ბათუმში, ევროპის მოედანზე USAID – სა და საქართველოს 32 წლიანი თანამშრომლობისთვის მიძღვნილი ღონისძიება გაიმართა.
ევროპის მოედანზე გაშლილი იყო ქართული სუფრა, რომელსაც თამადა უძღვებოდა. ღონისძიებაში მონაწილეობას იღებდნენ ის სამოქალაქო ორგანიზაციები, რომლებმაც USAID-ის მხარდაჭერით აჭარის რეგიონში სხვადასხვა სფეროში წარმატებული პროექტები განახორციელეს.
მათ შორის იყვნენ ახალგაზრდული ცენტრის წარმომადგენლები, ადგილობრივი მეწარმეები და ის არასამთავრობო ორგანიზაცები, რომლებიც საკუთარ გარემოს, ქალაქს და რეგიონს უკეთესობისკენ ცვლიან.
„ეს არის არაჩვეულებრივი თანამშრომლობის, არაჩვეულებრივი პროექტების, არაჩვეულებრივი ხალხის არაჩვეულებრივი გამოფენა – ანუ პასუხი იმაზე, რა გააკეთეს ქართველებმა ამერიკელ ხალხთან თანამშრომლობით.
თანამედროვეობისა და ტრადიციის შეწრყმის ყველაზე კარგი მაგალითი მოლაპარაკე ციფრული ქვევრი გახდა. გამოფენის მონაწილეებს შეეძლოთ ქართული ტრადიციული ღვინის ჭურჭლთან ესაუბრათ და საქართველოსა და USAID – ის თანამშრომლობის, ისტორიის, განხორციელებული პროექტებისა და დაგეგმილი ინიციატივების შესახებ ინფორმაცია მიეღოთ,“- ნათქვამია ღონისძიების ორგანიზატორთა მიერ გავრცელებულ რელიზში.
USAID საქართველოსთან და მის მოქალაქეებთან 1992 წლიდან თანამშრომლობს. ამ დროის განმავლობაში ორგანიზაციამ ამერიკელი ხალხის საშუალებით, $1.9 მილიარდი დოლარის მხარდაჭერა გაუწია ქვეყანას.
USAID, როგორც აშშ-ს მთავრობის ნაწილი საქართველოს სტრატეგიულ პარტნიორად მიიჩნევს და მისი მიზანია დაეხმაროს ქვეყანას გახდეს უფრო უსაფრთხო, წარმატებული, დემოკრატიული და ევროპასთან მჭიდროდ ინტეგრირებული პარტნიორი.
საქართველოსა და USAID- ის თანამშრომლობაზე სასაუბროდ “ არაჩვეულებრივი გამოფენა” საქართველოს სხვა კუთხეებსაც ესტუმრება.
