მახინჯაურში, ყოფილი სანატორიუმი „მზიურის“ ტერიტორიაზე მრავალწლოვან ხეებს ჭრიან. როგორც ადგილობრივებმა „ბათუმელებს“ უთხრეს, აქ გაყავთ გზა ტიტას ხემდე, რომელიც ექს-პრემიერმა ბიძინა ივანიშვილმა შეკვეთილში უნდა გადაიტანოს. ამ გადასატან ხემდე გზის მისაყვანად კი რამდენიმე მრავალწლოვანი ნაძვის ხის მოჭრა გახდება აუცილებელი.
ადგილზე „ბათუმელებს“ უთხრეს, რომ ხეები, რომლებიც მოიჭრა არ იყო ჯანმრთელი, თუმცა, არც იმ კომპანიის სახელი გვითხრეს, რომელიც სამუშაოებს ატარებს და არც ხეების მოჭრის ნებართვის არსებობა-არარსებობაზე თქვეს რამე: „კოტეჯები უნდა აშენდეს“.
კომპანია „ზიმო“-ში კი, რომელსაც გადააქვს ბიძინა ივანიშვილის ხეები აჭარიდან, „ბათუმელებს“ განუცხადეს, რომ ისინი ყოფილი „მზიურის“ ტერიტორიაზე არ მუშაობენ და არც „მზიურის“ ახლომახლო ტერიტორიიდან აქვთ დაგეგმილი ხის გატანა: „ჩვენ არ გაგვაქვს და სხვა კომპანიას თუ გააქვს ვერ გეტყვით“. „ზიმოში“ გვითხრეს, რომ შესაძლოა ივანიშვილის ხეების გატანაზე სხვა კომპანიებიც მუშაობდნენ.
ყოფილი პანსიონატ „მზიურისა“ და სანატორიუმ „მახინჯაურის“ ტერიტორიები აჭარის მთავრობამ პირდაპირი მიყიდვის წესით გაასხვისა კომპანიაზე [შპს „სტატოტელი“], რომლის მფლობელი კომპანიაც „საპარტნიორო ფონდის“ პარტნიორია.
„ბათუმელები“ „სტატოტელის“ დირექტორს, გოჩა ჯაიანს დაუკავშირდა, რომელმაც აღნიშნა, რომ მათ კომპანიას სამუშაოები „მზიურის“ ტერიტორიაზე ჯერ არ დაუწყია: „შევეცდები გავარკვიო რა ხდება“.
აჭარის ფინანსთა და ეკონომიკის სამინისტროს პრესსამსახურში საკითხის გარკვევს დაგვპირდნენ.
ბათუმის მერიის გამწვანებისა და ლანდშაფტური დაგეგმარების სამსახურში „ბათუმელებს“ განუცხადეს, რომ აღნიშნულ ტერიტორიაზე ხეების მოჭრასთან დაკავშირებით მათთვის არავის მიუმართავს, თუმცა ისიც განაცხადეს, რომ კერძო მესაკუთრეს უფლება აქვს საკუთარ ნაკვეთში ნებისმიერი ჯიშის ხე მოჭრას.
ხეები კერძო ტერიტორიაზეა მოჭრილი თუ არა, „ბათუმელებმა“ ჯერჯერობით ვერც ეს დააზუსტა.
ყოფილ სანატორიუმ „მზიურის“ მიმდებარე ტერიტორია. აქ მოჭრილია ერთი ნაძვი, მეორე კი სავარაუდოდ, მაგნოლიაა. 12.01.2017. ფოტო: თედო ჯორბენაძე
ნაძვის ტოტებით მოფენილი „გზა“ ყოფილი სანატორიუმი „მზიურის“ ტერიტორიაზე. 12.01.2017. ფოტო: თედო ჯორბენაძე
ყოფილი სანატორიუმი „მზიურის“ მიმდებარე ტერიტორია. 12.01.2017. ფოტო: თედო ჯორბენაძე
ყოფილი სანატორიუმი „მზიურის“ მიმდებარე ტერიტორია. როგორც ამბობენ, ბიძინა ივანიშვილს სავარაუდოდ, იმ მრავალწლოვანი ხის გადატანა სურს შეკვეთილში, რომელიც ამ ნაძვების უკან მოჩანს. გზის მისაყვანად კი რამდენიმე ნაძვის მოჭრა გახდება აუცილებელი. 12.01.2017. ფოტო: თედო ჯორბენაძე
ყოფილ სანატორიუმ „მზიურის“ ტერიტორია. 12.01.2017. ფოტო: თედო ჯორბენაძე
