კორონავირუსის საფრთხიდან გამომდინარე, გაიზარდა მოთხოვნა სადეზინფექციო სამუშაოების ჩატარებაზე როგორც კომერციული, ასევე საჯარო უწყებების მხრიდან. „ყოველდღე გვაქვს გამოძახება, დატვირთულ რეჟიმში ვმუშაობთ“, – გვითხრეს ბათუმის მერიის სანდასუფთავებაში.
ბათუმის „სანდასუფთავების“ ფინანსური დირექტორის მოადგილის, ნარგიზ ფალავანდიშვილის თქმით, მომსახურება ფასიანია როგორც საჯარო უწყებებისთვის, ასევე კომერციული ობიექტებისთვის.
„1 კვ. მეტრის დეზინფექცია 15 თეთრი ღირს ამ ეტაპზე, შეძენილი პრეპარატების თვითღირებულებიდან გამომდინარე. შემდეგ გაძვირდება თუ არა, ეს დამოკიდებულია ბაზარზე.“
დღეს, 12 მარტს, დეზინფექცია ჩაუტარდა ბათუმის რუსთაველის სახელობის უნივერსიტეტს. ფართობის მასშტაბიდან გამომდინარე, სადეზინფექციო სამუშაოები უნივერსიტეტის კორპუსებში ხვალაც გაგრძელდება.
„შეიწამლა უნივერსიტეტის ყველა კორპუსი, საერთო საცხოვრებლები, კვლევითი ცენტრები და ა.შ“.
როგორც ბსუ-ში გვითხრეს, სადეზინფექციო სამუშაოებზე უნივერსიტეტმა 5 115 ლარი დახარჯა.
უნივერსიტეტში სასწავლო პროცესი ამ დროისთვის შეჩერებულია. მთავრობის დადგენილებით, საგანმანათლებლო დაწესებულებებში სწავლა პირველ აპრილს უნდა განახლდეს. უნივერსიტეტში სწავლის დაწყების წინ დეზინფექციას კიდევ ერთხელ ჩაატარებენ.
როგორც ნარგიზ ფალავანდიშვილი ამბობს, სადეზინფექციო სამუშაოებზე შეკვეთას თითქმის ყველა მუნიციპალიტეტიდან იღებენ. „ქედა, ხულო, შუახევი, ქობულეთი – ყველგან გვაქვს გამოძახება. ამ ეტაპზე რესურსი კი გვყოფნის, თუმცა მაინც ვფიქრობთ ჯგუფების დამატებაზე და აპარატების შეძენაზე, რითაც ვამუშავებთ ტერიტორიას. შემოტანილი გვაქვს გერმანული პრეპარატი, რომლის მარაგი, სავარაუდოდ, თვის ბოლომდე იქნება საკმარისი“, – გვეუბნება ის.
ნარგიზ ფალავანდიშვილის თქმით, რამდენჯერმე მიიღეს შეკვეთა ე.წ. ხოფის ბაზრიდანაც. „უკვე 3-4 ჯერ შევწამლეთ ტერიტორია და კიდევ ვაპირებთ. ჩვენი აპარატები სხვებისგან იმით განსხვავდება, რომ სველი წესით არ ხდება დამუშავება და ჰაერში ხდება წამლის გაფრქვევა. დეზინფექციის დროს შენობა მინიმუმ 3-4 საათით უნდა იყოს დახურული. წამალს სუნი არ აქვს, მაგრამ შენობა შემდეგ მაინც კარგად უნდა განიავდეს“, – ამბობს ნარგიზ ფალავანდიშვილი.
მისივე თქმით, დღეს საღამოს ექნებათ დაზუსტებული მონაცემები იმის შესახებ, თუ რამდენ ობიექტს ჩაუტარდა დეზინფექცია. „ბუნებრივია, სადეზინფექციო სამუშაოებს კერძო ორგანიზაციებიც აკეთებენ, თუმცა ჩვენ საბიუჯეტო ორგანიზაცია ვართ და ცალკე ვაკეთებთ აღრიცხვას“.
