ბათუმში იპოთეკით დაზარალებულმა მოქალაქეებმა რამდენიმე წუთით ბაგრატიონის ქუჩა გადაკეტეს. ამ ფორმით საპროტესტო აქციის მონაწილეებმა მთავრობას დაბალპროცენტიანი და გრძელვადიანი სესხების დაპირება შეახსენეს.
დღეს, 18 აპრილს, აღსრულების პოლიცია ვაჟა-ფშაველას 147-ში მცხოვრები ოჯახის გამოსახლებას აპირებს. იპოთეკით დაზარალებული სხვა პირები სწორედ ამ მისამართზე შეიკრიბნენ და გამოსახლების შეჩერება მოითხოვეს.
„ამ ოჯახს აქვს მოლაპარაკებები საბანკო ინსტიტუტებთან და შესაძლებელია მას სესხი დაუმტკიცონ. ამიტომ მოვითხოვთ გამოსახლების შეჩერებას. ხალხის ერთად დგომას აქვს შედეგი – გუშინ, ანგისის ქუჩაზე გამოსახლების პროცესი გაურკვეველი ვადით გადაიდო. ხვალ საპროტესტო აქციის გამართვას ქუთაისში, პარლამენტის შენობის წინ ვაპირებთ,“ – გვითხრა ორგანიზაცია „ჩვენი უფლებებისთვის“ ხელმძღვანელმა, თამაზ ბაკურიძემ.
აქცია ვაჟა-ფშაველას ქუჩაზე / 18.04.2018 / როინ გუნდაძის ფოტოები
