ანგისის ქუჩაზე აღსრულების ბიურო, პოლიცია და სასწრაფო დახმარების ბრიგადაა მობილიზებული


ოჯახის გამოსახლების მიზნით ანგისის N4-ში დღეს აღრულების ბიურო მივიდა. მათ  ადგილზე ოჯახის ახლობლები დახვდათ მობილიზებული, სახლი კი ბოქლომით იყო დაკეტილი.

ორგანიზაცია „ჩვენი უფლებებისათვის“ ხელმძღვანელის, თამაზ ბაკურიძის ინფორმაციით, ადგილი ჰქონდა დაპირისპირებას, რა დროსაც ოჯახის წევრი ცუდად გახდა და მოუწიათ სახლის კარის გაღება, რომ ის სახლში შეეყვანათ: „ამ დროს სახლში აღრულების ბიუროს წამომადგენლებიც შევიდნენ, რის გამოც დაპირისპირება კიდევ უფრო გამწვავდა.“

ანგისის ნომერ 4- სა და 6- ში მცხოვრებლები ამბობენ, რომ ისინი თაღლითობის მსხვერპლნი გახდნენ.  მათთან მივიდა ინვესტორი, ვინმე რევაზ მიქელაძე და კერძო სახლების ადგილზე საცხოვრებელი კორპუსის აშენებას დაჰპირდა. მხარეებმა ხელშეკრულებას მოაწერეს ხელი, სადაც ეწერა, რომ მშენებელს ამ საცხოვრებელი სახლების იპოთეკით დატვირთვის უფლებაც ჰქონდა.

ხელშეკრულება მხარეებს 2010 წლის ბოლოს გაუფორმებიათ. გასული წლის ბოლოს კი მას შემდეგ, როცა გაიგეს, რომ სახლები უკვე გაყიდული იყო და მათ გამოსახლება ელოდათ, ანგისის ქუჩაზე მცხოვრებმა ოჯახებმა  პროკურატურას მიმართეს.

საქართველოს ახალგაზრდა იურისთა ასოციაციის ბათუმის ფილიალში ამბობენ,  რომ ასეთი შემთხვევები ხშირია და მოქალაქეები სამართლებრივი საკითხებით მხოლოდ მას შემდეგ ინტერესდებიან, როცა პრობლემა იქმნება,  ქონების გასხვისებასთან დაკავშირებულ საკითხებზე კი ხშირად ისე აწერენ ხელს , რომ არც კი კითხულობენ რა წერია ხელშეკრულებაში.

„ახალგაზრდა იურისტთა ასოციაციის“ იურისტი  მირზა მამულაძე ურჩევს მოქალაქეებს, კონსულტაცია იურისტებთან ხელშეკრულების გაფორმებამდე გაიარონ:

„ხელშეკრულებით მხარეები თავად განსაზღვრავენ უფლებებსა და ვალდებულებებს. შემდეგ ისინი, შეიძლება ითქვას, ამ ხელშეკრულების მძევლები ხდებიან. ამიტომ მოქალაქეებმა ხელშეკრულების გაფორმებამდე უნდა გამოიჩინონ წინდახედულება.“

იურისტი ასევე მიიჩნევს, რომ მსგავს ვითარებაში მოქალაქეებმა სამოქალაქო წესით სასამართლოს მიმართონ ზიანის ანაზღაურების მოთხოვნით. „მნიშვნელოვანია პროკურატურისთვის მიმართვაც, რადგან თუკი სისხლის სამართლის საქმეზე სასამართლო გამამტყუნებელ განაჩენს გამოიტანს, დაზარალებულ მოქალაქეს სამოქალაქო დავის მოგების მეტი შანსი ექნება,“ – განმარტავს მირზა მამულაძე, „ახალგაზრდა იურისტთა ასოციაციის“ იურისტი.

ბათუმი, ანგისის ქუჩა N4 / 17.04.2018

ნეტგაზეთის მასალების სხვა გამოცემებში გადაბეჭდვის წესი
ავტორი