გიორგი სეხნიაიძე 20 წლის თუშია, წლების წინ დაინტერესდა თუშეთის მცენარეების სამკურნალო თვისებებით. შეიტყო, რომ გვირილას, ბეგქონადარას, თავშავას, დეკასა და სხვებს სასიამოვნო გემოს გარდა ადამიანისთვის ჯანმრთელობაც მოაქვს. გადაწყვიტა შეეგროვებინა ყველა მცენარე, რომლებისგანაც  თუშეთში ყოველდღიურად ამზადებენ ნაყენს და ბარის ადამიანებამდე ცხელი სასმლის სახით მიეტანა თუშეთის მთების არომატი.

თავიდან მხოლოდ ერთი მიზანი ჰქონდა, შენაქოში, მის სახლში მოსულ უცხოელ ტურისტებს დაეგემოვნებინათ თუშური ჩაი. დააკვირდა, რომ ყველას მოსწონდა და გადაწყვიტა ბარშიც შეეთავაზებინა დეკის, გვირილის, თავშავას, კრაზანასა და ბეგქონდარას ჩაი.

18 წლის იყო გიორგი, როცა დედასთან ერთად 2016 წელს მცენარეების შეგროვება დაიწყო. შესაფუთი მასალებიც შეიძინა, რომელზეც ამ მცენარეების სამკურნალო თვისებებია დატანილი და თბილისის სუპერმარკეტებში, ტურისტულ ზონებში დაიწყო ჩაის დარიგება.

გიორგი თბილისში არქიტექტურის ფაკულტეტზე სწავლობს, მუშაობს და ჩაი „უშაროს“ აწარმოებს. დედისერთაა. მას და დედას, ნანო სეხნიაიძეს, საქმე განაწილებული აქვთ: დედა ჩაის კრეფს, აფასოებს და ფუთავს, გიორგი – მარკეტინგულ ნაწილზე ზრუნავს.

გიორგის თქმით, მცენარეების კრეფისას დიდი სიფრთხილის გამოჩენაა საჭირო, აუცილებელია მაკრატლით მოიჭრას მცენარის ახალწამოსული ყლორტები, რომ ფესვიანად არ ამოიძირკვოს. ასევე სასურველია შეძლებისდაგვარად სხვადასხვა ადგილას დაიკრიფოს მცენარე ყოველ სეზონზე, რომ ერთსა და იმავე ნაკვეთზე კრეფის გამო არ გადაშენდეს.

გიორგის წარსულიც, აწმყოც და მომავალიც თუშეთს უკავშირდება. ამბობს, რომ მისი წინაპრები დიდი ხნის წინ დასახლდნენ თუშეთში, შენაქოში და პაპის პაპების ამბებს ჰყვება:

„მერვე-მეცხრე თაობის თუში ვარ. ჩემი წინაპარი შენაქოში გადმოსულა საცხოვრებლად. თუშური წესების მიხედვით, აქ გადმოსულ ადამიანს სოფელში მაშინვე არ ადგმევინებდნენ სახლს, სამი წელი სოფლის განაპირას უნდა ეცხოვრა ახალმოსულს. შენაქოსა და ომალოს შორის ხევი ყოფილა, სადაც კოშკი იდგა, სიყვარულის კოშკს ეძახდნენ, იქ უცხოვრია ჩემს  წინაპარს, შენაქოელი ქალი შეურთავს ცოლად. სამი წლის განმავლობაში აკვირდებოდნენ თუშები ახალმოსულ სტუმარს, ამ დროის განმავლობაში თეთრი მოზვერი უნდა გაეზარდა და დაეკლა, ნიშნად იმისა, რომ მის გადმოსახლებაში ღვთის ხელი ერია. მერე რომელიმე თუშურ გვარს უნდა დანათესავებოდა, მხოლოდ ამის შემდეგ ითვლებოდა სოფლის მკვიდრად და ხმასაც ვეღარავინ გასცემდა, ასეთი ყოფილა მაშინდელი წესი.

ერთხელ შენაქოელებს ბრძოლა ჰქონიათ და ჩემი წინაპრისთვის, როგორც უცხოსთვის არ დაუძახნიათ, თავისით წასულა და თავიც გამოუჩენია. ამის შემდეგ თემის ნამდვილ წევრად მიუღიათ“, – ჰყვება გიორგი.

მათი სახელები არ ახსოვს, მაგრამ იცის რომ, პაპის პაპა სეხნიაიძე ლადო იყო. როგორც თვითონ ამბობს, „დიდ პაპა ლადო სეხნიაიძე” ფოტო ბიძისგან აქვს სახსოვრად. ლადო პაპა ფოტოზე მარცხნიდან პირველია.

თუშეთი ახლა დაცლილია. როგორც გიორგი გვეუბნება, შენაქოში სულ სამი ადამიანი ცხოვრობს მუდმივად, მთელ თუშეთში კი, როგორ თუშეთში ახმეტის გამგებლის წარმომადგენელი, ლადო კახოიძე ამბობს,  მუდმივად მცხოვრები, ზამთარსაც თუშეთში რომ ატარებს, ასეთი წელს მხოლოდ 22 კაცი იყო.  60-იანი წლების ფოტოზე ჩანს, რომ ამ პერიოდში სოფელი შენაქო ცოცხლობდა და სახლებიც საცხოვრებლად  გამართული იყო.

უკვე ერთი წელია, რაც თუშეთში კვირაში ერთხელ დაფრინავს ვერტმფრენი, არის ინტერნეტიც, რამაც ადამიანებს გაუადვილა ყოფა: თუ ზამთრიდან მოყოლებული ექვსი-შვიდი თვის განმავლობაში თუშეთთან კავშირი წყდებოდა, ახლა იქ მყოფებს მუდმივი კავშირი აქვთ ახლობლებთან.

20 წლის გიორგის საოჯახო სასტუმროსა და კაფეს მოწყობის გეგმაც აქვს, ამისთვის პროექტ „აწარმოე საქართველოში“ ფარგლებში გრანტი მოიპოვა და შენაქოს მამაპაპისეული სახლი აგვისტომდე უნდა შეაკეთოს, გაალამაზოს. მისი გათვლებით, ივლისის ბოლოდან თუშეთში უკვე საკუთარ სასტუმროსა და კაფეში უმასპინძლებს უცხოელ ტურისტებს.

ჩაიზე ნელ-ნელა მოთხოვნა იზრდება და როცა გიორგის დედა, ნანო სეხნიაიძე, მცენარეების კრეფასა და შეფუთვას ვერ უმკლავდება, მკრეფავ-შემგროვებლებს ქირაობენ თუშეთში. გიორგიმ 2017 წელს ასე დაასაქმა თუშეთში ზაფხულის სეზონზე სამი ადამიანი.

თუშური ჩაის შესახებ უცხოელი ტურისტები ფესტივალებიდანაც იგებენ, ახლაც შაბათ-კვირას, 21-22 აპრილს, მთაწმინდის ჩაის ფესტივალი იმართება, სადაც სხვადასხვა ქვეყანაში წარმოებულ ჩაისთან ერთად თუშური სურნელიც დატრიალდება.

20 წლის გიორგი მიიჩნევს, რომ ცხოვრებაში გაუმართლა, აკეთებს იმას, რაც მოსწონს და ყველა საქმიანობა საოცნებო ადგილს – თუშეთს უკავშირდება. თუშეთის სივრცითი დაგეგმარების პროექტშია ჩართული, რაც ბევრ რამეს გულისხმობს, მათ შორის 12 სოფლის განაშენიანების გეგმის დამუშავებას, მატერიალური და არამატერიალური კულტურული მემკვიდრეობის კვლევა-ძიებას, აღწერას და ა.შ.

გიორგის საოცნებო მომავალი თუშეთია. „ჯერ ჩემთვის ყველაზე მნიშვნელოვანი უნივერსიტეტი და სამსახურია. სწავლას რომ მოვრჩები, ერთი წლის შემდეგ, თუშეთში  ვაპირებ დასახლებას, იქ ყველაფერს სხვანაირად აღიქვამ, სხვანაირად გრძნობ თავს, თუშისთვის ბარი ჯოჯოხეთია… გაუქმებული და დატოვებული სახლიდან რომ კვამლი ამოვა, მეტი რა უნდა ვინატრო? ვნახოთ, რა იქნება“, – ამბობს გიორგი.

ცოტა ხნის წინ ბათუმს ესტუმრა. აქ შეხვდა პირველად ზღვას, როცა ვკითხე, რას ნიშნავდა თუშისთვის ზღვასთან პირველი შეხვედრა-მეთქი, მიპასუხა: „ბევრი წყალია ერთად დაგროვილი და მოძრაობს, სხვა რაო“, თან იცინოდა, მაგრამ ყველამ იცის, რომ თუშები ბევრს არასდროს ლაპარაკობენ და ვერავინ გაიგებს სინამდვილეში რას ფიქრობს მთის ხალხი ზღვაზე.

2017 წელს აჭარაში მოქმედ სამორინეებში ვიზიტორთა რაოდენობამ ჯამურად 1 მილიონ 96 ათასი კაცი შეადგინა, რაც 668 560-ით [61%] მეტია წინა წელთან შედარებით. ვიზიტორთა 68% [745 280] უცხო ქვეყნის, დანარჩენი [32%] კი საქართველოს მოქალაქეები იყვნენ. ამ მაჩვენებლებს რეგიონში მოქმედი სამორინეებისგან მიღებული ინფორმაციის საფუძველზე აჭარის ფინანსთა და ეკონომიკის სამინისტრო ავრცელებს.

2017 წელს აჭარაში, კერძოდ ბათუმში, ფუნქციონირებდა 9 სამორინე. აღნიშნული სამორინეების მიერ ბათუმის ბიუჯეტში გადახდილი სათამაშო ბიზნესის მოსაკრებლის ჯამურმა თანხამ შეადგინა 24,1 მილიონი ლარი. მთლიანობაში კი, ბათუმის ბიუჯეტში, გასულ წელს, სათამაშო ბიზნესის მოსაკრებლის სახით 30 მილიონ 630 ათას 200 ლარი შევიდა.

2017 წელს ხელვაჩაურის მუნიციპალურ ბიუჯეტში ჩარიცხულმა სათამაშო ბიზნესის მოსაკრებელმა შეადგინა 555 700 ლარი, ხოლო ქობულეთის მუნიციპალურ ბიუჯეტში – 129 100 ლარი.

2017 წელს აჭარის რესპუბლიკურ ბიუჯეტში რეგიონში მოქმედი სამორინეების მიერ გადახდილია 7,7 მილიონი ლარი.

მთლიანობაში, გასულ წელს, სათამაშო ბიზნესიდან გადახდილმა თანხამ აჭარაში 39 015 000 ლარი შეადგინა.

აჭარის ფინანსთა და ეკონომიკის სამინისტროს განცხადებით, სათამაშო ბიზნესი ბიზნესსექტორის ნაწილია, რომელსაც რეგიონის ეკონომიკისათვის გააჩნია
ფისკალური, საინვესტიციო, ტურიზმის ხელშემწყობი, დასაქმებითი და ზოგადეკონომიკური ეფექტები:

„საქართველოში, საკუთრივ კი აჭარის რეგიონში, სათამაშო ბიზნესს გააჩნია შემდეგი უპირატესობები:-

[checklist]

• სათამაშო ბიზნესის ხელშემწყობი კანონმდებლობა
• ნაკლები რეგულაციები და შეზღუდვები ბიზნესში
• მეზობელ ქვეყნებში არსებული აკრძალვა სათამაშო ბიზნესზე
• ლიბერალური სავიზო პოლიტიკა
• მიმზიდველი საინვესტიციო კლიმატი და ბიზნესგარემო.“

[/checklist]

აჭარის მთავრობა დაბა ჩაქვში, ზღვასთან ახლოს, 363 კვადრატულ მეტრ არასასოფლო-სამეურნეო მიწის ნაკვეთს უპირობო აუქციონის წესით ყიდის. ქონების საწყისი ფასი 21 000 ლარია, ვაჭრობის ბიჯი კი – 500 ლარი. მთავრობის ინფორმაციით, საუკეთესო წინადადებად ჩაითვლება გასაყიდი ფასის დასახელება, რომელიც უნდა აღემატებოდეს გამოცხადებულ საწყის საპრივატიზებო საფასურს, არანაკლებ ერთი ბიჯის ოდენობით.

სამინისტროს მიერ გამოქვეყნებული ფოტოების მიხედვით, გასაყიდ ფართობზე ჩაქვში, ნინოშვილის #2-ში, დაწყებულია მშენებლობა.

აჭარის მთავრობა 18 კვადრატულ მეტრ არსასოფლო სამეურნეო მიწის ნაკვეთს ყიდის, ასევე, გონიოს დასახლებაში, ზღვასთან ახლოს. პირობებში მითითებულია ასევე, რომ მიწის ნაკვეთზე განთავსებულია კერძო მესაკუთრის შენობის ნაწილი. ქონების საწყისი ფასი 7000 ლარია, ვაჭრობის ბიჯი კი – 150 ლარი.

აჭარის ფინანსთა და ეკონომიკის სამინისტროს ინფორმაციით, რესპუბლიკურ ბიუჯეტში გასულ, 2017 წელს, მიწის გაყიდვიდან მიღებულმა შემოსავალმა 25 მილიონ 516 ათას 900 ლარი შეადგინა.

მიმდინარე წლის 14 მაისიდან თუ თქვენ მიიღებთ მოკლე ტექსტურ შეტყობინებას იმის შესახებ, რომ დაგიმტკიცდათ სესხი, სავალდებულოა, რომ ამ შეტყობინებაში ასევე იყოს მითითებული ამ შეთავაზების წლიური ეფექტური საპროცენტო განაკვეთი.

თუ თქვენ მიიღეთ მოკლე ტექსტური შეტყობინება, რომ დაგიმტკიცდათ 1000 ლარი სესხი:

ამ შეტყობინებას 14 მაისიდან აუცილებლად უნდა ახლდეს ასევე წლიური ეფექტური საპროცენტო განაკვეთის შესახებ ინფორმაცია.

მაგალითად:

თქვენ იღებთ სესხს 1000 ლარის ოდენობით ერთი წლით, წლიური საპროცენტო განაკვეთი – 20%, ყოველთვიური შენატანი – 92,63 ლარი, სესხის გაცემის საკომისიო – 2% [20 ლარი]. ამ შემთხვევაში ეფექტური საპროცენტო განაკვეთი არის – 26,9%.

ეფექტური საპროცენტო განაკვეთის სხვა მაგალითები იხილეთ ბმულზე.

საქართველოს ეროვნული ბანკის ინფორმაციით, ფინანსური მომსახურების მომხმარებელთა უფლებების დაცვის სტანდარტის ამაღლების მიზნით მომზადდა ცვლილებები „ფინანსური ორგანიზაციების მიერ მომსახურების გაწევისას მომხმარებელთა უფლებების დაცვის წესში“, რომელთა გათვალისწინებაც ფინანსურ ორგანიზაციებს 2018 წლის 14 მაისიდან მოუწევთ.

ამ ცვლილებების მიხედვით, გამკაცრდა მომხმარებლის ინფორმირების მოთხოვნები სასესხო და სადეპოზიტო პროდუქტების შეთავაზებისას. კერძოდ, ფინანსური ორგანიზაცია ვალდებული იქნება მომხმარებლისთვის სასესხო და სადეპოზიტო პროდუქტის პირადი შეთავაზებებისას მას მიაწოდოს ინფორმაცია შეთავაზებული პროდუქტის ეფექტური საპროცენტო განაკვეთის შესახებ.

აღნიშნული მოთხოვნა ვრცელდება, მათ შორის, ისეთი დისტანციური კომუნიკაციის საშუალებების გამოყენებით პროდუქტის შეთავაზებაზე, როგორიცაა, მაგალითად, ინტერნეტ-ბანკი, გადახდის თვითმომსახურების კიოსკები და ბანკომატები, მოკლე ტექსტური შეტყობინებები და ა.შ.

„ცვლილებამდე მოქმედი რედაქციით, ამგვარი ვალდებულება ფინანსურ ორგანიზაციებს მხოლოდ იმ შემთხვევაში ჰქონდათ, თუ შეთავაზებაში პროდუქტის ფასის განმსაზღვრელ ნებისმიერ პარამეტრს მიუთითებდნენ“ – აცხადებს ეროვნული ბანკი – „ამასთან, ცვლილებებით განისაზღვრა ფინანსურ ორგანიზაციასა და მომხმარებელს შორის დისტანციური კომუნიკაციის საშუალებებით ხელშეკრულებების დადების წესი, რაც, მათ შორის, გულისხმობს მომხმარებლისთვის მნიშვნელოვანი ინფორმაციისა და შეთავაზების პირობების წინასწარ მიწოდებასა და ამ ინფორმაციის შემდგომ ხელმისაწვდომობას, ასევე მომხმარებელთან ზეპირი კომუნიკაციის სტანდარტებს“.

ბანკის ინფორმაციით, ცვლილებების შედეგად ასევე, დაზუსტდა ხელშეკრულების ფორმების ნიმუშები მათი შინაარსის უფრო ცხადად გამოხატვისა და მომხმარებლის ინფორმირებულობის უზრუნველყოფის მიზნით.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, უახლოეს დღეებში ბათუმში ღრუბლიანი და წვიმიანი ამინდია მოსალოდნელი. 20-21 აპრილს ბათუმში დროგამოშვებით იწვიმებს.

იქროლებს დასავლეთის ქარი 10-15 მეტრი წამში.

ჰაერის ტემპერატურა სანაპირო რაიონებში იქნება:

• დღისით: 12 – 17 გრადუსი  
• ღამით: 10 – 15 გრადუსი 

მთაში მოსალოდნელია:

• დღისით: 7 – 12 გრადუსი 
• ღამით: 2 – 7 გრადუსი 

სინოპტიკოსების ცნობით, ბათუმში კვირას, 22 აპრილს გამოიდარებს.

ბოლო მონაცემებით, ზღვის წყლის ტემპერატურა 12 გრადუსია.

_______________

თორნიკე თავაძის ფოტო 

აჭარაში ქარსაფარი ზოლების შესწავლას აჭარის სოფლის მეურნეობის სამინისტრო აპირებს. ტენდერი 29 ათას ლარად კომპანია „იბერჯეს კონსალტინგმა“ მოიგო, რომელმაც ელექტრონულ ტენდერში ყველაზე დაბალი ფასი შესთავაზა სამინისტროს. გამარჯვებული კომპანია კვლევის მოსამზადებლად გიზო გოგიჩაიშვილის დასაქმებას აპირებს. გიზო გოგიჩაიშვილი საქართველოს გარემოს დაცვისა და სოფლის მეურნეობის სამინისტროში განყოფილების უფროსად მუშაობს.

ტენდერი აჭარის სოფლის მეურნეობის სამინისტრომ 42 372 ლარზე 2018 წლის პირველ მარტს გამოაცხადა. სატენედერო დოკუმენტაციის მიხედვით, ხელშეკრულების გაფორმებიდან 140 დღეში უნდა მომზადდეს კვლევა – „ქარსაფარი ზოლების მდგომარეობის შესწავლა, მათი აღდგენის საჭიროებების, ასევე გასატარებელი ღონისძიებების და ამ ღონისძიებათა ტექნიკური აღწერილობა და ფინანსური დანახარაჯების შეფასება.“

„გაბატონებულ ქარებს გამოვიკვლევთ, ქარსაფარ ზოლებს, რაც იყო ჩვენს რეგიონში. ამ კვლევით ასევე დადგინდება, სად არის საჭიროება აღდგეს ქარსაფარი ზოლი,“ – ამბობს ჯიმშერ დიასამიძე, აჭარის სოფლის მეურნეობის სამინისტროს აგრარული განვითარების დეპარტამენტის დარგობრივი განყოფილების უფროსი.

22 მარტს აჭარის სოფლის მეურნეობის სამინისტრომ ტენდერში მონაწილე კომპანია „იბერჯეს კონსალტინგს“ დაზუსტების წერილი მისწერა, სადაც აღნიშნულია, რომ „წარმოდგენილი სპეციალისტების ჯგუფში სავალდებულოა იყოს მინიმუმ ერთი აგრარული დარგის სპეციალისტი – მემცენარეობის მიმართულებით, რომელსაც ექნება ბოლო 5 წლის განმავლობაში აგრარული დარგის მიმართულებით სამეცნიერო საქმიანობის გამოცდილება, რაც უნდა დადასტურდეს შესაბამისი ხელშეკრულებით ან ცნობებით.“

სატენედერო დოკუმენტაციის მიხედვით, აჭარის სოფლის მეურნეობის სამინისტროს კომპანია „იბერჯეს კონსალტინგმა“ მისწერა, რომ ამ პროექტში გიზო გოგიჩაიშვილს დაასაქმებს. წერილს ცნობაც ახლავს, რითაც დასტურდება, რომ გიზო გოგიჩაიშვილი 2001 წლიდან მუშაობს საქართველოს გარემოს დაცვის და სოფლის მეურნეობის სამინისტროს აგრომეტეოროლოგიისა და აგრომოდელირების განყოფილების უფროსის თანამდებობაზე.

„არა, ეს არაა ინტერესთა კონფლიქტი. ის ცენტრალური სამინისტროა, ეს კი აჭარის სოფლის მეურნეობის სამინისტროს ტენდერი იყო,“ – განმარტავს აჭარის სოფლის მეურნეობის სამინისტროს თანამშრომელი, ჯიმშერ დიასამიძე. მას ასევე ვკითხეთ მემცენარეობის კუთხით სპეციალისტის საჭიროებაზე, რაც კომპანიამ ვერ წარმოადგინა.

„ასე კონკრეტულად მემცენარეობის დარგის სპეციალისტი არ არსებობს. მას აქვს აგრარულ დარგში მუშაობის ხანგრძლივი გამოცდილება და შესაბამისი განათლება,“ – გვითხრა ჯიმშერ დიასამიძემ.

სატენდერო დოკუმენტებში ასევე იპოვით 30 მარტს გაგზავნილ წერილს, სადაც აღნიშნულია, რომ აჭარის სოფლის მეურნეობის სამინისტრომ „იბერჯეს კონსალტინგი“ გამარჯვებულად მიიჩნია და კომპანიის ხელმძღვანელი „სამინისტროში ხელშეკრულების გასაფორმებლად უნდა გამოცხადდეს 5 აპრილიდან 10 აპრილამდე“. დოკუმენტებში გაფორმებული ხელშეკრულება არ დევს.

„ხელშეკრულება უკვე გაფორმებულია და სხვა დოკუმენტებიც მზადაა, უახლოეს დღეებში აიტვირთება საიტზე… დაახლოებით აგვისტოში გვექნება კვლევა ქარსაფარ ზოლებზე,“ – ამბობს ჯიმშერ დიასამიძე, აჭარის სოფლის მეურნეობის სამინისტროს აგრარული განვითარების დეპარტამენტის დარგობრივი განყოფილების უფროსი.

მთავარ ფოტოზე: გაჩეხილი ქარსაფარი ზოლი ქობულეთში. ეს ზოლი გზის გაფართოების საჭიროებით გაჩეხეს, ივანიშვილის დენდროლოგიურ პარკში ხეები რომ გადაეტანათ.

ბათუმის შოთა რუსთაველის სახელმწიფო უნივერსიტეტის [ბსუ] სტუდენტთა ახალი საცხოვრებელი შენობის მშენებლობა 2018 წლის ივნისში უნდა დასრულებულიყო, თუმცა შენობის დასრულების ვადა, შენობაზე ერთი სართულის დამატების გამო, 25 სექტემბრამდე გადაიწია. სტუდენტთა ახალი საცხოვრებელი კორპუსი ბათუმში, ლეონიძის ქუჩაზე შენდება.

ბსუ-ს თავდაპირველი გადაწყვეტილებით სტუდენტთა საცხოვრებელი სამსართულიანი უნდა ყოფილიყო. მშენებლობა ტენდერში გამარჯვებულმა კომპანია „ვექტორმა“ დაიწყო, რომელთანაც ხელშეკრულება 2 359 000 ლარზე გაფორმდა. მშენებლობის პროცესში გადაწყდა ერთი სართულის დამატება, შესაბამისად, ხელშეკრულებაში შევიდა ცვლილება და თანხა 233 083 ლარით, ანუ 2 592 083 ლარამდე გაიზარდა.

მშენებარე სტუდენტთა საცხოვრებლის მეოთხე სართულის დასრულების სამუშაოებზე კი უნივერსიტეტმა ცალკე ტენდერი გამოაცხადა. ამჯერად სატენდერო თანხა 295 ათასი ლარია.

მეოთხე სართულის დასრულების სამუშაოები, მოიცავს შენობის შიდა კედლების მშენებლობის, შებათქაშების, სამღებრო, ჭერებისა და იატაკების, ელექტროობის, ინტერნეტის, ვიდეომონიტორინგის, სახანძრო უსაფრთხოებისა და გათბობის სისტემების, ცივი და ცხელი წყალმომარაგების, შიდა საკანალიზაციო სისტემების, სანიტარული კვანძების მოწყობის და სხვა სახის სამუშაოებს.

ანალოგიურ სამუშაოებს შენობის სამ სართულზე მშენებელი კომპანია „ვექტორი“ ჩაატარბსს, შენობის მეოთხე სართულზე კი სამუშაოები, შესაძლოა, ტენდერში გამარჯვებულმა სხვა კომპანიამ შეასრულოს.

როგორი იქნებოდა სამსართულიანი ახალი სტუდენტთა საცხოვრებელი, შეგიძლიათ იხილოთ ამ ბმულზე.

უნივერსიტეტის კანცლერმა, ჯემალ ანანიძემ, რამდენიმე თვის წინ „ბათუმელებთან“ განაცხადა, რომ საერთო საცხოვრებლის მშენებლობისთვის 3 მილიონი ლარი უნივერსიტეტმა მწვანე კონცხზე არსებული აგრარული ფაკულტეტის სასწავლო კორპუსისა და საერთო საცხოვრებლის გასხვისებით, კერძო კომპანიისგან მიიღო.

ამავე თემაზე:

19 აპრილიდან ქართველი რეჟისორის, ზაზა ხალვაშის ახალ ფილმს – „ნამე“ კინოთეატრებში აჩვენებენ, მათ შორის ბათუმის „აპოლოშიც“.

„ნამე“ ეროვნული კინოცენტრის მხარდაჭერით შექმნილი ფილმია და საქართველო-ლიტვა-საფრანგეთის კოპროდუქციას წარმოადგენს.

საქართველოს კინემატოგრაფიის ეროვნული ცენტრის ცნობით, ფილმის პრემიერა ტოკიოს საერთაშორისო კინოფესტივალის მთავარ საკონკურსო პროგრამაში შედგა, შემდეგ კი იგი ვილნიუსისა და სოფიას კინოფესტივალებზეც აჩვენეს.

ფილმს „აპოლოში“  26 აპრილამდე აჩვენებენ.

______________

მთავარ ფოტოზე: კადრი ზაზა ხალვაშის ფილმიდან „ნამე“

ბათუმის დრამატული თეატრი რუსეთში ფესტივალზე არ გაემგზავრება. ამის შესახებ „ბათუმელებს“ თეატრის დირექტორმა ოთარ კალანდაძემ განუცხადა. თეატრალურ ფესტივალზე ბათუმის თეატრი ორლოვის თავისუფალმა თეატრმა მიიწვია.

„გადავწყვიტეთ, რომ არ წავიდეთ. არც თანხები გვაქვს ამ მიმართულებით. წასვლის შემთხვევაში გზის ფული ჩვენ უნდა გადაგვეხადა, დანარჩენი ხარჯი – სასტუმრო, კვება, მასპინძელი მხარის იყო. ასე ეწერა მოწვევის დოკუმენტში“, – გვეუბნება ოთარ კალანდაძე.

დირექტორის თქმით, ორლოვის ფესტივალი საერთაშორისო თეატრალური ფესტივალია, სადაც მონაწილეობა უნდა მიეღოთ აღმოსავლეთ ევროპის ქვეყნებსაც: „პოლონეთს, ბულგარეთს, სლოვაკეთს და ა.შ. მათ შორის ვიყავით მიწვეული ჩვენც“, – ამბობს დირექტორი.

„ბათუმელების“ კითხვაზე, იყო თუ არა თეატრში აზრი გაყოფილი ამ საკითხზე? ოთარ კალანდაძე ამბობს, რომ არა. თუმცა დასძენს, რომ სამხატვრო ხელმძღვანელს ჰქონდა განსხვავებული პოზიცია.

„მან თქვა, რომ კულტურას არ აქვს საზღვარი, მაგრამ ჩვენ მაინც ოფიციალური თანხმობა ორლოვში წასვლაზე, პოლიტიკური მოვლენების ფონზე, არ გაგვიგზავნია და არც ვაპირებთ“, – გვეუბნება ის.

როგორც დირექტორი ამბობს, ორლოვის თეატრის წარმომადგენლებმა ბათუმის დრამატული თეატრის სპექტაკლები პოლონეთსა და ლიტვაში ნახეს და ძალიან მოეწონათ: „ამის შემდეგ გაუჩნდათ მიწვევის სურვილიც“.

თეატრმა რუსეთიდან მოწვევა 26 მარტს მიიღო. გამგზავრების შესახებ გადაწყვეტილება კი თეატრს 6 აპრილამდე უნდა მიეღო.

ბათუმის თეატრის  შესაძლო გასტროლზე რუსეთში სიუჟეტი აჭარის საზოგადოებრივი მაუწყებლის გადაცემა „ჰეშთეგმა“ 17 აპრილს მოამზადა. „ჰეშთეგთან“ ფესტივალის ერთ-ერთმა ორგანიზატორმა განაცხადა, რომ მათ ფესტივალში მონაწილეობაზე დასტური აქვთ ბათუმის დრამატული თეატრიდან.

______________

მთავარ ფოტოზე: სპექტაკლის აფიშა 

„ბათუმის ციხეში მყოფი პატიმარი – ნუგზარ თაბაგარი მეშვიდე დღეა შიმშილობს,“ – აცხადებს „ახალგაზრდა იურისტთა ასოციაციის“ აჭარის ფილიალის ხელმძღვანელი ანნა მდინარაძე. იგი ორი დღის წინ შეხვდა ამ მსჯავრდებულს. სახალხო დამცველი პატიმრის შიმშილობის ფაქტს ადასტურებს. ომბუდსმენის აპარატი ამ შემთხვევას უკვე სწავლობს. სასჯელაღსრულებისა და პრობაციის სამინისტროში კი გვითხრეს, რომ ნუგზარ თაბაგარმა შიმშილობა გუშინ საღამოს შეწყვიტა.

„ჩვენ გვითხრა ნუგზარ თაბაგარმა, რომ შიმშილობს სათანადო მკურნალობის უზრუნველყოფის მოთხოვნით. ამბობს, რომ სასჯელაღსრულების მე-3 დაწესებულების ადმინისტრაცია მისი ჯანმრთელობის მდგომარეობის გამოსასწორებლად არაფერს აკეთებს. ამავე დროს, იგი უნდობლობას უცხადებს ბათუმის მე-3 დაწესებულების სამედიცინო პერსონალს. რამდენიმე დღის წინ თბილისის საქალაქო სასამართლომ მიიღო დროებითი განჩინება და სასჯელაღსრულების სამინისტროს დაავალა, ნუგზარ თაბაგარის მკურნალობა უზრუნველყოს,“ – გვითხრა ანნა მდინარაძემ, რომელიც დღესაც ბათუმის ციხეში აპირებს პატიმრებთან, მათ შორის, ნუგზარ თაბაგართან შეხვედრას.

სასჯელაღსრულებისა და პრობაციის სამინისტროში განმარტავენ, რომ ნუგზარ თაბაგარი 11 აპრილიდან შიმშილობდა. სამინისტროს პრესსამსახურის ინფორმაციით, ნუგზარ თაბაგარმა შიმშილობა შეწყვიტა და მისი ჯანმრთელობის მდგომარეობა დამაკმაყოფილებელია.

გადის თუ არა ნუგზარ თაბაგარი მკურნალობის კურსს, როცა ის მე-3 დაწესებულების სამედიცინო პერსონალს უნდობლობას უცხადებს და ამავდროულად სასამართლომ სასჯელაღსრულების სამინისტროს დაავალა ნუგზარ თაბაგარის მკურნალობის უზრუნველყოფა? – სამინისტროში გვითხრეს, რომ პაციენტი ხშირ შემთხვევაში უარს აცხადებს სამედიცინო მომსახურების მიწოდებაზე, მათ შორის სამოქალაქო სექტორის ექიმ-სპეციალისტთა მიერ დანიშნულ მკურნალობაზე.

„ნ.თ 28.11.2017 წლიდან- 28.02.2018 წლამდე მკურნალობის კურსს გადიოდა N18 ბრალდებულთა და მსჯავრდებულთა სამკურნალო დაწესებულებაში, სადაც ჩაუტარდა კლინიკო-ლაბორატორიული და დიაგნოსტიკური გამოკვლევები, სხვადასხვა ექიმ-სპეციალისტთა კონსულტაცია. არა ერთხელ იყო გაყვანილი სამოქალაქო სექტორის კლინიკაში, სადაც ასევე ჩაუტარდა მაღალტექნოლოგიური კვლევები და ექიმის კონსულტაცია,“ – აღნიშნულია სასჯელაღსრულების სამინისტროს მიერ მოწოდებულ წერილობით განმარტებაში.

ნუგზარ თაბაგარი იგი ციხის ბადრაგს წამებასა და არაადამიანურ მოპყრობაში ადანაშაულებს. ეს საქმე თბილისის საქალაქო სასამართლოში განიხილება, თუმცა 20 მარტის სხდომაზე  ნუგზარ თაბაგარის ტრანსპორტირება ბათუმიდან თბილისში ციხის ადმინისტრაციამ ავტომობილების არასაკმარისი რაოდენობის მიზეზით ვერ უზრუნველყო. ბათუმის ციხის ადმინისტრაციამ მინიმუმ ორი კვირით ადრე იცოდა თბილისის საქალაქო სასამართლოსგან, რომ ნუგზარ თაბაგარის პროცესი 20 მარტს იყო ჩანიშნული.

ადვოკატის, ბესარიონ ბოჭორიშვილის თქმით, ნუგზარ თაბაგარი აპირებდა მოსამართლის წინაშე დეტალურად ესაუბრა, თუ რა პირობებში იხდის სასჯელს ბათუმის N3 პენიტენციურ დაწესებულებაში და რაში ადანაშაულებს კონკრეტულად ციხის ადმინისტრაციის თანამშრომლებს.

ადვოკატი ასევე აცხადებს, რომ პატიმრის ჯანმრთელობის მდგომარეობიდან გამომდინარე, აუცილებელია მისი თბილისის პენიტენციურ დაწესებულებაში გადაყვანა, რადგან ის პროცედურები, რაც დაუნიშნა ექიმმა, ბათუმის არცერთ საავადმყოფოში და არც მე-3 პენიტენციურ დაწესებულებაში არ არის ხელმისაწვდომი. ადვოკატი ასეთ მდგომარეობაში პატიმრის ყოფნას ბათუმის ციხეში “სამედიცინო წამებას” უწოდებს.

ნუგზარ თაბაგარი ასევე გახლავთ გიორგი ოქროპირიძის საქმის მთავარი მოწმე, რომელმაც ბათუმის ციხის ადმინისტრაცია დაადანაშაულა არაადამიანურ მოპყრობაში. თაბაგარმა ოქროპირიძის საქმეზე გამართულ პროცესზე განაცხადა, რომ ბათუმიდან თბილისისკენ მგზავრობისას ბადრაგი მოკვლით დაემუქრა და აყენებდა სიტყვიერ შეურაცხყოფასაც.

საზოგადოება „ბათომი“ აჭარის მთავრობის თავმჯდომარეს მიმართავს, ჩართოს საზოგადოებრივი ორგანიზაციები აჭარის კულტურული მემკვიდრეობის სააგენტოს ახალი ხელმძღვანელის შერჩევის საკითხში. „ბათუმელები“ სრულად გთავაზობთ მიმართვის ტექტს:

„აჭარის მთავრობის თავმჯდომარეს, ზურაბ პატარაძეს

ბატონო ზურაბ,

ბოლო წლებში ბათუმში გატარებულმა კულტურული მემკვიდრეობის დაცვისა და ურბანულმა პოლიტიკამ კატასტროფული შედეგების წინაშე დაგვაყენა. მრავალი მცდელობის მიუხედავად ვერ შევძელით თქვენი დარწმუნება, რომ არსებული მავნე პრაქტიკა კანონიერების ჩარჩოში მოგექციათ. არ მიიღეთ არცერთი სასარგებლო სამართლებრივი აქტი, არ შეასრულეთ მოცემული პირობა.

17 აპრილს ცნობილი გახდა, რომ აჭარის კულტურული მემკვიდრეობის დაცვის სააგენტოს ხელმძღვანელმა თანამდებობა დატოვა. ბათუმში კულტურული მემკვიდრეობის კუთხით არსებული მძიმე მდგომარეობის გათვალისწინებით,  უაღრესად მნიშვნელოვანია, ვინ დაიკავებს აჭარის კულტურული მემკვიდრეობის დაცვის სააგენტოს ხელმძღვანელის თანამდებობას, ამიტომაც მოვითხოვთ, აჭარის მთავრობამ კულტურული მემკვიდრეობის სააგენტოს ახალი ხელმძღვანელი მხოლოდ საზოგადოებრივ ორგანიზაციებთან კონსულტაციების შემდეგ წარადგინოს.

პატივისცემით,

საზოგადოება „ბათომი“

„ბათომი“ აჭარაში ერთადერთი არასამთავრობო ორგანიზაციაა, რომელიც მხოლოდ კულტურული მემკვიდრეობის დაცვის საკითხებზე მუშაობს.

__________________

წაიკითხეთ ამავე თემაზე:

„ბათომის“ კიდევ ერთი მიმართვა ზურაბ პატარაძეს

ისტორიულ ქალაქს მხოლოდ ძეგლის სტატუსის მქონე შენობები არ ქმნიან – „ბათომის“ ღია წერილი მერს

„ბათომი“: მორატორიუმი ერთადერთი გამოსავალია ქალაქის ნგრევის შესაჩერებლად 

საზოგადოება “ბათომის” ღია წერილი ზურაბ პატარაძეს

ბათუმის საფეხბურთო სტადიონის სამშენებლო სამუშაოები მეოთხე თვეა ზედამხედველი კომპანიის გარეშე მიმდინარეობს. ტექნიკური ზედამხედველის გამოსავლენად გამოცხადებული მორიგი ტენდერი ამჯერად ერთდროულად გაასაჩივრა სამმა კომპანიამ, რომლებიც აცხადებენ, რომ სათანადო გამოცდილების მქონე ტექნიკური ზედამხედველის გარეშე აშენებული სტადიონი ექსპლუატაციისას სხვადასხვა პრობლემის გაჩენის რისკებს შეიცავს, ტენდერში გამარჯვებულ კომპანიას კი ასეთი გამოცდილება არ აქვს.

სამშენებლო სამუშაოების ტექნიკურ ზედამხედველობას შპს „სტადიონს“ 2 მილიონ 847 ათას ლარად სთავაზობს კომპანია „კოლიერს ინტერნეიშენალ ჯორჯია“, რომელიც ხელშეკრულების გასაფორმებლად შპს „სტადიონის“ სატენდერო კომისიამ მიმდინარე წლის 16 აპრილს მიიწვია.

კომისიის შეტყობინებაში აღნიშნულია, რომ კომპანიამ 2018 წლის პირველ მაისამდე უნდა წარადგინოს შესაბამისი გარანტია და გააფორმოს ხელშეკრულება, წინააღმდეგ შემთხვევაში მოხდება მისი დისკვალიფიკაცია.

ამ შეტყობინების გაგზავნის დღესვე, ანუ 16 აპრილს, შპს „სტადიონს“ ადმინისტრაციული საჩივრით მიმართა სამმა კომპანიამ [შპს „მშენტექზედამხედველი – ნიკოლოზ ბოკუჩავა“, შპს „ოიკო-ჯგუფი“ და შპს „ტრიჯიტი“], რომლებმაც სატენდერო კომისიის შესაბამისი ოქმის გაუქმება და ხელშეკრულების გასაფორმებლად მიწვეული კომპანიის დისკვალიფიკაცია მოითხოვეს.

მომჩივანი კომპანიები აღნიშნულ ტენდერში არ მონაწილეობდნენ. ისინი აცხადებენ, რომ „მიუხედავად იმისა, აქვთ მრავალწლიანი გამოცდილება ტექნიკური ზედამხედველობის ბაზარზე, ტენდერში მონაწილეობა არ მიიღეს, ვინაიდან ჩათვალეს, რომ სრულად არ აკმაყოფილებდნენ გამოცდილებასთან დაკავშირებულ გარკვეულ სატენდერო პირობებს“.

საჩივრის ავტორები ასევე აცხადებენ, რომ „მათ შეისწავლეს ტენდერში გამარჯვებული კომპანიის დაზუსტებული დოკუმენტაცია, საიდანაც ვერ დასტურდება ვერც პრეტენდენტის და ვერც სპეციალისტების გამოცდილება, რაც მოთხოვნილი იყო სატენდერო პირობებით“.

ამონარიდი ადმინისტრაციული საჩივრიდან:

შპს „სტადიონის“ სატენდერო კომისიამ გუშინ, 17 აპრილს, ტექნიკურ ზედამხედველის შესარჩევი ტენდერის პროცედურები, შესაბამისი გადაწყვეტილების მიღებამდე შეაჩერა.

იმავე დღეს, 17 აპრილს, შპს „სტადიონის“ დირექტორმა სულხან ხალვაშმა წერილით მიმართა საჩივრის ავტორ კომპანიებს.

„…თქვენს მიერ აღნიშნულია, რომ მოცემულ ელექტრონულ ტენდერში მონაწილეობა არ მიგიღიათ და შესაბამისად, არ წარმოადგენთ პრეტენდენტებს. აღნიშნულიდან გამომდინარე, შპს „სტადიონი“-ს სატენდერო კომისიის გასაჩივრებული ოქმი ვერანაირად ვერ დაარღვევდა თქვენს რომელიმე უფლებას, ვინაიდან, ის თქვენს მიმართ არ არის გამოცემული.

ამასთან, იკვეთება, რომ არ გაგაჩნიათ კანონიერი ინტერესი ელექტრონულ ტენდერში, გასაჩივრებული ადმინისტრაციულ-სამართლებრივი აქტით მიღებული გადაწყვეტილება არავითარ პირდაპირ და უშუალო გავლენას არ ახდენს თქვენს კანონიერ ინტერსებზე და წარმოადგენთ არაუფლებამოსილ პირებს. აღნიშნულიდან გამომდინარე, საქართველოს ზოგადი ადმინისტრაციული კოდექსის საფუძველზე არსებობს ადმინისტრაციული საჩივარის განხილვაზე უარის თქმის საფუძვლები“, – აღნიშნულია სულხან ხალვაშის წერილში.

„სტადიონის“ დირექტორი მიმართავს საჩივრის ავტორებს, 2018 წლის 20 აპრილამდე პერიოდში, წერილობითი სახით მიაწოდონ მოსაზრება, თუ რამდენად და რის საფუძველზე წარმოადგენენ ისინი დაინტერესებულ მხარეს/უფლებამოსილ პირებს გასაჩივრებულ ადმინისტრაციულ-სამართლებრივ აქტთან მიმართებაში.

„ოიკო ჯგუფიმ“ საფეხბურთო სტადიონის ტექნიკურ ზედამხედველობაზე გამოცხადებული ტენდერი 2016 წელსაც გაასაჩივრა შესყიდვების სააგენტოს დავების საბჭოში, თუმცა საბჭომ სარჩელი არ დააკმაყოფილა. 2016 წელს ტენდერი სხვა პირებმაც გაასაჩივრეს, რის გამოც „სტადიონი“ იძულებული გახდა ტენდერი მაშინაც შეეჩერებინა.

უკვე მესამე წელია სტადიონის ტექნიკური ზედამხედველი ვერ გამოავლინეს, სტადიონის მშენებლობა კი მეოთხე თვეა დაწყებულია.

„ბათუმელები“ დაახლოებით ერთი თვის წინ წერდა, რომ სტადიონი ტექნიკური ზედამხედველის გარეშე შენდებოდა, თუმცა აჭარის მთავრობაში გვითხრეს, რომ მშენებლობას, ტენდერში გამარჯვებულის გამოვლენამდე, სამინისტროს მიერ გამოყოფილი 2 სპეციალისტი უწევდა ზედამხედველობას.

კონკრეტულად ვინ, რა კვალიფიკაციის სპეციალისტი უწევს ტექნიკურ ზედამხედველობას ბათუმის საფეხბურთო სტადიონის მშენებლობას და რას გულისხმობს ეს ზედამხედველობა – ამ ინფორმაციას აჭარის მთავრობა, აჭარის ფინანსთა და ეკონომიკის სამინისტრო და ამ სამინისტროს შპს „სტადიონი“ ასაიდუმლოებენ.

ფინანსთა და ეკონომიკის სამინისტროს ინფორმაციით, ბათუმში, ყოფილი მანქანათმშენებელი ქარხნის ტერიტორიაზე 20 000 მაყურებელზე გათვლილი UEFA-ს IV კატეგორიის საფეხბურთო სტადიონის მშენებლობის სამუშაოების ჯამური სავარაუდო ღირებულება კი 157 344 846 ლარია [დღგ-ს ჩათვლით].
მათ შორის:

[checklist]

• სტადიონის ნაგებობის მშენებლობა, მიმდებარე ტერიტორიის კეთილმოწყობა, განათება – 149 636 790 ლარი;
• მინდვრის საფარის მოწყობის სამუშაოები – 2 158 056 ლარი;
• სამშენებლო სამუშაოების საავტორო, ტექნიკური და საექსპერტო ზედამხედველობა – 5 550 000 ლარი.

[/checklist]

ზედამხედველობისთვის გათვლილი 5 550 000 ლარიდან:

• ტექნიკური ზედამხედველობისთვის 3 520 474 ლარია გათვალისწინებული. „კოლიერს ინტერნეიშენალ ჯორჯია“ კი „სტადიონს“ ზედამხედველობას 2 847 000 ლარად სთავაზობს;
• საექსპერტო ზედამხედველობისთვის 25 424 ლარი იყო გათვალისწინებული, თუმცა, შესაბამისი ხელშეკრულება ტენდერში გამარჯვებულ რევაზ კახიძესთან 13 650 ლარზე გაფორმდა;
• საავტორო ზედამხედველობაზე შპს „სტადიონი“ მოლაპარაკებას სამხარაულის ექსპერტიზის ბიუროსთან აწარმოებს და მასთან ხელშეკრულებას ტენდერის გარეშე გააფორმებს, თუმცა რა თანხაზე, „სტადიონში“ არ დაგვიკონკრეტეს. კომპანიაში გვითხრეს, რომ „თურქულმა პროექტმა, რომლის მიხედვითაც შენდება საფეხბურთო სტადიონი, სწორედ „სამხარაულში“ გაიარა ექსპერტიზა და ამიტომ „სამხარაული“ პროექტის ერთგვარი თანაავტორი გამოდის“. 

სტადიონის ნაგებობის მშენებლობაზე შპს „სტადიონსა“ და შპს „ანაგს“ შორის გაფორმებული ხელშეკრულების მიხედვით, სახელშეკრულებო თანხა, 99 მილიონ 448 ათას 408 ლარია, თუმცა ხელშეკრულებაში აღნიშნულია, რომ საერთო ღირებულება არის 117 მილიონ 349 ათას 122 ლარი დღგ-ს ჩათვლით.

ბათუმში ახალი მეჩეთის აშენების საინიციატივო ჯგუფი აცხადებს, რომ ისინი 2018 წლის მარტის ბოლოს მეჩეთის მშენებლობის საკითხზე შეხვდნენ ბათუმის მერს, ლაშა კომახიძეს. მორიგი შეხვედრა მერთან 12 აპრილს უნდა გამართულიყო, მაგრამ „მუსლიმთა მეჯლისის“ წევრები ხულოში აცხადებენ, რომ მათთვის უცნობი მიზეზის გამო შეხვედრა არ შედგა. მოლაპარაკებას რომ გამართავდნენ, ამაზე მხარეები სასამართლოში შეთანხმდნენ.

დღეს „ხულოს მუსლიმთა მეჯლისის“ სახელით სოციალურ ქსელში გავრცელდა განცხადება, რომელსაც გამგეობის ექვსი წევრი აწერს ხელს. განცხადებაში ნათქვამია, რომ მერმა ლაშა კომახიძემ შეხვედრაზე „ა(ა)იპ-ი ბათუმში მეჩეთის მშენებლობის საინიციატივო ჯგუფს“ შესთავაზა, ახალი მეჩეთის მშენებლობისთვის მრევლის მიერ შეძენილი მიწა, „მუსლიმთა სამმართველოს“ გადაეცეს.

„გადაცემის შემთხვევაში გამოხატა მერიის მზადყოფნა მეჩეთის მშენებლობაზე ნებართვის გაცემის თაობაზე“, – ნათქვამია განცხადებაში.

„მუსლიმთა მეჯლისის“ წევრები ხულოში, თავის მხრივ, დღეს გავრცელებული განცხადებით მიმართავენ „ა(ა)იპ-ი ბათუმში ახალი მეჩეთის მშენებლობის ფონდს“, რომ მრევლის მიერ ნაყიდი მიწა „მუსლიმთა სამმართველოს“ არ გადაეცეს.

საჯარო რეესტრის მონაცემებით, მეჩეთი, ისე როგორც მის მიმდებარედ არსებული უძრავი ქონება, საქართველოს სახელმწიფოს საკუთრებაა. სახელმწიფომ ეს ქონება სსიპ „სრულიად საქართველოს მუსლიმთა სამმართველოს“ 2011 წლის აგვისტოდან გადასცა სარგებლობის უფლებით.

დათანხმდება თუ არა ააიპ „ბათუმში ახალი მეჩეთის მშენებლობის ფონდი“ სახელმწიფოს გადასცეს მის მიერ ნაყიდი მიწის ნაკვეთი? – გვინდოდა გვეკითხა ამ ფონდის ერთ-ერთი დამფუძნებლის, ტარიელ ნაკაიძისთვის. თუმცა, მასთან დაკავშირება ვერ მოვახერხეთ.

„ბათუმელები“ მეჩეთის მშენებლობის ფონდის თავმჯდომარეს, ნოდარ პაქსაძეს ესაუბრა. მას მერთან შეხვედრის დეტალებზე ვკითხეთ, რომელიც დღემდე არ გასაჯაროებულა. მან დაადასტურა, რომ მერთან შეხვედრის დროს საუბარი მართლაც იყო „მუსლიმთა სამმართველოსთვის“ მიწის გადაცემაზე.

„გიდასტურებთ, რომ ასეთი საუბარი იყო ლაშა კომახიძის მხრიდან, რომ თუ გადასცემთ მიწას, შემდგომ პროცედურები გაგრძელდება და მივცემთ მშენებლობის ნებართვასო. რატომ „მუსლიმთა სამმართველოს“? ამაზე პასუხი ვერ მივიღეთ. სამართლებრივად ფონდს აქვს უფლება, რომ ააშენოს მეჩეთი“, – გვითხრა მან.

ნოდარ პაქსაძის აზრით, „მუსლიმთა სამმართველოსთვის“ მიწის გადაცემას იმიტომ ითხოვენ, რომ არ სურთ მეჩეთის მშენებლობა. „მუსლიმთა სამმართველო“ რას გააკეთებს, მათი მოსაზრება არ ვიცი, მაგრამ ჩვენ გვაქვს ხედვა და ვიცით, რომ ვიღაცას არ სურს აშენდეს ბათუმში მეჩეთი…“ – ამბობს ნოდარ პაქსაძე.

ნოდარ პაქსაძეს ამის არგუმენტად მოჰყავს 2014 წელს „მუსლიმთა სამმართველოს“ მიერ ხელმოწერილი განცხადება, რომლითაც მუფტები ბათუმში ახალი მეჩეთის აშენების საჭიროებას ვერ ხედავდნენ.

„ბათუმელები“ ხულოს „მუსლიმთა მეჯლისის“ გამგეობის კიდევ ერთ წევრს, ნოდარ ბერიძესაც ესაუბრა, რომელიც ასევე აწერს ხელს დღეს გავრცელებულ განცხადებას. 

„ჩვენ მიწვეული ვიყავით მასთან [ლაშა კომახიძესთან] და მაშინ მოვისმინეთ ეს შემოთავაზება. მაგრამ როცა ვიკითხეთ რა მნიშვნელობა ჰქონდა თუ ვის სახელზე გაიცემოდა მშენებლობის ნებართვა, პასუხი ვერ მივიღეთ. ამიტომ დაინიშნა განმეორებითი შეხვედრა. 12 აპრილს უნდა ყოფილიყო, თუმცა შემდეგ ეს შეხვედრაც არ შედგა“, – ამბობს ნოდარ ბერიძე.

ნოდარ ბერიძის თქმით, მერმა ისაუბრა იმაზე, რომ ტერიტორიაზე, სადაც მუსლიმებმა ახალი მეჩეთისთვის მიწა იყიდეს და მშენებლობა სურთ, გზა უნდა გავიდეს. „სულ სამი მიზეზი დაასახელა, რის გამოც მშენებლობის ნებართვაზე გვეთქვა უარი. იყო საუბარი იმაზე, რომ ქალაქს აქვს განვითარების გეგმა და ამ ხედვაში ეს პროექტი ვერ ჯდებაო“, – გვეუბნება ნოდარ ბერიძე.

„ბათუმელების“ კითხვაზე, იყო თუ არა მერის მხრიდან იმაზე საუბარი, მიწის მუსლიმთა სამმართველოზე გადაცემის შემთხვევაში როგორ აშენდებოდა მეჩეთი, თუკი მშენებლობა არ ჯდება ქალაქის განვითარების გეგმაში? – ნოდარ პაქსაძე გვპასუხობს:

„ერთ-ერთ ვარიანტად განიხილებოდა ეს, რომ თუკი ჩვენ „მუსულიმთა სამმართველოს“ მიწას გადავაბარებდით, მშენებლობაზე პრობლემა არ იქნებოდა. ჩვენც ვიკითხეთ, რომ თუკი სამმართველოს შეეძლო მშენებლობა, ჩვენს ორგანიზაციას რატომ არ შეუძლია. როგორც ჩანს, ხელისუფლებისთვის სამმართველო უფრო ადვილად სამართავია“, -გვეუბნება ის.

ნოდარ ბერიძის აზრით, თუკი ქალაქის განვითარებას მართლაც შეუშლის ხელს მეჩეთის მშენებლობა, მერიას შეუძლია მათ ალტერნატიული ტერიტორია შესთავაზოს.

„ალბათ ამას ფიქრობს ხელისუფლება. თუმცა ყველაფრის პასუხი ამ შეხვედრაზე მერს არ ჰქონდა. ამიტომ დავნიშნეთ მორიგი შეხვედრა“, -გვეუბნება ის. – „ჩვენ ვიმსჯელეთ ამ საკითხზე გამგეობაშიც, იმ ადამიანებთან, ვისაც ჭკუა მოეკითხება და სწორედ მათთან საუბრის შემდეგ გამოვაქვეყნეთ ეს განცხადება“.

„ბათუმელები“ ბათუმის მერიასაც დაუკავშირდა კომენტარისთვის. თუმცა, როგორც პრესსამსახურში გვითხრეს, ამ საკითხზე სამუშაო შეხვედრები მიმდინარეობს „მეჩეთის მშენებლობის საინიციატივო ჯგუფთან“ და „შეხვედრების დასრულებამდე კომენტარს არ გააკეთებენ“.

აჭარის უმაღლესი საბჭოს წევრს „ქართული“ ოცნებიდან, ირაკლი ჭეიშვილს აჭარის ტელევიზიაში გასულმა სიუჟეტმა ბათუმში მანქანის გაქურდვის შესახებ, ეჭვები გაუჩინა. დეპუტატმა სოციალურ ქსელში დაწერა, რომ ამ ამბავს შეიძლება „პოლიტიკური ქვეტექსტი“ ჰქონდეს. რა პოლიტიკური ქვეტექსტი შეიძლება ჰქონდეს კრიმინალის გაშუქებას? – ამაზე „ბათუმელებმა“ ირაკლი ჭეიშვილს ჰკითხა.

ბატონო ირაკლი, თქვენ წერდით, რომ მანქანის „ფარების“ მოპარვის ფაქტზე აჭარის ტელევიზიის მიერ მომზადებულ, გადამოწმებულ ამბავს [ნიუსს] შესაძლოა პოლიტიკური ქვეტექსტი ჰქონდეს. რას გულისხმობთ?

როდესაც ვწერდი ამ პოსტს, ზუსტად ვიცოდი რასაც ვწერდი, ზუსტად ვიცოდი, რომ კარგს არაფერს გამოიწვევდა ჩემი პოსტი ვიღაცებში და, შესაბამისად, კრიტიკაც მოჰყვებოდა. მაგრამ მე არ ვარ ის ადამიანი, რომელსაც კრიტიკის ეშინია და რასაც ვფიქრობ, ის დავწერე. დავანებოთ თავი იმას, რომ ვარ უმაღლესი საბჭოს, იმ ორგანოს წევრი, რომელიც ირჩევს ბორდს [აჭარის ტელევიზიის მრჩეველთა საბჭოს]და ბორდი ირჩევს დირექტორს. აბსოლუტურად იმავე შეკითხვების დასმა შემიძლია მაისში, როდესაც გვექნება ბორდის ანგარიში უმაღლეს საბჭოში.

ვიკითხე, ადგილზე შეესწრო თუ არა ჟურნალისტი-თქო, ვინ გამოიძახა-თქო, შეიძლება მოქალაქემ დარეკა, ვინც დაზიანდა. კი ბატონო, ბოდიშს ვიხდი, თუ მოქალაქემ დაურეკა, მაშინ არაფერი მაქვს სათქმელი. იმ ადამიანმა შეიძლება პატრულიც გამოიძახა და აჭარის ტელევიზიაც, მაგრამ არიან ადამიანები, რომლებიც არიან დაინტერესებულები ასეთი ფაქტებით, არის კონკრეტული ჯგუფი, კერძოდ, „ნაციონალური მოძრაობა“, რომელსაც ჰყავს ასეთი ჯგუფი, რომ სადმე რაღაცა თუ გაფუჭდა, დაშავდა, კრიმინალი ჩაიდინა ვიღაცამ, ელვისებურად ატყობინებენ ჟურნალისტებს და ტელევიზიას. ეს მაქვს ზუსტად პოლიტიკურ კონტექსტში ნაგულისხმევი.

ურეკავენ და ამ ყველაფერს აყოლებენ იმას, რომ დავბრუნდით შევარდნაძის ხანაში. კომენტარიც ნახეთ ალბათ ჩემს პოსტზე, წაიკითხავდით, ვითომ სააკაშვილის დროში არ ხდებოდა არც სარკის მოპარვა, არც ფარის მოპარვა.

ამ ყველაფერს მოიცავდა ჩემი პოსტი, თორემ კრიტიკა მიზანშეწონილობის ამბავია, უნდა – გააშუქებს ჟურნალისტი. ამ რეგიონში თუ მეტი ცუდი არაფერი ხდება და ფარების მოპარვით ხდება კრიმინალთან ბრძოლა…  ჩემი სტატუსი იყო სხვა: ვამბობ, რომ არიან ჯგუფები, რომლებიც რეკავენ. ეს იყო – მე არც მაგათ ცხოვრებაში ვერევი და არც საქმეში. მაისში, რომ მობრძანდებიან ბორდის წევრები და ანგარიშს წარმოადგენენ, იქ დავუსმევ კითხვას, რას აკეთებენ, რაში ვიხდით ხელფასს, როგორც მე მისმევენ კითხვას, რას აკეთებ, რაში გიხდიან ხელფასსო. ამას ვისმენ მე ექვსი წლის განმავლობაში.

თქვენი აზრით, რა მნიშვნელობა აქვს ტელევიზიამ როგორ გაიგო ამბავი, როცა ის ზუსტია?

დიახ, იქნებ შეეჩეხა ფაქტს ჟურნალისტი, იქნებ მეზობელი იყო მისი, მე არც ამას არ გამოვრიცხავ.

ანუ თუ მეზობელი იყო, მაშინ უნდა გაშუქებულიყო?

ფარების მოპარვის ფაქტი უნდა გაშუქებულიყო, თუ არ უნდა გაშუქებულიყო? – მე უფრო გავამახვილე ყურადღება იმაზე, თუ როგორ გაიგეს ეს ინფორმაცია… წყარომ მოგვაწოდაო დამიწერეს კომენტარებში. ყველაფერს წყაროს ეძახიან, წყაროა ყველა, ვინც ინფორმაციის მატარებელი და მიმწოდებელია. მაგრამ საიდან გაჩნდა ჟურნალისტი? – ვიღაცა დაინტერესებულმა პირმა დაურეკა, ოღონდ ეს დაინტერესებული პირი არ არის ამ შემთხვევაში მანქანის მეპატრონე. მეპატრონეს შეიძლება მართლა დაერეკა გაბრაზებულზე. მე ვხედავ, რომ პოლიტიკურად აპელირებულმა პირმა დაურეკა. მერე აპელირებენ, რომ თურმე დავბრუნდით შევარდნაძის დროში.

საზოგადოებას ხომ აქვს უფლება ინფორმაცია ჰქონდეს ქალაქში მომხდარი დანაშაულის შესახებ. ბოლოს როდის გაიგეთ, რომ მანქანის ფარები მოიპარეს?

მართლა არ გამიგია დიდი ხანია მანქანის ფარები ვინმეს მოეპარა, მაგრამ… ან როგორ მოიპარეს, ფარი რომ მოიპარო, „კაპოტი“ უნდა ახადო მანქანას და მთელი პროცედურები უნდა. ეს როგორ გააკეთეს მექანიკურად? – მანქანის მფლობელი ვარ მეც და ვიცი.

თქვენ ზუსტად იცით, ვინ მიაწოდა აჭარის ტელევიზიას ინფორმაცია? ან რატომ არის ეს ასე მნიშვნელოვანი?

ხშირად ხდება ასეთი რამ, როცა შეიძლება ბუზი სპილოდ აქციო, მაგრამ არავის საქმეში არ ვერევი. მე, როგორც მოქალაქეს, არ შემიძლია ჩემი აზრი გამოვხატო? – ასე ვფიქრობ.

მაგრამ თქვენ ხართ დეპუტატი…

მე ვარ ის დეპუტატი, რომლის უწყებასთანაც რაღაც დონით ანგარიშვალდებულია ეს ტელევიზია და მე მგონია, რომ უფრო მეტი უფლება მაქვს, ვიდრე რიგით მოქალაქეს დავსვა კითხვები.

ეს ზეწოლა ხომ არ არის თქვენი მხრიდან აჭარის ტელევიზიაზე?

რატომ არის ზეწოლა ტელევიზიაზე? კითხვა რომ დავსვა და ჩემი მოსაზრება გამოვხატო. დავმუნჯდე?  უმსგავსობაც რომ გააკეთოს ტელევიზიამ დავმუნჯდე, ხმა არ ამოვიღო იმიტომ, რომ ვიღაცამ შეიძლება ჩამითვალოს ზეწოლად?

უმსგავსობად აფასებთ ფარების მოპარვაზე მომზადებულ სიუჟეტს?

არა, ეს არ არის უმსგავსობა. ზოგადად ვამბობ. მე რომ ვიყო მთავარი პროკურორი ან შინაგან საქმეთა სამინისტროს სამმართველოს უფროსი, შეიძლება ზეწოლად ჩაგითვალონ. უმაღლესი საბჭოს დეპუტატი ვარ, რომელთანაც ანგარიშვალდებულია ბორდი მაინც. ბორდთან არის ანგარიშვალდებული ტელევიზია. ეს კითხვა რომ დავუსვა განხილვის დროს, ესეც ზეწოლაა?

არ ფიქრობთ, რომ საზოგადოებრივი მაუწყებელი ანგარიშვალდებულია არა თქვენთან, არამედ საზოგადოებასთან, რომელსაც აქვს უფლება მიიღოს ინფორმაცია ქურდობის ფაქტზე?

საზოგადოებას რომ აქვს უფლება, გაიგოს გაქურდეს თუ არა მანქანა, ინფორმაციას გებულობენ შს სამინისტროდან, მასაც აქვს პრესსამსახური. ფაქტები ელექტრონულად იტვირთება.

მე არ მითქვამს, რომ არასწორად გააკეთა [აჭარის ტელევიზიამ], მე ვთხოვ, რომ როგორ გაიგო. ყველაფერს წყაროს ეძახიან, კი ბატონო, წყარო ჰქვია მაგას, აბა ნაკადული არ ჰქვია. წყარომ მიაწოდა ინფორმაცია და გაშუქდა. თუ არ დაურეკია მეპატრონეს, რაღაც ნაწილში ვხედავ მე პოლიტიკურს არა ჟურნალისტის მოქმედებიდან, არამედ იმ ადამიანებიდან, ვინც ეს შეატყობინა.

როდესაც კარგი ხდება არ ატყობინებენ? ხშირ შემთხვევაში ნეგატიური ინფორმაციის შეტყობინება ხდება და შესაბამისად კომენტარებიც მოყვა, ზუსტად ვიცოდი რა კომენტარებიც მოყვებოდა, დავბრუნდით ამის ხანაში, იმის ხანაშიო. ეს ყველაფერი ისე არ ხდება. ერთხელ რომ ყოფილიყო, ხმას არ ამოვიღებდი და არ დავწერდი. ეს ხდება რამდენიმე წელია უკვე. წინა ხელისუფლებაში რატომღაც არ შუქდებოდა ასე.

არსებობს ჯგუფი, რომლებიც დადიან ქალაქში, ასურათებენ რაღაცას წაქცეულს, გაფუჭებულს და ამას უგზავნიან.

მართლა გგონიათ, რომ „ნაციონალურ მოძრაობას“ გავლენა აქვს აჭარის ტელევიზიაზე?

ინფორმაციებს აწვდიან და შემდეგ მიზანშეწონილობის საკითხია, ჟურნალისტი რას გააკეთებს. მე ხელს ვერ დავადებ და ვერ დავადანაშაულებ. არ მგონია, რომ ტელევიზია ვინმეს გავლენის ქვეშ იყოს.

მთავარი ფოტო: აჭარის ტელევიზია