რა წერია განაჩენში გიორგი ერმაკოვზე, რომელსაც 7 წელი მიუსაჯეს

„ნათელია, რომ სატენდერო კომისიის წევრებმა არაჯეროვნად შეასრულეს სამსახურებრივი მოვალეობა, აშკარა და თვალსაჩინო სიყალბეს არ მისცეს შეფასება, რამაც სახელმწიფოს კანონიერი ინტერესების არსებითი დარღვევა გამოიწვია,“ – წერს განაჩენში მოსამართლე დავით მამისეიშვილი ბათუმის ყოფილი მერის გიორგი ერმაკოვის და მერიის ყოფილი მაღალჩინოსნების შესახებ. ამ საქმეზე განაჩენი 27 იანვარს გამოცხადდა. ბათუმის ყოფილ მერს გიორგი ერმაკოვს 7 წლით თავისუფლების აღკვეთა მიუსაჯეს. განაჩენი მხარეებს დღეს, 17 თებერვალს ჩაბარდათ.

დავის საგანი „იაფი სახლის“ ტენდერი იყო, რომელიც არ შედგა. პროკურატურა მერიის ყოფილ მაღალჩინოსნებს დიდი ოდენობით საბიუჯეტო სახსრების გაფლანგვას ედავებოდა, ზოგიერთ მათგანს კი, სამსახურებრივი უფლებამოსილების ბოროტად გამოყენებას.

მოსამართლე დავით მამისეიშვილი ქრონოლოგიურად აღწერს „იაფი სახლის“ ტენდერთან დაკავშირებით ბათუმის მერიის პასუხისმგებელი პირების და სატენედრო კომისიის გადაწყვეტილებას. განაჩენის მიხედვით, „იაფი სახლის“ ტენდერში გამარჯვებულმა აზეირბაიჯანულმა კომპანია „კონვენტმა“ სატენდერო კომისიას წარმოუდგინა აზერბაიჯანის გადასახადების სამინისტროს ტერიტორიული საგადასახადო დეპარტამენტის მიერ 2015 წლის 19 ნოემბერს გაცემული #224 ცნობა, რომლის თანახმადაც „კონვენტი“ 2012 წლის 25 მაისს შეიქმნა და სახელმწიფო ბიუჯეტში არ აქვს საგადასახადო დავალიანება. 2018 წელს კი, იგივე აზერბაიჯანის გადასახადების სამინისტროს წერილით გაირკვა, რომ შპს „კონვენტთან“ დაკავშირებული დოკუმენტები ყალბია.

„მიუხედავად აშკარა და თვალსაჩინოდ შეუსაბამო ინფორმაციის არსებობისა [2012 წელს დაფუძნებულ კომპანიას სავაჭრო ბრუნვა 2011 წელს ბუნებრივია არ ექნებოდა] 2015 წლის 24 ნოემბერს მუდმივმოქმედმა სატენდერო კომისიამ ელექტრონულ ტენდერში მონაწილე „კონვენტ ჯორჯიას“ მიერ წარდგენილი დამატებითი დოკუმენტაცია მიიჩნია სატენდერო მოთხოვნებთან შესაბამისად და მიიღო გადაწყვეტილება სახელმწიფო შესყიდვის შესახებ ხელშეკრულების გაფორმების თაობაზე,“ – აღნიშნულია განაჩენში.

ბათუმის მერიასა და „კონვენტ კორჯიას“ შორის ხელშეკრულება სახელმწიფო შესყიდვის შესახებ 2015 წლის 15 დეკემბერს გაფორმდა 4 მილიონ 279 990 ლარზე. 2016 წლის იანვარში ამ კომპანიის დირექტორმა ანარ ალაკბაროვმა ბათუმის იმდროიდელ მერს, გიორგი ერმაკოვს ავანსის ჩარიცხვა მოსთხოვა. მოსამართლე ხაზს უსვამს იმ გარემოებას, რომ კომპანიამ უცხოური დაწესებულების მიერ გაცემული საბანკო გარანტია წარმოადგინა.

„არცერთ სხვა შემთხვევაში ბათუმის მერიაში არასოდეს ყოფილა არც წარდგენილი და არც მიღებული უცხოური დაწესებულების მიერ გაცემული საბანკო გარანტია,“ – დასძენს მოსამართლე.

ავანსის ჩარიცხვას გიორგი ერმაკოვი დათანხმდა. საერთო ჯამში გიორგი ერმაკოვის თანხმობით, „კონვენტ ჯორჯიას“ ავანსის სახით ჩაერიცხა 1 621 185 ლარი.

ტენდერში გამარჯვებულ კომპანიას საბანკო გარანტია ინგლისში რეგისტრირებულმა „Point Bank“-მა მისცა, რის ავიზირებაც „ბაზის ბანკმა“ მოახდინა. „ბაზის ბანკს“ ამ დრომდე ედავება მერია ავიზირების ნაწილში. დავა თბილისის საქალაქო სასამართლოში ჯერ არ დასრულებულა.

მოსამართლე დავით მამისეიშვილი საუბრობს ბათუმის მერიის ადმინისტრაციის უფროსის, ნუკრი დეკანაძის ჩვენებაზეც, რომელმაც „კონვენტ ჯორჯიას“ მიერ წარმოდგენილი საბანკო გარანტია რისკის შემცველად მიიჩნია. ნუკრი დეკანაძემ მოსამართლეს უთხრა, რომ დავის შემთხვევაში „Point Bank“-თან დავის პროცედურები გართულდებოდა, რადგან „გარანტიაში მკაფიოდ არ იყო განსაზღვრული სადაო საკითხების წარმოშობის შემთხვევაში საქართველოს კანონმდებლობის გამოყენების შესაძლებლობა“.

განაჩენის მიხედვით, „მომდევნო შეხვედრაზე არჩილ ვანაძემ განმარტა, რომ Point Bank-ს რეიტინგი არ ჰქონდა და „ის რისკები, რაც საბანკო გარანტიასთან დაკავშირებით დაფიქსირდა, არ იყო აღმოფხვრილი“.

მოსამართლე ყურადღებას ამახვილებს ამ ყველაფრის შემდეგ, როგორი იყო ბათუმის მერის, გიორგი ერმაკოვის რეაქცია:

„მითითებული ინფორმაციის მიღების შემდეგ მერი გიორგი ერმაკოვი დაინტერესდა, საბანკო გარანტია ფორმალურად თუ აკმაყოფილებდა მოთხოვნებს, რაზეც ნუკრი დეკანაძემ მერს – გიორგი ერმაკოვს განუცხადა, რომ საბანკო გარანტია ფორმალურად კი აკმაყოფილებდა ტენდერით გათვალისწინებულ მოთხოვნებს, მაგრამ არსებობდა რისკები, რომელთა აღმოფხვრაც არ ხერხდებოდა, რის გამოც მხოლოდ დასახელებული საბანკო გარანტიის საფუძველზე ხელშეკრულებიუს გაფორმება არ იყო მიზანშეწონილი და საჭირო იყო დამატებითი მექანიზმის მოფიქრება. ასევე შეიძლებოდა ტენდერის შეწყვეტა, ან კომპანის დისკვალიფიკაცია, შესაბამისი შეუსაბამობის აღმოჩენის შემთხვევაში“, – ვკითხულობთ განაჩენში.

მოწმეების ჩვენებების მიხედვით, ერმაკოვი მიიჩნევდა, რომ მოფიქრებულიყო დამატებითი მექანიზმი, რომელიც საშუალებას მისცემდა კომისიას, ტენდერი არ ჩავარდნილიყო და გაფორმებულიყო ხელშეკრულება. საბოლოოდ გადაწყდა, რომ შიქმნებოდა სპეციალური ანგარიში, სადაც მოხდებოდა ავანსის ჩარიცხვა, ხოლო თანხის განკარგვა მხოლოდ მერიის თანხმობით იქნებოდა შესაძლებელი.

განაჩენში მოხვდა ბათუმის მერიის იურიდიული სამსახურის უფროსის, ვახტანგ გედენიძის ჩვენებაც, რომლის მიხედვითაც Point Bank-ის გარანტიის ფორმა, ასევე ტექსტი ბუნდოვანი და ორაზროვანი იყო. საგარანტიო ფორმაში არ იყო აღნიშნული საგარანტიო მოთხოვნა.

„მოწმემ განმარტა, რომ სწორედ ამ ბუნდოვანებასთან დაკავშირებით, საკითხის გარკვევის მიზნით შეხვდა არჩილ ვანაძეს, რომელიც კარგად ფლობდა ინგლისურ ენას და ამავე დროს იყო ფინანსისტი, თუმცა მასთან შეხვედრის შემდეგაც ვერ გაიცა პასუხები მის კითხვებზე,“ – აღნიშნულია განაჩენში.

სასამართლოს წარუდგინეს ექსპერტიზის დასკვნაც, რომლის მიხედვითაც ჯავახიშვილის 78-ში, ანუ იქ, სადაც „იაფი სახლი“ უნდა აშენებულიყო, რეალურად 251 109 ლარის სამუშაოები ჩატარდა.

განაჩენში ნახავთ ირაკლი ხარაძის ჩვენებასაც. ამ მოწმემ მოსამართლეს დაუდასტურა, რომ იგი გიორგი ერმაკოვს სადავო ტენდერამდე იცნობდა. ირაკლი ხარაძე მანამდე „კონვენტ ჯორჯიას“ დირექტორმა ვახტანგ ჩიქოვანმა ახსენა საკუთარ ჩვენებაში. მისი თქმით, კომპანიის წინა დირექტორმა, ანარ ალაკბაროვმა ფინანსური ვალდებულებები არ შეასრულა და აზეირბაიჯანში დაბრუნდა. ირაკლი ხარაძის დახმარებით კი, ვახტანგ ჩიქოვანი გიორგი ერმაკოვს შეხვდა და „გამოსავლის მოძებნა შესთავაზა, რათა ტენდერით გათვალისწინებული სამუშაოები დასრულებულიყო“. ვახტანგ ჩიქოვანი ასევე ამბობდა, რომ ანარის თქმით, მან ტენდერის მოგების პროცესში ირაკლი ხარაძე იყო ჩართული – გიორგი ერმაკოვის მეგობარი.

სამართლებრივი შეფასების ნაწილში, მოსამართლე დავით მამისეიშვილი აქცენტს აკეთებს იმაზე, რომ გაფლანგული თანხიდან კორუფციის – ფულის მიღების ფაქტი არც დადასტურებულა და არც უარყოფილა, თუმცა:

„გაფლანგვის ნაწილში საყურადღებოა ის ფაქტი, რომ გონივრულ მოლოდინში გიორგი ერმაკოვს მასზე დაქვემდებარებული თანამშრომლები მიუთითებდნენ ხელშეკრულების შეუსრულებლობის შემთხვევაში სახელმწიფოსთვის მიყენებული ზიანის ანაზღაურების პრობლემაზე, რაც როგორც აღინიშნა, არ გაითვალისწინა… გიორგი ერმაკოვის მხრიდან „კონვენტ ჯორჯიასთვის“ ზედნადები ხარჯის – 282 809 ლარის გადარიცხვა, რომელმაც თავის მხრივ ხსენებული თანხა შპს „გლობალ დეველოპმენტს კონსალტინგს“ გადაურიცხა, ერთმნიშვნელოვნად უკანონო იყო,“ – ვკითხულობთ განაჩენში.

 

ნეტგაზეთის მასალების სხვა გამოცემებში გადაბეჭდვის წესი
ავტორი