წლობით შეუკეთებელი გზები ბათუმის გარეუბანში [ფოტო]

მიუხედავად ბათუმის ქუჩებზე პერიოდულად ჩატარებული სარეაბილიტაციო სამუშაოებისა, ქალაქში დღემდე რჩება ქუჩები, რომლებზეც ათეულობით წლებია გზა არ დაგებულა.

ერთ-ერთი ასეთია გიორგი სააკაძის ქუჩა “ჭაობის” უბანში. აქ მცხოვრებლები ამბობენ, რომ მიუხედავად სხვადასხვა მთავრობის დაპირებებისა,  50 წელია ამ ქუჩაზე გზა არ დაგებულა, რის გამოც წვიმის დროს სახლები სისტემატიურად იტბორება.

გიორგი სააკაძის ქუჩა

ამ ქუჩის მაცხოვრებლების თქმით, სექტემბერში ძლიერი წვიმის შედეგად დატბორილი წყალი სახლს სწორედ იქამდე წვდებოდა, სადაც შავი, ჰორიზონტალური ხაზი აქვს კედელს.

იგივეს ამბობენ ალექსეი ოსტროვის ქუჩის მაცხოვრებლებიც, რომელთა განმარტებითაც, მათი ქუჩის მოწესრიგებით მხოლოდ წინასაარჩევნოდ ინტერესდებიან პოლიტიკოსები. თუმცა, სულ ცოტა 40 წლის მანძილზე გზა არც აქ დაგებულა.

ჩოლოყაშვილის ქუჩა

ჩოლოყაშვილის ქუჩა

ლუკა ასათიანის ქუჩა

ლუკა ასათიანის ქუჩა

ლუკა ასათიანის ქუჩა

ვაჟა ფშაველას ქუჩა

ვაჟა ფშაველას ქუჩა

სელიმ ხიმშიაშვილის ქუჩა

დავით გურამიშვილის ქუჩა

ბათუმის მერის მრჩევლის, ჯაბა ტუღუშის თქმით, ბათუმში ამ ეტაპზე, წყალარინების პროექტის მესამე და მეოთხე ფაზა ხორციელდება, რომელიც წყლისა და საკანალიზაციო სისტემების რეაბილიტაციას ითვალისწინებს.

მერიის პრესცენტრის ინფორმაციით, წყლისა და წყალარინების სისტემების რეაბილიტაციის სამუშაოები ეტაპობრივად ხორციელდება. ეს სამუშაოები ზოგან უკვე დასრულდა, ზოგან კი ჯერ კიდევ მიმდინარეობს. მაგალითად, “ჭაობის” უბნის ნახევარი უკვე გადაერთებულია ახალ ქსელზე, თუმცა მანამ, სანამ ამ ქუჩებზე გზების კეთილმოწყობა დაიწყება, გარკვეული ინტერვალია საჭირო იმისთვის, რომ რეაბილიტირებული სისტემების მუშაობას დააკვირდნენ.

მერიაში ამბობენ, რომ წყლისა და საკანალიზაციო სისტემების რაბილიტაციის, ასევე ქუჩების კეთილმოწყობის სამუშაოები 2018 წლის ბოლომდე მთლიანად დასრულდება.