ექიმებმა დაიწყეს ფილტვის კიბოს პირველი ვაქცინის გამოცდა იმ პაციენტებში, რომელთაც დიაგნოსტირებული აქვთ კიბო. მედიის ცნობით, mRNA ვაქცინა შესაძლოა ქიმიოთერაპიის ალტერნატივა გახდეს, რადგან ის ორგანიზმს ნაკლებ ზიანს აყენებს. „მისი მიზანია გააძლიეროს ადამიანის იმუნური პასუხი კიბოს მიმართ, ხოლო ჯანმრთელი უჯრედები ხელუხლებელი დარჩეს, განსხვავებით ქიმიოთერაპიისგან“ – წერს ბრიტანული გამოცემა „გარდიანი“.
ფილტვის კიბო კიბოთი სიკვდილის წამყვანი მიზეზია მსოფლიოში და საქართველოშიც, ეს დიაგნოზი ყოველწლიურად დაახლოებით 1,8 მილიონი სიკვდილის მიზეზია. NCDC-ის ცნობით, 2020 წელს საქართველოში კიბოს დიაგნოზით გარდაიცვალა 8024 ადამიანი, მათ შორის უმეტესი წილი ტრაქეას, ბრონქის, ფილტვის (15%) და სარძევე ჯირკვლის კიბოზე (10%) მოდის.
BBC–ი წერს, რომ ეს ვაქცინა ზოგიერთი Covid ვაქცინის მსგავსად, იყენებს mRNA ტექნოლოგიას, რათა ინსტრუქციები მისცეს იმუნურ სისტემას: „67 წლის კაცი გახდა პირველი ადამიანი დიდ ბრიტანეთში, ვინც სცადა ის, რასაც ექიმები იმედოვნებენ, რომ იქნება რევოლუციური მკურნალობა ფილტვის კიბოსთვის – ვაქცინა, რომელიც ეუბნება სხეულს, როგორ ებრძოლოს და მოკლას დაავადება“.
„ვაქცინა, რომელსაც ახლა ექსპერტები ამოწმებენ, ავალებს ადამიანის ორგანიზმს მოძებნოს და მოკლას კიბოს უჯრედები – შემდეგ კი ხელს უშლის მათ უკან დაბრუნებას [განმეორებას ანუ რეციდივს]“, – განმარტავს „გარდიანი“.
BNT116 ვაქცინა დამზადებულია გერმანული ბიოტექნოლოგიური კომპანიის BioNTech-ის მიერ. ვაქცინა შექმნილია ფილტვის არაწვრილუჯრედოვანი კიბოს (NSCLC) სამკურნალოდ, რაც დაავადების ყველაზე გავრცელებული ფორმაა.
კვლევა დაიწყო 34 კვლევით ცენტრში შვიდ ქვეყანაში: დიდ ბრიტანეთში, აშშ-ში, გერმანიაში, უნგრეთში, პოლონეთში, ესპანეთსა და თურქეთში.
ამავე თემაზე:
კიბოს 10 000 ახალი შემთხვევა ყოველწლიურად – რას უკავშირდება სტატისტიკის ზრდა
