დღეს, 26 აგვისტოს, რუსეთის შეიარაღებულმა ძალებმა უკრაინის 15 რეგიონზე განახორციელეს შეტევა. რუსეთმა რამდენიმე ათეული ირანული დრონი გაუშვა უკრაინის მასშტაბით, ასევე, გამოიყენა ფრთოსანი და ბალისტიკური რაკეტები. აფეთქებები ისმოდა კიევში, ლუცკში, ზაპოროჟიეში, ოდესაში, ხარკოვსა და სხვა ქალაქებში.
ქვეყნის პრემიერ-მინისტრის, დენის შმიგალის განცხადებით, რუსეთის მასობრივი თავდასხმის შედეგად დაზარალდა უკრაინის 15 რეგიონი. რუსეთმა შეტევისას გამოიყენა სხვადასხვა ტიპის იარაღი, შეტევის შედეგად არიან დაჭრილები და დაღუპულები, ინფორმაციას მსხვერპლის შესახებ აზუსტებენ.
შეტევის სამიზნე გახდა უკრაინის ენერგეტიკული ინფრასტრუქტურა. „უკრენერგომ“ ელექტროენერგიის გადაუდებელი შეწყვეტის ბრძანება გასცა.
დენის შმიგალი ტელეგრამზე გავრცელებულ განცხადებაში კიდევ ერთხელ უსვამს ხაზს, რომ უკრაინას სჭირდება შორი მოქმედების იარაღი და ნებართვა პარტნიორებისგან, რომ გამოიყენოს ეს იარაღი რუსულ სამიზნეებზე.
ბოლო ცნობებით, შეტევის შედეგად მინიმუმ 4 ადამიანი დაიღუპა.
______________
ფოტო: ДСНС України
