ახალი საბაგირო გზა სანაპიროდან ყოფილი სასოფლო სამეურნეო ინსტიტუტის ტერიტორიამდე, სასტუმრო კომპლექსი, ახალი ადმინისტრაციული შენობა ბოტანიკურ ბაღში – არის თუ არა ეს „პანორამა ბათუმი“? რა მიზნით სტუმრობენ ბიძინა და ადიკო ივანიშვილები მწვანე კონცხს და რა პროექტების განხორციელებას გეგმავს ბათუმის ბოტანიკურ ბაღში ფონდი „ქართუ“?
მწვანე კონცხი / ბათუმის ბოტანიკური ბაღი
„ბიძინა ივანიშვილი რამდენჯერმე იყო მოსული, ეს ადგილები დაათვალიერა, ზოგ ადგილზე თქვა საინტერესოაო, ზოგზე – არაო. ბოლოს ერთი თვის წინ იყო, შვილთან ერთად. როგორც გავიგეთ, „პანორამას“ აშენებს – ყველა კმაყოფილი დარჩებით ისეთი რამე კეთდებაო. არაფერი ვიცით… პროექტი არ გვაჩვენეს“, – ამბობენ მწვანე კონცხზე.
ყოფილი სასოფლო-სამეურნეო ინსტიტუტის [ამჟამად ბათუმის უნივერსიტეტის] შენობა
შენობა- ნაგებობის გაბარიტები და სართულიანობა: 6-7 სართული, 200 მ/50 მ-ზე; მშენებლობის ნებართვის გამცემი ორგანო ქ. ბათუმის მუნიციპალიტეტის მერია, ადმინისტრაციული განხილვის ვადები: აპრილი-მაისი 2016 წ.“
ყოფილი სასწავლებლის ტერიტორიის დიდი ნაწილი, აჭარის ფინანსთა და ეკონომიკის სამინისტროს მიერ გამოცხადებულ აუქციონზე, სავარაუდოდ, ბიძინა ივანიშვილთან დაკავშირებულმა კომპანიამ – „ბიზნეს დეველოპმენტმა“ შეისყიდა.
„ბიზნეს დეველოპმენტთან“ დაკავშირებით ბათუმის მერიის არქიტექტურისა და ურბანული დაგეგმარების სამსახურში „ბათუმელებს“ განუცხადეს, რომ „გასავლელია პირველი ეტაპი, უშუალოდ პროექტი კი მერიაში შეტანილი არ არის“.
ხედი ყოფილი „სასოფლოს“ ტერიტორიიდან სადაც სასტუმრო უნდა აშენდეს
აუქციონის პირობების თანახმად, „ბიზნეს დეველოპმენტი“ ვალდებულია სამი წლის ვადაში ააშენოს არანაკლებ 150-ნომრიანი სასტუმრო, ავტოსადგომით, ღია და დახურული აუზებით, კვების ობიექტებით, გამაჯანსაღებელი ცენტრით – კომპანიამ არანაკლებ 30 მილიონი ლარის ინვესტიცია უნდა განახორციელოს.
კომპანიისა და ბოტანიკური ბაღის ტერიტორიებს დღეს ერთმანეთისგან მხოლოდ ბაღში მისასვლელი გზა ყოფს, რომლითაც ასევე სარგებლობს რამდენიმე ოჯახი.
„კომპლექსის მშენებლობას ბოტანიკურ ბაღთან არანაირი კავშირი არ აქვს – ის ბაღის საზღვრებს გარეთ ხდება. ამ მშენებლობას არც ერთი კვადრატული მეტრი ბოტანიკური ბაღისა არ მოხმარდება“, – განაცხადა „ბათუმელებთან“ ბოტანიკური ბაღის დირექტორმა ირაკლი არჩაიამ, რომელიც ამ თანამდებობაზე ბათუმის მერმა, გიორგი ერმაკოვმა წელს, 12 აპრილს დანიშნა.
სამუშაოები ბათუმის ბოტანიკურ ბაღში „ქართუს“ დაფინანსებით
ირაკლი არჩაია ადასტურებს, რომ მწვანე კონცხზე საბაგირო გზა აშენდება და პროექტზე ფონდი „ქართუ“ მუშაობს. „შერჩეულია ტრასა, საბაგირო გზა გაივლის ქვედა და ზედა პარკის ტერიტორიას – ფაქტობრივად გადაუვლის პარკს. ჩასასხდომის სადგურები იქნება ქვედა პარკში – მწვანე კონცხის შემოსასვლელიდან ზღვის პირთან; მეორე ჩასასხდომი – ზედა პარკში, ყოფილი სასოფლოს ტერიტორიაზე. ჩასხდომა სადაც მოხდება, იქნება ჩვენი ტერიტორია, ანუ შემოსავალს ამით მიიღებს ბოტანიკური ბაღი. დიდი შანსია, რომ ეს იყოს მორიგი საჩუქარი „ქართუსგან“.
ბათუმის ბოტანიკური ბაღის ადმინისტრაციის შენობა ბაღის ტერიტორიაზე
„ქართუ“ ასევე დააფინანსებს პროექტს, რომელიც ბოტანიკური ბაღის შემოსასვლელთან [ჩაქვის მხრიდან], მთელ რიგ მშენებლობებს ითვალისწინებს. პროექტის სავარაუდო ღირებულება არის 8 მილიონამდე აშშ დოლარი“, – აღნიშნულია ბაღის ვებგვერდზე. აქ აშენდება ვიზიტორთა ცენტრი [დამთვალიერებლისთვის მოსასვენებელი ოთახებით, ბარგის შესანახი განყოფილებით და სხვ], მის მიმდებარედ კი – ფასიანი ავტოსადგომი. „ქართუს“ დაფინანსებით უკვე დაწყებულია მეწყერსაშიში უბნების გამაგრება ბოტანიკურ ბაღში. ასევე „საპროექტო-სახარჯთაღრიცხვო სამუშაოები სამეცნიერო-კვლევითი ლაბორატორიული კორპუსისა, ბაღის დენდროლოგიური მუზეუმის შექმნისა, ე.წ. „დალფონსის“ სააგარაკე შენობის“, – წერია ადმინისტრაციის განცხადებაში.
ბოტანიკური ბაღის დირექტორი „ბათუმელებთან“ ამბობს, რომ „დალფონსის“ სახლის რეაბილიტაციაზე ჯერ „ქართუსთან“ და არც სხვა სპონსორებთან არ უსაუბრიათ. „ვინაიდან ეს ქველმოქმედებაა, ფინანსებზე ინფორმაცია ჩვენ არ გვაქვს. ჩვენ ვზედამხედველობთ სამუშაოებს“, – აცხადებს ირაკლი არჩაია.
ბათუმის ბოტანიკური ბაღის ადმინისტრაციის შენობა
მისივე თქმით, მწვანე კონცხის მხრიდან, ზემო შესასვლელიდან 100 მეტრში, ბაღის ტერიტორიაზე ახალი კორპუსი აშენდება: „აქ განთავსდება ადმინისტრაცია, ლაბორატორიები, საგამოფენო და საპრეზენტაციო სივრცეები. ახალი შენობის აგება არავის ხელს არ შეუშლის. პრაქტიკული იქნება ჩვენთვისაც და მანქანებისგანაც განტვირთავს ბაღს“.
კითხვაზე, ხომ არ გასხვისდება ადმინისტრაციის გარემონტებული შენობა [რომელიც ბაღში დგას და, სავარაუდოდ, 1902 წელშია აგებული], ირაკლი არჩაია პასუხობს: „არავის არ უნდა გაუჩნდეს ეჭვი, რომ ჩვენ რაღაცის სანაცვლოდ ამ შენობას გადავცემთ ვინმეს. პირიქით, ეს შენობა უფრო მეტად უნდა დავტვირთოთ – შესაძლოა მაღალი რანგის სტუმრებს დავუთმოთ შეხვედრებისთვის… ეს შენობა დარჩება ბოტანიკურ ბაღს თავისი კულტურული მემკვიდრეობის ძეგლის სტატუსით, რომელიც მას უნდა მიენიჭოს.“
ხედი ბათუმის ბოტანიკური ბაღის ადმინისტრაციის შენობის ეზოდან
რაც შეეხება ბიძინა ივანიშვილის ძმის, ადიკო ივანიშვილის ხშირ სტუმრობას ბოტანიკურ ბაღში, ბაღის დირექტორი ამბობს, რომ „ადიკო ივანიშვილს არანაირი კავშირი არ აქვს ბოტანიკურ ბაღთან, ის არ არის ჩვენი თანამშრომელი, არც ჩვენგან გასამრჯელოს იღებს, არც შტატგარეშე თანამშრომელია და არც კონსულტანტი. ის არის ბოტანიკური ბაღის მეგობარი“.
ფონდი „ქართუ“ ბოტანიკურ ბაღს, როგორც ადმინისტრაციის განცხადებაშია აღნიშნული, 2005 წლიდან დღემდე უწყვეტად ეხმარება: „ბატონი ბიძინა ივანიშვილის მხრიდან ბოტანიკური ბაღის ტერიტორიების რა მითვისებაზეა ლაპარაკი, როცა ბატონი ბიძინა პირიქით, 2005 წლიდან, დღემდე ღვიძლი შვილივით, გვერდში უდგას, ეფერება, ელოლიავება და ამდიდრებს ბაღის, როგორც კოლექციას და ფიტოგეოგრაფიულ განყოფილებებს, ისე ინფრასტრუქტურას და ბაღის თითოეული თანამშრომლის პირად ბიუჯეტს!“
ბოტანიკური ბაღი ბათუმის საკუთრებაა და ის ქალაქის ბიუჯეტიდანაც ფინანსდება. 2016 წლის ბიუჯეტში ბათუმის ბოტანიკური ბაღისთვის 1 მილიონ 324 ათასი ლარია გამოყოფილი, საიდანაც 1 მილიონ 9 ათასი ლარი მხოლოდ ბაღის თანამშრომელთა ხელფასებში დაიხარჯება. აქ 138 ადამიანი მუშაობს.
მწვანე კონცხი / გადამცემი ანძა ბათუმის ბოტანიკური ბაღის ზემოთა შესასვლელიდან
რაც შეეხება დამატებით გასამრჯელოს, დირექტორის თქმით, „ქართუსგან“ თანამშრომელთა 90% იღებს დამატებით ანაზღაურებას. ასევე „ქართუს“ დაფინანსებით წელს დაგეგმილია ბაღის თანამშრომელთა ევროპის ქვეყნებში გადამზადება.
ბათუმის ბოტანიკური ბაღის ტერიტორია დღეს 1 მილიონ 86 ათას 819 კვ/მ-ია. რეესტრის ამონაწერის მიხედვით, 2008 წლის აპრილიდან 2012 წლის მაისამდე, ბოტანიკური ბაღის ტერიტორია 4 ჰექტარით არის შემცირებული.
ხედი ბათუმის ბოტანიკური ბაღიდან / თედო ჯორბენაძის ფოტოები
