Batumelebi

აჭარის ფინანსთა და ეკონომიკის სამინისტროს მიერ ზღვისპირა ზოლში  გასხვისებულ ტერიტორიაზე, რომელიც ინვესტორს რეკრეაციული დანიშნულებით უნდა გამოეყენებინა, მრავალწლიანი ხეები ზოგი მოჭრეს, ზოგს კი თხრიან და იმ პარკში გადასატანად ამზადებენ, რომელსაც ყოფილი პრემიერი, ბიძინა ივანიშვილი შეკვეთილში აშენებს.

გადასატან ხეებს მახინჯაურში, თამარ მეფის გამზირის მიმდებარედ, ყოფილ სანატორიუმ „კოლხიდას“ ტერიტორიაზე თხრიან. ხეებთან მისასვლელი გზის მოსაწყობად კი ყოფილ სანატორიუმ „მზიურის“ ტერიტორიას იყენებენ. ამ სამუშაოებისთვის აქ რამდენიმე ძირი მრავალწლოვანი ნაძვი და მაგნოლია მოჭრეს. ეს ტერიტორია,12 იანვარს, როცა ხეებს მოჭრა-გატანა განაახლა ბიძინა ივანიშვილმა, ჯერ კიდევ აჭარის ქონება იყო.

ამ ტერიტორიის მიმდებარედ არსებული ყოფილი სანატორიუმები – „მზიური“ და „მახინჯაური“ აჭარის მთავრობამ პირდაპირი მიყიდვის წესით შარშან გაასხვისა კომპანიაზე, რომლის მფლობელიც „საპარტნიორო ფონდის“ პარტნიორია. მიწის ნაკვეთები, საერთო ფართობით: 33 530 კვ/მ და 2255 კვ/მ შენობა-ნაგებობა, აჭარის მთავრობის თავმჯდომარისა [ზურაბ პატარაძე] და აჭარის ფინანსთა და ეკონომიკის მინისტრის [რამაზ ბოლქვაძე] ბრძანებების საფუძველზე, პირდაპირი მიყიდვის წესით, 3,9 მილიონ ლარად, პირობებით, 16 სექტემბერს გაიყიდა. მყიდველი კომპანია „სტატოტელია“.

რაც შეეხება ყოფილ სანატორიუმ „კოლხიდას“, 413 კვ/მ ფართობის ორსართულიან შენობასა და მის მიმდებარე ტერიტორიაზე [32 171 კვ/მ მიწის ნაკვეთი] აჭარის ფინანსთა და ეკონომიკის სამინისტრომ პირობადებული აუქციონი 2016 წლის დეკემბერში გამოაცხადა. ელექტრონული აუქციონის ვებგვერდის მიხედვით, აუქციონი ამავე თვის ბოლოს დასრულდა და ქონება 1 მილიონ 125 ათას ლარად გაიყიდა. ეს თანხა მყიდველმა ერთი წლის განმავლობაში უნდა გადაიხადოს ბიუჯეტში. ამასთან განახორციელოს 2 მილიონი ლარის ინვესტიცია 3 წლის განმავლობაში.

აუქციონის პირობების მიხედვით, მყიდველმა ხელშეკრულების გაფორმებიდან არაუგვიანეს 36 თვის ვადაში აქ არანაკლებ 10 კოტეჯი, კემპინგი, სასეირნო ბილიკები და კაფე-ბარი უნდა მოაწყოს. გარდა ამისა, ერთ-ერთი პირობით, საკუთრებაში გადაცემული მიწის ნაკვეთის 50%-ზე რეკრეაციული ზონა უნდა მოაწყოს. ამ პირობის მიუხედავად, ტერიტორიაზე ხეების მოჭრა-მოთხრას რითი ხსნის აჭარის ფინანსთა და ეკონომიკის მინისტრი? – კითხვაზე პასუხი “ბათუმელებმა” რამაზ ბოლქვაძისგან ვერ მიიღო. მან სატელეფონო ზარებს არ უპასუხა.

ზემოთ აღნიშნულ ტერიტორიაზე ცხოვრობს 4 ეკომიგრანტი ოჯახი, რომელთა ბედიც ამ დრომდე გაურკვეველია. მათთან საცხოვრებლით უზრუნველყოფის საგარანტიო ხელშეკრულება არც აჭარის მთავრობას აქვს გაფორმებული და არც ინვესტორი დაავალდებულეს ეზრუნა ამ ოჯახების საცხოვრებელი ფართობით დაკმაყოფილებაზე. აქ შესახლებულების თქმით, იციან, რომ ტერიტორია გაიყიდა, თუმცა ვინ იყიდა და მათ რას უპირებენ, ეს არ იციან.

რეესტრის ამონაწერის მიხედვით, ყოფილი „კოლხიდას“ ტერიტორიაზე ნასყიდობის ხელშეკრულება მიმდინარე წლის 13 იანვარსაა გაფორმებული აჭარის ფინანსთა და ეკონომიკის სამინისტროსა და შპს „ჯეო დეველოპმენტს“ შორის. 13 იანვრის ამონაწერის მიხედვით, ტერიტორია უკვე ამ კომპანიის საკუთრებაშია.

დოკუმენტების მიხედვით,  შპს „ჯეო დეველოპმენტი“ აუქციონის დაწყებამდე  4 თვით ადრე, 2016 წლის 13 ივლისს დაარეგისტრირა უკრაინის მოქალაქემ ნატალია ტოვკაჩმა. ამ კომპანიის დამფუძნებელიც და დირექტორიც ნატალია ტოვკაჩი იყო, თუმცა სულ რაღაც 2 თვით.

2016  წლის 7 ოქტომბრის ამონაწერის მიხედვით, „ჯეო დეველოპმენტის“ 100% წილის მფლობელიც და დირექტორიც უკვე ირაკლი სირაძეა. რეესტრის დოკუმენტების მიხედვით, მან კომპანიის მთლიანი წილი ნატალია ტოვკაჩიდან 100 ლარად იყიდა.

ირაკლი სირაძე ასევე ფლობს შპს „ATA Partners“-ის წილის – 50, ხოლო შპს „სოლუშენს ვესტ“-ის წილის 25 პროცენტს.

„კოლხიდა“, „მზიური“ და „მახინჯაური“ იმ 21 ობიექტში შედიოდა, რომლებიც ყაზახური ინვესტიციის განხორციელების პირობით, 2006 წელს, მაშინდელმა მთავრობამ ნიდერლანდებში ერთი კვირის დარეგისტრირებულ კომპანიას მიჰყიდა. კომპანიამ ამ ქონების ნაწილი კი, 2016 წელს უკან დააბრუნა.

---

ამავე თემაზე:

ხეებს ციხისძირში სახელმწიფო აუქციონზე ყიდის

 

ბათუმის ბოტანიკური ბაღი საქორწილო ცერემონიალისთვის ხის თეთრი ფერის მაგიდას იყიდის. ბაღის ადმინისტრაცია სხვადასხვა ზომის 45 სტენდსა და ერთ მაგიდაში მაქსიმუმ 3 500 ლარს გადაიხდის. როგორც სატენდერო განაცხადშია აღნიშნული, ეს თანხა არა ბიუჯეტიდან, არამედ ბოტანიკური ბაღის საკუთარი შემოსავლებიდან დაიხარჯება.

თეთრი ფერის მაგიდა „ბოტანიკურ ბაღს“  საქორწილო ცერემონიალის უზრუნველსაყოფად სჭირდება.

როგორც ბაღის ადმინისტრაციაში გვითხრეს, მომსახურება ფასიანია:

• მაყრიონის დაშვება ბაღის ტერიტორიაზე ფოტოების გადასაღებად – 50 ლარი,
• ხელის მოწერის ცერემონიალი – 100 ლარი.

---

ახალი საბაგირო გზა სანაპიროდან ყოფილი სასოფლო სამეურნეო ინსტიტუტის ტერიტორიამდე, სასტუმრო კომპლექსი, ახალი ადმინისტრაციული შენობა ბოტანიკურ ბაღში… რა მიზნით სტუმრობენ ბიძინა და ადიკო ივანიშვილები მწვანე კონცხს და რა პროექტების განხორციელებას გეგმავს ბათუმის ბოტანიკურ ბაღში ფონდი „ქართუ“? – ამ ყველაფრის შესახებ გაიგეთ ამ ბმულზე.

„ბათუმის ბოტანიკურ ბაღში“, რომელიც ბათუმის მერიის ა[ა]იპ-ია, სახელმწიფო აუდიტის დეპარტამენტმა 2014-2015 წლების საქმიანობის შემოწმებისას არაერთი დარღვევა-ნაკლოვანება გამოავლინა.

„ბათუმის სამშობიარო სახლი“, რომელიც რუსთაველის ქუჩაზე მდებარე შენობაშია განთავსებული, გაყიდულია. ახალი მესაკუთრეა შპს „ირის ბორჩაშვილის სახელობის ჯანმრთელობის ცენტრი მედინა“. შესაბამისი ხელშეკრულება მხარეებს შორის გუშინ, 2 მარტს გაფორმდა.

მეწილეების საერთო კრება სამშობიარო სახლში, რეესტრის დოკუმენტების მიხედვით, მიმდინარე წლის 24 თებერვალს ჩატარდა. შპს „ჩარკვიანის სახელობის ბათუმის სამშობიარო სახლის“ 187 მეწილედან კრებას 154 ესწრებოდა. შპს „ბათუმის სამშობიარო სახლის“ 100% წილის გასხვისებას კი მხარი 110-მა პარტნიორმა დაუჭირა.

წილის გასხვისებადე შპს „ბათუმის სამშობიარო სახლის“ მფლობელი სწორედ  შპს „ჩარკვიანის სახელობის ბათუმის სამშობიარო სახლი“ იყო. საჯარო რეესტრში უკვე დევს ნასყიდობის ხელშეკრულებაც, თუმცა რეგისტრაციის პროცესი ხარვეზის გამო შეჩერებულია.

„ხარვეზი დადგინდა იმიტომ, რომ ნატომ დაუშვა შეცდომა. ეს მხოლოდ ტექნიკური ხარვეზია და მალე გამოსწორდება“, – გვითხრა ჯუმბერ უნგიაძემ. „ბათუმის სამშიობიარო სახლის“ დირექტორი არ აკონკრეტებს, ვინ არის ნატო. მისი თქმით, კრების შესახებ ყველა მეწილე იყო წინასწარ გაფრთხილებული და უმრავლესობის თანხმობა ამ შემთხვევაში საკმარისი იყო გადაწყვეტილების მისაღებად.

26 თებერვალს, როცა „ბათუმელები“ სამშობიარო სახლთან დაკავშირებით წერდა, ჯუმბერ უნგიაძემ თქვა, რომ წესდების მიხედვით, ყველა მეწილის თანხმობა იყო საჭირო.

„არ იყვნენ თანახმა და მათ დარჩებათ საკუთარი წილი, თუ ამის სურვილი აქვთ, არავინ წაართმევს“, – გვითხრა ჯუმბერ უნგიაძემ დღეს.

ნასყიდობის ხელშეკრულების მიხედვით, ინვესტორმა ორი წლის განმავლობაში  უნდა დაასაქმოს სამშობიარო სახლში ამ დროისთვის დასაქმებული 280 ადამიანი და ჩადოს მილიონ 200 ათასი ლარის ინვესტიცია. ხელშეკრულების ღირებულებაა 353 ათასი ლარი. ხელშეკრულებაში არაფერი წერია სამედიცინო პროფილის შენარჩუნებაზე.

„ეს ჩაიწერება იმ ხელშეკრულებაში, რომელიც ფინანსთა სამინისტროსა და ახალ ინვესტორს შორის გაფორმდება. არ ინერვიულოთ, პროფილის შეცვლას არავინ აპირებს, აქ სასტუმრო არ გაიხსნება. პირიქით, ჩვენ მრავალპროფილური კლინიკის ამოქმედებას ვგეგმავთ. ეს იქნება ისეთივე წარმატებული კლინიკა, როგორიც „მედინაა“, – ამბობს ჯუმბერ უნგიაძე, „ბათუმის სამშობიარო სახლის“ დირექტორი. ის „მედინაში“ მუშაობს დღემდე.

ჯუმბერ უნგიაძის თქმით, ახალ ინვესტორს ექნება პროფილის 15 წლის ვადით შენარჩუნების ვალდებულება.

ბათუმისა და ლაზეთის მიტროპოლიტი დიმიტრი დღეს, 2 მარტს, ჟურნალისტებს შეხვდა. დაახლოებით ერთსაათიანი შეხვედრის განმავლობაში მან ყველაზე ხშირად გამოძიების მიმართ სანდოობას გაუსვა ხაზი. „არ მაქვს საფუძველი, არ ვენდო გამოძიებას. ისე არ გამიგოთ, თითქოს ხელისუფლების კრიტიკას ვარიდებ თავს…“ – აღნიშნა მიტროპოლიტმა.

კითხვას, აპირებთ თუ არა მოინახულოთ ციხეში დეკანოზი გიორგი მამალაძე, რომელიც თქვენთან შეხვედრას ითხოვს, მეუფე დიმიტრიმ უპასუხა, რომ საგამოძიებო მოქმედებების დასრულებას დაელოდება და დეკანოზს იმ შემთხვევაში შეხვედება, თუ პატრიარქისგან კურთხევას მიიღებს.

მიტროპოლიტმა ისაუბრა დეკანოზის ოჯახის წევრებთან გუშინდელ შეხვედრაზეც. დეკანოზ გიორგი მამალაძის დედამ, მეუფესთან შეხვედრის შემდეგ, ჟურნალისტებს უთხრა, რომ მისი ოჯახის წევრების უსაფრთხოება დაცული არ არის.

„კონკრეტულ საფრთხეზე გიორგის ოჯახის წევრებს ჩემთან არ უსაუბრიათ. ასეთი კონკრეტული რამ ოჯახის წევრებს ჩემთან არ უთქვამთ,“ – ამბობს მიტროპოლიტი დიმიტრი.

გუშინ, პირველ მარტს, ბათუმისა და ლაზეთის ეპარქიამ განაცხადა, რომ გამოძიების დასრულებამდე პატრიარქის ლოცვა-კურთხევით საჯარო განცხადებებს არ გააკეთებდნენ. რატომ გადაწყვიტა ჟურნალისტებთან შეხვედრა მეუფე დიმიტრიმ დღეს? – „ბათუმელების“ კითხვას ბათუმისა და ლაზეთის ეპისკოპოსმა ასე უპასუხა:

„ვხედავდი, როგორ ათენ-აღამებდით რეზიდენციის წინ. ხმაური არ მაწუხებს, მაგრამ შემაწუხა იმან, რომ ამ სიცივეში იდექით. იძულებული გამხადეთ, რომ მეთქვა… არც თქვენ ისვენებდით და არც მე მასვენებდით“.

დეკანოზი გიორგი მამალაძე 10 თებერვალს მთავარმა პროკურატურამ დააკავა მკვლელობის მომზადების ბრალდებით. იგი ამ დრომდე პატიმრობაში იმყოფება და თავს უდანაშაულოდ მიიჩნევს. საქმის დეტალები და მტკიცებულებები პროკურატურას ამ დრომდე არ გაუსაჯაროებია. ადვოკატის ინფორმაციით, საბრალდებო დასკვნაში საუბარია პატრიარქის მდივან-რეფერენტის, შორენა თეთრუაშვილის მკვლელობის მომზადებაზე. პროკურატურა იუწყება, რომ დეკანოზი აეროპორტში დააკავეს, როდესაც ბერლინში მიფრინავდა, სადაც პატრიარქი მის თანმხლებ პირებთან ერთად იმყოფებოდა და მის ბარგში მომწამლავი ნივთიერება ციანიდი აღმოაჩინეს.

2017 წლის იანვარ-თებერვალში ტურისტების რაოდენობა 2016 წლის ანალოგიურ პერიოდთან შედარებით 24, 3 პროცენტით გაიზარდა – ინფორმაციას ამის შესახებ შს სამინისტროს საინფორმაციო-ანალიტიკური დეპარტამენტი აქვეყნებს.

სამინისტროს ნფორმაციით, იანვარ-თებერვალში საქართველოში 294 001 ტურისტი შემოვიდა, რაც ქვეყანაში უცხო ქვეყნებიდან შემოსული ვიზიტების  საერთო რაოდენობის 38,9%. ბოლო ორი თვის განმავლობაში საქართველოში  სულ 755 080 ვიზიტი განხორციელდა, რაც 10,5%-ით მეტია 2016 წლის ანალოგიური საანგარიშო პერიოდის მაჩვენებელზე.

შს სამინისტროს სტატისტიკის თანახმად  2017 წლის თებერვალში ყველაზე მეტი ვიზიტი კვლავ აზერბაიჯანიდან (-6,6%), სომხეთიდან (+7,7%), თურქეთიდან (-21%), რუსეთიდან (+31,4%), უკრაინიდან (+10,6%) და ირანიდან (+321,4%) განხორციელდა.

რაც შეეხება ევროკავშირის ქვეყნებს,  2017 წლის იანვარ-თებერვალში ყველაზე მეტი ვიზიტი გერმანიიდან, ბულგარეთიდან, პოლონეთიდან, დიდი ბრიტანეთიდან, საფრანგეთიდან და ლიტვან განხორციელდა.

ბათუმში გორგილაძის #22-ში, ძეგლის დაცვის ზონაში შპს „მინი-77“ ორი ათსართულიანი კორპუსის მშენებლობას გეგმავს. ამ ქუჩის #18-ში, 19-ში და 37-ში ძეგლის სტატუსის მქონე შენობები მდებარეობს, რაც იმას ნიშნავს, რომ კომპანიამ პროექტი კულტურული მემკვიდრეობის სააგენტოს ზონალურ საბჭოს უნდა შეათანხმოს.

კულტურული მემკვიდრეობის ძეგლთა დაცვის შესახებ კანონით ძეგლის დაცვის არეალში დაუშვებელია ისეთი მასშტაბების მშენებლობა, რომელიც დაჩრდილავს ძეგლს.

ძეგლის დაცვის ზონაში ახალი პროექტის განხორციელებას კანონი გამონაკლის შემთხვევებში უშვებს, თუმცა იქვე ადგენს, რომ ისტორიული განაშენიანების ლანდშაფტი უნდა შენარჩუნდეს.

საჯარო რეესტრის მონაცემების მიხედვით გორგილაძის #22 – ში მდებარე 1016 კვ.მ არასასოფლო სამურნეო ფართობი და შენობა-ნაგებობები ჯამში 146.11 კვ.მ. უკვე კომპანიას ეკუთვნის. რეესტრის დოკუმენტებით ირკვევა ასევე, რომ ფართების გამოსყიდვის სანაცვლოდ კომპანია ყოფილ მესაკუთრეებს ახალ აშენებულ კორპუსში ბინებს დაპირდა.

კომპანიამ კულტურული მემკვიდრეობის დაცვის სააგენტოს ზონალურ საბჭოს უკვე მიმართა. ზონალურმა საბჭომ პროექტი 2016 წლის 30 ოქტომბერს განიხილა და კომპანიას უარი უთხრა. მიმართავს თუ არა შპს „მინი-77“ სააგენტოს ახალი პროექტით, ამის შესახებ კომპანიის მფლობელმა ზურაბ წითელაძემ „ბათუმელებთან“ არ ისაუბრა. თუმცა მან დაადასტურა, რომ გორგილაძის #22-ში მშენებლობას ნამდვილად გეგმავს: „ ყველაფერი იქნება კანონმდებლობის ფარგლებში, როგორც კანონი ითხოვს ისე. მეტს ვერაფერს გეტყვით“ – უთხრა ზურაბ წითელაძემ „ბათუმელებს“.

სააგენტოს ინფორმაციით კი კომპანიამ 2017 წლის 31 იანვარს სააგენტოს ზონალურ საბჭოს სახეცვლილი პროექტით ისევ მიმართა, თუმცა ზონალურ საბჭოს ჯერ ის უახლოეს დღეებში განსახილველ პროექტთა ნუსხაში არ შეუტანია.

შპს „მინი-77“ 2009 წელს დაფუძნებული კომპანიაა და მას ერთპიროვნულად ფლობს ზურაბ წითელაძე. კომპანიის დიერქტორად კი მანუჩარ ბასილაძე ფიქსირდება.

საქართველოს სახალხო დამცველის აპარატი აცხადებს სტაჟირებას. სტაჟირების ვადა 6 თვეა, ადგილი: ბათუმი და ქუთაისი. განაცხადების წარდგენის ბოლო ვადა 2017 წლის 10 მარტია. კონკურსი ჩატარდება ორ ეტაპად -განცხადებების გადარჩევა და გასაუბრება.

შერჩევის დროს განსაკუთრებული ყურადღება მიექცევა წარმოდგენილი სამოტივაციო წერილის შინაარსს და კანდიდატის პროფესიულ უნარ-ჩვევებს;

მოთხოვნები:

• მინიმალური განათლება: ბაკალავრი/ ბაკალავრიატის დამამთავრებელი კურსის სტუდენტი;
• სამუშაო გამოცდილება: გამოცდილება არ არის სავალდებულო;
• პროფესია: იურისტი.

სტაჟიორი უზრუნველყოფს საქართველოს სახალხო დამცველის აპარატში შესული განცხადებების/საჩივრების საფუძველზე ან საქართველოს სახალხო დამცველის ინიციატივით დაწყებული, ადამიანის უფლებათა დარღვევასთან დაკავშირებული საქმეების შესწავლას ხელმძღვანელის ზედამხედველობით და შესაბამისი სამართლებრივი დოკუმენტების პროექტების/ანალიზის მომზადებას; ასევე შეასრულებს ხელმძღვანელის მითითებებსა და დავალებებს.

კონკურსში მონაწილეობის მისაღებად სტაჟიორობის კანდიდატმა ელექტრონული ფორმით მისამართზე vacancy@ombudsman.ge უნდა წარადგინოს:

• რეზიუმე (CV);
• პირადობის მოწმობა;
• სამოტივაციო წერილი;
• დიპლომის ასლი (ასეთის არსებობის შემთხვევაში) ან ცნობა სასწავლებლიდან;
• არსებობის შემთხვევაში შესაძლებელია ასევე სერთიფიკატების, დიპლომების, სიგელების და ა.შ. წარდგენა

ელექტრონული წერილის სათაურში უნდა მიეთითოს ვაკანსიის ზუსტი დასახელება.

დამატებითი ინფორმაცია კონკურთან და პირობებთან დაკავშირებით შეგიძლიათ იხილოთ ამ ბმულზე.

დღეს, პირველ მარტს, ბათუმისა და ლაზეთის ეპარქიამ, დეკანოზ გიორგი მამალაძის დაკავების საქმესთან დაკავშირებით, განცხადება გაავრცელა.

„საქართველოს მართლმადიდებელ ეკლესიაში ბოლო დროს განვითარებულ მოვლენებთან დაკავშირებით გვსურს კიდევ ერთხელ განვაცხადოთ, რომ გაოგნებული ვართ მომხდარი ფაქტის გამო, ბრალის დამტკიცების შემთხვევაში ეს იქნება უმძიმესი ტრაგედია თითოეული ჩვენთაგანისათვის.

ნდობას ვუცხადებთ საგამოძიებო ორგანოებს, თვალყურს ვადევნებთ პროცესების მიმდინარეობას და მისი უწმინდესობის სრულიად საქართველოს კათოლიკოს-პატრიარქის ილია II ლოცვა-კურთხევით გამოძიების დამთავრებამდე არ ვაკეთებთ საჯარო განცხადებებს.

მოგიწოდებთ ყველას თავი შეიკავოთ სხვადასხვა ვერსიების გავრცელებისაგან“ – ვკითხულობთ ეპარქიის განცხადებაში.

დღეს  ბათუმისა და ლაზეთის მიტროპოლიტი დიმიტრი “ციანიდის საქმეში” ბრალდებული დეკანოზის, გიორგი მამალაძის ოჯახს შეხვდა. 

დღეს, პირველ მარტს, ბათუმისა და ლაზეთის მიტროპოლიტი დიმიტრი “ციანიდის საქმეში” ბრალდებული დეკანოზის, გიორგი მამალაძის ოჯახს შეხვდა. შეხვედრა რამდენიმე წუთის წინ დასრულდა.

ბათუმში ეპარქიის რეზიდენციიდან გამოსული დეკანოზის დედა, ქეთევან მაღლაკელიძე ჟურნალისტებთან მოკლე კომენტარით შემოიფარგლა. “ეს არის ჩემი პირადული, აღსარების მსგავსი. ეს არის ჩემი ოჯახის საქმე”.

დეკანოზ გიორგი მამალაძის დედამ ასევე იმის შესახებ განაცხადა, რომ მისი ოჯახის უსაფრთხოება არ არის დაცული.

შეხვედრა დაახლოებით ნახევარ საათს გაგრძელდა.

დეკანოზი გიორგი მამალაძე თბილისში გადასვლამდე, ბათუმში ბარბარეს ეკლესიის წინამძღვარი იყო. ეს იყო პირველი შემთხვევა, როდესაც, დეკანოზის დაკავების შემდეგ, მიტროპოლიტი დიმიტრი  დაკავებულის ოჯახის წევრებს შეხვდა.

გუშინ, 28 თებერვალს მიტროპოლიტმა პეტრემ განაცხადა, რომ “თუ ვინმეს პირველს უნდა გამოეხატა თანადგომა მამა გიორგის მიმართ, ეს უნდა ყოფილიყო მეუფე დიმიტრი”.

 

მას შემდეგ, რაც სასამართლოს სამივე ინსტანციამ აჭარის გარემოს დაცვის სამმართველოს ყოფილი უფროსის, ვახტანგ წულაძის ხელმოწერილი ბრძანება უკანონოდ მიიჩნია, სასამართლოს ამჯერად სარჩელით სამმართველომ მიმართა. მოთხოვნა ასეთია: სამსახურში აღდგენილი თანამშრომლისთვის გადახდილი განაცდურის ნაწილის უკან დაბრუნება.

მოპასუხე აღსრულების ბიუროა, რადგან სწორედ მან ჩამოაჭრა სამმართველოს ოფიციალური ანგარიშიდან თანხა იძულების წესით, როცა ვახტანგ წულაძემ უზენაესი სასამართლოს გადაწყვეტილების ნებაყოფლობით შესრულებაზე უარი თქვა.

სამმართველოს დაახლოებით 20 ათასი ლარის გადახდა მოუწია უკანონოდ გათავისუფლებული თანამშრომლისთვის. საუბარია სამმართველოში მომხდარ სექსუალურ ძალადობაზე, რომლის საპასუხოდ სამმართველოს უფროსმა, ვახტანგ წულაძემ ძალადობის მსხვერპლი ორსული ქალი, 2014 წლის აპრილში, დაცვის ნაცვლად სამსახურიდან გაათავისუფლა. „უღირსი საქციელი” და “საჯარო სამსახურის დისკრედიტაცია” – ეს ფრაზები გათავისუფლების ბრძანებაში წერია.

ვახტანგ წულაძემ ის შტატიც გააუქმა, სადაც ორსული ქალი გათავისუფლებამდე მუშაობდა. სამმართველომ აღდგენილ თანამშრომელს განაცდური ახალი საშტატო ერთეულის მიხედვით გადაუხადა. აღმასრულებელმა სამმართველოს კიდევ დაახლოებით 2400 ლარი ჩამოაჭრა – ესაა სხვაობა, რომელიც გაუქმებულ და ახალ საშტატო ერთეულების სახელფასო განაკვეთებს შორის არსებობდა.

„დღემდე მიმდინარეობს ამ თანამშრომლის დისკრიმინაცია სხვადასხვა მეთოდით“, – ასე აფასებს სამმართველოს მიერ წამოწყებულ ახალ სასამართლო დავას ანა ბერძენიშვილი, „საერთაშორისო გამჭვირვალობა საქართველოს“ იურისტი. ეს ორგანიზაცია სასამართლოში გათავისუფლებული ქალის ინტერესებს იცავდა. ანა განმარტავს, რომ აღმასრულებელმა უზენაესი სასამართლოს აქამდე არსებული პრაქტიკით იხელმძღვანელა და განაცდურად მიიჩნია ის ხელფასი, რასაც გათავისუფლებული მუშაობის პერიოდში იღებდა.

„შტატი რომ არ გაუქმებულიყო და ხელფასი გაზრდილიყო იმავე პოზიციაზე, გაზრდილი ხელფასი არ უნდა გადაეხადა სამმართველოს, ამას ამბობს პრაქტიკა. სამწუხაროა, რომ სასამართლოს გადაწყვეტილების მიუხედავად, გარემოს დაცვის სამმართველოს პოზიცია ურყევია და ისევ განაგრძობს ეს უწყება კონკრეტული თანამშრომლის კანონიერი უფლებების დარღვევას. ეს არის არა კონკრეტული სამმართველოს, არამედ მთლიანად საჯარო სამსახურის სისტემის პრობლემა,“ – გვიყვება ანა ბერძენიშვილი.

„გაუგებარია, რა სამართლებრივი საფუძვლით ჩამოგვაჭრა აღსრულების ეროვნულმა ბიურომ დამატებით თანხა“, – ამბობს რაულ აბუსერიძე, აჭარის გარემოს დაცვის სამმართველოს იურისტი. განმარტავს, რომ უკანონოდ გათავისუფლებული თანამშრომლის შტატი გაუქმებულია, ხოლო სასამართლოს არ უმსჯელია ამ კუთხით – შტატის გაუქმება კანონიერი იყო თუ არა: „ჩვენი პოზიციაა, რომ ეს თანამშრომელი რასაც აიღებდა, ის გადავუხადეთ. რა ლოგიკით უნდა გადაგვეხადა ხელფასი, რომელიც უკვე გაუქმებული საშტატო ერთეულისთვის იყო გათვალისწინებული?“

რაულ აბუსერიძე ამბობს, რომ უზენაესი სასამართლოს პრაქტიკაში ზუსტად ამგვარი სხვა გადაწყვეტილება მიღებული არ არის: „ამიტომაც მოვითხოვეთ განმარტება უზენაესი სასამართლოსგან, როგორ უნდა მოგვეხდინა მისი აღსრულება, მაგრამ, სამწუხაროდ, ამაზე უარი გვითხრეს“.

ვახტანგ წულაძის უკანონო გადაწყვეტილება რეაგირების გარეშე დატოვა არჩილ ხაბაძის მთავრობამ. აჭარის მთავრობას არც იმაზე მოუთხოვია პასუხი ჩინოვნიკისგან, რომ მან სასამართლოს გადაწყვეტილების აღსრულება გააჭიანურა და კიდევ უფრო გაიზარდა განაცდური თანხა, რაც ბიუჯეტის ხარჯზე გადაიხადა გარემოს დაცვის სამმართველომ. ვახტანგ წულაძე ზურაბ პატარაძის მთავრობამ დააწინაურა კიდეც – ის აჭარის უმაღლესი საბჭოს წევრი გახდა „ქართული ოცნებიდან“.

 

 

 

სახელმწიფო კომპენსაციის ანუ განსხვავებული პენსიის მიღებას ყოფილი უზენაესი საბჭოს დეპუტატები ითხოვენ, რომლებიც დამოუკიდებლობის მოპოვებამდე, საბჭოთა კავშირის დროს იყვნენ არჩევით ორგანოში.

„ეს ორგანო ასრულებდა საკანონმდებლო საქმიანობას. ამ ადამიანებს აქვთ შესრულებული ისტორიული მისია. მათ მოამზადეს სამართლებრივი საფუძველი იმისთვის, რომ ქვეყანაში ჩატარებულიყო პირველი მრავალპარტიული არჩევნები”, – მიმართა საკონსტიტუციო სასამართლოს მეორე კოლეგიას იურისტმა, ლია მუხაშავრიამ.

ლია მუხაშავრია 52 მოსარჩელის ინტერესებს იცავს, ვინც მიიჩნევს, რომ სახელმწიფო კომპენსაციას უმაღლესი საკანონმდებლო ორგანოს მხოლოდ ის წევრები არ უნდა იღებდნენ, ვინც 1990 წლიდან გახდნენ დეპუტატები.

მოსარჩელეების აზრით, კანონის “სახელმწიფო კომპენსაციის და სახელმწიფო აკადემიური სტიპენდიის შესახებ” მე-13 მუხლი ეწინააღმდეგება საქართველოს კონსტიტუციას, სადაც წერია, რომ „ყველა ადამიანი დაბადებით თავისუფალი და თანასწორი”.

„არავის დაკრულზე არ გვიცეკვია ჩვენ. ჩვენ მივიღეთ პირველად სიტყვის და გამოხატვის თავისუფლება”, – მიმართა მოსამართლეებს ერთ-ერთმა მოსარჩელემ.

საკონსტიტუციო სასამართლო რამდენიმე დღეში გამოაცხადებს, მიიღებს თუ არა ამ საქმეს არსებითად განსახილველად.

სარჩელის დაკმაყოფილების შემთხვევაში, პარლამენტს კანონის შეცვლა მოუწევს და კომპენსაციის მიცემა იმ ადამიანებისთვის, რომლებიც 1990 წლამდე იყვნენ დეპუტატები.

---

1990 წლის 20 ივნისს საქართველოს სსრ უზენაესმა საბჭომ მიიღო დადგენილება არჩევნების ჩატარების შესახებ. ეს დადგენილება გახდა სამართლებრივი საფუძველი ახალი არჩევნების ჩასატარებლად. არჩევნებს ეწოდა „საქართველოს რესპუბლიკის უზენაესი საბჭოს“ არჩევნები, ნაცვლად „საქართველოს სსრ უმაღლესი საბჭოს არჩევნებისა“.

1990 წლის 28 ოქტომბრის არჩევნები იყო საქართველოს სსრ-ში ჩატარებული პირველი მრავალპარტიული არჩევნები, რაც შემდეგ, 1991 წელს, საქართველოს დამოუკიდებლობის აღდგენის საფუძველი გახდა.

 

ქობულეთში, სოფელ ციხისძირში მდებარე სახელმწიფო საკუთრებაში არსებულ მრავალწლოვან ხეებს „სახელმწიფო ქონების ეროვნული სააგენტო“  აუქციონზე 13 ათას ლარად ყიდის. აუქციონზე ბიჯი 500 ლარია.

სააგენტოს ინფორმაციით, აუქციონზე გატანილი სამი ხიდან: ამბრის ხის გარშემოწერილობა 2,4 მ. სიმაღლე 30 მ-ია;   ევკალიპტის ხის – გარშემოწერილობა 5,55 მ. სიმაღლე 35-40 მ; სექვოიას ხისა კი – გარშემოწერილობა 4,2 მ. სიმაღლე 25 მ.

ხეების მყიდველის ვინაობა ოფიციალურად აუქციონის დასრულების, 6 მარტის შემდეგ გახდება ცნობილი.

აღნიშნულ ხეებს, სავარაუდოდ, ოზურგეთის მუნიციპალიტეტში, შეკვეთილის დენდროლოგიურ პარკში გადაიტანენ, რომელსაც ყოფილი პრემიერი, ბიძინა ივანიშვილი აშენებს.

აღნიშნულ პარკში აჭარიდან გადატანილი პირველი ხე – მრავალწლოვანი ტიტა, ორ სხვა ხესთან ერთად 2015 წლის დეკემბერში კომპანია „ზიმომ“ შეისყიდა. მაშინდელი მთავრობის თავმჯდომარის, არჩილ ხაბაძის ბრძანებით „ზიმოს“ 6200 ლარად საკუთრებაში გადაეცა ერთი ტიტას ხე და ორი ჭაობის კიპარისის ხე. ხეების გადატანაზე სწორედ კომპანია „ზიმო“ მუშაობს.

ვინაიდან ხეები, ძირითადად, ქობულეთის მუნიციპალიტეტიდან გააქვთ, „ბათუმელებმა“ ქობულეთის მუნიციპალიტეტიდან მიმდინარე წლის იანვარში გამოითხოვა ყველა იმ ნაკვეთის საკადასტრო კოდები, საიდანაც გაიტანეს ან გააქვთ ხეები.  მუნიციპალიტეტიდან მიღებული დოკუმენტებით მხოლოდ რამდენიმე ნაკვეთის საკადასტრო კოდი დგინდებოდა, რომლებიც კერძო საკუთრებას წარმოადგენდა.

მახინჯაურში, ყოფილი სანატორიუმი „მზიურის“ ტერიტორიაზე კი მრავალწლოვანი ხეები მოჭრეს იმ ხემდე მისასვლელად, რომელიც დღეს დენდროლოგიურ პარკში გადასატანად უკვე მზადაა. არის თუ არა ეს ხე კერძო მესაკუთრის ტერიტორიაზე, შესაბამის უწყებებში ამ დრომდე ვერ დავადგინეთ.

ხელვაჩაურის თვითმმართველობას სხვადასხვა სოფლის მოსახლეობამ 5 პეტიციით მიმართა. მოთხოვნები ძირითადად ინფრასტრუქტურულ სამუშაოებს ეხება. პეტიციები ხელვაჩაურის საკრებულომ გამგეობასთან ერთად გუშინ განიხილა და მიიჩნია, რომ „ხალხის მოთხოვნები მიზანშეწონილია“.

ამის მიუხედავად, პეტიციების დაკმაყოფილება წელს ვერ მოხერხდება იმ მოტივით, რომ ბიუჯეტი უკვე დაგეგმილია. ადგილობრივი მთავრობა მოსახლეობას პეტიციებით მოთხოვნილი პროექტების განხორციელებას მომავალი წლიდან დაჰპირდა.

პეტიციებით მოსახლეობამ მოითხოვა: სოფელ ახალსოფელში სტადიონის მიმდებარე ტერიტორიაზე სკვერის მოწყობა; სოფელ ერგეში საბავშვო ბაღის აშენება; სოფელ მახოში კულტურის ცენტრის აშენება; სოფელ წინსვლაში №20 ქუჩის რეაბილიტაცია და ასევე ხელვაჩაურის მუნიციპალიტეტის ტერიტორიაზე მდებარე სოფლებსა და დაბაში, სადაც საჯარო რეესტრის მონაცემებით დამისამართება გაკეთებულია, აბრებისა და ნიშნულების განთავსება.

პეტიციებს მოქალაქეები ამზადებენ „დემოკრატიის ინსტიტუტის“ პროექტის ფარგლებში – „პეტიცია – ხალხის ხმა თვითმმართველობებში“. მოქალაქეები საკრებულოებში სხდომებს ესწრებიან და თავად ასაბუთებენ საკითხის გადაწყვეტის აუცილებლობას. პროექტი სამწლიანია და მისი ავტორები ამ პერიოდში სხვადასხვა სოფლის მოსახლეობასთან აპირებენ შეხვედრებს. ისინი მოსახლეობას მათთვის სასურველი პეტიციის მომზადებაში დაეხმარებიან.

ფოტოზე: სოფელ მახოში მცხოვრები მიხეილ საფარიძე  ხელვაჩაურის საკრებულოს სხდომაზე. წყარო: „დემოკრატიის ინსტიტუტი“.

 

საინიციატივო ჯგუფმა – „დაიცავი ძველი ბათუმი“ – ქალაქის ისტორიული ნაწილის დასაცავად ფოტოაქცია – „ჩემი ფოტო ძველ ბათუმში“ – დაიწყო. 28 თებერვალს ბათუმში პირველი ფოტოაქცია გაიმართა, რომლის ფარგლებშიც ფოტოგრაფებმა აქციის მონაწილეებს ძველი ბათუმის ქუჩებში გადაუღეს ფოტოები. აქციის მონაწილეები ფოტოებს ფეისბუქზე ათავსებენ ჰეშთეგით – #შენიფოტოძველბათუმში.

„დაიცავი ძველი ბათუმი“, „ნუ ანგრევ“, „ძველი არ ნიშნავს უვარგისს“, „შევინარჩუნოთ ისტორია“ – ეს არის სოციალური კამპანიის მთავარი გზავნილი. ადრესატი ბათუმის მერიაა, რომლისგანაც  საინიციატივო ჯგუფი ძველი ბათუმის ტერიტორიაზე მშენებლობაზე მორატორიუმს მოითხოვს და პეტიციის საშუალებით, ხელმოწერებს აგროვებს.

საინიციატივო ჯგუფის წევრი, ჟურნალისტი სოფო ჟღენტი ყვება, რომ ფოტოაქცია სწრაფად დაიგეგმა და მეორე დღესვე შედგა:

„ჯერ ვამბობდით, რომ ფეისბუქზე ჩვენთვის მნიშვნელოვანი ისტორიული სახლებისა და ადგილების ფოტოები გამოგვექვეყნებინა. განხილვაში  ფოტოგრაფები ჩაერთვნენ, რომლებიც  ამბობდნენ,  რომ თუ კი ბათუმში უნდა გადაიღონ ფოტო, არა მხოლოდ შენობის, არამედ, მაგალითად, ფოტომოდელის, აუცილებლად მიდიან ძველ ბათუმში, იქ, სადაც ხდება ქალაქის იდენტიფიკაცია. აქედან გაჩნდა  ფოტოაქციის იდეა, რაზეც იქვე დაგვთანხმდა ოპერატორი და ფოტოგრაფი ედო კოჩალიძე, რომელმაც თქვა, რომ თუ ადამიანები მოვლენ, მე სიამოვნებით გადავიღებ მათ ფოტოებსო.  სპონტანურად დაგეგმილი აქცია მეორე დღესვე გაიმართა და ასამდე ადამიანი ჩაერთო.“

ოპერატორი ედო კოჩალიძე ამბობს, რომ ფოტოაქციაზე ფოტოებს სხვა ფოტოგრაფებთან ერთად იღებდა. ედო ამბობს, რომ მისთვის, როგორც ოპერატორისთვის, რომელიც უკვე წლებია კადრებს იღებს ძველ ბათუმში, ცვლილებები ქალაქში ძალიან ადვილი შესამჩნევია:

„ხუთი წლის წინ სულ სხვა იყო ბათუმი. ძველ ფოტოებს რომ გადავხედოთ, თუ ძველად ლამაზად იყო შენობები ჩაწყობილი, ახლა სოკოებივითაა ახალი შენობები, ზოგი მაღალი, ზოგი – დაბალი…  ძველ ბათუმში ჯერ კიდევ დაცულია ის, რომ არ გვხვდება ძალიან მაღალი შენობები და ამის გადარჩენა, შენარჩუნება,  ვფიქრობ, შესაძლებელია.“

ჰეშთეგთამაშში მონაწილეობის მიღება ყველა მსურველს შეუძლია. ამისათვის საჭიროა ფეისბუქზე განათავსოთ ძველ ბათუმში გადაღებული ფოტო, მისცეთ ჰეშთეგი – #ჩემიფოტოძველბათუმში და გამოიწვიოთ სამი მეგობარი. ამ სახით თამაშში ის ადამიანებიც ჩაერთვნენ, რომლებიც ამჟამად ბათუმში არ იმყოფებიან.

„ჰეშთეგი მთლიანი აქციის – „დაიცავი ძველ ბათუმი“ – ერთ-ერთი მცირე ნაწილია.  არიან ადამიანები, რომელთაც უნდათ საკუთარი პოზიციის გამოხატვა, მაგრამ რაღაც მიზეზების გამო ვერ ახერხებენ. ზოგი არ არის ქალაქში, ზოგს სამუშაო გრაფიკი არ აძლევს საშუალებას უფრო მეტად აქტიური იყოს. მათ უნდათ გამოხატონ თავისი პოზიცია, უნდათ ხმა მიაწვდინონ მერიას და ეს არის ერთგვარი საშუალება, თქვან, რომ მათთვის ღირებულია ძველი ბათუმი. ეს არ არის 15 კაცის ახირება და მნიშვნელოვანია ძველი ბათუმის ნაწილი დაკანონდეს, როგორც ისტორიული ზონა,“  – ამბობს სოფო ჟღენტი.

საინიციატივო ჯგუფი მსგავს ფოტოაქციას ისევ გამართავს, ამჯერად შაბათს ან კვირას, რათა კიდევ უფრო მეტმა ადამიანმა შეძლოს აქციაში მონაწილეობა.

„აქციის დასრულების შემდეგ ბევრმა ადამიანმა მოგვწერა, რომ ვერ მოახერხეს მოსვლა, რადგან იყო სამუშაო და გვიან გაიგეს, ამიტომ გადავწყვიტეთ, რომ ერთ შაბათ-კვირას ისევ გაიმართება ასეთი აქცია, სადაც ადამიანებს ექნებათ საშუალება მოვიდნენ და მათ პროფესიონალმა ფოტოგრაფებმა გადაუღონ  ფოტო ძველ ბათუმში. უბრალოდ  ჩვენ  შევთავაზებთ ბანერებს და თავად შეარჩევენ, რომელი სლოგანით უნდათ ფოტოს გადაღება,“ – ამბობს სოფო.