ბათუმის საერთაშორისო ჰოსპიტლიდან თანამშრომლების გათავისუფლებასთან დაკავშირებით ჰოსპიტლის იურისტმა ლევან სიამაშვილმა „ბათუმელებთან“ განაცხადა, რომ დამსაქმებლის ინიციატივით ჰოსპიტლიდან მხოლოდ ერთი თანამშრომელი გათავისუფლდა.
„გავრცელდა ინფორმაცია, რომ 30 თანამშრომელი გათავისუფლდა, რაც სიმართლეს არ შეესაბამება. აქ 507 ადამიანია დასაქმებული და დამსაქმებლის ინიციატივით მხოლოდ ერთი თანამშრომელი გათავისუფლდა, თუ არ ვცდები მაია ქობულაძე. ამ ბოლოს იყო როცა 3 თუ 4 თანამშრომელი [არასამედიცინო პერსონალი] გათავისუფლდა ხელშეკრულების ვადის ამოწურვის გამო და არავითარ დათხოვნას და ხელშეკრულების შეწყვეტას ადგილი არ ჰქონია. ადრე იყო ასევე, როცა 7-მა თანამშრომელმა დატოვა სამსახური. მაგრამ ესეც იყო ურთიერთშეთანხმებით დამსაქმებელთან, ანუ ორმხრივი შეთანხმება იყო“, – ამბობს ლევან სიამაშვილი.
დღეს, 3 მარტს, ჰოსპიტლის თანამშრომლებმა ბრიფინგი გამართეს. ბრიფინგის გამართვის დროს დარბაზში ისხდნენ სამედიცინო დაწესებულების მოქმედი თანამშრომლებიც, დაახლოებით 30 ადამიანი. ბრიფინგზე განაცხადეს, რომ ისინი სამსახურიდან სხვადასხვა მიზეზით გაუშვეს ან იძულებულს ხდიან, რომ თავად წავიდნენ.
ჰოსპიტლის ყოფილი თანამშრომლის, მაია ქობულაძის თქმით, კომპანიამ მათ ხელშეკრულების ახალი პირობები შესთავაზა და თან გააფრთხილა, რომ თუ არ დათანხმდებიან, სამსახურის დატოვება მოუწევთ: “ახლა ვინც მუშაობს, მათ ახალი ხელშეკრულებით სთავაზობენ ნაკლებ ხელფასს. ასევე თანამშრომლებს ჩამოეჭრებათ საშემოსავლო, რასაც ადრე კომპანია იხდიდა”.
მაია ქობულაძის თქმით, 10-12 ადამიანი აპირებს მიმართოს სასამართლოს კომპენსაციის მოთხოვნით.
აღნიშნულთან დაკავშირებით ჰოსპიტლის იურისტი ამბობს, რომ პირობების შეთავაზება დამსაქმებლის პრეროგატივაა.
„თანამშრომლების გათავისუფლებასა თუ გავრცელებულ სხვა ინფორმაციებზე კომენტარს ჰოსპიტლის ხელმძღვანელობა ორშაბათს გააკეთებს “, – აცხადებს ჰოსპიტლის იურისტი ლევან სიამაშვილი.
საერთაშორისო საუნივერსიტეტო ჰოსპიტალი მრავალპროფილურია.
კლინიკა სრული დატვირთვით გასული წლის პირველი თებერვლიდან ამოქმედდა.
