Batumelebi | დავით თარხან-მოურავს აჭარის უმაღლესი საბჭოს წევრის სტატუსი შეუწყდა დავით თარხან-მოურავს აჭარის უმაღლესი საბჭოს წევრის სტატუსი შეუწყდა – Batumelebi
RU | GE  

დავით თარხან-მოურავს აჭარის უმაღლესი საბჭოს წევრის სტატუსი შეუწყდა

დღეს, 15 დეკემბერს, აჭარის უმაღლესმა საბჭომ, „პატრიოტთა ალიანსის“  ლიდერს, დავით თარხან-მოურავს  უმაღლესი საბჭოს წევრის უფლებამოსილება შეუწყვიტა.

გადაწყვეტილება უმაღლესი საბჭოს პლენარულ სხდომაზე კანონმდებლებმა 16 ხმით მიიღეს. კენჭისყრისას წინააღმდეგი მხოლოდ ორი დეპუტატი – ცოტნე ანანიძე და გია აბულაძე აღმოჩდნენ. საკითხი სხდომაზე საკონსტიტუციო, იურიდიულ და საპროცედურო საკითხთა კომისიის თავმჯდომარემ ნინო ჩხეტიამ წარადგინა.

მისი განმარტებით, „დავით თარხან-მოურავმა უმაღლესი საბჭოს წევრის უფლებამოსილების ვადამდე შეწყვეტის თაობაზე შესაბამისი განცხადებით უსკო-ს 28 ნოემბერს მიმართა.  მისი ანალოგიური განცხადება, რომელიც აჭარის უმაღლეს საბჭოში შემოვიდა, 30 ნოემბრით თარიღდება და ის საკანონმდებლო ორგანოს თავმჯდომარის დავით გაბაიძის სახელზეა“.

დავით თარხან-მოურავის ნაცვლად უმაღლეს საბჭოში „პატრიოტთა ალიანსის“ სიის მეორე ნომერი, ბიზნესმენი ზაზა ოქუაშვილი უნდა შევიდეს, თუმცა მისი უფლებამოსილების ცნობისთვის შესაბამისი წერილი [თარხან-მოურავის მონაცვლეობის შესახებ] უმაღლეს საბჭოში უსკომ უნდა წარადგინოს. უსკოს კი თავის მხრივ უმაღლესმა საბჭომ უნდა მიმართოს, რომ დავით თარხან-მოურავს უფლებამოსილება შეუწყდა.

უმაღლეს საბჭოში შესვლაზე უარი განაცხადა „ერთიანი ნაციონალური მოძრაობის“ აჭარის ორგანიზაციის ლიდერმა ლევან ვარშალომიძემაც, რომელიც  უმაღლესი საბჭოს არჩევნებზე პარტიის პროპორციულ სიაში პირველი ნომერი იყო.  თუ ლევან ვარშალომიძე უარს იტყვის უმაღლესი საბჭოს წევრობაზე, პარტიული სიით საბჭოს წევრი ასმათ დიასამიძე უნდა გახდეს.

ნინო ჩხეტიას თქმით, ლევან ვარშალომიძეს შესაბამისი განცხადებით უმაღლესი საბჭოსთვის ამ დრომდე არ მიუმართავს.

15 დეკემბრის პლენარული სხდომით აჭარის უმაღლესი საბჭოს საშემოდგომო სესია დაიხურა. უმაღლესი საბჭო აჭარის მთავრობის ახალი შემადგენლობისა თუ მომავალი წლის რესპუბლიკური ბიუჯეტის დასამტკიცებლად საგანგებო სხდომებზე შეიკრიბება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com