Batumelebi

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭომ დირექტორის ასარჩევად კონკურსი გამოაცხადა. განცხადებები კონკურსში 4 ივნისიდან 3 ივლისის ჩათვლით მიიღება.

კონკურსში მონაწილეობა შეუძლია საქართველოს მოქალაქეს, რომელსაც  აქვს მაგისტრის ან მასთან გათანაბრებული აკადემიური ხარისხი; არანაკლებ 10 წლის მუშაობის გამოცდილება, მათ შორის, ხელმძღვანელ თანამდებობაზე მუშაობის სულ ცოტა 3 წლის და ჟურნალისტიკის, ადამიანის უფლებათა დაცვის ან/და სამეცნიერო – პედაგოგიურ სფეროში მუშაობის არანაკლებ 5-წლიანი მუშაობის გამოცდილება.

სამეურვეო საბჭომ დირექტორის კონკურსის შესახებ გადაწყვეტილება უნდა მიიღოს არაუგვიანეს 13 ივლისისა.

აჭარის ტელევიზიის დირექტორის ხელფასი 3300 ლარია. დირექტორს სამი წლის ვადით აირჩევენ.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭო უკვე მეორედ აცხადებს კონკურსს დირექტორის ასარჩევად. პირველ კონკურსში 8 მსურველი მონაწილეობდა, თუმცა კონკურსი ჩაიშალა, რადგან ვერც ერთმა კანდიდატმა ვერ მიიღო სამი ხმა, რაც დირექტორის ასარჩევად იყო საჭირო. დირექტორობის კანდიდატებიდან ყველაზე მეტი, ორი ხმა მიიღო მერაბ წულუკიძემ, საზოგადოებრივი მაუწყებლის ჟურნალისტმა; 1 ხმა მიიღო ნათია ზოიძემ, აჭარის ტელევიზიისა და რადიოს დირექტორის მოვალეობის შემსრულებელმა; 1 ხმა – ირმა ზოიძემ – საგამოძიებო სტუდია REC -ის დამფუძნებელმა და 1 ხმა – ბაჩო გურაბანიძემ, აჭარის ტელევიზიის გადაცემა „დილის ტალღის“ ხელმძღვანელმა.

გუშინ, 3 ივნისს, აჭარის ტელევიზიისა და რადიოს დირექტორის მოვალეობის შემსრულებელმა ნათია ზოიძემ განცხადება გაავრცელა და განაცხადა, რომ მრჩეველთა საბჭო არის პოლიტიკურად მოტივირებული.

საზოგადოებრივი მაუწყებლის აჭარის ტელევიზიისა და რადიოს დირექტორის ადგილი 19 აპრილიდანაა ვაკანტური, როცა მრჩეველთა საბჭომ ნათია კაპანაძე თანამდებობიდან გადააყენა.

„ერთიანი ნაციონალური მოძრაობა“ ბათუმში საზოგადოებრივი მაუწყებლის აჭარის ტელევიზიისა და რადიოს ირგვლივ მიმდინარე პროცესებს ეხმიანება. დღეს, 4 ივნისს, პარტიის ოფისში უმაღლესი საბჭოს წევრმა, ასმათ დიასამიძემ, გამართა ბრიფინგი და აღნიშნა, რომ მდგომარეობა კიდევ უფრო რთული გახდა და ამაზე მიუთითებს აჭარის ტელევიზიისა და რადიოს დირექტორის მოვალეობის შემსრულებლის, ნათია ზოიძის განცხადებაც, რომელიც მან გუშინ, 3 ივნისს გაავრცელა.

„ჩვენ, იმთავითვე, აჭარის რეგიონში წარმოდგენილ პარტიებთან ერთად გამოვეხმაურეთ ტელევიზიის დირექტორის და ტელევიზიის ირგვლივ მიმდინარე პროცესებს, სადაც მკაფიოდ დავაფიქსირეთ მოსაზრება, რომ ქართული ოცნების ხელისუფლება ცდილობდა აჭარის ტელევიზიის დირექტორის გადაყენებას და ამითი საზოგადოებრივი მაუწყებლის სარედაქციო პოლიტიკის შეცვლას.

გაცილებით უფრო რთული მდგომარეობაა დღეს, ამ ყველაფერზე მიუთითებს გუშინ ტელევიზიის დირექტორის მოვალეობის შემსრულებლის, ნათია ზოიძის საგანგაშო წერილი, ასევე, ბორდის წევრის ბეჟან გობაძის განცხადება ხელისუფლების მხრიდან ზეწოლაზე.

ჩვენ ამ პროცესებს ვარქმევთ ივანიშვილ-რიჟვაძის სპეცოპერაცია – ,,აჭარის ტელევიზიას“. არ ჩავუგდოთ აჭარის საზოგადოებრივი მაუწყებელი ბიძინა ივანიშვილ-რიჟვაძის ქართულ ოცნებას ხელში, ჩვენ დავიწყებთ კონსულტაციებს ყველასთან, ვისთვისაც მნიშვნელოვანია სიტყვის თავისუფლება და ტელევიზიის დამოუკიდებლობა,“ – განაცხადა ასმათ დიასამიძემ.

საზოგადოებრივი მაუწყებლის აჭარის ტელევიზიასა და რადიოს დირექტორის არჩევნები 31 მაისს გაიმართა, თუმცა კონკურსი ჩაიშალა.

 

2019 წლის თბილისის წიგნის ბაზრობაზე სამოცდაათმა გამომცემლობამ და სამთავრობო თუ არასამთავრობო ორგანიზაციამ მიიღო მონაწილეობა. ფესტივალს წელს ესტუმრნენ ფინელი მწერლები, შვედი გამომცემლები და გამომცემელთა მსოფლიო ასოციაციის დელეგაცია; სხვადასხვა გამომცემლობის წარმომადგენლები: მარი კორინთელი (,,წიგნები ბათუმში“), ზვიად კვარაცხელია („ინტელექტი“, ,,არტანუჯი“) ნინო მჭედლიშვილი („დიოგენე“) და თინა კუხიანიძე (,,ბაკურ სულაკაურის გამომცემლობა“) წიგნებზე საუბრობენ, რომლებიც წლევანდელ ფესტივალზე იყო ბესტსელერები.

ვიტოლდ გომბროვიჩი – „პორნოგრაფია”

„მეოცე საუკუნის უდიდესი მოაზროვნის, ვიტოლდ გომბროვიჩის ფსიქოლოგიურ რომანში მოქმედება მეოცე საუკუნის პოლონეთში ვითარდება. აპათიურ გარემოში არცერთხელ არ არის ნახსენები, რომ ომია, მაგრამ წიგნი ომის პერიოდს აღწერს. ორი მეგობარი, ვარშაველი ინტელექტუალი, ჩადის მესამე მეგობრის მამულში, სადაც იქვე  მცხოვრებ გოგოს და ბიჭს გაიცნობენ. ერთმანეთისგან დამოუკიდებლად მეგობრები იწყებენ რთულ თამაშს. მთელი მონდომებით ცდილობენ გოგო და ბიჭი ერთმანეთს დააკავშირონ.

ომის პირობებსა და აპათიურ გარემოში სექსი ამ ოთხი ადამიანისთვის არის ერთადერთი საშუალება, რითაც გრძნობენ, რომ ცოცხლები არიან. წიგნის სიუჟეტი  საინტერესოდ ვითარდება და მოულოდნელი ფინალი აქვს.

 

ნორა იკსტენა – „დედის რძე”

ეს რომანი არის სერიიდან ,,საკუთარი ოთახი“, რომელიც ქალ ავტორებს აერთიანებს. ნორა იკსტენა თანამედროვე ლატვიელი ავტორია, წიგნი ძალიან დასამახსოვრებელი, მძაფრი ემოციებითაა სავსე. „დედის რძე“ მოგვითხრობს საბჭოთა რიგაში მცხოვრები დედა-შვილის ამბავს – ცალ-ცალკე ორივე მათგანი წიგნის მთხრობელად გვევლინება. ტექსტში ჩანს, როგორ არასდროს კვეთს დედა-შვილის ცხოვრება ერთმანეთს პარალელური წრფეებივით. დედა ინტელექტუალია და კარგად იაზრებს რა ხდება მის თავს, გარშემო და მას არ შეუძლია არაფრის გაცემა არც შვილის, არც არავისითვის, რადგან ყველა ემოცია რეჟიმის პირობებში თავის გადარჩენას შესწირა. აღწერილია შვილის გრძნობები, თუ როგორი ტრავმაა მისთვის დედის უყურადღებობა.

 

გუსტავ მაირინკი – „გოლემი”

მიუხედავად იმისა, რომ წიგნი რამდენიმე წლის წინ გამოიცა ქართულ ენაზე, ის ბესტსელერად წლევანდელ ფესტივალზე იქცა.

ავტორი გუსტავ მაირინკი ავსტრიელი ექსპრესიონისტია და მოგვითხრობს მეოცე საუკუნის დასაწყისში პრაღის გეტოში ებრაელების ცხოვრებაზე.

საიდუმლო ქსელით მოცული პრაღა, ჩრდილოვან ძალებთან დაპირისპირება, ბიუროკრატიული ჯოჯოხეთი და პოლიტიკური ინტრიგები – მკითხველი მეოცე საუკუნის დასაწყისში გადაინაცვლებს, დიდი მღელვარების პერიოდში, როდესაც ევროპის კარს პირველი მსოფლიო ომი იყო მომდგარი. მის მიერ აღწერილი პრაღა ერთდროულად ისტორიული და ეზოტერიკული, დიდებული და გროტესკული, რეალური და წარმოსახვითი. „გოლემის“ სახით მკითხველს წინ ჰალუცინოგენური მოგზაურობა ელის.

,,გოლემი“ ერთდროულად ცოტა აბსურდული, ცოტათი მისტიკური და ფსიქოლოგიური რომანია.

 

ე. მ. ფორსტერი – „ოთახი ხედით”

მართალია, ფესტივალზე ფორესტერის რომანის ,,ოთახი ხედით“ ჩამოტანავერ მოასწრესდა გვიან ჩამოიტანეს, მაგრამ მკითხველების მოლოდინი წიგნისადმი კარგად ჩანდა მათ კომენტარებში, რომლებსაც გამომცემლობის გვერდზე წერდნენ. „ოთახი ხედით“ მეოცე საუკუნის დასაწყისის ბრიტანული კლასიკაა, მნიშვნელოვანი ნაწარმოები, რომელიც აქამდე ნათარგმნი არ იყო. ტექსტით ქართულ ენაზე ნათარგმნი ლიტერატურის დიდი, ცარიელი ადგილი შეივსო.

ეს არის მეოცე საუკუნის დასაწყისის ბრიტანული  კონსერვატული საზოგადოების  ირონიული სურათი, რომელშიც ახალგაზრდა გოგოსა და ბიჭის ამბავია მოთხრობილი. წყვილს რაღაც გრძნობა ეწევა ერთმანეთისკენ, მაგრამ საზოგადოებრივ აზრს მათზე ძალიან დიდი გავლენა აქვს და მთელი წიგნი მათ გრძნობებში თვითგამორკვევას ეხება. რომანში აღწერილი ამბები ძალიან კარგად ერგება ქართულ სინამდვილეს და ამ მხრივ ,,ოთახი ხედით“ აქტუალური და მნიშვნელოვანი ტექსტია.

 

იუკიო მიშიმა – „ნიღბის აღსარება”

იაპონურიდან თარგმნა თათია მემარნიშვილმა. მიშიმას ეს რომანი სამი თვის წინ გამოიცა და მაშინვე მიიპყრო ქართველი მკითხველის დიდი ყურადღება, რადგან აქამდე ავტორის წიგნები ქართულად არ გამოცემულა. პირველი იყო ამავე ავტორის „ოქროს ტაძარი“ ასევე ძალიან პოპულარული, რაც ალბათ იმითაა განპირობებული, რომ მთარგმნელმა თათია მემარნიშვილმა ორივე ტექსტი იაპონურიდან თარგმნა.

იაპონური ლიტერატურა კი ქართულად ძირითადად ინგლისური ან სხვა ენებიდან ითარგმნება.

სანახევროდ ავტობიოგრაფიულ წიგნში თავგზააბნეული ახალგაზრდა კაცის ფარული მისწრაფებების კვლევას დროდადრო სადომაზოხისტური ფანტაზიები ენაცვლება. განსაკუთრებული მგრძნობელობით გამორჩეულ მთხრობელს ნიღბების ცვლა შესანიშნავად გამოსდის და ერთგვარად ეხმარება კიდეც – დარჩეს ბოლომდე გულწრფელი, თვალი გაუსწოროს ძნელად გასააზრებელ სიმართლეს.

 

ალექსანდრა და დანიელ მიზილინსკები ,,რუკები”

,,„„     რუკები“ ბოლო წლების საერთაშორისო ბესტსელერი და ყველაზე პოპულარული საბავშვო შემეცნებითი წიგნია. 2012 წელს შეიქმნა პოლონეთში და მოიცავს ეთნოგრაფიული, გეოგრაფიული, ზოოლოგიური, ბოტანიკური, ზოგადკულტურული ხასიათის ინფორმაციას მსოფლიოს მრავალი ქვეყნის შესახებ.

ამ წიგნს იყენებენ როგორც სასწავლო-პედაგოგიურ გარემოში, ისე ოჯახში სხვადასხვა თაობის წარმომადგენელთა მიერ ერთობლივი კითხვისთვის. „რუკების“ მასალის გამოყენებით შესაძლებელია სხვადასხვა თამაშისა და საგანმანათლებლო აქტივობების დაგეგმვა.

55 დიდი რუკა 46 ქვეყანასა და 6 კონტინენტს მოიცავს. ყოველ რუკაზე უამრავ საინტერესო ილუსტრაციას და მნიშვნელოვან ფაქტს აღმოაჩენთ.

,,რუკები“ წელს წიგნის ფესტივალზე საყმაწვილო ლიტერატურის ბესტსელერი იყო. ეს არის თვალისმომჭრელად დასურათებული მაღალპოლიგრაფიული, შემეცნებითი ატლასი.

 

ჯინ ვებსტერი – გრძელფეხება მამილო

წიგნი რამდენიმე წლის წინ გამოიცა და ყოველ წელს ბესტსელერია წიგნის ფესტივალებზე, ისევე როგორც წელს. ქართულენოვანი გამოცემა ორ ტექსტს მოიცავს: ქართულს და  ინგლისურს.

ცნობილი ამერიკელი მწერლის, ჯინ ვებსტერის წიგნი “გრძელფეხება მამილო” მოგვითხრობს ობოლი გოგონას ამბავს, რომელიც უცნობმა ქველმოქმედმა კოლეჯში გაგზავნა. ამ კლასიკადქცეულ ეპისტოლარულ რომანს დღემდე სიამოვნებით კითხულობენ სხვადსხვა ასაკის მკითხველები მთელ მსოფლიოში.

წიგნი წლებია დიდი პოპულარობით სარგებლობს მოზარდებში. „გრძელფეხება მამილო“ ფესტივალისთვის სპეციალურად ხელახლა დაიბეჭდა.

 

ნათია ფანჯიკიძე – ,,შიშო, გამოდი გარეთ“

გამომცემლობა „არტანუჯის“ ბესტსელერი წიგნის ფესტივალზე იყო ჟურნალ „ლიბერალთან“ ერთად გამოცემული მორიგი პროექტი: ნათია ფანჯიკიძის ,,შიშო, გამოდი გარეთ“.

„წერილების კრებული 2014-2018 წლებში უმთავრესად ჟურნალ „ლიბერალისთვის“ იწერებოდა – სხვადასხვა მოვლენის პასუხად და სხვადასხვა განწყობით. ტექსტებს ამიტომ არ აქვთ ერთმანეთთან მკაფიო შინაარსობრივი კავშირი. მათი გამაერთიანებელი ყოველ ჯერზე იყო მხოლოდ მიზანი, განმეწყო ადამიანები მეტი გამბედაობისკენ, გამეჩინა მათში სულიერი სიმხნევე და ოდნავ მაინც შემემცირებინა მათი შიში და სევდა. ვცდილობდი, ამეხსნა და საგრძნობი გამეხადა ზოგიერთი დაავადების შინაარსი და სხვადასხვა მდგომარეობის ფარული, შინაგანი მხარე, რადგან ის, რაც გავიგეთ, თუ არ ვიგრძენით კიდეც, ვერაფერს შეცვლის ჩვენში,“ – წერს წიგნის ანოტაციაში ავტორი.

 

მარსელ პრუსტი – ,,ნაპოვნი დრო“

პრუსტის „ნაპოვნი დრო“ ცნობილი ციკლიდანაა – ,,დაკარგული დროის ძიებაში“, რომელიც 3000-ზე მეტ გვერდს მოიცავს და შვიდ ტომადაა დაყოფილი.

ავტორი გადაწყვეტს, ხელი აიღოს მწერლად გახდომის განზრახვაზე. თუმცა გერმანტების წვეულებაზე მისული ეზოში ფეხს წამოჰკრავს ცუდად დაგებულ ფილაქანს და წამსვე სენ-მარკის ეკლესიის ეზო ახსენდება ვენეციაში, სადაც სწორედ ამგვარად წაბორძიკდა. ლაქიას ჩაი მოაქვს და კოვზი გაწკარუნდება ლამბაქზე, რაც შუა მინდორში გაჩერებული მატარებლის შეკეთების ხმაურს აგონებს, როდესაც საყვარელ ბებიასთან ერთად მგზავრობდა. ბიბლიოთეკაში ფორთოხლის წვენს მოართმევენ და ხელსახოცი სწორედ ისევეა გახამებული, როგორც ბალბეკში პირველად ჩასვლისას დახვდა. ეს სამი ნიშანი იდუმალი კავშირია წარსულსა და აწმყოს შორის. ის უმნიშვნელოვანეს გადაწყვეტილებას იღებს – ჩაიკეტება, წერას დაიწყებს და კვლავ იპოვის დაკარგულ დროს. სასწორის ერთ მხარეს წერა იდება, მეორეზე – სხვა ყველაფერი. წერით უმაქნისი, უბედური, ამაო სიცოცხლე ქმედით, ბედნიერ სიცოცხლედ იქცევა.

პრუსტის ,,ნაპოვნი დრო“ ფრანგულიდან დალი იაშვილმა თარგმნა.

მელანია მაცუკო „ვიტა“

ათასობით იტალიელს შორის, რომლებიც 1903 წელს ნიუ-იორკში ჩადის უკეთესი მომავლის საძებრად, სამხრეთ იტალიის უღარიბესი სოფლიდან შიმშილს გამოქცეული ცხრა წლის ვიტა და თორმეტი წლის დიამანტეც არიან. ძალადობა, ჩაგვრა, შიში, თავისა და ოჯახის რჩენის პასუხისმგებლობა მათ ბავშვობას ართმევს. რომანი ერთსა და იმავე დროს ოჯახური საგაცაა და კოლექტიური ეპოპეაც -სიყვარულზე მარადიული ოცნების, იმედის, არდანებების,  ცრემლიანი და თან ღიმილის მომგვრელი ამბავი. ამ რომანით, თავისი ოჯახის ისტორიიდან აღებული პერსონაჟებით ავტორმა მთელი იტალიის ავტობიოგრაფია დაწერა.

„ვიტა“ მელანია მაცუკოს მესამე რომანია, რომელსაც 2003 წელს იტალიის ყველაზე პრესტიჟული ლიტერატურული პრემია „სტრეგა“ მიენიჭა.  2011 წელს მელანია მაცუკო იტალიის წლის ავტორად დასახელდა. მისი რომანები მსოფლიოს ოცდაათამდე ენაზეა თარგმნილი. „ვიტა“ ამ იტალიელი ავტორის პირველი ნაწარმოებია ქართულ ენაზე.

თბილისის წიგნის 21-ე საერთაშორისო ფესტივალი 2 ივნისს დასრულდა.

„ბათუმის წყლის“ ინფორმაციით, დღეს, 4 ივნისს, 10-დან  16:00 საათამდე წყლის მიწოდება შეუწყდება მახინჯაურისა და განთიადის დასახლებაში მცხოვრებ აბონენტებს.

კომპანიის განცხადებით, წყლის შეწყვეტის მიზეზი მახინჯაურის წყლის სამარაგო რეზერვუარზე სარეაბილიტაციო სამუშაოებია.

დღეს მუსლიმური სამყარო მარხვის დასასრულის დღესასწაულს – რამადან ბაირამს აღნიშნავს.  ბათუმში სადღესასწაულო ლოცვები ორ ადგილას – ორთაჯამესა და ბათუმის ახალ მეჩეთში ერთდროულად დაიწყო.

იმის გამო, რომ მუსლიმებს დღემდე არ მიუღიათ მეჩეთის მშენებლობის ნებართვა, მლოცველთა დიდ ნაწილს გარეთ, ღია ცის ქვეშ მოუწია ლოცვა.

ბათუმის ახალ მეჩეთში სადღესასწაულო ქადაგებას მეჩეთის წინამძღვარი იმამი თამაზ მგელაძე წაუძღვა. ქართველ მუსლიმთა კავშირის ხელმძღვანელის ტარიელ ნაკაიძის თქმით, დღეს რამადანის ლოცვა  ბათუმის ახალ მეჩეთში 4 ათასზე მეტმა ადამიანმა შეასრულა.

“ბათუმის ახალი მეჩეთი არ არის მხოლოდ მეჩეთი. ეს არის ზოგადად მუსლიმების კონსოლიდაციის, მუსლიმების ბრძოლისუნარიანობის შემძენი ერთ-ერთი მთავარი ასპექტი. ძალიან მნიშვნელოვანია იმ მიმართულებით, რომ მუსლიმი თემი გათვიცნობიერდა, თუ როგორ უნდა იბრძოლონ საკუთარი უფლებებისთვის დემოკრატიული გზებით და კანონის ფარგლებში. ეს არის მაგალითი და გამოცდილებაც ამასთანავე. არის გამოთქმა, “ზოგი ჭირი მარგებელია” – ყველა ცუდში რაღაც სიკეთე შეიძლება იყოს. იმ უარში, რომელიც ბათუმის მერიამ გასცა 2017 წელს, ის სიკეთეა, რომ მუსლიმმა თემმა ისწავლა ბრძოლა, ისწავლა ერთიანობა და ისწავლა იმ ღირებულებებზე აქცენტები, რომელიც არამარტო საკუთარი სულიერებისთვის არის მნიშვნელოვანი, არამედ საკუთარი ქვეყნის განვითარებისთვის. სამწუხაროდ, დღევანდელ ხელისუფლებას არ აქვს ხედვა, რომ სწორად და მართებულად მიუდგნენ მუსლიმ თემს და, შესაბამისად, შეაფასონ ეს ყველაფერი. სამწუხაროდ, არ აქვს დღეს ხელისუფლებას სწორი პოლიტიკური ხედვა, რომელიც, ზოგადად, რელიგიური უმცირესობების მიმართ უნდა ჰქონდეს. სწორედ ამის შედეგია, რომ ბათუმში წლების განმავლობაში ვერ ხერხდება სამართლებრივად სწორი ფორმებით აშენდეს ახალი მეჩეთი. დარწმუნებული ვარ, რომ ეს ბრძოლა გამოიღებს შედეგს და არამარტო მუსლიმებისთვის, არამედ ეს იქნება, ზოგადად, საქართველოში მცხოვრები რელიგიური უმცირესობებისთვის მაგალითი, პრეცედენტი იმის, რომ ერთხელ და სამუდამოდ დარეგულირდება, თუ როგორ უნდა მოხდეს სამართლებრივად საკულტო ნაგებობების მშენებლობა,” – თქვა ტარიელ ნაკაიძემ.

ღია ცის ქვეშ ილოცა ორთაჯამეში მისული მუსლიმების ნაწილმაც. ბათუმის ძველი მეჩეთი მლოცველებს ვერ იტევდა. ძველ მეჩეთში სადღესასწაულო ლოცვა საქართველოს მუფთმა ბეგლარ ქამაშიძემ აღავლინა. მუსლიმებს რამადანი მიულოცა აჭარის მთავრობის თავმჯდომარემ და ბათუმის მერმა. ისინი ძველ მეჩეთში მივიდნენ.

რამადან ბაირამი მუსლიმებისთვის უდიდესი დღესასწაულია. მუსლიმები ერთი თვის განმავლობაში მარხულობენ – დილიდან საღამომდე (მზის ამოსვლიდან მზის ჩასვლამდე) არ იღებენ საკვებს და წყალს. ბაირამისთვის აჭარაში აკეთებენ ჰალვას, ამ დღეს ასევე გასცემენ ფითრის ფულს, რომელიც ღარიბებს ურიგდება.

ხვალ, 4 ივნისს, მუსულმები რამადან ბაირამს აღნიშნავენ. შეავსეთ ტესტი და გაიგეთ, ან გაიხსენეთ, რა წერია ყურანში რწმენის თავისუფლების, ქალისა და მამაკაცის თანასწორობის შესახებ, ან სიკეთეზე, სიკვდილზე, წუთისოფელზე.

ტესტი მომზადებულია ყურანის ქართული თარგმანის მიხედვით [გიორგი ლობჟანიძე, კავკასიური სახლი, 2006].

მთავარი ფოტო: ღორჯომის მეჩეთი, მანანა ქველიაშვილის ფოტო „ბათუმელების“ არქივიდან

„გასულ წელთან შედარებით, დელფინების სანაპიროზე გამორიყვის შემთხვევები გახშირდა,“ – ამბობს არჩილ გუჩმანიძე, ბიოლოგიის დოქტორი, ასოციაცია „ფლორა და ფაუნას“ გამგეობის თავმჯდომარე.

„ბოლო მონაცემებით, 60-ზე მეტი ასეთი შემთხვევაა, საუბარია სარფი-ანაკლიის მონაკვეთზე. რაც შეეხება საქართველოს შავი ზღვის სანაპიროს აფხაზეთის მონაკვეთს, ჩემს ხელთ არსებული ინფორმაციით, იქაც ანალოგიური ვითარებაა. არ გვაქვს ზუსტი ციფრები, მაგრამ ვისთანაც გვაქვს კომუნიკაცია, ისინიც ადასტურებენ, რომ ვითარება მსგავსია,“ – ამბობს არჩილ გუჩმანიძე.

მისივე თქმით, ზღვის ძუძუმწოვრების: აფალინის, თეთრგვერდა დელფინისა და ზღვის ღორის გამორიყვის მიზეზი რამდენიმეა: ბადეებში გახლართვა, ზღვის დაბინძურება, პათოლოგიური ფაქტორი ანუ დაავადებები და ნავიგაციური ტრავმები.

„წელს ჩვენ ნავიგაციური ტრავმები არ გვქონია, ბადეებში მოხვედრის კი რამდენიმე შემთხვევა იყო.

ძირითადად, დაღუპული ეგზემპლარების 90 პროცენტი და მეტი არის ტოქსიკო-პათოლოგიური ფაქტორი, ანუ დაავადებები და დაბინძურება, მაგრამ კონკრეტულად რასთან გვაქვს საქმე, ეს ჯერჯერობით უცნობია. ამ საკითხის სიღრმისეული კვლევაა საჭირო, რადგან გარკვეული რისკები არსებობს, მათ შორის ადამიანების დაავადების.

ჩვენ გვაქვს კომუნიკაცია ჩვენს კოლეგებთან შავი ზღვის სხვადასხვა ქვეყნებში. უკრაინასა და რუმინეთში გაკეთებული კვლევებით აქ გააკეთო რაიმე დასკვნა, რა თქმა უნდა, ეს არ არის სწორი, მაგრამ იმ კვლევებში სიკვდილიანობის და შემდგომში გამორიყვის ძირითად მიზეზად დასახელდა ინფექციები,“ – გვითხრა არჩილ გუჩმანიძემ.

მისივე თქმით, დაუშვებელია ნაპირზე გამორიყულ დელფინთან შეხება:

„დელფინი არის თბილსისხლიანი ცხოველი, ისევე როგორც ადამიანი. ძალიან ბევრი საერთო დაავადებაა დელფინსა და ადამიანს შორის, მათ შორის გადამდებიც. აქედან გამომდინარე, არ შეიძლება ნაპირზე გამორიყულ ცხოველთან კონტაქტი. ასეთ დროს უმჯობესია ადამიანმა მიმართოს სამინისტროს, საპატრულო პოლიციას… და ასევე, სანიტარული სამსახურების მიერ დაუყოვნებლივ უნდა მოხდეს მათი გატანა, გაჩერება პლაჟზე არ შეიძლება, იქ არიან შინაური ცხოველები, ფრინველები, მღრღნელები, მწერები… ძალიან დიდია საფრთხეები. ამიტომაც დაუყოვნებლივ უნდა მოხდეს პლაჟიდან გატანა და მისი გაუვნებელყოფა დადგენილი წესით,“ – ამბობს არჩილ გუჩმანიძე.

გარემოს დაცვის სააგენტოში კი „ბათუმელებს“ უთხრეს, რომ დელფინების გამორიყვის ტენდენცია კლებისკენ მიდის. სააგენტოს ცნობით, წელს, იანვრიდან დღემდე, 50 დელფინი გამორიყა ზღვამ, გასულ წელს კი დელფინების გამორიყვის 121 შემთხვევა იყო.  სააგენტოს მიერ მოწოდებული ინფორმაციის თანახმად, უახლოეს წლებში ზღვის ძუძუმწოვრების გამორიყვის ყველაზე მეტი შემთხვევა 2012 წელს იყო – სულ 167.

რაც შეეხება ზღვის ძუძუმწოვრების გამორიყვის მიზეზებს, სააგენტომ ამ ინფორმაციის ოფიციალური გამოთხოვა გვთხოვა.

__________________

მთავარ ფოტოზე: ქობულეთის სანაპიროზე გამორიყული დელფინი. მარიამ დუმბაძის ფოტო.

ამავე თემაზე: 

შავი ზღვის დიაგნოზი – ახალი ფაქტები ყველაზე მასშტაბური კვლევის ანგარიშიდან

See more

 

საგანმანათლებლო და სამეცნიერო ინფრასტრუქტურის განვითარების სააგენტო პროგრამა – „ჩემი პირველი კომპიუტერის“ ფარგლებში 42 500 ლეპტოპს 5,5 მილიონი ლარით ძვირად შეისყიდის, ვიდრე თავიდანვე ჰქონდა გათვლილი. ამ რაოდენობის ლეპტოპების შესაძენად კი სააგენტო 23 162 500 ლარს [545 ლარი ერთი ლეპტოპი] ტენდერის გარეშე დახარჯავს. ამ თანხაში შედის როგორც ლეპტოპების შესყიდვა, ასევე, მათი ტრანსპორტირება საგანმანათლებლო რესურსცენტრებამდე, მთელი ქვეყნის მასშტაბით.

ხელშეკრულება ლეპტოპების შესყიდვაზე ამ შემთხვევაში კომპანია „იუ ჯი თი“-სთან გაფორმდება. შესაბამისი თანხმობა საგანმანათლებლო და სამეცნიერო ინფრასტრუქტურის განვითარების სააგენტოს სახელმწიფო შესყიდვების სააგენტოსგან უკვე აქვს.

სააგენტომ 2019 წლის 2 აპრილს გამოაცხადა ელქტრონული ტენდერი 42 500 ცალი პორტაბელური კომპიუტერის (ლეპტოპების) შესყიდვაზე. შესყიდვის სავარაუდო ღირებულება შეადგენდა 17 637 500 ლარს, ხოლო მიწოდების ადგილად განსაზღვრული იყო ქ. თბილისი.

„გამოცხადებულ ტენდერში მიმწოდებლებმა მონაწილეობა არ მიიღეს. მიზეზების გასარკვევად, თუ რატომ არ შედგა ტენდერი, სააგენტო დაუკავშირდა ბაზრის კვლევაში მონაწილე კომპანიებს [„ალტა“, „ჯი-თი ჯგუფი“, „იუ ჯი თი“]. შედეგად გაირკვა, რომ „იუ ჯი თი“-მ და „ჯი-თი ჯგუფი“-მ ტენდერში არმონაწილეობის მიზეზად ერთეულის ფასი დაასახელეს, ხოლო „ალტა“-ს განმარტებით ტენდერით მოთხოვნილ ერთ-ერთ მაკომპლექტებელზე, კერძოდ, პროცესორის ხელმისაწვდომობაზე მათ პარტნიორ ბრენდებს შეექმნათ პრობლემა, რადგან არის გლობალური დეფიციტი Intel-ის პროცესორზე“, – აღნიშნულია სააგენტოს განაცხადში.

სააგენტოში ასევე აცხადებენ, რომ აღნიშნულის შემდეგ სავარაუდო ღირებულების დასადგენად განახორციელეს განმეორებითი ბაზრის კვლევა. ამ კვლევით ფასები წარმოადგინეს:

• „იუ ჯი თი“ – ერთი ლეპტოპის ფასი 589 ლარი [ჯამური ღირებულება დღგ-ს ჩათვლით 25 032 500 ლარი], მიწოდების ვადა 100 დღე და 565 ლარი [ჯამური 24 012 500 ლარი], თუ მიწოდების ვადა იქნება 135 დღე.
• „ჯი თი ჯგუფი“ – 636 ლარი [ჯამური ღირებულება დღგ-ს ჩათვლით 27 030 000 ლარი], მიწოდების ვადა 70 დღე.
• „ჯი-თი-ეს ჯგუფი“ – 430 ლარი [ჯამური ღირებულება დღგ-ს ჩათვლით 18 275 000 ლარი].

„2019 წლის 20 მაისს საქართველოს მთავრობის ადმინისტრაციიდან გვეცნობა, რომ ადმინისტრაციის შესყიდვების სამსახურის მიერ, კომპეტენციის ფარგლებში, შესწავლილი იქნა ინფორმაცია დღგ-ს ჩათვლით 18 275 000 ლარის ღირებულების ელექტრონული ტენდერის გამოცხადებასთან დაკავშირებით. წერილში ასევე მითითებულია, რომ შესყიდვის ღირებულებისა და საკითხის მნიშვნელობიდან გამომდინარე, ხელმეორედ ტენდერის გამოცხადებისას პრეტენდენტის საკვალიფიკაციო და ტექნიკური მონაცემების მიმართ არსებული მოთხოვნების გადახედვა არ მიაჩნიათ მიზანშეწონილად. ვინაიდან, 30 აპრილიდან საკმაოდ დიდი დროის გასვლის მიუხედავად არ იყო მიღებული გადაწყვეტილება შესყიდვის განხორციელებაზე, სააგენტომ კვლავ ჩაატარა ბაზრის კვლევა და კომპანიებს განუსაზღვრა მოთხოვნები, მათ შორის დისტრიბუციის თაობაზეც“.

ბაზრის კვლევაში ამჯერად მონაწილეობა მიიღო ორმა კომპანიამ:

• „იუ ჯი თი“ – ერთეულის ღირებულება დღგ-ს ჩათვლით შეადგენს 550 ლარს, ხოლო ჯამური ღირებულება 23 375 000 ლარს.
• „ჯი თი ჯგუფი“ – ერთეულის ღირებულება დღგ-ს ჩათვლით შეადგენს 636 ლარს, ხოლო ჯამური ღირებულება 27 030 000 ლარს;

სააგენტო ასევე აღნიშნავს, რომ ამის შემდეგ, 2019 წლის 27 მაისს „იუ ჯი თი“-დან მათთან შევიდა შემდეგი შინაარსის შეტყობინება – „თქვენს მიერ მოთხოვნილ 42 500 ცალ პირველკლასელთა პორტაბელური კომპიუტერების შესყიდვასთან დაკავშირებით ვახდენთ ინფორმაციის განახლებას დღეის მდგომარეობით, მოგახსენებთ რომ შეიქმნა კრიტიკული სიტუაცია მარაგი ნაწილების, კერძოდ პროცესორების ხელწვდომაზე, მწარმოებლისგან მივიღეთ გამაფრთხილებელი ინფორმაცია შინაარსით, რომ მოთხოვნილი რაოდენობის შემოთავაზებული მოწოდების ვადით წარმოებას და ჩამოტანას შეძლებენ იმ შემთხვევაში თუ შეკვეთა განთავსდება მიმდინარე წლის 7 ივნისამდე, ამავე დროს მითითებულ ვადამდე შეკვეთის განთავსების შემთხვევაში შემოთავაზებულ ტექნიკაზე მოხდება ფასდაკლება და ერთეული პორტაბელური კომპიუტერის ფასი იქნება 545 ლარი“.

საგანმანათლებლო და სამეცნიერო ინფრასტრუქტურის განვითარების სააგენტო ირწმუნება, რომ „მთავრობის ადმინისტრაციიდან და შპს „იუ ჯი თი“-დან მიღებული შეტყობინების ანალიზით დგინდება, რომ იმ შემთხვევაში თუ შესყიდვა არ მოხდება კანონით გათვალისწინებულ შეზღუდულ ვადებში, ისეთი მნიშვნელოვანი სახელმწიფოებრივი და საზოგადოებრივი პროექტის, როგორიცაა პირველკლასელ მოსწავლეთა და მათი დამრიგებლების კომპიუტერებით უზრუნველყოფა, განხორციელებას რეალური საფრთხე შეექმნება, რაც დიდი ზიანს მიაყენებს საზოგადოებრივ ინტერესებს“.

სააგენტო ასევე აღნიშნავს, რომ „მოცემულ შემთხვევაში მიმწოდებელი [„იუ ჯი თი“] თავად უზრუნველყოფს კომპიუტერების მიტანას საგანმანათლებლო რესურცენტრებამდე მთელი საქართველოს მასშტაბით. შესაბამისად, მიწოდების ვადა გაიზარდა იმ [დაახლოებით 43 კალენდარული დღე] პერიოდით, რაც სააგენტოს ესაჭიროებოდა კომპიუტერების მთელი საქართველოს მასშტაბით დასარიგებლად. მიწოდების ვადა [2019 წლის 13 სექტემბერი] განსაზღვრულია იმგვარად, რომ სწავლის დაწყების დღეს უზრუნველყოფილი იქნას პირველკლასელებისათვის და მათი დამრიგებლებისათვის პორტაბელური კომპიუტერის გადაცემა“.

საგანმანათლებლო და სამეცნიერო ინფრასტრუქტურის განვითარების სააგენტოს ინფორმაციით, პროგრამის – „ჩემი პირველი კომპიუტერი“, ფარგლებში 2019 წელს სულ  55 000 ცალი ლეპტოპია საჭირო.

„პროგრამის მიზნებისათვის შესყიდული ლეპტოპებით უკვე რამდენიმე წელია ტარდება ერთიანი ეროვნული გამოცდები. შესაბამისად, გამოცდების შეუფერხებლად ჩატარების მიზნით, საქართველოს მთავრობის 2019 წლის 29 მარტის განკარგულების საფუძველზე სააგენტომ 2019 წლის 1 აპრილს გააფორმა ხელშეკრულება და შპს „იუ ჯი თი“-სგან შეისყიდა 12 500 ცალი ლეპტოპი. აღნიშნული კომპიუტერები სსიპ შეფასებისა და გამოცდების ეროვნული ცენტრს გადაეცემა დროებით სარგებლობაში და გამოცდების დასრულების შემდეგ უბრუნდება სააგენტოს, რათა მოხდეს ბენეფიციარებისთვის მათი მიწოდება“.

სააგენტომ „იუ ჯი თი“-სგან 12 500 ცალი კომპიუტერი 6 373 750 ლარად [ერთი კომპიუტერის ფასი 509 ლარი და 90 თეთრი] შეისყიდა. თუ შეძენილი და შესაძენი კომპიუტერების ფასებს დავაჯამებთ, სააგენტო 2019 წელს ლეპტოპების შესაძენად ამ კომპანიას ჯამში 29 536 250 ლარს გადაუხდის.

 

 

კურორტ ბახმაროს ელექტრომომარაგების ქსელის მოწყობისა და ინდივიდუალირი გამრიცხველიანებისთვის საქართველოს მუნიციპალური განვითარების ფონდმა 3-მილიონიანი ტენდერი გამოაცხადა.

ტექნიკურ პირობაში აღნიშნულია, რომ სს „ენერგო პრო-ჯორჯია“ ტენდერში გამარჯვებულს სამშენებლო მოედანზე მიაწვდის აღრიცხვის კარადებს; მრიცხველებსა და მიწისქვეშა ელექტრო სადენებს, ასევე პროექტს, რომლის მიხედვითაც უნდა შესრულდეს სამუშაოები.

მუნიციპალური განვითარების ფონდის ინფორმაციით, კურორტ ბახმაროს ელექტრომომარაგება პირველი ეტპის პროექტის ფარგლებში განხორციელებულია ქვესადგურ „ნაბეღლავი“-დან გამომავალი, 35 კვ ძაბვის გაბარიტებში აშენებული, 10 კვ ძაბვაზე ჩართული საჰაერო ელექტროგადამცემი ხაზით, სიგრძით 15 კმ. პროექტის მეორე ეტაპი კი ითვალისწინებს ბახმაროს ტერიტორიაზე 0.4 კვ. მომხმარებლებისთვის მიწისქვეშა კაბელების და მრიცხველის კარადების [თითო კარადა გათვლილია 12 აბონენტზე] მოწყობას.

პროექტის მიხედვით ბახმაროში უნდა აშენდეს 9 სატრანსფორმატორო ქვესადგური; მომხმარებლების სიახლოვეს დამონტაჟდება 12-მრიცხველიანი ჯგუფური ძალოვანი კარადები [საერთო ჯამში 345 კარადა], საიდანაც სპილენძის მრავალძარღვა მიწისქვეშა კაბელით მოხდება აბონენტების ელექტრომომარაგება; თითოეულ აბონენტთან კი დამონტაჟდება ავტომატური ამომრთველი გარე დადგმულობის ინდივიდუალურ კოლოფში, რომელზეც მიერთდება აბონენტის შიდა ქსელი.

სამუშაოები უნდა დაიწყოს ხელშეკრულების გაფორმების დღიდან და დასრულდეს 2019 წლის 15 ნოემბერს. ტენდერში წინადადებების მიღება კი 2019 წლის 4 ივნისს დასრულდება.

დაახლოებით ორი კვირის წინ, კურორტ ბახმაროში ცხრა მიწის ნაკვეთი და მათზე განლაგებული შენობა-ნაგებობები საქართველოს მთავრობამ „ორბი ჯგუფი ბახმაროს“ 1 ლარად მიჰყიდა. ნაკვეთების საერთო ფართობი 43 269 კვ.მ-ია. კომპანიამ სიმბოლურ ფასად გადაცემულ ქონებაზე 5 წლის ვადაში უნდა აამოქმედოს არანაკლებ 120 ნომრის მქონე სასტუმრო/სასტუმროები, კომერციული ფართობ[ებ]ი, კვების ობიექტ[ებ]ი, სპორტული მოედნები და სხვ.

ინვესტიციის მინიმალური მოცულობა 50 მილიონი ლარია, მაგრამ „ორბი ჯგუფში“ აცხადებენ, რომ აღნიშნულ პროექტში 100 მილიონ ლარზე მეტი ინვესტიციის დაბანდებას გეგმავენ; სასტუმრო ნომრების ფონდი კი 120-დან 800 ნომრამდე გაიზრდება.

ამ თემაზე:

გურიის გუბერნატორი: ბახმაროში სასტუმრო კომპლექსების მშენებლობა იგეგმება

See more

 

 

აჭარის განათლების სამინისტრომ ხუთი საჯარო სკოლისთვის ფიზიკის, ქიმიისა და ბიოლოგიის ლაბორატორიის აღჭურვილობის შესყიდვაზე ტენდერი ხელახლა გამოაცხადა. შესყიდვის სავარაუდო ღირებულება კვლავ 100 ათასი ლარია.

ანალოგიურ შესყიდვაზე სამინისტრომ ტენდერი მიმდინარე წლის 7 მარტს გამოაცხადა. ამ ტენდერში ყველაზე დაბალი ფასი შპს „ნიუ ლაბი“-მ დააფიქსირა – 64 800 ლარი. სამინისტროს სატენდერო კომისიამ ეს კომპანია გამარჯვებულად გამოაცხადა, თუმცა სხვა კომპანიამ [„ჯეო დეკორ“-მა], კომისიის გადაწყვეტილება დავების საბჭოში გაასაჩივრა.

დოკუმენტებიდან ჩანს, რომ დავების განხილვის საბჭოს გადაწყვეტილებით სამინისტროს სატენდერო კომისიას დაევალა გადაესინჯა მის მიერ მიღებული გადაწყვეტილება და ხელახლა განეხორციელებინა „ნიუ ლაბი“-ს დაზუსტებული ტექნიკური დოკუმენტაციის შერჩევა-შეფასება.

სატენდერო კომისიის ოქმში აღნიშნულია, რომ საჩივრით „სადავოდ“ იყო გამხდარი შემდეგი საკითხი: „პრეტენდენტს (ქვეკონტრაქტორს) საქონლის ძირითად მახასიათებლებში არ აქვს მითითებული ფიქსირებული ზომები და შემოთავაზებული აქვს „არაუმეტეს“ „არანაკლებ“… რაც არ წარმოადგენს შემოთავაზებული საქონლის ზუსტ პარამეტრებს“.

ამასთან, „დავების საბჭომ აღნიშნა, რომ ზემოაღნიშნულ მსაზღვრელებს „არანაკლებ“, „არაუმეტეს“, ასევე პროდუქციის მოდელთან დაკავშირებულ მითითებას, შეიცავდა ასევე ფასების ცხრილი, რომელიც შეფასებული იქნა სატენდერო კომისიის შესაბამისი ოქმით. თუმცა, ვინაიდან საჩივრის შემოტანის დროს გასული იყო გასაჩივრების 5-დღიანი ვადა. შესაბამისად, საბჭო მოკლებული იყო შესაძლებლობას ემსჯელა და გაეუქმებინა აღნიშნული ოქმი“.

სამინისტროს სატენდერო კომისიის მომდევნო ოქმში აღნიშნულია, რომ „მას უფლება აქვს გააუქმოს მის მიერ მიღებული გადაწყვეტილებები, თუმცა ამ შემთხვევაში ხელახლა უნდა განხორციელდეს პრეტენდენტის წინადადების ხელახალი განხილვა, რასაც მოყვება ხელახალი დაზუსტება, რაც არ არის მიზანშეწონილი, რადგანაც სატენდერო კომისიის ქმედების გამო ერთ პრეტენდენტს მიეცემა შესაძლებლობა ორჯერ გამოიყენოს დაზუსტების ეტაპი“.

„გამომდინარე იქედან, რომ საფრთხე არ შეექმნას საქონლის მოწოდებას და სკოლებმა მიიღონ სტანდარტით გათვალისწინებული მოწყობილობები/მასალები, რომლებიც კონკრეტულად იქნება განსაზღვრული ხელშეკრულებით, შესაბამისად, სატენდერო კომისიას მიზანშეწონილად მიაჩნია შეწყდეს ელექტრონული ტენდერი და გამოცხადდეს ხელახლა, სადაც კონკრეტულად განისაზღვრება შესყიდვის ობიექტთან დაკავშირებული მოთხოვნები“ – აღნიშნულია ოქმში.

სამინისტრომ ხელახალი ტენდერი 2019 წლის 27 მაისს გამოაცხადა.

ლაბორატორიის თითო ეგზემპლარი, რომელსაც სამინისტრო შეიძენს, გადაეცემა შემდეგ სკოლებს:

[checklist]

• ქედის მუნიციპალიტეტის სოფელ ცხმორისის საჯარო სკოლა;
• შუახევის მუნიციპალიტეტის სოფელ ჯაბნიძეების საჯარო სკოლა;
• დაბა ხულოს საჯარო სკოლა;
• ხელვაჩაურის მუნიციპალიტეტის სოფელ თხილნარის N1 საჯარო სკოლა;
• ქალაქ ქობულეთის N2 საჯარო სკოლა.

[/checklist]

ხელახლა გამოცხადებულ ტენდერში წინადადებების მიღება 2019 წლის 9 ივნისს დაიწყება და 11 ივნისს დასრულდება.

გამარჯვებულმა ლაბორატორიები შესაბამის რესურსცენტრებს, ხელშეკრულების გაფორმებიდან 45 დღეში უნდა მიაწოდოს.

დღეს პირველ ივნისს, ბავშვთა დაცვის საერთაშორისო დღეს, იუნისეფი ძალადობის მსხვერპლი ბავშვების შესახებ საუბრობს და სახელმწიფოს მოუწოდებს ძალადობის მსხვერპლი ბავშვებისთვის ფსიქო-სოციალური პროგრამები დაინერგოს.

იუნისეფის განცხადებით, პრობლემაა იმ სპეციალიზებულ პროფესიონალთა ნაკლებობაც, რომლებიც ძალადობაგადატანილ ბავშვებს რეაბილიტაციაში ეხმარებიან.  საჭიროა სოციალური მუშაკების გაძლიერება და ბავშვებთან მომუშავე სხვა პროფესიონალების  კვალიფიკაციის ამაღლება, შესაბამისი სერვისების და პროგრამების შექმნის პარალელურად, რომ ბავშვებმა შეძლონ ტრავმასთან გამკლავება და შემდგომი განვითარება.

„ამ დღეს ასევე გვსურს ვიფიქროთ იმ ბავშვებზე, ვინც ყურადღების მიღმაა დარჩენილი, ცხოვრობს სიღარიბეში, ძალადობის მსხვერპლია და არ არის დაცული. ქვეყანაში არ არსებობს   შესაბამისი მომსახურებები ძალადობის მსხვერპლი ბავშვებისთვის. ამიტომ მზადყოფნას გამოვთქვამთ, დავეხმაროთ მთავრობას ამგვარი მომსახურებების და პროგრამების შემუშავებაში“-ამბობს, ორგანიზაციის წარმომადგენელი საქართველოში, ღასან ხალილი.

წელს ასევე აღინიშნება ყველაზე ფართოდ რატიფიცირებული ადამიანის უფლებათა საერთაშორისო ხელშეკრულების –  ბავშვის უფლებათა კონვენციის – 30 წლისთავი.

„მიღებიდან 30 წლის მანძილზე ამ კონვენციამ ხელი შეუწყო ბავშვთა ცხოვრებების გარდაქმნას. მან სათავე დაუდო საკანონმდებლო ცვლილებებს, რომ უკეთ იყოს დაცული ბავშვთა უფლებები და მათ მიეცეთ საზოგადოებაში მონაწილეობის საშუალება. თუმცა ბავშვის უფლებათა კონვენცია ჯერ კიდევ არ არის სრულად რეალიზებული და სათანადოდ გააზრებული. აუცილებელია 21-ე საუკუნეში კონვენციის  რელევანტურობის და საჭიროების ხაზგასმა. იუბილე განსაკუთრებული მომენტია იმისთვის, რომ წევრმა სახელმწიფოებმა კვლავაც აიღონ ვალდებულება, განახორციელონ კონვენცია და  მოსახლეობაში გააუმჯობესონ ცოდნა ბავშვის უფლებების შესახებ“-ნათქვამია, იუნისეფის განცხადებაში.

ორგანიზაციის მიერ გავრცელებულ განცხადებაში ასევე წერია, რომ ბავშვის უფლებათა კოდექსის პროექტი, რომელიც საქართველოს პარლამენტში ამჟამად განიხილება, მნიშვნელოვანი კანონია, რომელიც ქმნის სამართლებრივ საფუძვლებს, დაცვის მექანიზმებს და გარანტიებს საქართველოში ბავშვის უფლებებისა და თავისუფლებების რეალიზაციისთვის.

„მასში განსაკუთრებული ყურადღება ეთმობა ბავშვის უფლებას იზრდებოდეს ოჯახში, დაცული იყოს ძალადობის ყველა ფორმისგან, მიუწვდებოდეს ხელი ინკლუზიურ განათლებასა და ჯანდაცვაზე, სოციალურ დაცვასა და მართლმსაჯულებაზე.  მიღების შემდეგ, ეს კოდექსი წარმართავს სახელმწიფო უწყებების, ადგილობრივი ხელისუფლებების, სასამართლოების, საჯარო და კერძო ორგანიზაციების და პირების  ბავშვებთან მუშაობისა და მათ შესახებ გადაწყვეტილებების მიღების პროცესს“.