Batumelebi | ქობულეთის 6 სოფლის გაზიფიცირებისთვის 10 მილიონამდე ლარი დაიხარჯება ქობულეთის 6 სოფლის გაზიფიცირებისთვის 10 მილიონამდე ლარი დაიხარჯება – Batumelebi

ქობულეთის 6 სოფლის გაზიფიცირებისთვის 10 მილიონამდე ლარი დაიხარჯება

ქობულეთის ექვსი სოფლის გაზიფიცირებისთვის, ჯამში 10 მილიონამდე ლარით, სამი ტენდერია გამოცხადებული.

ამ ტენდერების ფარგლებში ბუნებრივ აირს შეიყვანენ შემდეგ სოფლებში: მუხაესტატე, ალამბარი, წყავროკა, ლეღვა, აჭყვისთავი და ზენითი. დოკუმენტების მიხედვით, აღნიშნულ სოფლებში, ჯამში, 2 304 საცხოვრებელი სახლია.

გაზიფიცირების სამუშაოები ტენდერში გამარჯვებულებთან ხელშეკრულებების გაფორმებიდან მაქსიმუმ 10 თვეში უნდა დასრულდეს.

მუხაესტატესა და ალამბარის გაზიფიცირების სამუშაოებისთვის 3 600 489 ლარია გათვალისწინებული. წინადადებების მიღება 2020 წლის 28 მარტს დაიწყება და 2 აპრილს დასრულდება. ალამბარში 428 საცხოვრებელი სახლია, მუხაესტატეში კი – 519. სამუშაოების შესრულების ვადა არ უნდა აღემატებოდეს ხელშეკრულების გაფორმებიდან 290 დღეს.

წყავროკასა და ლეღვას გაზიფიცირებისთვის 3 488 734 ლარია გამოყოფილი. წინადადებების მიღება აქაც იწყება 28 მარტს და 2 აპრილს დასრულდება, სამუშაოების შესრულების ვადა კი, არ უნდა აღემატებოდეს ხელშეკრულების გაფორმებიდან 273 დღეს. წყავროკაში 341 სახლია, ხოლო ლეღვაში – 496.

2 556 942 ლარია გათვალისწინებული აჭყვისთავის და ზენითის გაზიფიცირებისთვის. წინადადებების მიღება დაიწყება 28 მარტს და დამთავრდება 2 აპრილს. სამუშაოები ხელშეკრულების გაფორმებიდან 262 დღეში უნდა დასრულდეს. აჭყვისთავში 313, ხოლო ზენითში 207 საცხოვრებელი სახლია.

ტენდერები საქართველოს გაზის ტრანსპორტირების კომპანიამ გამოაცხადა. 

ამ თემაზე:

ქობულეთის 8 სოფელი, რომელთა გაზიფიცირებისთვის საჭირო ფასს ადგენენ

მთავარი ფოტო: ქობულეთი, სოფელი აჭყვისთავი / ჯაბა ანანიძის ფოტო „ბათუმელების“ არქივიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com