დეკემბერში „ოცნებას“ 50 000 ლარი შესწირა მაგდანა ფეიქრიშვილმა, ის „ალიანსის“ გაყიდვების დეპარტამენტს ხელმძღვანელობს.

2021 წელს მან „ოცნებას“ თანხა ორჯერ, ჯამში 60 000 ლარი, ხოლო 2020 წელს 40 000 ლარი შესწირა. „ოცნებას“ 40 000 ლარი შესწირა სალომე სიხარულიძემ, ის „ალიანსის“ გაყიდვების უფროსი მენეჯერია. 2020-2021 წლებში სალომეს „ოცნების“ ანგარიშზე ჯამში 50 000 ლარი შეუტანია.

„ალიანს ჯგუფის“ დამფუძნებელი გია ბიწაძე „ოცნების“ აქტიური მხარდამჭერი და შემწირველია. 2014 წელს გიორგი ბიწაძემ „ქართულ ოცნებას“ 60 000 ლარი შესწირა.

შეფასებისა და გამოცდების ეროვნულმა ცენტრმა 2024 წლის ერთიანი ეროვნული გამოცდების საბოლოო შედეგები გამოაქვეყნა.

უწყების ცნობით, წელს უმაღლეს სასწავლებელში სწავლის გაგრძელების უფლება მოიპოვა 32 000-ზე მეტმა აბიტურიენტმა, რაც ჩარიცხვის უფლების მქონე გამოსაცდელების დაახლოებით 80%-ს შეადგენს.

2024 წელს დაფინანსდა 11 600-ზე მეტი გამოსაცდელი.

სახელმწიფო გრანტი მოიპოვა 6 500-ზე მეტმა აბიტურიენტმა.

აქედან – 100%-იანი სახელმწიფო გრანტი მიიღო 1 000-ზე მეტმა აპლიკანტმა, 70%-იანი – 1 400-ზე მეტმა გამოსაცდელმა, 50%-იანი გრანტი კი – 4 000-ზე მეტმა აბიტურიენტმა.

სახელმწიფოს მიერ დაფინანსებულ უმაღლეს საგანმანათლებლო პროგრამებზე ჩაირიცხა 5 000-ზე მეტი გამოსაცდელი. ქართულ ენაში მომზადების პროგრამებზე სწავლას – 1 600-მდე აპლიკანტი გააგრძელებს.

2024 წელს მთელი საქართველოს მასშტაბით სულ გახსნილი იყო 24 საგამოცდო ცენტრი. გამოცდებისათვის 80 000-მდე აპლიკანტი დარეგისტრირდა, მათ შორის – ერთიანი ეროვნული გამოცდებისათვის – 47 000-ზე მეტი აბიტურიენტი; სტუდენტთა საგრანტო კონკურსისათვის – 3 000-ზე მეტი სტუდენტი; საერთო სამაგისტრო გამოცდისათვის რეგისტრაცია 10 000-ზე მეტმა მაგისტრანტობის კანდიდატმა გაიარა, მასწავლებლის გამოცდაზე მონაწილეობის სურვილი კი 18 900-ზე მეტმა აპლიკანტმა გამოთქვა.

__________

ფოტო „ბათუმელების“ არქივიდან

სურსათის ეროვნული სააგენტოს ცნობით, სახელმწიფო კონტროლის ფარგლებში, ბათუმში, აგრარული ბაზრის მიმდებარე ტერიტორიაზე, შპს „ნთკ 2016-დან“ ხმელი სუნელის ნიმუშები აიღეს და გამოსაკვლევად სოფლის მეურნეობის სახელმწიფო ლაბორატორიაში გადააგზავნეს. სააგენტო იუწყება, რომ ხმელ სუნელში ტყვიის შემცველობამ შეადგინა 9323 მგ/კგ, რაც მნიშვნელოვნად აღემატება დასაშვებ ნორმას.

სააგენტოს ცნობით, ობიექტში არსებული სუნელი დაილუქა, ბიზნესოპერატორს აეკრძალა ხმელი სუნელის კონკრეტული პარტიის რეალიზაცია და დაევალა დასახელებული სურსათის ბაზარზე განთავსების შეჩერება, ბაზარზე უკვე განთავსებულის ამოღება და გამოთხოვილი სურსათის შესახებ სააგენტოს დაუყოვნებლივ ინფორმირება; ასევე, წარმოებისათვის/გადამუშავებისათვის გამოსაყენებელი ნედლეულის, ინგრედიენტის ან სხვა ნებისმიერი მასალის ლაბორატორიული ტესტირება ტოქსიკურობაზე (ტყვიის შემცველობაზე).

„ნთკ 2016-ის„ არაგეგმური სახელმწიფო კონტროლისას დადგინდა, რომ ხმელი სუნელის მწარმოებელი ბიზნესოპერატორია ინდივიდუალური მეწარმე (მისამართი: ქარელის რაიონი, სოფელი ზემო ხვედურეთი და ქ. გორი, ცხინვალის გზატკეცილი), ხოლო შპს „ნთკ 2016“ არის დამფასოებელი.

შესაბამისად, სააგენტოს შიდა ქართლის რეგიონული სამმართველოს უფლებამოსილმა პირებმა ინდმეწარმესთან არაგეგმური ინსპექტირება განახორციელეს. დადგინდა, რომ ბიზნესოპერატორი სრულყოფილად არ აწარმოებს ჩანაწერებს მიკვლევადობის შესახებ; დარღვეულია ეტიკეტირების წესი. მეწარმე დაჯარიმდა 500 ლარით, დაილუქა ხმელი სუნელი და მისი შემადგენელი ინგრედიენტები (ქინძი, უცხო სუნელი, ძირა, ყვითელი ყვავილი, კურკუმა), რომელთა ნაწილი წარმოებულია ინდმეწარმის მიერ, ხოლო კურკუმა იმპორტირებულია ინდოეთიდან.

ბიზნესოპერატორს დაევალა დალუქული ნიმუშების კვლევა აკრედიტებულ ლაბორატორიაში და ხმელი სუნელის რეალიზაციის აკრძალვა, ბაზარზე განთავსება, განთავსებული ამოღება და გამოთხოვილი სურსათის თაობაზე სააგენტოს დაუყოვნებლივ ინფორმირება“ – წერს სააგენტო.

ამავე თემაზე: 

ოთხი ქვეყანა: თურქეთი, რუმინეთი, ბულგარეთი და საქართველო იწყებს შავ ზღვაში მიტოვებული ან დაკარგული სათევზაო ბადეების ამოღებას, რომლებშიც დღემდე იხლართებიან და იღუპებიან შავი ზღვის ბინადრები. 

„BlackNETs – შავი ზღვის ჩუმი მკვლელების განდევნა“ შავი ზღვის აუზის ინტერრეგიონალური პროგრამაა ევროკავშირის დაფინანსებით, რომელშიც ოთხი ქვეყნის უნივერსიტეტი ერთიანდება. პროექტს ხელმძღვანელობს რუმინეთი, ხოლო პარტნიორები არიან: თურქეთის შავი ზღვის ტექნიკური უნივერსიტეტის საზღვაო მეცნიერებათა ფაკულტეტი; ბულგარეთის მეცნიერებათა აკადემიის ოკეანოლოგიის ინსტიტუტი და საქართველოს ილიას სახელმწიფო უნივერსიტეტის ეკოლოგიის ინსტიტუტი.

„ვინაიდან მიტოვებული სათევზაო აღჭურვილობა მიიჩნევა ზღვის ნაგვის ერთ-ერთ ყველაზე საშიშ ფორმად, მნიშვნელოვანია პრობლემის არა მხოლოდ მასშტაბის და ბუნების გაგება, არამედ შესაძლებელია თუ არა არსებული მართვის რეჟიმებით ამ რთულ საკითხზე რეაგირება.

დადასტურებულია, რომ მას აქვს მნიშვნელოვანი მავნე ზემოქმედება ზღვის ჰაბიტატებსა და აქ მობინადრე სახეობებზე (მათ შორის მრავალ საფრთხის წინაშე მყოფ სახეობაზე)” – ვკითხულობთ პროექტის აღწერაში.

პროექტის მიზანია, ერთობლივი ქმედებებით, რომლებიც განხორციელდება თითოეულ პარტნიორ ქვეყანაში, ამოღებულ იქნას სულ ცოტა 8000 კილოგრამი მიტოვებული სათევზაო ბადე შავი ზღვის წყლებიდან. 

პროექტის სამეცნიერო ხელმძღვანელი საქართველოში, ნათია კოპალიანი ამბობს, რომ საქართველოში ოთხი სამიზნე ლოკაციაა შერჩეული, საიდანაც, გეგმის მიხედვით, 2000 კგ. მიტოვებული სათევზაო ბადე უნდა იქნეს ამოღებული, თუმცა აქვე დასძენს, რომ ამის წინასწარი ზუსტი პროგნოზი შეუძლებელია.

„ძალიან ბევრი ცხოველი იხლართება ამ ბადეებში, დელფინებიც ამოგვიღია ასე გახლართული. გარდა ამისა, როდესაც ეს ბადე წყალშია, აგროვებს ათასგვარ ნაგავს, მათ შორის პლასტიკსაც, ხდება ნაგვის შემგროვებელი „ხელსაწყო“ . თუ ბადე დიდხანს არის წყალში და ხანგრძლივი დროის მანძილზე ხდება აქ ნაგვის შეგროვება, შეიძლება ამ პროცესმა გამოიწვიოს ეკოსისტემის თანდათანობითი დეგრადაცია.

სწორედ ამიტომ ამიტომ უკვე მთელ მსოფლიოში ძალიან სერიოზულ ყურადღებას აქცევენ მიტოვებული, მოწყვეტილი, დაკარგული ბადეების პრობლემას. სერიოზულად სწავლობენ რუმინეთში, თურქეთსა და ბულგარეთში. პრინციპში ჩვენთან ეს საკითხი საერთოდ არ იყო შესწავლილი. ჩვენ ვეშაპისნაირების ეკოლოგიას ვსწავლობთ, ანუ დელფინებისა და ზღვის ღორების ეკოლოგიას და ხანდახან თუ წავაწყდებოდით ხოლმე მიტოვებულ ბადეებს.

 ამ პრობლემაზე აქამდე არ გვიფიქრია, ახლა ვაპირებთ ამის კვლევას“ – ამბობს პროექტის სამეცნიერო ხელმძღვანელი.

ნათია კოპალიანის განმარტებით, რამდენიმე ჩაყვინთვა უნდა განხორციელდეს, რაშიც პროფესიონალი მყვინთავები და ილიაუნის თანამშრომლებიც ჩაერთვებიან, რომელთაც აქვთ ყვინთვის სერტიფიკატი.

„ბადეების ამოღების შემდეგ მოხდება მათში არსებული ორგანიზმების ამოღება, იდენტიფიკაცია რაღაც დონემდე მაინც; შემდეგ ამ ბადეების აწონა და დადგენა, თუ რა სახის ბადეა. ასევე, უნდა გამოვკითხოთ მეთევზეები, როგორც სათევზაო კომპანიების წარმომადგენლები, ასევე, ე.წ. მოყვარული მეთევზეები, რომლებიც სამოყვარულოდ თევზაობენ ხოლმე, თუ წასწყდომიან მოტივტივე ბადეებს, ან წყალში უნახავთ, ან თვითონ კარგავენ და რა პირობებში კარგავენ, რომელი ტიპის ბადეები უფრო იკარგება და ა.შ.“

ნათია კოპალიანი: ილიას უნივერსიტეტს აქვს თავისი საკვლევი გემი, რომელსაც აქვს სპეციალური ამწე. მყვინთავები უბრალოდ მოაბამენ ბადეებს ამწეს და ამწე ამოიღებს. გვაქვს სპეციალური მოწყობილობა, ე.წ. კალათა, რომელთა საშუალებით მოხდება მყვინთავების ჩაშვება. 

ოთხი ლოკაცია, სადაც ჩაყვინთა მოხდება, მონიტორინგის საფუძველზე შეირჩა.

„გვაქვს ჩანიშნული ადგილები სადაც გვხვდება ჩაგებული ბადეები მაღალი სიხშირით; ლოკაციები დაახლოებით განსაზღვრულია. სექტემბრის ბოლოს განხორციელდება ერთი დაზვერვითი ჩაყვინთვა, სადაც ვვარაუდობთ, რომ შეიძლება იყოს ბადეები.

ეს არის კოლხეთის ეროვნული პარკის საზღვაო აკვატორიის მახლობლად, ყულევთან, სადაც არის ჩაძირული გემი და შესაძლებელია აქ გროვდებოდეს ჩაძირული ბადეები. ორი ადგილი გვაქვს შერჩეული აჭარის სანაპიროსთან. პროექტში ჩართულია სამი მკვლევარი, ორი პროფესორი ილიას სახელმწიფო უნივერსიტეტიდან და ორი პროფესიონალი მყვინთავი; პროექტის კოორდინატორია სოფიო კიკნაველიძე“ – გვითხრა ნათია კოპალიანმა.

პროექტის თანახმად, შავი ზღვიდან რვა ტონა ძველი სათევზაო ბადეების ამოღება 2025 წლის დეკემბრისთვის უნდა დასრულდეს.

ავტორი: ნათია კაპანაძე

___

ყოველ დღე ჩემი პატარა წვლილი შემაქვს თავისუფლებისთვის ბრძოლაში – ამბობს მადონა ნოზაძე, 3 შვილის დედა, რომელიც უკვე ორი წელია აშშ-ში ცხოვრობს და ტაქსის მძღოლად მუშაობს:

„ალბათ, ყოველი მეორე ადამიანი ოცნებობს ამერიკაში ცხოვრებაზე. ოცნებობს ღირსეულ სამუშაო პირობებზე, ხარისხიან განათლებასა და ხელმისაწვდომ სამედიცინო სერვისებზე. ჩვენი ეს ოცნებები უკვე პასუხისმგებლობად იქცევა ხოლმე, როცა შვილები გვყავს. ამიტომაა, რომ მე და ჩემი მეუღლე  ცხოვრებისთვის უკეთესი გზების ძიებაში, სამი არასრულწლოვანი შვილით რვა ქვეყნის საზღვრების გადალახვის შემდეგ აღმოვჩნდით ამერიკაში.

ჩვენი ცხოვრების მთავარ მიზანს, შევქმნათ შვილების საუკეთესო მომავალი, ყველაზე რთული და საშიში გზის გადალახვით მივუახლოვდით.

თურქეთი, ესპანეთი, კოლუმბია, სან-სალვადორი, ნიკარაგუა, ჰონდურასი, გვატემალა, მექსიკა და ბოლოს ამერიკა – ეს იყო ერთთვიანი მგზავრობის ქრონოლოგია. მგზავრობის, რომელსაც მოგზაურობას ნამდვილად ვერ დავარქმევ.

აქ ორწლიანი ცხოვრების გამოცდილებით შემიძლია ვთქვა, რომ ამერიკა არის ქვეყანა, სადაც შრომა გიფასდება და შეგიძლია საუკეთესო განათლება აჩუქო შვილებს. დღეს ჩემს სამ შვილს ერთმანეთისგან განსხვავებულ საგანმანათლებლო რესურსებზე აქვთ წვდომა. მყავს ორი ბიჭი და ოთხი წლის პატარა გოგო.

უფროსი 19 წლისაა და უკვე სტუდენტია. მან სრული დაფინანსებით ჩააბარა სახელმწიფო კოლეჯში. მიუხედავად იმისა, რომ ამერიკაში საკმაოდ სოლიდურ თანხებთანაა დაკავშირებული განათლების მიღება, დაფინანსება შრომის და მონდომების მიხედვით ხდება.

ჩემს 11 წლის ბიჭს ე.წ „საშინაო დავალებას“ აძლევენ იმდენს, რომ არ დაისტრესოს და დავალება მაქსიმუმ 15 წუთში დაასრულოს. სკოლაში აქვს უფასო ორჯერადი კვება. პიცა, ჰამბურგერი, ქათამი შემწვარი, თევზი, შოკოლადის რძე, ნატურალური წვენი, ხილის ჯემი – ესაა მშობლებთან შეთანხმებული საბავშვო მენიუ ბაღსა და სკოლაში.

ახლა სასწავლო წელს ვიწყებთ, სასკოლო მზადება ქართული გაგებისგან განსხვავებულია, მხოლოდ ჩანთა და ტანსაცმელი უნდა შევარჩიოთ. წიგნებს, რვეულებს და ყველა სხვა საკანცელარიო ნივთებს სკოლაში დაგვახვედრებენ.

მე, როგორც 3 შვილის დედა, ამერიკას მეორე სამშობლოდ მივიჩნევ. ამ სახელმწიფომ უკვე მომცა ის, რაც ჩემმა ქვეყანამ ვერ შეძლო, სამწუხაროდ – აქ ჩემი შვილები ბედნიერ გარემოში იზრდებიან.

საქართველოში ძალიან ბევრს ვმუშაობდით მე და მეუღლე, თუმცა ჩვენი შემოსავალი საარსებო მინიმუმს უტოლდებოდა. უფრო ზუსტად რომ ვთქვა, ვარსებობდით და არ ვცხოვრობდით. აქ კი ვმუშაობთ და იმაზე მარტივად ვუმკლავდებით გამოწვევებს, ვიდრე ჩვენს სამშობლოში. აქ არ მეშინია ავად გახდომის, რადგან დაზღვევა წამლებსაც და ნებისმიერ ექიმთან ვიზიტს გვიფინანსებს. საქართველოში წამლების შეძენა და ექიმთან კონსულტაცია ფუფუნება გახდა.

დაახლოებით 4 წელი საბერძნეთში ვიცხოვრეთ და 3 წელი კვიპროსში გავატარეთ, ევროპაში ცხოვრებამ ძალიან ბევრი რამ მასწავლა. მაშინ მივხვდი, რომ ჩვენს ქვეყანას ევროკავშირი ჰაერივით სჭირდება განათლების ხელმისაწვდომობასთან ერთად, ევროპული სტანდარტი არის კიდევ ერთი დიდი სიკეთე – ხანდაზმული ადამიანების ღირსეული სიბერის შესაქმნელად.

ევროპასა და ამერიკაში ცხოვრების გამოცდილების შემდეგ, კიდევ უფრო მწვავედ განვიცდი ჩვენს ქვეყანაში არსებულ ყოფით პრობლემებს – გაზრდილ ფასებს, განათლების ხარვეზებს, დაბალ შემოსავლებს, ჯანდაცვაზე ხელმიუწვდომლობას, არაღირსეულ სიბერეს.

ამიტომ ვაპირებ არჩევნებში მონაწილეობასაც. ეს პროცესი ჩემთვის განათლებასა და გაუნათლებლობას შორის არჩევანს უტოლდება. მე ვირჩევ ცხოვრების ევროპულ ხარისხს რუსული რეალობის ნაცვლად.

მე ვირჩევ თავისუფლებას და მინდა ჩვენი მომავალი თაობა თავისუფალი იყოს რუსული გავლენისგან. 38 წლის ვარ და უკვე ორი ომის რეალობით ვიცხოვრე. ორივე რუსეთისგან იყო.

ახლა ამერიკაში ტაქსის მძღოლი ვარ, ავტომობილში ჩვენი ქვეყნის დროშა ჩემი მგზავრების ინტერესს იწვევს. „რუსეთთან რომ არის მეზობლად, ეს ის საქართველოა ხომ?“ – ესაა ჩვენი ცნობადობის მთავარი ხაზი. ყველას ვუხსნი, რომ რუსეთი საქართველოს მტერია, რომ ჩემი ქვეყნის 20% ოკუპირებული აქვს და რუსეთი ოკუპანტია. ასე მგონია, ყოველ დღე ჩემი პატარა წვლილი შემაქვს თავისუფლებისთვის ბრძოლაში. ვცდილობ, ქართველი ხალხის ხმა მივაწვდინო სამყაროს.

არჩევნების დემოკრატიულად ჩატარება ქართველი ხალხის გამარჯვების ტოლია. ადამიანებმა თავისუფალ გარემოში უნდა მიანიჭონ ძალაუფლება პოლიტიკოსებს. ხალხს აქვს თავისუფლება აკონტროლოს და უკარნახოს პოლიტიკურ ძალას თავისი საჭიროებები, როგორც ეს ამერიკაში ხდება.

ქართველ ქალებს, დედებსა და ბავშვებს მინდა მივმართო: არასოდეს თქვათ უარი თავისუფლებაზე, არასოდეს არ დაკარგოთ უკეთესი ცხოვრების შექმნის ინტერესი. ყოველთვის გააკეთეთ თავისუფალი არჩევანი.

ავტორი: ნათია როყვა

___

შორენა ლომთაძე პროფესიით განათლების მეცნიერებათა დოქტორია და საქართველოში სხვადასხვა უნივერსიტეტში ასწავლიდა. შორენა ბოლო 8 წელია ამერიკაში ცხოვრობს, მაგრამ საქართველოში მიმდინარე პოლიტიკურ პროცესებში ყოველთვის ჩართულია: მაგალითად, ბოლო ერთ კვირაში 60-ზე მეტ ადამიანს დაეხმარა, არჩევნებში ხმის მისაცემად დარეგისტრირებაში და ასზე მეტი ადამიანი გადაამოწმა არიან თუ არა საარჩევნო სიაში.

•  შორენა, ბოლოს გნახეთ შვილთან ერთად, ნიუ იორკში,  გაეროს შენობასთან აქციაზე, სადაც  რუსულ კანონპროექტს აპროტესტებდით, თქვენ რა საშიშროებას ხედავთ ამ კანონში?

შევეცდები ავხსნა, მე რატომ ვხედავ საფრთხეს: ჯერ კიდევ 2012 წელს რუსეთის ხელისუფლებამ მიიღო კანონი უცხოელი აგენტების შესახებ. ბუნებრივია, ისმის კითხვა, რატომ? ამბობენ, რომ ,,გამჭვირვალეობისთვის” და ,,სახელმწიფოს უსაფრთხოებისთვის“. სხვათა შორის, ჩვენი ხელისუფლებაც იმავეს გვიმტკიცებს.

გავიაზროთ, როგორი ტიპის  სახელმწიფოა რუსეთი? – პასუხი  ცალსახაა, ავტორიტარული, სახელმწიფო ძალაუფლება კონცენტრირებულია ერთი პირის, პუტინის ხელში. მისი მთავარი მიზანია გაიხანგრძლივოს მმართველობა.

მაშასადამე, რუსული მთავრობისათვის, კანონი უცხოური აგენტების შესახებ არის  საშუალება, დაასუსტოს სამოქალაქო საზოგადოება, რომელიც  ორიენტირებულია მოქალაქეთა უფლებების, თავისუფლების დაცვაზე, სახელმწიფოს მხრიდან ჩადენილი უკანონობის სააშკარაოდ გამოტანაზე.

2012 წლიდან დღემდე, რუსეთში, აღნიშნული კანონის ძალით, დაიხურა დამოუკიდებელი მედიები, არასამთავრობო ორგანიზაციები.

გარდა ამისა, აგენტის სტატუსი მიენიჭა ყველა იმ მოქალაქეს, ვისაც რაიმე სახით შეხება ჰქონდა ამ ორგანიზაციებთან: თანამშრომლებს, დამფუძნებლებს, მენეჯერებს, უბრალოდ მოქალაქეებს, ვინც რაიმე ტიპის მომსახურეობა მიიღო.

უცხოური აგენტის სტატუსმინიჭებულ მოქალაქეებზე დაწესდა შეზღუდვები. მაგალითად, ასეთები სტატუსის შემდეგ, ვერ იმუშავებენ პედაგოგებად განათლების სისტემაში. შეუძლებელი ხდება საზღვარგარეთ განათლების მიღება და სხვა.

ფაქტობრივად, რუსული კანონის საცეცები შეეხო ყველას და ქვეყანაში სრული დიქტატურა დამყარდა.

მაშინ, როცა „რუსული გამოცდილება“ ხელისგულზე დევს,  ჩვენი ხელისუფლების მიერ რუსული კანონპროექტის საქართველოში ამოქმედება მთლიანად მიმართულია მმართველობის გახანგრძლივებისაკენ. შესაბამისად, ავტორიტარული რეჟიმის  განმტკიცებისკენ. 

თუმცა, ბიძინა ივანიშვილმა და მისმა მარიონეტმა მთავრობამ ვერ გაითვალისწინა, რომ  ქართველი ხალხის მოტყუება შეუძლებელია. საზოგადოება საკადრის პასუხს გასცემს მათ არჩევნებზე. დიახ, „არა ავტორიტარიზმს“, „არა რუსულ კანონს“, „კი ევროპას“.

•  რატომ ირჩევთ ევროპას და ამერიკას? 

მარტივია არჩევანის გაკეთება ცუდსა და კარგს შორის. რატომ არა რუსეთს და კი ევროპას? შევეცდები გამოვყო ერთი მიზეზი მრავალთაგან.

რუსეთს ოკუპირებული აქვს ჩვენი ქვეყნის ოცი პროცენტი. აწარმოებს ომს უკრაინაში. ანადგურებს ათასობით ადამიანის სიცოცხლეს, მათ შორის, ჩადენილი აქვს ბავშვების სასტიკი მკვლელობები.

ამერიკა და ევროპა ზრუნავენ ადამიანების განვითარებაზე, განათლების ხელმისაწვდომობაზე, ხარისხიან ჯანდაცვაზე, ეკოლოგიაზე. ქვეყნებს შორის თანამშრომლობაში კი მოიაზრება თანასწორობასა და ერთმანეთის პატივისცემაზე დამყარებული საქმიანი ურთიერთობები.

ასეთი ტიპის ურთიერთობები ნებისმიერი ქვეყნისთვის განვითარების საფუძველია. ოკუპაცია გამორიცხავს მშვიდობიან თანამშრომლობას, თანასწორობას, თავისუფლებას და, მაშასადამე, განვითარებას. ამიტომაც  ვირჩევ ევროპას და ამერიკას.

• რა მოლოდინები გაქვთ არჩევნებისგან?

„ქართული ოცნების“ მცდელობა, გადააქციოს არჩევნები ფარსად, კრახით დასრულდება.

საქართველოს მოსახლეობა არასოდეს დათმობს თავისუფლებას, არ გახდება მორჩილი, არ იტყვის უარს საკუთარ უფლებებზე, არ შეეგუება სტაგნაციას, არ დაუშვებს ავტოკრატიის განმტკიცებას სახელმწიფოში. ეს დაადასტურა „რუსული კანონის“ მიღების პარალელურად გამართულმა მრავალრიცხოვანმა საპროტესტო მსვლელობებმა, როგორც ქვეყნის შიგნით, ასევე ქვეყნის გარეთ.

მე მჯერა ჩვენ გავხდებით ევროპული ოჯახის სრულუფლებიანი წევრი.

• როგორ ემზადებით არჩევნებისთვის ამერიკაში მცხოვრები ემიგრანტები? 

განსაკუთრებით დიდ იმედს მაძლევს ემიგრანტების აქტიურობა არჩევნებში მონაწილეობის მისაღებად.

მე, სხვა ემიგრანტებთან ერთად, მესამედ ვმონაწილეობ წინასაარჩევნო სამზადისში. ბატონმა რევაზ ბეროზაშვილმა შექმნა პლატფორმა „,თაობები ქვეყნისათვის“, რომლის მიზანია დიასპორებისაგან ძლიერი სამოქალაქო საზოგადოების შექმნა.

ამ პლატფორმამ საშუალება მოგვცა სხვადასხვა ქვეყნის ემიგრანტებს, ყოველდღიურ კონტაქტზე ვიყოთ ერთმანეთთან. ვეხმარებით ემიგრანტებს გაიარონ  რეგისტრაცია საკონსულო აღრიცხვაზე, მოხვდნენ საარჩევნო სიებში და შეძლონ ხმის მიცემა.

გარდა ამისა, მზადდება მოთხოვნები დამატებითი საარჩევნო უბნების გახსნისათვის იმ ლოკაციებზე, სადაც ემიგრანტთა დიდი რაოდენობა ცხოვრობს. ყველამ უნდა შეძლოს არჩევნებში მონაწილეობა.

თუ მთავრობამ უარი განაცხადა დამატებით უბნების გახსნაზე, ეს იქნება  ამომრჩევლის კონსტიტუციური უფლების დარღვევა, რაზეც შესაბამისი რეაგირება მოხდება.

ამ საკითხზე  ხშირად გვაქვს პირდაპირი ჩართვები, როგორც საქართველოს ოპოზიციური სპექტრის წარმომადგენლებთან, ასევე ევროპარლამენტარებთან. ჩვენ, ქართველი ხალხი აუცილებლად გავიმარჯვებთ თავისუფლებისთვის ბრძოლაში. ჩვენ ქვეყანას ასე იოლად არ დავთმობთ.

შეკვეთილში, ზღვის სანაპიროზე, სასტუმრო „პარაგრაფის“ გვერდით შპს „ვი არ შეკვეთილი რესორტი“ მრავალფუნქციური ტურისტული კომპლექსის მშენებლობას გეგმავს. კომპანიამ  სანაპიროზე 40 ჰექტარი გამწვანებული ფართობი დაირეგისტრირა საკუთრებაში.

შპს „ვი არ შეკვეთილი რესორტის“ ასივე პროცენტი შპს „ვი არ ლისის“ საკუთრებაა. ამ კომპანიას კი, რუსული კანონის მხარდამჭერი ბიზნესმენი, ოფიციალურად ნოშრევან ნამორაძე ფლობს. თუმცა, შეკვეთილში არავის სჯერა, რომ საკუთარი სასტუმროს გაგრძელებაზე „ქვიშიან სანაპიროს მრავალწლიანი ფიჭვების ტყით, ბიძინა ივანიშვილი ვინმეს დაუთმობს.“

ამ ეჭვებს მეტი დამაჯერებლობისთვის დაამატეს ისიც, რომ „ვი არ შეკვეთილი რესორტის“ მფლობელი ნოშრევან ნამორაძე პირველად არ დაინტერესებულა ბიძინა ივანიშვილის პროექტის მიმდებარედ არსებული მიწის ნაკვეთით. „ეს შემთხვევით არ ხდება, ხალხი სულელი ნუ ჰგონიათ მაგათ“, – ამბობენ შეკვეთილში.

შპს „ვი არ შეკვეთილი რესორტის“ საკუთრებაში არსებული ნაკვეთების ჯამური ფართობი 473 468 კვ.მეტრია. საპროექტო ტერიტორიის სამეზობლო მიჯნა ერთ მხარეს „სასტუმრო პარაგრაფს“ ესაზღვრება და კერძო დასახლებამდე ერთი დიდი მწვანე ფართობია. ჰორიზონტალურად საპროექტო ნაკვეთებს ზღვა და ქვიშიანი პლაჟი, ზედა ნაწილში კი სამანქანო გზა მიუყვება.

მიმდებარედ არის „ბლექ სი არენა“, დენდროლოგიური პარკი, მუსიკალური პარკი, მინიატიურების პარკი, ციცინათელას პარკი. ექვსივე მათგანი ბიძინა ივანიშვილის კომპანიების პროექტებია. „ბლექ სი არენა“ მუსიკოსთა პარკთან, ასევე მინიატიურების პარკთან ერთად და ციცინათელა, რამდენიმე წლის წინ მან სახელმწიფოს გადასცა. მიწის ნაკვეთების ნაწილი, რაც „ბლექ სი არენას სარგებლობაშია“ კომპანიამ სახელმწიფოსგან უსასყიდლოდ მიიღო. კომპანიის სამართავად ბიუჯეტიდან მილიონობით ლარი იხარჯება დღემდე.

ცოტა ხნის წინ Black Sea Arena-ს მართვის უფლება კულტურის სამინისტროს ჩამოერთვა და მთავრობის ადმინისტრაციას გადაეცა. 

სასტუმრო „პარაგრაფი“ და მიმდებარედ არსებული მნიშვნელოვანი ინფრასტრუქტურა, ბიძინა ივანიშვილის საკუთრებაა და ეს ახალი ამბავი არ არის. „პარაგრაფის“ მფლობელი, შპს „ბლექ სი რიზორთსი“ 2014 წელს ოფშორულ ზონაში, პანამაში დააფუძნეს. მისი დაფუძნების დღიდან კომპანიას გრიგოლ ლილუაშვილი ხელმძღვანელობდა. ახლა ლილუაშვილი სახელმწიფო უსაფრთხოების სამსახურის უფროსია. მალევე კომპანია „ოლდ სითი დეველოპმენტზე“ გადააფორმეს. ეს კომპანია შპს „საქართველოს ტურიზმის განვითარების ფონდის“ საკუთრებაა, ფონდი „ქართუს“ ეკუთვნის.

შპს „ბლექ სი რიზორთში“ გრიგოლ ლილუაშვილი კომპანიის დაფუძნებიდან მალევე ირაკლი ქარსელაძემ ჩაანაცვლა. ის ახლა საქართველოს რეგიონული განვითარებისა და ინფრასტრუქტურის მინისტრია, მისი წასვლის შემდეგ კი კომპანიის დირექტორი შოთა ხიზანიშვილი გახდა.

არც ბიზნესმენ ნოშრევან ნამორაძის „ოცნებასთან“ კავშირია ახალი ამბავი. ის „ოცნების“ მხარდამჭერი და შემწირველია. ნამორაძემ არაერთხელ გამოხატა მადლიერება „ოცნების“ და მისი მთავრობის მიმართ „ჯანსაღი მიდგომისა და ხელშეწყობისთვის კერძო სექტორისა და ბიზნესისთვის.“  მთავრობისა და განსაკუთრებით ბიძინა ივანიშვილის წვლილს მან შეკვეთილში დაგეგმილი პროექტის პრეზენტაციაზეც გაუსვა ხაზი. 

ნამორაძის სამშენებლო კომპანიებმა, პროტესტისა და წინააღმდეგობის ფონზე ნებართვები მიიღეს მასშტაბურ პროექტებზე თბილისში, თაბორის მთაზე, კრწანისში და სხვაგან.

2023 წლის სექტემბერში ბიზნესმენი ნოშრევან ნამორაძე ირაკლი კობახიძესთან და პარლამენტარ ნინო წილოსანთან ერთად, ინგლისურენოვანი ჟურნალის, „გლამურ საქართველოს“ ახალი ნომრის გადაღებებზე გამოჩნდა. ეს ჟურნალი ძირითადად რეკლამაზე მუშაობს.

მანამდე ნამორაძის ყოფილ პრემიერთან, ირაკლი ღარიბაშვილთან დაახლოებაზეც საუბრობდნენ. ბიზნესმენის მეუღლემ ტელეკომპანია „პირველთან“ არ დაადასტურა, თუმცა არც უარყო, რომ ყოფილი პრემიერი მათი შვილის ნათლიაა. ნამორაძის კომპანიის ერთ-ერთი პროექტის – „კრწანისი რესორტ რეზიდენსის“ პრეზენტაციას ყოფილი პრემიერი ირაკლი ღარიბაშვილი და თბილისის მერი კახა კალაძე ესწრებოდნენ.

ნამორაძის გავლენებზე კარგად იციან შეკვეთილში, მისმა კომპანიებმა არაერთი სამშენებლო ნებართვა მიიღეს თბილისში, რასაც საზოგადოების უკმაყოფილება და პროტესტი მოჰყვა. თუმცა ამბობენ, რომ მისი პროექტი, სინამდვილეში ივანიშვილის პროექტია და პარაგრაფთან ახლოს ახალი სასტუმრო კომპლექსის ასაშენებლად 40 ჰექტარზე მშენებლობას ბიძინა ივანიშვილი არავის დაანებებდა დაგეგმილი პროექტი მისი რომ არ იყოს:

„ეს ყველაფერი ფორმალობაა. ნამორაძეა თუ ვინ, ჩვენ არ ვიცით, მაგრამ მფლობელი ივანიშვილი იქნება“. 

კომპანია არ მალავს, რომ პროექტის განხორციელებას „საქართველოს ტურიზმის განვითარების ფონდთან“ [ეს კომპანია „ქართუს“ ეკუთვნის] თანამშრომლობით, Paragraph-ის ბრენდის მოთხოვნების და გამოცდილების გათვალისწინებით გეგმავს. მხარეებმა ურთიერთთანამშრომლობის მემორანდუმიც გააფორმეს. პროექტს კი „VR Shekvetili Forest – Beach | By Paragraph“ დაარქვეს. 

შეკვეთილს რომ დავუბრუნდეთ – ნაკვეთები ზღვის სანაპიროზე, შეკვეთილის ფიჭვნარში ნოშრევან ნამორაძის კომპანიას ძირითადად 2023 წელს შეუსყიდია, რამდენიმე მათგანი უფრო ადრეც. საჯარო რეესტრის მიხედვით, მათი გამყიდველი საქართველო-რუსეთის ორმაგი მოქალაქეობის მქონე ბიზნესმენი ზურაბ სომხიშვილია. ეს ნაკვეთები მის სახელზე 2003 წლიდან ფიქსირდება. სომხიშვილს თანამესაკუთრეებთან ერთად დაუფუძნებია შპს „გავრიონი“, სადაც წილების 80 პროცენტს თავად ფლობს. დოკუმენტების მიხედვით, ამ კომპანიას 2016 წელს მიღებული აქვს მიწისქვეშა მტკნარი წყლის მოპოვების ლიცენზია ოზურგეთის მუნიციპალიტეტში, სოფელ მერიის მიმდებარე ტერიტორიაზე.

დოკუმენტის თანახმად, პირველ ეტაპზე იგეგმება საინჟინრო ქსელისა და საპროექტო გზების, ასევე საპროექტო ღობეების მოწყობა, სასტუმროს ტიპის მრავალბინიანი საცხოვრებელი სახლისა და საპროექტო დასასვენებელი საცხოვრებელი სახლების მშენებლობა.

პროექტი მოიცავს სხვადასხვა ტიპის საცხოვრებლებს, ვილებს, საცხოვრებლებსა და სასტუმროს, აუზს, სპასა და ველნეს ცენტრს, ავთენტურ და სხვადასხვა ქვეყნის ტრადიციულ რესტორნებს, ღია და დახურულ სპორტულ მოედნებს, გასართობ და რეკრეაციულ სივრცეებს.

„ვი არ შეკვეთილის“ პროექტის პრეზენტაცია „პარაგრაფში“ გამართეს, პრეზენტაციას მოწვეულ სტუმრებთან ერთად, მთავრობის წევრები, მინისტრები და ვიცე-პრემიერი ლევან დავითაშვილი ესწრებოდნენ, პრეზენტაციაზე პირველი სიტყვა სწორედ მას მისცეს.

ლევან დავითაშვილმა „ვი არ ჰოლდინგის“ პროექტს შეკვეთილის განვითარების მეორე ეტაპი უწოდა და „პარაგრაფის“ მიერ დანერგილ „მაღალ სტანდარტზეც“ ისაუბრა. შეხვედრას დაესწრო და სიტყვით გამოვიდა ასევე „ტურიზმის განვითარების ფონდის“ ხელმძღვანელი კახა ბაინდურაშვილი, თავად ნოშრევან ნამორაძემ კი განსაკუთრებული მადლობა გადაუხადა ბიძინა ივანიშვილს და მთავრობას. ამ შეხვედრაზე ხელი მოაწერეს ურთიერთთანამშრომლობის მემორანდუმს.

შპს „ტურიზმის განვითარების ფონდი“ საქართველოს თანაინვესტირების ფონდმა დააფუძნა. ფონდის შექმნიდან მალევე გავრცელდა ინფორმაცია, რომ „ტურიზმის განვითარების ფონდმა“ თბილისში, გურიაში, აჭარასა და სამეგრელოში 680 მილიონი დოლარის ღირებულების 8 მასშტაბური პროექტი უნდა განახორციელოს.

პროექტები თანაინვესტირების ფონდმა წამოიწყო და ახალშექმნილ ფონდს გადააბარა, რადგან მათი განცხადებით, პროექტების სიმრავლე მოითხოვდა მიზნობრივი ფონდის ცალკე არსებობას. ტურიზმის განვითარების ფონდის ხელმძღვანელად თანაინვესტირების ფონდის სამეთვალყურეო საბჭოს თავმჯდომარე ირაკლი ქარსელაძე დაინიშნა [ახლა ის საქართველოს ინფრასტრუქტურის მინისტრია].

პროექტების ჩამონათვალი ნახეთ აქ. 

• თაბორის მთა – ბიძინა ივანიშვილის კომპანიის პროექტის მიმდებარედ, აქაც ნოშრევან ნამორაძემ გამოხატა ინტერესი

2022 წელს თბილისის მერიამ ივანიშვილის პროექტის – „პანორამა თბილისის“ მიწის ნაკვეთების მიმდებარედ მთავრობას უსასყიდლოდ გადასცა ტერიტორია თაბორის მთაზე სამომავლოდ მისი საინვესტიციოდ გასხვისების მიზნით – 2 მილიონი კვ.მეტრი [200 ჰექტარი]. ამის პარალელურად ცნობილი გახდა, რომ ამ ნაკვეთის შესყიდვით ნოშრევან ნამორაძე იყო დაინტერესებული.  გასხვისებამდე ამ ნაკვეთს სტატუსი პროტესტის ფონზე შეუცვალეს – ტერიტორიას სატყეო ზონის სტატუსი ჰქონდა და იქ მშენებლობა იკრძალებოდა, რაც საკრებულოს გადაწყვეტილების შემდეგ დასაშვები გახდა.

ბიძინა ივანიშვილის კომპანია „თაბორი რიზორთსი“ თაბორის მთაზე რამდენიმე კომპლექსს აშენებს. „პანორამა თბილისის“ პროექტების მშენებლობას წლების განმავლობაში საზოგადოების ნაწილი აპროტესტებდა. პროექტი თაბორის მთაზე, ბოტანიკური ბაღის მიმდებარედ 80-ნომრიანი სასტუმროს, გოლფის მოედნების, გოლფ-კლუბისა და სარეკრეაციო ზონის მოწყობას მოიცავდა.

2022 წლის დეკემბერში ნოშრევან ნამორაძის კომპანიამ შპს „ვი არ ვაკე თაუერსმა“ თბილისში, ვაკეში, ჭავჭავაძის 49-ში არსებული სპორტის უნივერსიტეტი და მის ირგვლივ არსებული მიწა იყიდა. ქონების საწყისი ფასი 10 მლნ ლარი იყო, ბიჯი კი მხოლოდ 20 000 ლარი. 18 019  კვ.მ მიწის ნაკვეთი იმ პირობით გაიყიდა, რომ მყიდველი მიწის ნაკვეთის ერთ ნაწილს – 7374 კვ.მ.-ს კეთილმოაწყობდა, გაარემონტებდა სპორტის უნივერსიტეტის შენობას, სპორტულ დარბაზებს და სახელმწიფოს გადასცემდა.

2022 წლის სექტემბერში კულტურისა და სპორტის მინისტრმა თეა წულუკიანმა პარლამენტში სიტყვით გამოსვლისას თქვა, რომ 2025 წლისთვის საქართველოს სპორტის ახალი უნივერსიტეტი ექნებოდა და ის ჭავჭავაძის გამზირზე, იმავე ტერიტორიაზე აშენდებოდა, სადაც ახლა ავარიული შენობა იდგა.

გაყიდული მიწის ნაკვეთი 2 ნაწილად გაიყო, ერთ ნაწილზე კომპანიამ საინვესტიციო პროექტი „VR Vake Skyview Tower“ თბილისის  მერიას შეათანხმა.

გასულ კვირას კომპანიამ ამ პროექტის კოეფიციენტის გაზრდა მოითხოვა. ოპოზიციონერი დეპუტატების ინფორმაციით, მოთხოვნა დაუკმაყოფილეს.

ნამორაძის კომპანია „კრწანისი რესორტ რეზიდენსი” თბილისის ისტორიულ ნაწილში, კრწანისში 20 ჰექტარ ფართობზე მრავალფუნქციურ კომპლექსებს აშენებს, ვილების ნაწილი კი დასრულებული აქვს.

სამშენებლო საქმიანობისა და „ოცნების“ ღია მხარდაჭერის გარდა, ბიზნესმენი ნამორაძე რამდენიმე გახმაურებული ამბით არის ცნობილი. ის ბიზნესმენ დავით კოდუას ცემის ბრალდებით იყო დაკავებული. საქმის მასალების მიხედვით, კოდუას ნოშრევან ნამორაძე შურისძიების მოტივით გაუსწორდა. ნამორაძეს აღმკვეთი ღონისძიება არასაპატიმრო ღონისძიებით შეუცვალეს.

ის სასამართლო დარბაზიდან 50 000 ლარის გირაოს სანაცვლოდ გაათავისუფლეს. მაშინ ნამორაძემ თქვა, რომ ეს აგრესია პირადი შურისძიებით იყო ნაკარნახევი, რადგან წინა მთავრობის დროს მისი ოჯახი ცუდ მდგომარეობაში აღმოჩნდა და ეს მასზეც გავრცელდა.

მაშინ სასამართლომ დააკმაყოფილა ადვოკატის მოთხოვნა და აღმკვეთი ღონისძიება – პატიმრობა ბრალდებულს შეუცვალა არასაპატიმრო ღონისძიებით. ერეკლე კოდუას ძმა, ბიზნესმენი დავით კოდუა 4 წლის შვილთან და ძიძასთან ერთად იმყოფებოდა, როცა სცემეს და სახის არეში მრავლობითი დაზიანებები მიაყენეს.

ნოშრევან  ნამორაძე რუსული კანონის მხარდამჭერია:

„… რაც შეეხება გამჭვირვალობის კანონის ირგვლივ მიმდინარე დისკუსიებს, აუცილებელია გამჭვირვალობისა და კარგი მმართველობის აღიარება, როგორც ფუნდამენტური საყრდენი, რომელიც ეხმიანება ევროპულ ღირებულებებს. ეს ეთოსი სცილდება ბიზნეს სექტორს და მოიცავს საზოგადოების ყველა ასპექტს. გამჭვირვალობა აუცილებელია ყველა სექტორში. ჩვენ არ შეგვიძლია უგულებელვყოთ ფარული უცხოური დაფინანსების მავნე გავლენა სასიცოცხლო მნიშვნელობის პროექტებზე, რომლების „გაუქმება ან გადადება“ ხელს უშლის ჩვენი ქვეყნის პროგრესს“, – ეს ამონარიდია ნოშრევან ნამორაძის ტექსტიდან, რომელიც მან სოციალურ ქსელში გამოაქვეყნა.

დაღუპვის ერთი შემთხვევა, კიდურის ამპუტაცია, თავის ქალის მძიმე ტრავმები, სხვადასხვა სახის მძიმე თუ მსუბუქი დაზიანებები – ეს ის ჩამონათვალია, რომელიც სულ ცოტა, ბოლო ორი განმავლობაში მიიღეს ბათუმის ზღვაში დამსვენებლებმა.

ტურისტების თქმით, ზღვაში შესვლის დროს ისინი თავს უსაფრთხოდ ვერ გრძნობენ, რადგან საზღვაო ტრანსპორტი საცურაო ზოლთან ახლოს მოდის, რაც იწვევს ზღვაში მყოფი ადამიანების დაზიანებას. ბოლო პერიოდში მინიმუმ ორი შემთხვევა იყო, როცა მძღოლის გარეშე მოძრავმა კატერმა და სკუტერმა დამსვენებლებს საფრთხე შეუქმნა.

ერთ შემთხვევაში სკუტერი ნაპირზე შევარდა, მეორე შემთხვევაში კი მძღოლის გარეშე დარჩენილი კატერი ზღვაში მოძრაობდა, რაც საფრთხეს უქმნიდა ირგვლივ მყოფ პირებს.

„ბათუმელები“ ორ კლინიკას ესაუბრა და ჰკითხა, რამდენი პაციენტი მიიღეს ზღვის ტრანსპორტისგან მიღებული დაზიანებებით?

კლინიკა BMC-ში, სულ სამ მძიმე შემთხვევას იხსენებენ, როცა დაშავებული ადამიანების გადარჩენა ძლივს მოხერხდა.

„სადღაც ივნის-ივლისის პერიოდში იყო 3 შემთხვევა. ერთი იყო უცხოელი ტურისტი, რომელსაც კატერი შეეჯახა და ძალიან მძიმედ იყო, ძლივს მოხერხდა მისი გადარჩენა.

მეორე დაშავებული იყო ახალგაზრდა ბიჭი, რომელიც სერფინგის დაფაზე იდგა და „ბანანმა“ ისე სწრაფად მოუხვია, რომ თოკი მოხვდა სახეში და მიიღო ისეთი მძიმე დაზიანება, რომ მის გადარჩენასაც არ ველოდებოდით. მესამე შემთხვევაშიც დაშავებული იყო ახალგაზრდა ადამიანი, რომელსაც ასევე დასჭირდა ქირურგების ჩარევა“, – გვეუბნებიან კლინიკაში.

ბათუმის რესპუბლიკურ საავადმყოფოში კი სულ ცოტა 10 შემთხვევაზე გვესაუბრებიან.

„ზღვის სანაპირო ზოლიდან მოყვანილი პაციენტების დაზიანებებიდან, ორი იყო ყველაზე მძიმე. ერთ-ერთი დაშავებული იყო უცხოელი ტურისტი, რომელსაც თავის ქალა-ფუძის ტრავმა ჰქონდა და სამი დღეა, რაც გაეწერა საავადმყოფოდან. მეორე შემთხვევაში, მძიმე ტრავმა მიიღო საქართველოს მოქალაქემ, ახალგაზრდა კაცი იყო, რომელსაც დასჭირდა კიდურის ამპუტაცია.

სხვა იყო შედარებით მსუბუქი ტრავმები. მაგალითად მხრის ამოვარდნა, მოტეხილობა, დაჟეჟილობები“, – ამბობს გადაუდებელი მედიცინის ექიმი, ჯუმბერ ბოლქვაძე.

„ბათუმელები“ ზღვის სანაპიროზე დამსვენებლებს და ადგილობრივებს ესაუბრა და ჰკითხა, მათი აზრით, რამდენად დაცულია სანაპირო ზოლზე უსაფრთხოება და თავად თუ გრძნობენ უსაფრთხოდ თავს, ზღვაში ცურვის დროს.

ანანო ჯანელიძე, რომელიც ერთი კვირაა რაც ბათუმში ისვენებს, ამბობს, რომ პირადად მას რაიმე ინციდენტი არ ჰქონია, თუმცა დაუნახავს, როგორ დაეჯახა „ბანანი“ ნაპირზე მყოფ გოგონას.

„ნაპირზე როცა შემოვიდა „ბანანი“, მაშინ მოხვდა მისი კიდე თავში ერთ გოგონას. ამიტომ კარგი იქნება მეტი უსაფრთხოება.

ვამჩნევ, რომ სამაშველო ნავები ხშირად გამოდიან, მაგრამ ადამიანების დაშავების ფაქტებზეც მსმენია და ეს ცუდია“, – გვეუბნება ის.

ზღვაში ყოფნის დროს მთლად უსაფრთხოდ ვერც არჩილ ჭიკაიძე გრძნობს თავს. ამბობს, რომ თუ შორს გადის ნაპირიდან, აქვს განცდა, რომ შეიძლება რამე მოხდეს.

„შენ უნდა აკონტროლო, რომ რაიმე არ დაგეჯახოს, თუ მოგიახლოვდა, უნდა ანიშნო და ასე შემდეგ. ამის გამო ვერიდები ხოლმე შორს გასვლას ზღვაში. კარგი იქნება სანაპიროდან ცოტა მოშორებით რომ მოძრაობდეს ეს ტრანსპორტი, რადგან ზღვაში როცა შედიხარ და ახლოს ჩაგივლის, სკუტერი იქნება ეს თუ კატარღა, მერე აღარ გაქვს უსაფრთხოების განცდა“, – გვეუბნება არჩილ ჭიკაიძე.

ის ჰაერის დაბინძურების თემასაც შეეხო, მისი თქმით, როცა სანაპირო ზოლზე ახლოს ცურავს ტრანსპორტი, იგრძნობა საწვავის სუნი, რაც ასევე დისკომფორტია დამსვენებლებისთვის. „ჯანმრთელობისთვისაც საზიანოა“, –  ამბობს არჩილ ჭიკაიძე.

საწვავის სუნზე გვესაუბრება მაკა ნადირაძეც. „გასაგებია, რომ ბიზნესია და ადამიანები ცდილობენ რაღაც გამოიმუშაონ, მაგრამ საწვავის სუნი მაინც არ არის სასიამოვნო და ეს პრობლემაა. ამიტომ, კარგი იქნება თუ უფრო მოშორებით იმოძრავებს ტრანსპორტი“, – გვეუბნება ის.

„წინა წლებში გაცილებით მეტი ტრანსპორტი მოძრაობდა ზღვაზე, წელს თითქოს უფრო ნაკლებია, მაგრამ საფრთხე მაინც არსებობს.

ზოგიერთი ადამიანი ძალიან დაუდევრად იქცევა, რადგან ვერ მართავს ტრანსპორტს, ზოგიც შორს შედის ზღვაში და ამით უქმნის თავს საფრთხეს. წესით ამ ყველაფერს უნდა არეგულირებდეს სანაპირო დაცვა, მარტო სამაშველოს პრეროგატივა ხომ არ არის ეს“, – გვეუბნება ხათუნა შავშიშვილი.

მისი თქმით, შტორმის გარდა, სხვა რაიმე რეკომენდაცია უსაფრთხოებაზე არასდროს მოუსმენიათ შესაბამისი სამსახურებიდან.

„ერთადერთი რეკომენდაცია, რაც მომისმენია უსაფრთხოებაზე არის ის, რომ თუ შტორმია და დიდი ტალღებია, გვეუბნება სამაშველო, რომ არ შევიდეთ ზღვაში, სხვა უსაფრთხოებაზე არაფერი მომისმენია. ალბათ საჭიროა უსაფრთხოებაზე რეკომენდაციებიც“, – გვეუბნება ხათუნა.

ელენე ობოლაშვილიც მიიჩნევს, რომ შესაბამისმა სამსახურებმა მეტი კონტროლი უნდა გაუწიონ საზღვაო ტრანსპორტის მოძრაობას სანაპირო ზოლზე, რომ უკონტროლობამ არ გამოიწვიოს ადამიანების დაზიანება ან დაღუპვა.

„ძირითადად ვერ ვგრძნობ ხოლმე თავს უსაფრთხოდ, როცა წყალში შევდივარ, რადგან ძალიან ბევრი ტრანსპორტი მოძრაობს სანაპიროზე. მეორე მხრივ, ეს კატერები თუ იახტები ასე ახლოს რომ დადის სანაპიროზე, ბენზინის სუნი იგრძნობა, რაც არ არის სასიამოვნო.

ამასთან, ზღვის ტრანსპორტზე შეიძლება ბევრი გამოუცდელი დამსვენებელი იჯდეს, ვერ გათვალოს მანძილი და ახლოს მოვიდეს ნაპირთან, ხოლო ვინც კარგად ცურავს და უნდა, რომ ცოტა ღრმად შევიდეს ზღვაში, მათ ექმნებათ საფრთხე ამ ტრანსპორტისგან.

მე ვცდილობ, არ გავიდე შორს. თუმცა მირჩევნია, რომ ამ ტრანსპორტისთვის ცალკე სივრცე იყოს გამოყოფილი“, – გვეუბნება ელენე.

ნიკა თუთბერიძე კი მიიჩნევს, რომ თუ დამსვენებლები მეტი ყურადღებით იქნებიან, აღარც პრობლემა იარსებებს.

„ტივტივას იქეთ თუ არ წახვალ, მშვენივრად იქნები. „ბანანი“ კი შემოდის ნაპირზე და ალბათ უნდა შემოვიდეს, რომ აიყვანოს დამსვენებელი, მაგრამ შეიძლება ცალკე მისადგომიც იყოს ამ ტრანსპორტისთვის და საფრთხეც ნაკლები იქნება“, – გვეუბნება ის.

კანონმდებლობის მიხედვით, საზღვაო სივრცეში გასართობი თუ სხვა ტრანსპორტის მოძრაობის უსაფრთხოებაზე პასუხისმგებელი უწყება სასაზღვრო პოლიციის სანაპირო დაცვის დეპარტამენტია.

„ბათუმელებმა“ შს სამინისტროსაც ჰკითხა, თუ რა ზომებს იღებს აღნიშნული უწყება იმისთვის, რომ ადამიანებმა არ მიიღონ ტრავმები დასვენების დროს და არ შეექმნათ მათ სიცოცხლეს საფრთხე რეგულაციების დარღვევის გამო.

შს-ში გვეუბნებიან, რომ „უფლებამოსილების ფარგლებში, ყოველდღიურად, აქტიურად ახორციელებენ საზღვაო სივრცეში უსაფრთხოების უზრუნველყოფისთვის საჭირო შესაბამის ღონისძიებებს და საზღვაო სივრცის საპასუხისმგებლო არეალში სამართალდარღვევის გამოვლენის შემთხვევაში ტარდება შესაბამისი სამართლებრივი ზომები, მათ შორის ხორციელდება ადმინისტრაციული წესით დაჯარიმება“.

უწყების ინფორმაციით, მიმდინარე წლის ივნისიდან  22 აგვისტოს მდგომარეობით, საქართველოს საზღვაო სივრცის საპასუხისმგებლო არეალში სამართალდარღვევის 533 ფაქტი გამოავლინეს.

შსს არ აზუსტებს, რამდენია კონკრეტული ჯარიმა რეგულაციების დამრღვევ პირზე.

______________

ფოტო „ბათუმელების“ არქივიდან

ავტორი: ნათია როყვა

თამარ შელია პროფესიით მეან-გინეკოლოგია, განათლება რუსეთში მიიღო, საქართველოში კი ექიმად 23 წელი იმუშავა. თამარი მარტოხელა დედაა და ნიუ- იორკში ორ შვილთან ერთად ცხოვრობს. როგორც თავად ამბობს, 5 წლის წინ, ამერიკაში ჩამოსვლის გადაწყვეტილება, გიოს გამო მიიღო – გიორგი, თამარის შეზღუდული შესაძლებლობის მქონე შვილია.

• თამარ, რა საფრთხეებს ხედავთ რუსულ კანონში, რომელიც უკვე ძალაში შევიდა?

ეს კანონი ძალიან საშიშია – ეს ეწინააღმდეგება სიტყვის თავისუფლებას, ადამიანებს გამოხატვის თავისუფლებას უზღუდავს, კრძალავს ევროპულ და ამერიკულ სიკეთეებს, რომლითაც ჩვენ, საქართველოს მოქალაქეები, 90-იანი წლებიდან ვსარგებლობთ.

მაგალითად, ჯანდაცვის პროგრამებმა უამრავი ადამიანი გადაარჩინა, უამრავი სიკეთე მივიღეთ განათლების სფეროში, ეს კანონი კი ყველა ასეთ სასიცოცხლოდ მნიშვნელოვან პროექტს არსებობის საფრთხეს უქმნის. ის, რაც ადამიანის ფუნდამენდტურ უფლებებს ზღუდავს, ყველაფერი საშიშია.

ხელისუფლება ამ კანონით გვიწესებს შეზღუდვებს, გვართმევს თავისუფლებას, როგორ შეიძლება 21-ე საუკუნეში დაბადებულ ადამიანს დაუწესო აკრძალვები, სიტყვის და გამოხატვის.

• როგორ წარმოგიდგენიათ ადამიანების ჩართულობა, როგორ უნდა გადავარჩინოთ ქვეყანა? 

ჩვენი, საქართველოს მოქალაქეების ვალდებულებაა წავიდეთ არჩევნებზე, ძალადობრივი გზით ცვლილებები არ არის სასიამოვნო ჩემთვის, ცივილური გზაა ოქტომბერში, საარჩევნო ყუთებთან მისვლა. ჩვენ უნდა შევძლოთ ქვეყნის გადარჩენა, ახლა სასწორზეა ჩვენი ქვეყნის ევროპული მომავალი ან 30 წლით უკან დაბრუნება.

• ვიცი, რომ განათლება რუსეთში მიიღეთ, საქართველოში 22 წელი ექიმად იმუშავეთ, რატომ მიიღეთ ამერიკაში წამოსვლის გადაწყვეტილება?  

მე შვიდი წელი ვიცხოვრე რუსეთში, ვიცი 90-იანი წლებიდან დაწყებული დღემდე რა ხდება იქ. რუსეთი არ არის მოსკოვი ან სანკტ-პეტერბურგი 20-30% მასა, რომელიც შედარებით ნორმალურად ცხოვრობს.

პერიფერიებში გაიხედონ – რა მაგალითი უნდა მივიღოთ რუსეთისგან ქართველებმა, ქვეყნისგან, სადაც უპატრონო ბავშვებია, უამრავი ადამიანი ცხოვრობს ქუჩაში, გაჭირვება და სიღარიბეა, პენსიონრები მკურნალობის გარეშე არიან. უამრავი ადამიანი მინახავს მორგებში, უპატრონოდ.

რუსეთი ოკუპანტია, ჩვენი ტერიტორიის 20% მეტი მიითვისეს, დღემდე აგრძელებენ მცოცავ ოკუპაციას. როგორ შეიძლება დადებითად ვიყო განწყობილი, ეს გამორიცხულია.

• გიფიქრიათ თუ არა საქართველოში დაბრუნებაზე?                 

მე საქართველოდან წამოვედი 2018 წელს. ფინანსური პრობლემების გამო არ წამოვსულვარ საქართველოდან, მე წამოვედი იმიტომ, რომ ჩემი პაციენტების მაგალითზე ვხედავდი, როგორ უარესდებოდა ცხოვრების დონე, ეკონომიური და პოლიტიკური მდგომარეობა მძიმდებოდა, მთავარი რის გამოც მე აქ წამოვედი იყო ჩემი შეზღუდული შესაძლებლობის მქონე შვილი. მარტოხელა დედა ვარ და ვფიქრობდი თუ ასე გაგრძელდება, ქვეყნის განვითარება, როგორ იქნება გიორგი, როგორ შეძლებს ის ცხოვრებას მარტო. შშმ ადამიანებს სკოლაში დიდი პრობლემები აქვთ, მათი განვითარების ბაზა არ არის.

განცდა იმისა, რომ სახელმწიფო მათზე ზრუნავს, ან იზრუნებს არ მქონია და ცოტა ხნით მივატოვე ჩემი კარიერა, იქ, სადაც მე პაციენტების დიდი არმია მყავდა. წამოვედი ამერიკაში, მიმღებლობა ჩემი შვილისნაირი ადამიანების აქ ბევრად უკეთესია, ვიდრე საქართველოში. როგორც კი ჩვენი ქვეყნის განვითარების დინამიკა უკეთესობიაკენ წავა, მე აუცილებლად დავბრუნდები საქართველოში. ჩემთვის ბედნიერებაა ჩემ სამშობლოში ცხოვრება, ჩემი პროფესიით.

ჩემი დაკვირვებით სხვა ეროვნების ადამიანები რომ ჩამოდიან აქ იწყებენ ბიზნესს, ყიდულობენ სახლებს, ჩვენ ქართველები უძრავ ქონებას ვყიდულობთ საქართველოში, ჩვენ ნაშრომ ფულსაც იქ ვაგზავნით. ეს ნიშნავს იმას, რომ თვალი სულ იქეთ გვაქვს და ჩვენი გულები ისედაც იქ, საქართველოშია.

„ბათუმელები“ გომისმთაზე იმყოფებოდა, სადაც შუახევის სხვადასხვა სოფლიდან მთაში ამოსულ მემთეურებს ესაუბრა.

მემთეურები საუბრობენ სიღარიბეზე, მათ სოფლების ახალგაზრდებისგან დაცლა აწუხებთ ყველაზე მეტად და ასევე, ქვეყანაში შექმნილი მძიმე პოლიტიკური სიტუაცია.

შუშანა გოგრაჭაძე სოფელ წყავროკიდანაა. ამბობს, რომ მემთეურობის ტრადიცია ნელ-ნელა ქრება, რადგან ახალგაზრდები სოფლიდან მიდიან, მოხუცებს კი ძალა აღარ შესწევთ.

„წავიდა ახალგაზრდობა სოფლიდან, მაგრამ რა ქნან, ფული უნდათ. სოფელში კი არაფერია, რომ დასაქმდე. თამბაქო დარგეს და ფასი დაუვარდა, არ გაამართლა. ხალისი არაფერს აქვს, სოფელს რომ ახალგაზრდობა დაუბრუნდებოდეს, მეტი ხალისი იქნება, მაგრამ ამისთვის არავინ არაფერს აკეთებს.

რომ მოვკვდეთ, ერთ კვირას ვერავინ მოგვაგნებს. არ ეცოდინებათ, ცოცხალი ვართ თუ მკვდარი… ცოცხალი მკვდრები ვართ, ცოცხალი მკვდრები…“- წუხს შუშანა.

საუბარში გვერთვება მისი მეუღლე შალვა გოგრაჭაძე. მისი აზრით, ქვეყანაში არსებული სიღარიბე და უიმედობა ოლიგარქიის ბრალია.

„ოლიგარქიაა ქვეყანაზე, ოლიგარქია. ყველამ უნდა ვიმოქმედოთ და მოვიცილოთ ეს ბიძინა ივანიშვილი. თუ ვერ მოვიცილეთ, გველოდება არეულობა.

იქიდან გამოგზავნილი კაცია ეგ, მაგას მისი ნაშრომი ფული არ აქვს, რუსეთმა გამოატანა, ჩადი და დაანგრიე საქართველოო და ანგრევს და კი მიაქვს რუსეთში. ქართველებს ყრიან საქართველოდან, რუსები შემოჰყავთ“ – ამბობს შალვა.

მისი აზრით, ამ არჩევნებზე ხალხმა უნდა შეძლოს საკუთარი არჩევანის დაცვა.

„ხმებს უნდა დაცვა, რომ არ გაგვიყალბონ არჩევნები“ – გვეუბნება ის.

როგორ ხდება ისე, რომ მთავრობის წევრები მილიონერები გახდნენ, ხალხი კი ღარიბდება? – ვკითხეთ გოგრაჭაძეებს. მათი აზრით, ეს კორუფციის გამოა.

„როგორ ხდება და ჩვენი ჯიბიდან, კორუფციაა ქვეყანაზე. გაგვიყიდეს მიწა-წყალი, გამგებლებმაც, მთავრობამაც. მაგათთვის კარი ღიაა და ჩვენთვის დაკეტილი. მაგრამ მე მჯერა ერთობის ძალის. თუ ხალხი გაერთიანდა, ცვლილება იქნება“ – გვეუბნება შალვა გოგრაჭაძე.

„ოლიგარქია მოვიცილოთ, ეს მთავრობა მოვიცილოთ და მერე, თვითონ წავა რუსი. უნდა გაერთიანდეს ხალხი და ჩვენი პრინციპი ჩვენ უნდა დავიცვათ. დემოკრატია გვინდა ჩვენ, ამას აქვს ძალა“-მიაჩნია შალვა გოგრაჭაძეს.

მისი აზრით, აგენტების შესახებ კანონიც რუსეთის ინტერესებში შედის და ეს ქვეყანას დააზიანებს.

„აგენტების კანონი გადაჩეხავს ქვეყანას უფსკრულში. ივანიშვილია აგენტი, ჩვენ კი არ ვართ. ჩამოსული, დამჯდარი ჩუმად მართავს ქვეყანას და ჰყავს ხელისშემწყობი პარლამენტარები.

თუ ესენი არ წავიდნენ, საფრთხე ექმნება ჩვენს ევროინტეგრაციასაც. მაგათ თვითმფრინავებით აფრინონ მათი შვილები ამერიკაში, ასწავლონ და ჩვენსას სკოლები არ ჰქონდეთ, ეს არ იქნება“-ამბობს შალვა გოგრაჭაძე.

დურსუნ ბალაძე ფიქრობს, რომ ხალხი ოპოზიციას უფრო უჭერს მხარს და არა „ოცნებას“.

„ახლა ოპოზიციას უჭერს ყველა მხარს, რადგან ივანიშვილს რა სურს და რუსული ენა იყოს, რუსული კანონი იყოს… ახალგაზრდობისგანაც სოფლები გაცლილია. 60-80 კომლი ცხოვრობს ჩემს სოფელში და ძროხა 2 პროცენტს აღარ ჰყავს.

სოფლის შემოსავლით რა უნდა ქნა, მშიერი არ დარჩები და ეგაა, მეტს ვერაფერს იზამ“-ამბობს დურსუნი.

ეთერ ზოიძეც მემთეურია. ამბობს, რომ ხელისუფლება გომისმთაზე მათ პრობლემებს უქმნით, რის გამოც შესაძლებელია მომავალს წელს აღარც კი ამოვიდეს.

„ამ 12 წელიწადში ჩემი ცხოვრება არ შეცვლილა. ერთი აუზი გააკეტეს აქ, გომისმთაზე და ჩვენ არ მოგვცეს წყალი. ვართ უწყლოდ.

არც ქოხების შეკეთების უფლებას გვაძლევენ. წყალი ჩამოგვდის და ცელოფნებით გვძინავს. არ გვაკეთებინებენ სახურავს. ვერ გავიგეთ რა უნდათ და რა მიზანი აქვთ. ალბათ უნდათ, რომ დაინგრეს ეს სახლები და შემდეგ მათ ააშენონ“ – ამბობს ეთერი.

„მაშინ მოგცენ საშუალება და გადავალთ სხვაგან. დიათეზიანი შვილიშვილი მყავს, მინდა ამოვიყვანო ჰაერზე და არ მაძლევენ საშუალებას, რომ სახურავი შევაკეთო.

ამ უწყლობამ ხომ გაგვაწამა. ძროხები გვყავს, გარეცხვა გვინდა, სისუფთავე გვინდა. თუ ასე გაგრძელდა, შეიძლება მომდევნო წელს ვეღარ ამოვიდე მთაში“- გვეუბნება ეთერი.

მისი თქმით, რადგან ხელისუფლებას ხალხის მდგომარეობა არ აინტერესებს, ვერც ისინი მიიღებენ ხალხის ხმას.

„ხმის მოსათხოვნად რომ მოვლენ არჩევნებზე, აი, მაშინ უნდა გავუჭირვოთ ჩვენც და მიხვდებიან, გაჭირვება როგორი ყოფილა.

ზოგს ფულით ატყუებენ და 50 ლარად ვიღაც შეიძლება აძლევს ხმას, მაგრამ მე მაგათი მოსატყუებელი კბილი დიდი ხანია მოვიცვალე.

ის, რასაც აქ გვიკეთებენ, არის შევიწროება გლეხის. საქონელი უნდა ამოვწყვიტოთ მაშინ და დავსხდეთ სახლში“-ამბობს ეთერ ზოიძე.

ფატი ბოლქვაძეც მემთეურია და ისიც იმაზე ჩივის, რომ მალე ეს საქმიანობა წარსულს ჩაბარდება.

„დასაქმება, სამუშაო არ არის, ყველა ქალაქში გარბის და არავის უნდა ძროხა და მემთეურობა. წელს იცით რამდენი ქოხია დაკეტილი? ხალხი აქაც ვეღარ ამოდის, რადგან არ აქვს საშუალება. თუ ასე გაგრძელდა, ორი-სამი წელი და მთაში არავინ წამოვა მემთეურად.

ხალხმაც ამიტომ ჩაიქნია ხელი და აღარ აძლევს ხმას „ოცნებას“, რადგან დაპირებები არ სრულდება. აგერ, წყალი ჩამოგვდის ქოხში და არ გვაძლევენ გადახურვის უფლებას, წვიმაში გვძინავს. მე ამათ უკვე აღარ ვენდობი“ – გვეუბნება ფატი.

ანა სანიკიძე ქობულეთიდანაა და გომისმთაზე დასასვენებლად ამოვიდა.

სხვა მემთეურების მსგავსად უკმაყოფილებას ისიც გამოხატავს შეზღუდვებზე, რის გამოც სახლების მეპატრონეებს არც შეკეთების უფლებას ეძლევათ და არც რაიმე ცვლილების.

„ხის კიბე გვქონდა და ჩამოინგრა, ბავშვი ჩამოგვივარდა და ვიფიქრე, რომ რკინის კიბეს გავაკეთებდით. მოვიდნენ და მოჭრეს.

ქობულეთში, სადაც ვცხოვრობ, ერთი 900-მეტრიანი გზა გვაქვს დასაგები და არ დაგვიგეს, რუკაზე არ არის, გეგმაში არ არისო. მანდ ადრე თავდაცვის შენობა იყო და შევარდნაძეც კი ჩამოდიოდა და მაშინ თუ იყო რუკაზე, ახლა სად გაქრა“ – ამბობს ანა სანიკიძე.

სელვა ბალაძე „ოცნების“ ამომრჩეველია. ამბობს, რომ ხმა „ხათრით აძლევს „ოცნებას“, თუმცა ქვეყანაში არსებული მდგომარეობით მაინც უკმაყოფილოა.

„მთავრობა არ გამოივლის და არ მოგიკითხავს რა გიჭირს და რა არა. აქ წყალი არ გვაქვს, ან წყალი მოგვიყვანონ ან მოაგვარონ ეს ამბავი, რატომ გვიშლიან ხელს.

ხმა ყოველთვის „ოცნებას“ ვაძლევ, ხათრით.

პენსიაზე ხომ გვიმატებენ 20 თეთრს… 20 თეთრია ეგ 20 ლარი აბა რა არის, ყველაფერი ძვირია, რით უნდა იცხოვრო? ტელევიზორს ჩართავ და მარტო ჩხუბია.

მეწყერსაშიშ ზონაში ვართ, დაგვპირდნენ კომპენსაციას და ვნახოთ“ – ამბობს სელვა.

ხუსეინ ბოლქვაძეც შუახევიდანაა. დარდობს, რომ სოფელი მოწყენილია ახალგაზრდების გარეშე. ცრემლი ერევა იმის გამო, რომ ახალგაზრდების ნაწილი დაუსაქმებლობის გამო ნარკოდამოკიდებულები გახდნენ და ამ პრობლემის მოგვარებაზე ხელისუფლება არ ზრუნავს.

არჩევნებთან დაკავშირებით კი ასეთი განწყობა აქვს: „საარჩევნოდ იქნება ომი. დაძაბული სიტუაციაა. ყველას სათავეში უნდა. რატომ უნდა იყოს მარტო „ოცნება“, კოალიციური მთავრობა უნდა შეიქმნას, ეს ჩამოაყალიბებს ყველაფერს“- გვეუბნება ის.

რამაზ ტაკიძეც მიიჩნევს, რომ რომ არა სოციალური პროგრამით „დასაქმება“, სოფელში ადამიანებს სხვა შემოსავალი არ აქვთ.

„რეალური, გლეხობისთვის მაინც არაფერია. ამიტომ არის ხალხი დაფიქრებული, რა იქნება და როგორ.

ხალხი ახლა უყურებს რა იქნება ამ გომისმთასთან დაკავშირებით, რა კანონი უნდა შემოიღონ და თუ ჩვენს წინააღმდეგ იქნება, ხალხი ფეხზე დადგება.

გვაწიოკებენ, არ გვაძლევენ არაფრის გაკეთების საშუალებას, სახურავი რომ გადახურო, ჯარიმებს აწერენ ხალხს და არაფრის საშუალებას არ გვაძლევენ“ – გვითხრა მან.

რატომ უკრძალავენ მემთეურებს გომისმთაზე იმ ქოხების შეკეთებას, რომელიც ათწლეულებია აქ დგას, ამ თემაზე „ბათუმელები“ ცალკე შემოგთავაზებთ მასალას.

ამავე თემაზე: 

დღეს, 23 აგვისტოს, ბათუმში, აეროპორტის გზატკეცილზე ავარიის შედეგად დაღუპული ორი პირი 15 წლამდე მოზარდია.

გავრცელებული ინფორმაციით, ერთმანეთს მსუბუქი ავტომანქანა და მოპედი შეეჯახა, მოზარდები მოპედზე ისხდნენ.

დღეს, ასევე, ავტოსაგზაო შემთხვევა მოხდა ქობულეთის შემოვლით გზაზე, სადაც ერთმანეთს ორი ავტომანქანა შეეჯახა. არიან დაშვებულები.

შს სამინისტროს ინფორმაციით, ორივე შემთხვევაზე გამოძიება სისხლის სამართლის 276-ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.