“გადადგეს საქართველოს მთავრობა” – ორი კაცის შიმშილობა ბათუმში


“გადადგეს საქართველოს მთავრობა, შეწყდეს ძალადობა თავისუფალ მედიაზე,”-  ამ მოთხოვნებით ბსუ-ს მეცნიერ თანამშრომელი უჩა ოქროპირიძე მეხუთე დღეა ბათუმში შიმშილობს. ოთხი დღის წინ უჩა ოქროპირიძის მოთხოვნებს შეუერთდა მხატვარი ჯონი ჯიჯეიშვილი. მათ ბათუმის დრამატული თეატრის წინ აქვთ კარავი გაშლილი.

“თავისუფლება პოლიტპატიმრებს, დავით გარეჯი საქართველოა, რუსეთი ოკუპანტია,” – საპროტესტო ტრანსპარანტები

“ვითხოვ საქართველოს მთავრობის გადადგომას, რადგანაც ის, ფაქტობრივად, არ არსებობს. საკუთარ არარსებობას ის ვერ გრძნობს. 20 ივნისს თავის არარსებობას დაუსვა წერტილი,” – ამბობს უჩა ოქროპირიძე.

“მეოთხე დღეა აქციას შევუერთდი. თბილისშიც ვიყავი, მაინტერესებდა შიმშილობის პროცესი. თბილისში რომ ჩავედი, იქ აღარ შიმშილობდნენ. მერე აქ დაიწყო უჩამ, ჩამოვედი და დავდექი აქ. საერთო ქართული მოთხოვნაა ამ აქციის მოთხოვნა –  უნდა გადადგეს მთავრობა,” – ამბობს მხატვარი ჯონი ჯიჯეიშვილი.

ჯონი ჯიჯეიშვილი და უჩა ოქროპირიძე

კითხვაზე, როდემდე აპირებენ შიმშილობის გაგრძელებას, უჩა ოქროპირიძე პასუხობს:

“სადამდეც არ მოუვა მთავრობას გონიერი აზრი და იმაში მაინც არ დაეთანხმება ქართველ ხალხს, რომ ასე გაგრძელება არ შეიძლება”.

მოქალაქეები მთავრობის გადადგომის მოთხოვნით შიმშილობენ

 

ნეტგაზეთის მასალების სხვა გამოცემებში გადაბეჭდვის წესი
ავტორი