ბათუმში გორგილაძის #22-ში, ძეგლის დაცვის ზონაში შპს „მინი-77“ ორი ათსართულიანი კორპუსის მშენებლობას გეგმავს. ამ ქუჩის #18-ში, 19-ში და 37-ში ძეგლის სტატუსის მქონე შენობები მდებარეობს, რაც იმას ნიშნავს, რომ კომპანიამ პროექტი კულტურული მემკვიდრეობის სააგენტოს ზონალურ საბჭოს უნდა შეათანხმოს.
ბათუმი. გორგილაძის ქუჩა #18 კულტურული მემკვიდრეობის ძეგლი. აშენებულია xix -საუკუნის ბოლოს.
კულტურული მემკვიდრეობის ძეგლთა დაცვის შესახებ კანონით ძეგლის დაცვის არეალში დაუშვებელია ისეთი მასშტაბების მშენებლობა, რომელიც დაჩრდილავს ძეგლს.
ძეგლის დაცვის ზონაში ახალი პროექტის განხორციელებას კანონი გამონაკლის შემთხვევებში უშვებს, თუმცა იქვე ადგენს, რომ ისტორიული განაშენიანების ლანდშაფტი უნდა შენარჩუნდეს.
ბათუმი. გორგილაძის ქუჩა #19 კულტურული მემკვიდრეობის ძეგლი. აშენებულია xx საუკუნის დასაწყისში.
საჯარო რეესტრის მონაცემების მიხედვით გორგილაძის #22 – ში მდებარე 1016 კვ.მ არასასოფლო სამურნეო ფართობი და შენობა-ნაგებობები ჯამში 146.11 კვ.მ. უკვე კომპანიას ეკუთვნის. რეესტრის დოკუმენტებით ირკვევა ასევე, რომ ფართების გამოსყიდვის სანაცვლოდ კომპანია ყოფილ მესაკუთრეებს ახალ აშენებულ კორპუსში ბინებს დაპირდა.
კომპანიამ კულტურული მემკვიდრეობის დაცვის სააგენტოს ზონალურ საბჭოს უკვე მიმართა. ზონალურმა საბჭომ პროექტი 2016 წლის 30 ოქტომბერს განიხილა და კომპანიას უარი უთხრა. მიმართავს თუ არა შპს „მინი-77“ სააგენტოს ახალი პროექტით, ამის შესახებ კომპანიის მფლობელმა ზურაბ წითელაძემ „ბათუმელებთან“ არ ისაუბრა. თუმცა მან დაადასტურა, რომ გორგილაძის #22-ში მშენებლობას ნამდვილად გეგმავს: „ ყველაფერი იქნება კანონმდებლობის ფარგლებში, როგორც კანონი ითხოვს ისე. მეტს ვერაფერს გეტყვით“ – უთხრა ზურაბ წითელაძემ „ბათუმელებს“.
სააგენტოს ინფორმაციით კი კომპანიამ 2017 წლის 31 იანვარს სააგენტოს ზონალურ საბჭოს სახეცვლილი პროექტით ისევ მიმართა, თუმცა ზონალურ საბჭოს ჯერ ის უახლოეს დღეებში განსახილველ პროექტთა ნუსხაში არ შეუტანია.
შპს „მინი-77“ 2009 წელს დაფუძნებული კომპანიაა და მას ერთპიროვნულად ფლობს ზურაბ წითელაძე. კომპანიის დიერქტორად კი მანუჩარ ბასილაძე ფიქსირდება.
ბათუმი. გორგილაძის ქუჩა # 31. „გეოგრაფიკის“ რეკომენდაციით ამ სახლს კულტურული მემკვიდრეობის ძეგლის სტატუსი უნდა მიენიჭოს.
ბათუმი. გორგილაძის ქუჩა #32 კულტურული მემკვიდრეობის ძეგლი. აშენებულია xix-xx საუკუნის მიჯნაზე. ფოტო: ცაგო კახაბერიძე
ბათუმი.გორგილაძის #22, სადაც ინვესტორი ორი ათასართულიანი სახლის მშენებლობას გეგმავს. შენობა ძეგლი არ არის. ის ძეგლის დაცვის ზონაში მდებარეობს.
ფოტო: ცაგო კახაბერიძე
