რატომ დაიკეტა პეტრას ციხე – პროექტი, რომელშიც 1 750 000 ლარი დაიხარჯება


პეტრას ციხე 2019 წლის 12 აგვისტოდან 2020 წლის პირველ დეკემბრამდე ვიზიტორებისთვის დაიკეტა. აჭარის კულტურული მემკვიდრეობის დაცვის სააგენტოს განცხადებით, მიზეზი  მიმდინარე ინფრასტრუქტურული სამუშაოებია.

პეტრას ციხეზე ინფრასტრუქტურის მოსაწყობად აჭარის კულტურული მემკვიდრეობის დაცვის სააგენტომ ტენდერი 2019 წელს მესამედ გამოაცხადა და გამარჯვებულთან – სამშენებლო კომპანია „ივერთმშენთან“ – 2019 წლის 8 აგვისტოს ხელშეკრულებაც გააფორმა. შესყიდვის ღირებულება 1 მილიონ 750 ათასი ლარი იყო, ზუსტად ამ თანხაზეა გაფორმებული ხელშეკრულებაც.

ტენდერის პირობის თანახმად, „სამუშაოების განხორციელება უნდა დაიწყოს ხელშეკრულების გაფორმების დღიდან და დასრულდეს 2020 წლის პირველ დეკემბრამდე“.

ეს ტენდერი სააგენტომ მიმდინარე წლის 30 ივნისს გამოაცხადა, სადაც წინადადებების მიღება 5 ივლისს შეწყდა. ტენდერში, ელექტრონული შესყიდვების პორტალის მიხედვით, მხოლოდ ერთი კომპანია მონაწილეობდა. ეს მესამე ტენდერი იყო, რომელიც სააგენტომ პეტრას ციხეზე ინფრასტრუქტურის მოსაწყობად 2019 წელს გამოაცხადა.

თებერვალში გამოცხადებული ტენდერი თავად სააგენტომ შეწყვიტა. აღნიშნული ტენდერის გამო აჭარის კულტურული მემკვიდრეობის დაცვის სააგენტოს ორმა კერძო კომპანიამ დავების საბჭოშიც უჩივლა. ამ თემაზე ვრცლად იხილეთ ბმულზე: ატომ შეწყვიტა სააგენტომ პეტრას ციხეზე ინფრასტრუქტურის მოწყობის ტენდერი.

რაც შეეხება აპრილში მეორედ გამოცხადებულ ტენდერს, ის უარყოფითი შედეგით დასრულდა. სააგენტოს სატენდერო კომისიის შესაბამის ოქმში აღნიშნულია, რომ პრეტენდენტის მიერ წარმოდგენილი დოკუმენტაცია ვერ აკმაყოფილებდა ტენდერის მოთხოვნებს, რის გამოც მას დისკვალიფიკაცია მისცეს. პრეტენდენტი იყო „სამშენებლო კომპანია „ივერთმშენი“, რომელიც სააგენტოს სამუშაოების შესრულებას 1 მილიონ 529 ათას ლარად სთავაზობდა [ამ კომპანიასთან მესამე ტენდერის შემდეგ კი ხელშეკრულება, როგორც აღვნიშნეთ 1 მილიონ 750 ათას ლარზე გაფორმდა, საიდანაც, ხელშეკრულების მიხედვით, 2019 წელს კომპანიას 700 ათასი ლარი აუნაზღაურდება, დანარჩენი – 1 050 000 კი, 2020 წელს.]

სააგენტოს პეტრას ციხეზე სამუშაოების დასრულების ვადად თავიდან, 2020 წლის პირველ სექტემბრამდე პერიოდი ჰქონდა განსაზღვრული. თუმცა, სატენდერო პროცედურების გამო, ეს ვადა სამი თვით – 2020 წლის პირველ დეკემბრამდე გადაიწია.

ციხე-ქალაქი პეტრა ადრეფეოდალური კულტურის ძეგლია, რომელიც ახალი წელთაღრიცხვის VI საუკუნით თარიღდება.

რა სამუშაოების ჩატარებაა დაგეგმილი პეტრას ციხეზე, შეგიძლიათ იხილოთ ბმულზე:

რა იგეგმება პეტრას ციხეზე – ინფრასტრუქტურის მოსაწყობად 1,7 მილიონი ლარი დაიხარჯება

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com