Batumelebi

1921 წელს, ჯერ კიდევ საბჭოთა რეჟიმის დამყარებამდე ბათუმის ნავსადგურიდან გემს კონსტანტინეპოლისკენ  19-20 წლის ჯარისკაცი გაჰყვა. კონსტანტინეპოლიდან  ცხოვრების ამოუცნობმა გზებმა საბოლოოდ  ის შორეული ამერიკისკენ  წაიყვანა, საოცნებო ქვეყანაში, სადაც  მისი ცხოვრება  სხვა ემიგრანტებისგან განსხვავებულ დიდ ზღაპრად იქცა.

ჯარისკაცს ჯორჯ  (გიორგი) პაპაშვილი ერქვა და მოგვიანებით , საქართველოსა და ემიგრაციის თემაზე დაწერილი მისი ინგლისურენოვანი წიგნი „Anything Can Happen“, ,,ყველაფერი შეიძლება მოხდეს“ 40-იანი წლების ამერიკაში ბესტსელერი გახდება, თვალის დახამხამებაში გაქრება დახლებიდან წიგნის მილიონნახევრიანი ტირაჟი, ითარგმნება მსოფლიოს 15 ენაზე და ჯეკ ლონდონთან, იუჯინ ო’ნილთან, ფოლკნერთან, ჰემინგუეისთან და სხვა მწერლებთან ერთად ჯორჯ პაპაშვილს ამერიკის 50 რჩეულ ი ლიტერატურის სიაში შეიყვანენ – ეს 1950 წელს მოხდება.

წიგნის მიხედვით ჯორჯ სიტონის მიერ  1952 წელს გადაღებული ამავე სახელწოდების  Paramount pictures-ის საათნახევრიანი  ფილმი „Anything Can Happen“ ოქროს გლობუსს აიღებს.

სახალისო ნაწყვეტი ჯორჯ პაპაშვილის წიგნის მიხედვით გადაღებული ფილმიდან ,,Anything Can Happen“ ფილმის გმირს თან ხინკლის ცომი მიაქვს, ცომი სიცხეში ფუვდება და ტრანსპორტში დიდ გაუგებრობას ქმნის.

წიგნი პაპაშვილის მშობლიურ კობიანთკარზე, ქართულ რეალიიებზე, მის ახლობლებზე, ემიგრაციაზე, ამერიკაში ემიგრანტთა თვითდამკვიდრების რეალობაზე მოგვითხრობს -მსუბუქად და სახალისოდ.

ჯორჯ პაპაშვილზე  აქამდე საქართველოში ძალიან მწირი ცნობები არსებობდა, მისი ნაწერები არც კი განიხილებოდა ემიგრანტულ ლიტერატურად, ყველა ამერიკულ გამოცემაში წერია, რომ ის არის  ამერიკელი მწერალი და მოქანდაკე ფრჩხილებში კი მითითებულია: ქართული წარმომავლობის

,,ყველაფერი შეიძლება მოხდეს“ ქართულად 60-იან წლებში თარგმნა ანდუყაფარ ჭეიშვილმა, მაგრამ მცირეტირაჟიანი თარგმანი ყველასთვის ხელმისაწვდომი არ იყო.

,,უცნობი ჯორჯ (გიორგი) პაპაშვილი“ ივ. ჯავახიშვილის სახ. თბილისის სახელმწიფო უნივერსიტეტის  პროფესორის, რუსუდან ნიშნიანიძის პირველი, ორტომიანი მნიშვნელოვანი კვლევაა პაპაშვილზე. ვრცელი ნაშრომი ავტორმა  მას შემდეგ გამოაქვეყნა, რაც შეერთებულ შტატებში, კერძოდ, პენსილვანიაში, ლიჰაის უნივერსიტეტში (სადაც ეს უნიკალური არქივია დაცული) ჯორჯ  და ჰელენ უეიტ პაპაშვილების სპეციალურ კოლექციას გაეცნო   საფუძვლიანად. რუსუდან ნიშნიანიძე აქამდე უცნობი ჯორჯ პაპაშვილის მემკვიდრეობაზე გვესაუბრება:

„ყველაფერი შეიძლება მოხდეს“

რამდენიმე წლის წინ პარიზ_ლევილის და ჰარვარდის არქივებზე ვმუშაობდი, რაც ჩემთვის დიდი პროფესიული გამოცდილება იყო. სხვადასხვა არქივში არაერთხელ შემხვდა ჯორჯ პაპაშვილის სახელი საინტერესო კონტექსტში, რაც მიმანიშნებდა, რომ ეს იყო ძალიან წარმატებული ქართველი. დავიწყე მასზე ცნობების შეგროვება, დავუკავშირდი ამერიკაში სხვადასხვა საარქივო  დააწესებულებას, რაკიღა კონკრეტული მინიშნება  ცნობილი არ  იყო  პენსილვანიიდან მომწერეს, რომ პაპაშვილების სპეციალურ კოლექციას გამიხსნიდნენ თუ  ადგილზე ჩავიდოდი საკვლევად, ცხადია, ეს შესაძლებლობა ხელიდან არ  გავუშვი და სამეცნიერო  მივლინებით  გავემგზავრე შტატებში.  იმავე, 2012 წელს ვაშინგტონში, კონგრესის სადემონსტრაციო დარბაზში გამოიფინა ჩემი ორტომეული: ,,საქართველო სამანს აქეთ… და სამანს იქით…“  ეს წიგნები ძირითადად ევროპაში მყოფი ქართველი ემიგრაციის ტექსტების კვლევა გახლდათ.

ევროპაში ემიგრირებული ქალთველი ავტორები ძირითადად მაინც ქართველი მკითხველებისთვის წერდნენ. პაპაშვილის ტექსტები კი  ინგლისურ ენაზე იყო დაწერილი. თავად ყვებოდა და ჰელენი ამ თავგადასავლებს იწერდა.

საქართველოდან წასულ ახალგაზრდა პაპაშვილს აქ არავინ იცნობდა. მოგონებებში წერს, რომ ამერიკაში ჩასული ,, მუნჯურად    ელაპარაკებოდა ამერიკას“, რადგან ინგლისური არ  იცოდა.

,,ყველაფერი შეიძლება მოხდეს“ წიგნად 1944 წელს გამოიცა პირველად შტატებში, მანამდე ცალკეულ თავებად იბეჭდებოდა ,,ქომონ გრაუნდში“, შემდეგ წიგნი სამჯერ ზედიზედ გამოსცეს ოქტომბერში, ნოემბერსა და დეკემბერში. 1945 წელს ,,ყველაფერი შეიძლება მოხდეს“ ბესტსელერად აღიარეს. არქივში დაახლოებით 600-ზე მეტი რეცენზია და ლიტერატურული წერილი ვნახე, რაც ვფიქრობ, ძალიან სერიოზული გამოხმაურებაა. ორტომეულში ძირითადი და მნიშვნელოვანი ნაწილია წარმოდგენილი მათი თარგმანების, თუმცა რასაკვირველია, ყველა არა. ეს იმის ჩვენება გახლდათ, ვინ დაკარგა საქართველომ. არაერთი ნიჭიერი ქართველი გახდა იძულებული, იმ წლებში დაეტოვებინა ქვეყანა.

ჯორჯის მეუღლე, ჰელენი ძალიან განათლებული ქალი გახლდათ. ბერკლის უნივერსიტეტში სწავლობდა და თავადაც რამდენიმე წიგნის ავტორი იყო. სწორედ ის იწერდა ჯორჯის მიერ ინგლისურად მონათხრობ ქართულ-ამერიკულ ამბებს. საბჭოთა პრესაში წაიკითხავთ, რომ ეს არ იყო პაპაშვილის მონათხრობი და თითქოს წიგნი ჰელენმა დაწერა, მაგრამ შეუძლებელია ამერიკელ ქალს სცოდნოდა კობიანთკარზე,  ხევსურეთზე, ქართველებზე ზოგადად, ხინკალზე,ნიორწყალსა და ხუთკუნჭულააზე. ყველაფერი კი შეიძლება მოხდეს, მაგრამ არც ამდენი!

ავტორი იხსენებს საქართველოს, მის წეს-ჩვეულებებს, წერს ყველაფერზე – რაც მოსწონს და რაც არ მოსწონს ამერიკაში. აქ შეხვდებით ისტორიებს, თუ როგორ იქცევიან ამერიკაში ჩასული ემიგრანტები და როგორ იქცევა თავად გიორგი _ ნაწარმოებში ჯორჯი, მთავარი გმირი, რომელიც რუს ემიგრანტებთან ერთად   ცხოვრობს.

ვნახე მიუნხენში გამოცემული რუსულად თარგმნილი ეს ტექსტი. საბჭოთა ეპოქაში მთარგმნელს 20 თავისგან შემდგარი წიგნიდან 9 ამოუღია, სადაც ავტორი რუსი ემიგრანტების ამერიკაში ცხოვრებას აღწერს. გამოცემას რედაქტორისა და მთარგმნელის სახელიც კი არ აქვს მითითებული. დაკარგულია იუმორი, ტექსტის მთავარი ღირსება და სათქმელი.

ეს საბჭოთა უშიშროების ,,ოსტატური“ ხერხი გახლდათ – თარგმნეს წიგნი, მაგრამ ისე, რომ არავის მოსწონებოდა და არც ავტორისადმი ინტერესი გაჩენილიყო.

,,ოქროს გლობუსი“ ფილმმა მიიღო, ნომინაციაში: ,,ფილმი, რომელიც ხელს უწყობს საერთაშორისო თანხმობას“. რეჟისორი გახლდათ ცნობილი ჯორჯ სიტონი, რომლის ფილმებიც არაერთხელ იყო წარდგენილი ამერიკის კინოაკადემიის პრემიაზე. ამ შემთხვევაშიც მის მიერ მოწვეული საუკეთესო გუნდი მუშაობდა.

,,ჯორჯ პაპაშვილმა დაგვიტოვა რაღაც, რაც ყველაფერზე მეტია – მან  გვაზიარა მეგობრობის, თანაგრძნობის, ერთიანობისა და ახლობლის სიყვარულს ჭეშმარიტ მნიშვნელობას“ – ეს ფილმის რეჟისორის, სიტონის სიტყვებია, რომელიც მან ჯორჯის  დაკრძალვისას წარმოთქვა.

ჯორჯ პაპაშვილი – მოქანდაკე

გარდა იმისა, რომ რამდენიმე წიგნის ავტორი გახლდათ,, ჯორჯ პაპაშვილი უპირველესად იყო მოქანდაკე. მისი ნამუშევრები გამოფენილიი იყო პენსილვანიის სახვითი ხელოვნების აკადემიაში, ფილადელფიის ხელოვნების უნივერსიტეტში და ა.შ.

არტურ სტენიუსმა, რომელსაც აშშ-ში დოკუმენტური ფილმების დიდი კორპორაცია ჰქონდა პაპაშვილზე დოკუმენტური ფილმიც გადაიღო სახელწოდებით „მშვენიერება ქვაში“.

პენსილვანიის შტატში მისი მამული უზარმაზარ ტერიტორიას მოიცავს სანადირო ადგილებით, ტყეებითა და წყაროებით. უკან გრანიტის მთებია, საიდანაც ამწეებით მოჰქონდა სახლამდე მასალა მოქანდაკეს და შინ მოწყობილ სახელოსნოში აქანდაკებდა.

სტენიუსის დოკუმენტური ფილმი  ჯორჯ პაპაშვილზე დეტროიტში უეინის უნივერსიტეტში ინახება.

ჯორჯ და ჰელენ უეიტ პაპაშვილებს ეკუთვნით ასევე ტექსტები “ჰო და არა” ზღაპრები, “შინისაკენ, კვლავ შინისაკენ”, “რუსული (მსოფლიო) კულინარია”, “მადლობა ნოეს” და  ,,ძაღლები და ადამიანები“

,,მადლობა ნოეს“ ცხოველებზე დაწერილი თავგადასავლებია ბავშვებისთვის. ტექსტი ქართულად ისევე, როგორც ,,ყველაფერი…“ ბატონმა ანდუყაფარ ჭეიშვილმა თარგმნა სახელწოდებით ,,დღესაც მელოდება“ – ასე ქვია პირველ თავს წიგნში.

მქონდა სურვილი, რომ ქართულ სასკოლო სახელმძღვანელოებში თუნდაც რამდენიმე თავი შეგვეტანა ამ ტექსტიდან. სასიამოვნოდ გაოცებული დავრჩი , როცა არქივში ვნახე , რომ ამერიკის საშუალო 250 სკოლაში ეს წიგნი, როგორც სავალდებულო, ისე გახლდათ შეტანილი.  ჩემი და ამერიკის განათლების სისტემის აზრი ერთმანეთს დაემთხვა

წიგნს ,,შინისკენ, კვლავ შინისაკენ“ ჯორჯ   პაპაშვილიისა და ჰელენის ბოლო წიგნია. მისი ტირაჟი 73 ათასი იყო და ფიქრობდნენ, რომ პირველი წიგნივით ბესტსელერი გახდებოდა, მაგრამ ასე არ მოხდა.

პაპაშვილი 1961 წელს ჩამოვიდა საქართველოში მეუღლესთან დარჩენაც შესთავაზეს, მაგრამ უარი თქვა: ,,მე ვერ დავრჩები, ჩემი ,,შინ“ ,ჩემი საქმე, ჩემი ცხოვრება უკვე შეერთებულ შტატებშია“ – ეს სიტყვები ბოლო წიგნში გაიხსენა 10 წელი რომ წერდა.

ქართველებისთვის აქამდე უცნობი ჯორჯ პაპაშვილი 1978 წელს გარდაიცვალა, 80 წლის ასაკში და პენსილვანიაში, საკუთარ მამულშია დაკრძალული მეუღლესთან ერთად.

საზოგადოება – „მე მიყვარს ბათუმი“ ბათუმში ძეგლის სტატუსის მისანიჭებლად წარდგენილი სახლების თაობაზე საქართველოს პრეზიდენტს სალომე ზურაბიშვილს, პრემიერ გიორგი გახარიას და მთავრობის სხვა წევრებს მიმართავს.

საქმე იმაშია, რომ ხვალ, 13 მარტს, ექვსწლიანი ლოდინის შემდეგ, კულტურული მემკვიდრეობის ძეგლების საბჭომ, „გეოგრაფიკის“ მიერ ძეგლის სტატუსის მისანიჭებლად რეკომენდებული 23 სახლის საკითხი უნდა განიხილოს. შესაბამისად, ხვალინდელ სხდომაზე გადაწყდება, მიანიჭებენ თუ არა ამ სახლებს ძეგლის სტატუსს.

ამის შესახებ ინფორმაცია „ბათუმელებმა“ 11 მარტს გამოაქვეყნა.

ორგანიზაციის მიმართვის ტექსტს უცვლელად გთავაზობთ:

„2015 წელს კომპანია „გეოგრაფიკმა“ ბათუმის მერიის დაკვეთით შეარჩია და ძეგლის სტატუსის მისანიჭებლად წარადგინა 22 შენობა (+ მ. აბაშიძის 44) ბათუმის ისტორიულ ნაწილში.
მიუხედავად იმისა, რომ კვლევა საქართველოში ყველაზე კომპეტენტურმა სპეციალისტებმა ჩაატარეს და ამაზე ბიუჯეტიდან 100 000 ლარი დაიხარჯა, დღემდე სტატუსი არცერთ შენობას არ მინიჭებია.
უფრო მეტიც, ამ დროის განმავლობაში სიიდან რამდენიმე შენობა უკანონოდ დაინგრა.

ხვალ, 13 მარტს, კულტურული მემკვიდრეობის დაცვის ეროვნულ სააგენტოს ძეგლების მინიჭების საკითხი სხდომაზე განსახილველად გააქვს.

პრაქტიკა გვაჩვენებს, რომ ისტორიულ შენობებს მხოლოდ კომერციული მიზნით ანგრევენ ხელისუფლებასთან გარიგებით, შესაბამისად, თუკი ხვალ ამ ისტორიულ სახლებს სტატუსი არ მიენიჭება, ის უახლოეს ხანში განწირულია დასანგრევად.

აქედან გამომდინარე მოვითხოვთ, რომ კვლევის შედეგად გამოვლენილ ყველა შენობას მიენიჭოს ძეგლის სტატუსი, რადგანაც ბათუმის კულტურულმა მემკვიდრეობამ უკვე დიდი დანაკლისი განიცადა და ყოველი გადარჩენილი სახლი ჩვენთვის განსაკუთრებით ძვირფასია“.

განცხადების ავტორები ასევე მიმართავენ საქართველოს კულტურული მემკვიდრეობის დაცვის
ეროვნული სააგენტოს დირექტორს, ნიკოლოზ ანთიძეს, აჭარის მთავრობის თავმჯდომარეს, თორნიკე რიჟვაძეს და ქალაქ ბათუმის მერს, ლაშა კომახიძეს.

____

ამავე თემაზე:

მსოფლიოში კორონავირუსის ეპიდაფეთქებას ცრუ ინფორმაციის დიდი ტალღაც მოჰყვა. „სიცხე კლავს ვირუსს და რომ დათბება ყველაფერი მოგვარდება“, ,,არაყი კლავს და თუ სვამ, ვერ მოგეკარება“,,ნიორი უნდა ჭამო პრევენციისთვის“, ბოლოს კიდევ ,,ღამის 11-ზე თვითმფრინავი გადმოიფრენს და ქალაქს მოწამლავს“. კორონავირუსთან დაკავშირებული მსოფლიო და ლოკალური სიახლეების ეპიცენტრში არიან ექიმები, სახელმწიფო სტრუქტურები თუ მედია, რომლებსაც ვირუსზე გავრცელებულ ცრუ ინფორმაციასთან ბრძოლაც უწევთ.

ცრუ ინფორმაციის მსხვერპლი გახდა ლუგარის კვლევითი ცენტრის ხელმძღვანელის პაატა იმნაძის დედა, რომელიც სოციალურ ქსელში აზიარებდა ცრუ ინფორმაციას, თითქოს საქართველოში კორონავირუსით დაავადებული პაციენტი გამოჯანმრთელდა და საავადმყოფოდანაც გაწერეს. პაატა იმნაძემ დედას დაუწერა, რომ „ტყუილს ნუ აზიარებს“.

გუშინ, 11 მარტს მთელ საქართველოში ადამიანები ერთმანეთს ცრუ ინფორმაციას უგზავნიდნენ, თითქოს ღამის 11 საათიდან ვერტმფრენი ჰაერს შეწამლავდა კორონავირუსის გამო.

სინამდვილეში კი თბილისისა და ბათუმის მერიის პრესსამსახურის ინფორმაციით, ყოველდღიურ რეჟიმში ხდება დეზინფექცია ავტობუსებში, მეტროსადგურებში, მეტროს ვაგონებში, სერვისცენტრებში, უფასო სასადილოებში და ასე შემდეგ, მაგრამ ვერტმფრენებით ქალაქებში დეზინფექციის შესახებ ინფორმაცია სიმართლეს არ შეესაბამებოდა.

სოცქსელებში ვრცელდებოდა ასევე ინფორმაცია, რომ ნიორი ვირუსისგან თავდაცვის საშუალებაა. ჯანდაცვის მსოფლიო ორგანიზაციის განმარტებით, მიუხედავად იმისა, რომ ნიორი ჯანსაღი პროდუქტია და გარკვეული ანტიმიკრობული თვისებები მართლაც აქვს, არ არსებობს არანაირი მტკიცებულება, რომ ნივრის მირთმევა კორონავირუსისგან დაიცავს ადამიანებს.

ზომიერად მოხმარების შემთხვევაში თავისთავად ეს პროდუქტი მავნე არ არის, თუმცა, როგორც  BBC იტყობინება, ჩინურმა გაზეთმა Morning Post-მა გაავრცელა ამბავი ქალზე, რომელიც საავადმყოფოში ყელის ანთებით მოხვდა – მან კორონავირუსისგან თავდასაცავად კილო-ნახევარი ნიორი მიირთვა.

წყლის სმა ყოველ 15 წუთში. ოქსფორდის უნივერსიტეტის პროფესორი, ტრუდი ლანგი ამბობს, რომ არ არსებობს არანაირი ბიოლოგიური მექანიზმი, რომ უბრალოდ წყლის დალევით მოკლათ პირის ღრუში მოხვედრილი ვირუსი.

ხვალ, 13 მარტს, აჭარის ტელევიზიის შენობის წინ დაგეგმილი იყო ამ არხის ჟურნალისტების მხარდასაჭერი აქცია. COVID-19 რისკებიდან გამომდინარე, აქციის ორგანიზატორებმა ტელევიზიასთან დაგეგმილი საპროტესტო აქცია გააუქმეს. უფრო ზუსტად, აქციამ გადაინაცვლა ინტერნეტში. ჟურნალისტების მხარდასაჭერ აქციაში ჩართვა შეუძლია ნებისმიერ ადამიანს, ვინც ფიქრობს, რომ აჭარის მაუწყებელში სიტყვის თავისუფლება საფრთხეშია. ჩართე საკუთარი ტელეფონი, გადაიღე მხარდასაჭერი ვიდეო და გამოაქვეყნე ან გადააგზავნე ქვემოთ მითითებულ მისამართზე.

აქციის ორგანიზატორები, 8 არასამთავრობო ორგანიზაცია, აქციის დეტალებზე განცხადებას ავრცელებენ, რომელსაც აქვე გთავაზობთ უცვლელად:

„საზოგადოებრივი ორგანიზაციები იწყებენ აჭარის საზოგადოებრივი მაუწყებლის ჟურნალისტების მხარდამჭერ კამპანიას „საზოგადოება მაუწყებლის გადასარჩენად“ – ამ ფორმით ვაპროტესტებთ საზოგადოებრივი მაუწყებლის აჭარის ტელევიზიასა და რადიოში მიმდინარე პროცესებს, რომელიც საზოგადოების, სამოქალაქო სექტორისა და საერთაშორისო ორგანიზაციების მხარდაჭერის გარეშე, შესაძლოა, დასრულდეს აჭარის საზოგადოებრივი მაუწყებლის სარედაქციო დამოუკიდებლობის დაკარგვით.

კამპანიის ფარგლებში აქციის გამართვა დაგეგმილი იყო პარასკევს, 13 მარტს, 19 საათზე მაუწყებლის შენობასთან, თუმცა ქვეყანაში შექმნილი მდგომარეობიდან გამომდინარე, რომელიც უკავშირდება COVID-19-ის გავრცელების რისკს და ჩვენი მაღალი საზოგადოებრივი პასუხისმგებლობიდან გამომდინარე, გადაწყდა, რომ სოლიდარობის აქცია გაიმართოს ონლაინ, ინტერნეტის საშუალებით, პარასკევს, 13 მარტს, 19:00 საათიდან 21:00 საათამდე.

ყველა მოქალაქეს შეუძლია ჩაწეროს მიმართვა და გაავრცელოს საკუთარ Facebook-ზე, მიკრობლოგზე ან კამპანიის ოფიციალურ გვერდზე

ჩვენ, აჭარის საზოგადოებრივი მაუწყებლის მაყურებლები, მივიჩნევთ, რომ საფრთხე ექმნება მაუწყებლის იდეას, რაც სასიცოცხლოდ აუცილებელია რეგიონსა და, ზოგადად, ქვეყანაში დემოკრატიული პროცესების მხარდაჭერისთვის და ხელისუფლების ანგარიშვალდებულების დონის ასამაღლებლად.

აჭარის საზოგადოებრივი მაუწყებლის დირექტორის მიერ წარმოებული საკადრო პოლიტიკა ეწინააღმდეგება საზოგადოებრივი მაუწყებლის იდეას, მაუწყებლის სარედაქციო დამოუკიდებლობას და აშკარა პოლიტიკურ რევანშისტულ შინაარსს ატარებს იმ პირების მიმართ, რომელთა მუშაობით იქმნებოდა მაუწყებლის კრიტიკული სარედაქციო პოლიტიკა. განსაკუთრებით მნიშვნელოვანია ამგვარი სარედაქციო პოლიტიკის წარმოება მოახლოებული საპარლამენტო არჩევნების წინ.

მათ, ვისთვისაც მნიშვნელოვანია საზოგადოებრივი მაუწყებელი იყოს თავისუფალი სახელისუფლებო და ნებისმიერი სხვა სახის გავლენებისგან, ვისთვისაც მნიშვნელოვანია სიტყვისა და გამოხატვის თავისუფლება, მოგიწოდებთ, შემოუერთდეთ ონლაინ კამპანიას და ამით გამოხატეთ თქვენი მხარდაჭერა.

შეგახსენებთ, რომ 2013 წლიდან ტელევიზია აღარ არის აჭარის მთავრობის საქვეუწყებო ორგანიზაცია – ის საზოგადოებრივი მაუწყებელი გახდა, რომლის ბიუჯეტი 11 მილიონ ლარზე მეტია და ამ ფულს ვიხდით ჩვენ, საქართველოს მოქალაქეები, ჩვენი შემოსავლებიდან გადახდილი გადასახადებიდან.

თუ თქვენთვის მნიშვნელოვანია თქვენი ხმა ისმოდეს აჭარის ტელევიზიისა და რადიოს ეთერში, თუ თქვენთვის მნიშვნელოვანია სიტყვის თავისუფლება, შემოუერთდით ონლაინ კამპანიას მაუწყებლის გადასარჩენად“.

ხელმომწერი ორგანიზაციები:

• საზოგადოებრივი განვითარების აკადემია
• თავისუფალ ჟურნალისტთა სახლი
• სამართლიანი არჩევნები
• დემოკრატიული ჩართულობის ცენტრების ქსელი
• სამოქალაქო საზოგადოების ინსტიტუტი ბათუმის ფილიალი
• აღმოსავლეთ ევროპის ცენტრი მრავალპარტიული დემოკრატიისთვის
• საქართველოს ახალგაზრდა იურისტთა ასოციაცია
• მწვანე სექტორი

ჯანდაცვის საზოგადოებრივი ცენტრის სპეციალისტები კორონავირუსის პრევენციისთვის სასურველად არ მიიჩნევენ ისეთი ღონისძიებების გამართვას, სადაც პირობითად ასამდე ადამიანი მოიყრის თავს. ამ ფონზე ბათუმში მუშაობას არ აჩერებენ  ბაზრობები, სადაც ასობით ადამიანი გადაადგილდება.

ბაზრობების ადმინისტრაციებში გვითხრეს, რომ მითითებებს იცავენ, ეტაპობრივად ატარებენ სადეზინფექციო სამუშაოებს და მუშაობას ჩვეულებრივად აგრძელებენ. მათივე ინფორმაციით, დეზინფექციების ეტაპობრივ ჩატარებაზე ხელშეკრულება იურიდიულ პირთან აქვთ გაფორმებული, თუმცა ყოველდღიური მოხმარებისთვის სადეზინფექციო ხსნარები მაინც შეისყიდეს.

„ყოველ დილით და საღამოს ზედაპირებს ქლორით ვამუშავებთ და ვიცავთ სხვა წესებსაც,“ – გვითხრა თევზის ბაზრობის დირექტორმა თემურ ვერძაძემ.

ე.წ. ხოფის ბაზრობის დირექტორის, ზვიად მელიქაძის ინფორმაციით კი, ბაზრობა ორშაბათობით მთლიანად იკეტება და ტარდება დეზინფექციის სამუშაოები: „ახლა უკვე კვირაში ორჯერ ვატარებთ დეზინფექციას“.

იგივე ვითარებაა ე.წ. „ბონის ბაზარშიც“.

ბათუმში სამი მსხვილი ბაზრობა ფუნქციონირებს.

ბათუმის მერიის მუნიციპალური ინსპექცია სამხრე კამერებით აღიჭურვება. ინსპექცია 49 კამერას ელექტრონული ტენდერით შეისყიდის. კამერებისთვის 23 520 ლარია გათვალისწინებული, ანუ ერთი კამერისთვის – 480 ლარი.

ბათუმის მერიის ა(ა)იპ „მუნიციპალური ინსპექცია“ 2019 წლის ბოლოს შეიქმნა. ქალაქის 2020 წლის ბიუჯეტში კი ინსპექციისთვის 3 444 000 ლარია გათვალისწინებული.

ინსპექციაში შტატით დასაქმებულ თანამშრომელთა რაოდენობა 110, შრომითი ხელშეკრულებით დასაქმებულ პირთა რაოდენობა კი 71 კაცითაა განსაზღვრული.

ინსპექციამ, ძირითადად, უნდა განახორციელოს პროგრამა – „მუნიციპალური მომსახურების მართვა და გაუმჯობესება“.

[toggle title=”რა ევალება ინსპექციას, ნახეთ აქ:“]ა) ბათუმის ტერიტორიაზე სამშენებლო საქმიანობაზე, სამშენებლო საქმიანობის დადგენილი წესების, მათ შორის უსაფრთხოების წესების დაცვაზე ზედამხედველობა და დარღვევის ფაქტების გამოვლენა, უნებართვო ან/და დარღვევით მშენებარე ობიექტების შეჩერებაზე, სამშენებლო დოკუმენტაციასთან შესაბამისობაში მოყვანაზე ან/და დემონტაჟზე სამშენებლო სამართალდარღვევის საქმისწარმოება და კანონმდებლობით გათვალისწინებული შესაბამისი გადაწყვეტილებების მიღება, საჯარიმო სანქციების გამოყენება;

ბ) სამშენებლო, სარემონტო და საავარიო სამუშაოების წარმოების (სამშენებლო და სარემონტო ტერიტორიების შემოღობვა, მიწის გრუნტისა და სამშენებლო ნარჩენების სპეციალურად გამოყოფილ ადგილებში გატანა, მიწისქვეშა კომუნიკაციათა ჩაწყობა გადაკეთებისა და მიწის გათხრასთან დაკავშირებული სხვა სამუშაოების ჩატარება, სამუშაოების დამთავრების შემდეგ ობიექტის კეთილმოწყობა-მოწესრიგება და სხვა) წესების დაცვასა და დროულ და ხარისხიან შესრულებაზე კონტროლის დაწესება;

გ) თვითმმართველი ერთეულის იერსახეზე, გარე ვაჭრობის, პლასტიკისა ან/და ბიოდეგრადირებადი პარკების რეალიზაციის, რეკლამის, აბრის განთავსების, საზოგადოებრივი ადგილებით სარგებლობის შეზღუდვის, ავტომანქანების პარკირების წესების დაცვაზე ზედამხედველობა, დარღვევის ფაქტების გამოვლენა და სათანადო რეაგირება, მათ შესაბამისობაში მოყვანაზე/შესრულებაზე კონტროლი;

დ) უკანონო, უსახური და ამორტიზებული შენობა-ნაგებობების, ჯიხურების, ავტო-ფარეხების, პავილიონების, მცირე არქიტექტურული ფორმების მქონე მანქანა-დანადგარების, დახლების, სხვადასხვა კონსტრუქციის, სტელაჟების, სარეკლამო და საინფორმაციო სტენდების, დაფების, აბრების, აფიშების, პლაკატებისა და სხვა სარეკლამო ატრიბუტების უკანონო განთავსების ფაქტების გამოვლენა, მათი აღკვეთისა და სადემონტაჟო ღონისძიებების განხორციელება;

ე) აკუსტიკური ხმაურის დასაშვები ზღვრის გადაჭარბებისა და პიროტექნიკური ნაკეთობის გამოყენების ფაქტების გამოვლენა და კონტროლი;
ვ) მწვანე ნარგავების დაზიანებაზე ან/და განადგურებაზე კონტროლის განხორციელება;

ზ) საკუთარი უფლებამოსილების ფარგლებში, დამრღვევი ფიზიკური ან/და იურიდიული პირების მიმართ საქართველოს კანონით „საქართველოს ადმინისტრაციულ სამართალდარღვევათა კოდექსი“, საქართველოს ორგანული კანონით „საქართველოს საარჩევნო კოდექსი“,

თ) საქართველოს კანონით „საქართველოს სივრცის დაგეგმარების, არქიტექტურული და სამშენებლო საქმიანობის კოდექსი“ და საქართველოს კანონით „ნარჩენების მართვის კოდექსი“ დადგენილი ზომების განხორციელება; დასრულებული ობიექტების ექსპლუატაციაში მიღება და შესაბამისი აქტის გამოცემა;

ი) საკუთარი უფლებამოსილების ფარგლებში, დადგენილი წესით, საზოგადოებრივი ადგილებით სარგებლობის შეზღუდვის უფლების (ნებართვა, თანხმობა, დადასტურება) მინიჭების თაობაზე შესაბამისი აქტების გამოცემა;

კ) კომპეტენციის ფარგლებში, მუნიციპალიტეტის ტერიტორიაზე განთავსებული საზოგადოებრივი დანიშნულების დაწესებულებებში (სილამაზის სალონები, სასტუმროები, აბანოები, სამრეცხაოები, საცურაო აუზები და სხვა), საგანმანათლებლო და სააღმზრდელო დაწესებულებებში ლაბორატორიული კვლევების ჩატარება და ადამიანის ჯანმრთელობაზე მათი შესაძლო მავნე ზეგავლენის შეფასება;

ლ) კომპეტენციის ფარგლებში, მუნიციპალიტეტის ტერიტორიაზე განთავსებულ საზოგადოებრივი მნიშვნელობის დაწესებულებებში (საპარიკმახეროები, კოსმეტიკური კაბინეტები, სასტუმროები, კემპინგები, მოტელები, ავტოსადგომები, აბანოები, საუნები, საშხაპეები, სამრეცხაოები, საზოგადოებრივი პლაჟები, კინოთეატრები, საკონცერტო დარბაზები, სპორტული მოედნები, ნაგავსაყრელები, ტურისტული ბაზები, სანატორიუმები, სათამაშო სახლები, საგამოფენო დარბაზები, კლუბები, ატრაქციონები და საზოგადოებრივი მნიშვნელობის სხვა დაწესებულებები) სანიტარიული ნორმების დაცვის ზედამხედველობა;

მ) კომპეტენციის ფარგლებში, საგანმანათლებლო, სააღმზრდელო და საგანმანათლებლო-სააღმზრდელო დაწესებულებებში სანიტარიული სახის პრევენციული ღონისძიებების განხორციელების ხელშეწყობა, სანიტარიული და ჰიგიენური ნორმების დაცვის ზედამხედველობა;

ნ) კომპეტენციის ფარგლებში, დადგენილი წესით, დაწესებულების მოწყობის სანიტარულ-ჰიგიენურ ნორმებთან შესაბამისობის დასკვნის გაცემა;

ო) კომპეტენციის ფარგლებში, ეპიდსაშიშროებისას პრევენციული და ეპიდემიოლოგიური კონტროლის ღონისძიების გატარება;

პ) კომპეტენციის ფარგლებში, მუნიციპალიტეტის ტერიტორიაზე პირველად ეპიდკვლევის ხელშეწყობა;

ჟ) პარკირების წესების დარღვევის ზედამხედველობა და კანონმდებლობით გათვალისწინებული ღონისძიებების განხორციელება;

რ) მგზავრთა გადაყვანის ავტოტრასპორტის ზედამხედველობა და კანონმდებლობით გათვალისწინებული შესაბამისი ღონისძიებების განხორციელება;

ს) მუნიციპალური ავტოტრასპორტში მგზავრთა გადაყვანის ზედამხედველობა და კანონმდებლობით გათვალისწინებული შესაბამისი ღონისძიებების განხორციელება;

ტ) საჯარიმო სადგომების და მუნიციპალური პარკირების ადგილების ადმინისტრირება;

უ) სააგენტოს მიზნებისა და ფუნქციების გათვალისწინებით, კომპეტენციის ფარგლებში, მუნიციპალიტეტის სამოქმედო გეგმების და სტრატეგიების დოკუმენტებით განსაზღვრული ღონისძიებების შესრულება;

ფ) მერისა და მუნიციპალიტეტის საკრებულოს ადმინისტრაციულ-სამართლებრივი აქტებით გათვალისწინებული სხვა უფლებამოსილებათა განხორციელება.[/toggle]

მიუხედავად იმისა, რომ მუნიციპალურ ინსპექციას მუნიციპალურ ავტოტრასპორტში მგზავრთა გადაყვანის ზედამხედველობა და კანონმდებლობით გათვალისწინებული შესაბამისი ღონისძიებების განხორციელებაც ევალება, ჯერჯერობით ის ამ ფუნქციას ვერ ასრულებს.

მაგალითად, სამარშრუტო ტაქსების მძღოლებს, რომლებიც 10 მარტს,  მგზავრთა გადაჭარბებული ნაკადის გადაყვანის გამო გააფრთხილეს, დარღვევის გამოვლენის შემთხვევაში ისევ აფრთხილებენ და ვერ აჯარიმებენ – ინსპექციას ჯერ არ აქვს ამ პროცედურისთვის საჭირო ოქმები. სანებართვო პირობების დარღვევა  100 ლარით დაჯარიმებას ითვალისწინებს.

ამ თემაზე:

ლარი დოლართან და ევროსთან მიმართებით 9 მარტის შემდეგ უფასურდება. ლარის ოფიციალური გაცვლითი კურსი ევროსთან მიმართებაში 9 მარტს 3,13 იყო, დღეს, 12 მარტს, კი არის – 3,25. აშშ დოლართან მიმართებაში კი ეს მაჩვენებელი 2,77-დან 2,87-მდე გაიზარდა.

„კორონავირუსის პანდემიასთან დაკავშირებით, ბოლო დღეებში მნიშვნელოვნად გაზრდილია გაურკვევლობა როგორც საერთაშორისო, ისე რეგიონული მასშტაბით. ეს გაურკვევლობა მოლოდინების არხით გადაეცემა ფინანსურ ბაზრებს და, მათ შორის, სავალუტო კურსს, რისი შედეგიც, გამყარების ერთთვიანი პერიოდის შემდეგ, ლარის ბოლოდროინდელი გაუფასურებაა“, – აცხადებს საქართველოს ეროვნული ბანკი.

„აღნიშნულ გაუფასურებაზე რამდენიმე ფაქტორმა იმოქმედა. ერთი მხრივ, კორონავირუსის გავრცელება გლობალურად და საქართველოში, ტურისტული ნაკადების მოსალოდნელ შემცირებას განაპირობებს. ამავე დროს, ნავთობის საერთაშორისო ფასების ვარდნა საქართველოს ნავთობის ექსპორტიორი სავაჭრო პარტნიორი ქვეყნებიდან საგარეო მოთხოვნის შესუსტებასა და ფულადი გზავნილების შესაძლო შემცირებაზე მიუთითებს. შედეგად, გაიზარდა სავალუტო შემოდინებების შემცირების რისკები, რაც მოლოდინების არხით შესაბამისად აისახა სავალუტო ბაზარზე. მსგავსი სურათია ჩვენი რეგიონის ქვეყნების უმეტესობაშიც, სადაც ბოლო დღეებში ადგილობრივი ვალუტები უფასურდება. მეორე მხრივ, ავიამიმოსვლების შეზღუდვის გამო, მოიკლებს ვალუტის გადინება საქართველოდან უცხოეთში, ასევე შემცირდება ტურისტულ მომსახურებასთან დაკავშირებული იმპორტი, რაც გაცვლით კურსზე პოზიტიურად იმოქმედებს. ამავე დროს, საქართველოს დამოკიდებულება გზავნილებზე ნავთობის ექსპორტიორი ქვეყნებიდან მნიშვნელოვნად შემცირებულია, რაც ასევე დადებითი ფაქტორია“, – აღნიშნულია ეროვნული ბანკის განცხადებაში.

ეროვნული ბანკის განცხადებით, ბანკის ძირითადი ამოცანა ქვეყანაში ფასების სტაბილურობის უზრუნველყოფა, ანუ დაბალი ინფლაციის შენარჩუნებაა, მიუხედავად იმისა, რომ საგარეო მოთხოვნის შესუსტება ინფლაციის შემცირებაზე მოქმედებს, გაცვლითი კურსის გაუფასურებას საპირისპირო ეფექტი აქვს და ინფლაციურ რისკებს ზრდის.

„საბოლოო გავლენა ინფლაციაზე და, შესაბამისად, ეროვნული ბანკის რეაგირება, დამოკიდებული იქნება იმაზე, თუ რომელი ფაქტორის გავლენა გადაწონის. ამ ეტაპზე მოვლენათა შესაძლო განვითარებასთან დაკავშირებით გაურკვევლობა საკმაოდ მაღალია, თუმცა საქართველოს ეროვნული ბანკი მოვლენათა ნებისმიერი განვითარებისთვის მზად არის. ჩვენ ყოველდღიურ რეჟიმში ვაკვირდებით ბაზრის დინამიკას და, როგორც ყოველთვის, საჭიროებისამებრ გამოვიყენებთ ჩვენს ხელთ არსებულ ყველა ინსტრუმენტს ეროვნული ბანკის ძირითადი მანდატის, ფასების სტაბილურობის უზრუნველსაყოფად“, – აცხადებს ეროვნული ბანკი.

აჭარის მაუწყებელში განვითარებული მოვლენები აშშ-ის სახელმწიფო დეპარტამენტის ახალ ანგარიშში მოხვდა. ანგარიში მიმოიხილავს 2019 წელს საქართველოში ადამიანის უფლებების შესახებ მდგომარეობას.

ანგარიშში წერია, რომ ზოგიერთი მედიასაშუალება, მედიის უფლებების დამცველი და არასამთავრობო ორგანიზაცია აგრძელებს შეშფოთების გამოხატვას მედიაში პოლიტიკური გავლენების შესახებ.

იქვე მოყვანილია აჭარის მაუწყებლის მრჩეველთა საბჭოს 19 აპრილის გადაწყვეტილება, დაეთხოვათ გენერალური დირექტორი ნათია კაპანაძე, რის საბაბადაც სახელმწიფო სახსრების არასწორად გამოყენება და პროგრამული პრიორიტეტების შეუსრულებლობა დაასახელა. „საერთაშორისო მონიტორები, მათ შორის ეუთოს ODIHR-ი, მანამდე აჭარის ტელევიზიას მიუკერძოებელ მედიად მიიჩნევდნენ“.

სახელმწიფო დეპარტამენტის ანგარიშში ნახსენებია არაერთი განცხადება სხვადასხვა არასამთავრო ორგანიზაციების გაერთიანების მხრიდან, რომლებიც კაპანაძის იმპიჩმენტს აკრიტიკებდნენ და აცხადებდნენ, რომ ამ ნაბიჯით ძლიერდებოდა ეჭვები შესაძლო პოლიტიკური ჩარევის შესახებ.

„2019 წლის დეკემბერში ჟურნალისტებმა პროტესტი გამოხატეს და ამბობდნენ, რომ ახალი დირექტორი მათს სამუშაო პროცესში ერეოდა და ცდილობდა არხის სარედაქციო პოლიტიკაზე გავლენის მოპოვებას. სახალხო დამცველმა ხაზი გაუსვა, რომ იმის გათვალისწინებით, რომ აჭარის ტელევიზია საზოგადოებრივი მაუწყებელია, მის გარშემო განვითარებული მოვლენები გავლენას ახდენს ქვეყნის მედიაგარემოზე“, – წერია ანგარიშში.

აჭარის ტელევიზიაში ცვლილებები მას შემდეგ დაიწყო, რაც დირექტორი ნათია კაპანაძე 2019 წლის გაზაფხულზე თამამდებობიდან გადააყენეს.

მაშინ ნათია კაპანაძემ აღნიშნული დაუკავშირა ხელისუფლების მიერ ტელევიზიის გაკონტროლების სურვილს. მას შემდეგ ტელევიზიის დირექტორის მოვალეობას დირექტორის მოადგილე ნათია ზოიძე ასრულებდა, რომელსაც ახალმა დირექტორმა გიორგი კოხრეიძემ ფუნქციები შეუკვეცა.

ზოიძემ ამის შემდეგ აჭარის მაუწყებელი საერთოდ დატოვა. აჭარის ტელევიზიის თანამშრომლები უკვე რამდენიმე თვეა საუბრობენ ხელისუფლებიდან მომდინარე საფრთხეზე.

ისინი აცხადებენ, რომ ტელევიზიაში მიმდინარე პროცესები მიზნად ისახავს საკვანძო თანამდებობებიდან იმ ადამიანების გაშვებას, რომლებიც ამ ტელეარხის დამოუკიდებელ და მიუკერძოებელ სარედაქციო პოლიტიკას განსაზღვრავენ.

ბოლო პერიოდში ტელევიზიაში არაერთი საკადრო ცვლილება განხორციელდა.

10 მარტს აჭარის მაუწყებლის გარშემო განვითრებულ მოვლენებს კიდევ ერთხელ გამოეხმაურა მედიის თავისუფლების საკითხებში ეუთოს სპეციალური წარმომადგენელი, ჰარლემ დეზირი და განაცხადა, რომ შეშფოთებულია აჭარის მაუწყებელში ბოლო დროს განვითარებული მოვლენებით.

https://netgazeti.ge/news/432721/

„იმ დღეს ლექტორს ტელეფონზე შეტყობინება მოუვიდა, უი, მგონი ხვალ აღარ მოვალთო… მეორე დღეს მოგვწერეს, რომ უნივერსიტეტში აღარ უნდა მივსულიყავით – სწავლა გადაიდო. ეს 4 მარტი იყო. ამ დროს საქართველოს უნივერსიტეტებში, სკოლებში, ბაღებში სწავლა უკვე შეწყვეტილი იყო. ახლა მიკვირს, რატომ ვერ იგრძნო იტალიამ უკიდურეს სიტუაციამდე ამ ვირუსის საფრთხე…“ – ამას იტალიაში, რომში მცხოვრები ქრისტინა აფაქიძე ამბობს. ის ახლა თვითიზოლაციაშია და სამშობლოში დაბრუნება სურს, რადგან იტალიაში დარჩენის მიზანს ვეღარ ხედავს.

„…იზოლაციაში ვართ, მაგრამ აქ ისეთი სიტუაციაა, ვეღარ ვხდები, აქ რატომ უნდა დავრჩე – ვიცი, საქართველოში დაბრუნება რომ მოვახერხო, კარანტინში მომიწევს ყოფნა, მაგრამ ამისთვის მზად ვარ. აქ, გარდა იმისა, რომ უკვე ყველაფერი რთულია, საკუთარ თავთან გამკლავებაც გიწევს – მარტო ხარ.

რამდენჯერმე მივმართე საელჩოს. მითხრეს, რომ ამ ეტაპზე რეისი საქართველოსკენ არ იგეგმება და უნდა დაველოდო სიახლეს. 15 მარტამდე ვისაც ჰქონდა ბილეთი აღებული, მათთვის სპეციალური რეისი დაინიშნა. ჩვენი ბედი გაურკვეველია. არ ვიცი, აქ კიდევ რამდენია ჩემს მდგომარეობაში,“ – გვიყვება ქრისტინა.

ქრისტინა რომში სამაგისტრო პროგრამას გადის. ამბობს, რომ სწავლის შეწყვეტის შემდეგ უნივერსიტეტმა ონლაინპროგრამები აამოქმედა. ამ რეჟიმში კი ქრისტინას განათლების მიღება საქართველოდანაც შეუძლია.

„…რეალურად გაურკვეველია, როდის აღდგება სწავლა. დიდი ალბათობით, ეს უახლოეს მომავალში არ მოხერხდება. ამიტომაც მინდა დაბრუნება,“ – დასძენს ქრისტინა.

ქრისტინა აფაქიძე გვიყვება იმაზეც, თუ რა იგრძნობა ახლა რომის ქუჩებში.

„…გაგვაფრთხილეს, რომ იზოლაციაში უნდა ვიყოთ, თუმცა არავინ მოსულა, არ შეუმოწმებია რამე. არც ის გამიგია, რომ ვინმემ საზოგადოებრივი ტრანსპორტის დეზინფექცია ჩაატარა, პირბადეებიც, მგონი, საქართველოში უფრო ადრე გაიკეთეს, ვიდრე აქ.

სახლიდან ძირითადად მაშინ გავდივარ, როცა საკვების შეძენა მჭირდება. მარკეტებთან დიდი რიგებია, რიგს მარკეტის თანამშრომლები აწესრიგებენ – ვიღაც რომ გამოვა, მერე შეხვალ. გვაფრთხილებენ, რომ ერთმანეთისგან დისტანცია უნდა დავიცვათ.

ძირითადად ყველაფერი დაკეტილია. ადამიანები პარკებსა და სკვერებში გამოდიან, ბავშვები გამოჰყავთ… მუშაობს რესტორნებიც, თუმცა ძირითადად საღამოს შვიდამდე.

ჩემი დაკვირვებით ხანდაზმულმა ადამიანებმა უფრო იგრძნეს საფრთხე, ვიდრე ახალგაზრდებმა. მათ ეტყობათ უფრო, რომ ღელავენ, სხვას პროტესტი არ გამოუხატავს, ან მე არ მომისმენია,“ – გვიზიარებს საკუთარ შთაბეჭდილებას რომში მყოფი ქრისტინა აფაქიძე.

სახელმწიფო უსაფრთხოების სამსახურის ანტიკორუფციული სააგენტოს და კონტრდაზვერვის დეპარტამენტის თანამშრომლებმა, ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად, დიდი ოდენობით ყალბი ვალუტის შეძენა, შენახვის და გასაღების ფაქტზე თურქეთის მოქალაქე ა.კ. დააკავეს.

სუს-ის ინფორმაციით, გამოძიებამ დაადგინა, რომ თურქეთის მოქალაქემ 2100 აშშ დოლარის სანაცვლოდ 4200 ყალბი აშშ დოლარი საქართველოში მცხოვრებ ნიგერიის მოქალაქეზე გაასაღა.

გამოძიება დიდი ოდენობით ყალბი ვალუტის შეძენა, შენახვის და გასაღების ფაქტზე მიმდინარეობს (საქართველოს სისხლის სამართლის კოდექსის 212-ე მუხლის მე-2 ნაწილის „ა“ ქვეპუნქტით, რაც სასჯელის სახით ითვალისწინებს თავისუფლების აღკვეთას ვადით 7-დან 10  წლამდე).

გამოძიებას აწარმოებს სახელმწიფო უსაფრთხოების სამსახურის ანტიკორუფციული სააგენტო.

დღეს, 11 მარტს, აჭარის მთავარ პროკურორად ზაზა მეტონიძე დანიშნეს. ჯერ უცნობია, სად გადაიყვანეს ნათია სონღულაშვილი, რომელიც 2018 წლის 22 თებერვლიდან დღემდე აჭარის მთავარი პროკურორი იყო.

ზაზა მეტონიძე ამ დრომდე სამცხე-ჯავახეთის საოლქო პროკურორად მუშაობდა, თუმცა მას აჭარის პროკურატურაში მრავალწლიანი მუშაობის გამოცდილება აქვს – 2009 წლიდან 2013 წლამდე იგი ბათუმის რაიონული პროკურატურის პროკურორი იყო, შემდეგი ორი წელი კი,  ბათუმის პროკურორის მოადგილე.

ამ პერიოდის ერთ-ერთი გახმაურებული ამბავი „გიგა ფარტენაძის საქმეა“ – ბიჭი, რომელიც ყაჩაღობისთვის 2011 წელს გაასამართლეს და 16 წლით თავისუფლების აღკვეთა მიუსაჯეს. ამ საქმის პროკურორი ზაზა მეტონიძე იყო. პატიმრობის პერიოდში გიგა ფარტენაძე გეგუთის ციხეში 2014 წელს მოკლეს.

„…ამ პროკურორმა შეცვალა ჩემი შვილის ცხოვრება, არასწორი მუხლი მოარგო. ჩემმა შვილმა რეალურად იჩხუბა, სცემა და კონფლიქტი ჰქონდა, მაგრამ ყაჩაღობა არ დასტურდებოდა… ჩვენ გვინდოდა ამ პროკურორთან შეხვედრა თავის დროზე, მაგრამ არ მიგვიღო.

ეკა ბესელიას მივმართეთ თავის დროზე, უნდა განეხილათ ეს საქმე, გვპირდებოდნენ, მაგრამ ამასობაში გიგა მოკლეს,“ – ამბობს მზია ნიქაბაძე, გიგა ფარტენაძის დედა.

გასულ წელს შევსებული დეკლარაციის მიხედვით,ზაზა მეტონიძეს 2018 წელს ხელფასის სახით ჯამში 47 384 ლარი აქვს აღებული. ამ დროს ზაზა მეტონიძე შიდა ქართლის და მცხეთა-მთიანეთის საოლქო პროკურორის მოადგილედ მუშაობდა.

ქონებრივი დეკლარაციის მიხედვით, ზაზა მეტონიძე არ ფლობს უძრავ ქონებას. ხელვაჩაურში ოთხი მიწის ნაკვეთის 20-20-პროცენტიანი წილის მესაკუთრეა აჭარის მთავარი პროკურორის მეუღლე – ნინო დუმბაძე, იგი გორის იუსტიციის სახლის მენეჯერია.

კიდევ ერთი დეტალი – გასულ წელს ზაზა მეტონიძეს მოსამართლეობის საკვალიფიკაციო გამოცდა ჩაუბარებია სისხლის სამართლის სპეციალიზაციით, ანუ იგი მოსამართლეობას აპირებდა.

ბათუმის მერიის ინფორმაციით, 11 მარტის მდგომარეობით, სერვისცენტრებს „იაფ სახლში“ ბინის მისაღებად 560-მა მოქალაქემ მიმართა. სერვისცენტრებმა კი მხოლოდ 2 მოქალაქის განაცხადი დაარეგისტრირეს. „სერვისცენტრებმა მიიღეს მხოლოდ ის განაცხადები, რომლებსაც თან ახლდა ყველა საჭირო დოკუმენტაცია, რომლის წარმოდგენაც შესაბამისი პროგრამით აუცილებელია“, – გვითხრეს მერიაში.

ხელმისაწვდომი საცხოვრისის პროგრამაში ჩართვის მიზნით განაცხადების მიღება ბათუმის მერიის სერვისცენტრებში 2020 წლის 2 მარტს დაიწყო და 29 მაისს დასრულდება.

ამ ეტაპზე, პროგრამის ფარგლებში, 40 ბინა განაწილდება.

„იაფ სახლში“ ბინის მსურველი, ხელმისაწვდომი საცხოვრისის [„იაფი სახლის“] პროგრამაში რომ ჩაერთოს, პირველ რიგში უნდა აკმაყოფილებდეს ამ პროგრამის კრიტერიუმებს, შემდეგ უნდა მიმართოს ბათუმის მერიის ნებისმიერ სერვისცენტრს, უნდა აიღოს იქ სპეციალური განაცხადის ფორმა, შეავსოს და ჩააბაროს ისევ სერვისცენტრს შესაბამის დოკუმენტებთან ერთად.

დეტალურად ნახეთ ბმულზე:

დღეიდან [11 მარტი] აჭარის არ პროკურორი ნათია სონღულაშვილი ამ თანამდებობაზე აღარ მუშაობს. მის ნაცვლად ზაზა მეტონიძე დანიშნეს, რომელიც ბოლო დრომდე სამცხე-ჯავახეთის საოლქო პროკურორი იყო.

სამცხე-ჯავახეთში ზაზა მეტონიძე 2019 წლის 14 მარტიდან მუშაობდა.

ჯერჯერობით უცნობია, სად აგრძელებს სამსახურებრივ საქმიანობას ნათია სონღულაშვილი.

საქართველოს მთავარმა პროკურატურამ სხვა ცვლილებებიც განახორციელა:

• თბილისის პროკურორად ლევან გეგეჭკორი დანიშნეს;
• სამცხე-ჯავახეთის საოლქო პროკურორად მალხაზ გეწაძე,
• ქვემო ქართლის საოლქო პროკურორად შოთა კვაჭანტირაძე.

ნათია სონღულაშვილი აჭარის პროკურორად 2018 წლის თებერვლიდან მუშაობდა.

ზაზა მეტონიძე აქამდეც მუშაობდა ბათუმში – 2007 წელს ბათუმის რაიონული პროკურატურის შტატგარეშე თანამშრომელი იყო, 2008 წელს მუშაობდა ბათუმის რაიონულ პროკურატურაში სტაჟიორად; 2009-2013 წლებში ბათუმის რაიონულ პროკურორად დანიშნეს. 2013-2014 წლებში მუშაობდა ბათუმის რაიონული პროკურორის მოადგილედ, ხოლო 2014 წლიდან 2019 წლამდე ეკავა შიდა ქართლისა და მცხეთა-მთიანეთის საოლქო პროკურორის მოადგილის თანამდებობა.