ბათუმში ბაზრობები მუშაობას არ აჩერებენ

ჯანდაცვის საზოგადოებრივი ცენტრის სპეციალისტები კორონავირუსის პრევენციისთვის სასურველად არ მიიჩნევენ ისეთი ღონისძიებების გამართვას, სადაც პირობითად ასამდე ადამიანი მოიყრის თავს. ამ ფონზე ბათუმში მუშაობას არ აჩერებენ  ბაზრობები, სადაც ასობით ადამიანი გადაადგილდება.

ბაზრობების ადმინისტრაციებში გვითხრეს, რომ მითითებებს იცავენ, ეტაპობრივად ატარებენ სადეზინფექციო სამუშაოებს და მუშაობას ჩვეულებრივად აგრძელებენ. მათივე ინფორმაციით, დეზინფექციების ეტაპობრივ ჩატარებაზე ხელშეკრულება იურიდიულ პირთან აქვთ გაფორმებული, თუმცა ყოველდღიური მოხმარებისთვის სადეზინფექციო ხსნარები მაინც შეისყიდეს.

„ყოველ დილით და საღამოს ზედაპირებს ქლორით ვამუშავებთ და ვიცავთ სხვა წესებსაც,“ – გვითხრა თევზის ბაზრობის დირექტორმა თემურ ვერძაძემ.

ე.წ. ხოფის ბაზრობის დირექტორის, ზვიად მელიქაძის ინფორმაციით კი, ბაზრობა ორშაბათობით მთლიანად იკეტება და ტარდება დეზინფექციის სამუშაოები: „ახლა უკვე კვირაში ორჯერ ვატარებთ დეზინფექციას“.

იგივე ვითარებაა ე.წ. „ბონის ბაზარშიც“.

ბათუმში სამი მსხვილი ბაზრობა ფუნქციონირებს.

ნეტგაზეთის მასალების სხვა გამოცემებში გადაბეჭდვის წესი
ავტორი