ნეტგაზეთი • RU

ერთ-ერთ აფთიაქში რეცეპტის გარეშე ფსიქოტროპული მედიკამენტების გაცემის ფაქტი გამოვლინდა

სამედიცინო და ფარმაცევტული საქმიანობის რეგულირების სააგენტომ ბათუმში აფთიაქების საქმიანობა შეამოწმა. შემოწმების შედეგად დადგინდა, რომ ერთ-ერთი ავტორიზებული აფთიაქიდან შესაბამისი დოკუმენტაციის გარეშე (სპეციალური რეცეპტი ფორმა N2-ის ან/და დაწესებულების მიერ წარდგენილი მოთხოვნისა (განაცხადის) და ერთჯერადი მინდობილობის გარეშე), გაცემულია 525 301 ერთეული I ჯგუფს მიკუთვნებული ფარმაცევტული პროდუქტი, ანუ ფსიქოტროპული და ლეგალური ბრუნვის თვალსაზრისით მასთან გათანაბრებული მედიკამენტები.

კონტროლის ღონისძიებების შედეგად, ასევე, გამოვლინდა ავტორიზებული აფთიაქის სანებართვო პირობებისა და მე-2 ჯგუფს მიკუთვნებული ფარმაცევტული პროდუქტის გაცემის წესის დარღვევის ფაქტები.

დაწესებულების მიმართ შედგა ადმინისტრაციული სამართალდარღვევის ოქმი, რომელიც, დადგენილი წესით, განსახილველად გადაეგზავნა ბათუმის საქალაქო სასამართლოს. სამართალდარღვევა გათვალისწინებულია „წამლისა და ფარმაცევტული საქმიანობის შესახებ“ საქართველოს კანონის 37(3) მუხლით, 37(4) მუხლის მე-3 და მე-5 პუნქტებით:

  •  ფარმაცევტული პროდუქტის რეალიზაციის წესის დარღვევა განმეორებით – ჯარიმა 1000 ლარი.
  • პირველი ჯგუფისთვის მიკუთვნებული ფარმაცევტული პროდუქტის რეალიზაციის (გაცემის) წესის დარღვევა – ჯარიმა 6000 ლარი.

ბათუმში მდებარე ავტორიზებულ აფთიაქში 2020 წლის 4-5 მარტს სამედიცინო და ფარმაცევტული საქმიანობის რეგულირების სააგენტომ  ფარმაცევტულ საქმიანობაზე კონტროლის ღონისძიებები განახორციელა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან