Batumelebi

საგანგებო მდგომარეობის გამოცხადებამდე ნესტან ტარიელაძე ბათუმში, ერთ-ერთ რესტორანში მზარეულად მუშაობდა, თუმცა დღეს ეს სამუშაო აღარ აქვს. რესტორანი დაიხურა და ოჯახი შემოსავლის გარეშე დარჩა. როგორც ნესტანი „ბათუმელებთან“ ამბობს, მას სამი შვილი ჰყავს და სვიშევსკის ქუჩაზე, კერძო სახლის რამდენიმე ოთახში ქირით ცხოვრობს.

ნესტანი ამბობს, რომ მისი კომუნალური გადასახადები ზამთრის პირობებში არ სცდება 100 ლარს, თუმცა, რადგან მრიცხველი სახლის მეპატრონის სახელზეა, ის ვერ სარგებლობს იმ შეღავათით, რასაც მთავრობა მოქალაქეებს დაჰპირდა.

მთავრობის გადაწყვეტილებით, იმ ოჯახებს, რომლებიც თვეში 200 კვ/ტ ელექტროენერგიაზე და 200 კუბ ბუნებრივ აირზე მეტს არ წვავს, სამი თვის კომუნალურ ხარჯს სახელმწიფო დაუფარავს.

„ჩვენი ოჯახების საკითხი დადგა კითხვის ნიშნით ქვეშ. არ ვიცი რა გვეშველება. მე აღარ სამუშაო მაქვს და არც კომუნალური შეღავათები გავრცელდება ჩემზე. სახლის პატრონს ქირის ფულს ვერ ვუხდი, სხვა შემოსავალი არც მას აქვს, რომ არ გადაიხადოს კომუნალურები და ჩამიჭრან, რა უნდა გავაკეთო? სამი შვილი მყავს და ახლა ისიც დამემატა, რომ ბავშვები ტელესკოლის გაკვეთილებით სარგებლობენ, შუქი რომ გამომირთონ, გაკვეთილებსაც ვეღარ მოუსმენენ“.

ნესტან ტარიელაძე ამბობს, რომ ენერგოკომპანიამ ან სახელმწიფომ  გაითვალისწინოს ეს მდგომარეობა და რაიმე ფორმით გაუწიოს დახმარება მსგავს მდგომარეობაში მყოფ მოქალაქეებს.

არსებობს თუ არა ასეთ ვითარებაში გამოსავალი? – ენერგოომბუდსმენი, სალომე ვარდიაშვილი ამბობს, რომ რადგან მთავრობის მიერ განაცხადი გაკეთდა კონკრეტული პირობით, სახელმწიფო შეღავათი შეეხება მხოლოდ მათ, ვის სახელზეცაა რეგისტრირებული კომუნალური ხარჯი.

„შესაბამისად, ერთი სახლის შიგნით რა ხდება, ამას ვერავინ ვერ დაინახავს, სამწუხაროდ“,- გვეუბნება ის.

„სოკარ ჯორჯია გაზის“ აჭარის რეგიონული ოფისის დირექტორი ვახტანგ ბერიშვილიც ამბობს, რომ კომპანიისთვის ასეთი გაგება – „საერთო მრიცხველი“, არ არსებობს.

თუ ვინმეს ოთახებად აქვს ჩაშლილი (სახლი) და ინდივიდუალური გამრიცხველიანებით, ეს არ ნიშნავს, რომ ამას კანონი არეგულირებს“, – გვეუბნება ის.

მისი თქმით, „სოკარისთვის“ აბონენტი არის ის, ვინც  ოფიციალურადაა რეგისტრირებული საინფორმაციო ბაზაში.

მსგავსი პოზიციაა აქვთ „ენერგო-პრო ჯორჯიაშიც“. კომპანიაში გვეუბნებიან, რომ ამ საკითხზე სმკ-მა უნდა იმსჯელოს.

მსგავსი პრობლემის წინაშე დგას ბათუმში. ე.წ. „ოცნების ქალაქში“ მცხოვრები 700-ზე მეტი ოჯახიც, რადგან ისინიც, ქირაში მყოფი ადამიანების მსგავს, ელექტროენერგიის გადასახადს საერთო მრიცხველის მიხედვით იხდიან.

ადამიანის უფლებების სწავლებისა და მონიტორინგის ცენტრის (EMC) სოციალური პოლიტიკის პროგრამის დირექტორი კოტე ერისთავი ამბობს, რომ მთავრობამ აუცილებლად უნდა შეიმუშაოს სოციალური დახმარების მოქნილი სისტემა, რომელიც გამარტივებული ბიუროკრატიის გარეშე დაეხმარება შემოსავლის გარეშე დარჩენილ ადამიანებს.

„10 და 100 ათასობით ადამიანი დარჩა შემოსავლის გარეშე პანდემიის ვითარებაში. კომუნალურებში მოსახლეობის დახმარება კარგი იდეაა, თუმცა ეს არ არის საკმარისი, რადგან ეს შეღავათები ყველა მოწყვლად ჯგუფზე არ ვრცელდება. უნდა შედგეს კომისია, რომელიც მარტივი კრიტერიუმებით მოახდენს იმ ადამიანების იდენტიფიცირებას, ვინც შემოსავალი დაკარგა, ფორმალურ თუ არაფორმალურ სექტორში და ჩართავს რაღაც ტიპის შემწეობის პროგრამაში“.

დღეს, 3 აპრილს, ვიცე-პრემიერმა მაია ცქიტიშვილმა განაცხადა, რომ რამდენმა ადამიანმა დაკარგა სამუშაო, ამას შემოსავლების სამსახურის მეშვეობით დაადგენენ. კოტე ერისთავის შეფასებით, ეს ვერ მოგვცემს რეალურ სურათს, რადგან ადამიანების საკმაოდ დიდი ნაწილი არაფორმალურ სექტორში მუშაობს.

„იქნებიან ეს გიდები, გარემოვაჭრეები თუ საცალო ვაჭრობაში ჩართული ადამიანები და სხვა. ამიტომ მხოლოდ ეს წყარო უმუშევართა დადგენის არ იქნება საკმარისი. ადამიანებს, რომლებსაც დიდი ვალი აქვთ სხვადასხვა ინსტიტუციის, შეიძლება მინიმალურ ხელფასზე მუშაობდნენ და ამის გარეშე დარჩენა ძალიან რთულია მათთვის.

სწორედ ამიტომ უნდა შექმნას სახელმწიფომ დროებითი დახმარების მოქნილი სისტემა. საიდან მოიტანს სახელმწიფო ამ რესურსებს, იქნება ეს სოლიდარობის ფონდი თუ სხვა რამ, მნიშვნელოვანია, რომ ეს ყველაფერი სწორედ ამ პრობლემისკენ იყოს მიმართული“, – ამბობს კოტე ერისთავი.

გარდა ამისა, როგორც ერისთავი ამბობს, როცა სახელმწიფო ბიზნესს აძლევს დახმარების პაკეტს, აუცილებლად და ხაზგასმული უნდა იყოს პირობა, რომ ბიზნესი შეინარჩუნებს სამუშაო ადგილებს.

რა უნდა ქნათ იმ შემთხვევაში, თუკი თქვენს პირადობის მოწმობას ვადა გაუვიდა, დაკარგეთ, ან, მაგალითად, შეკვეთილი გქონდათ, მაგრამ აღება ვეღარ მოასწარით იუსტიციის სახლების დაკეტვამდე?

„ბათუმელებს“ ამ პრობლემით ლანჩხუთის მუნიციპალიტეტის ერთ-ერთ სოფელში მცხოვრები დაუკავშირდა. მან პირადობის მოწმობა დაკარგა და ახლის აღებას ვეღარ ახერხებს. იუსტიციის სახლები ქვეყნის მასშტაბით დისტანციურ რეჟიმზე გადავიდა, პირადობის მოწმობა კი, შესაძლოა, დღისითაც მოგთხოვოთ პოლიციელმა, როცა ქუჩაში გახვალთ.

სახელმწიფო სერვისების სააგენტოს ცხელ ხაზზე გვიპასუხეს, რომ ამ ეტაპზე პირადობის მოწმობის ან პასპორტების დამზადება არ ხდება. ცხელ ხაზზე ვერ გვიპასუხეს, რა უნდა ქნას მოქალაქემ, თუკი მას პირადობის მოწმობა იმის გამო არ აქვს, რომ იუსტიციის სახლი ამ მიმართულებით არ მუშაობს. აქვე გვითხრეს, რომ ამ საკითხზე მუშაობა მიმდინარეობს, თუმცა გადაწყვეტილება ჯერ მიღებული არ არის.

მეტი ინფორმაციის მისაღებად ჩვენ სახელმწიფო სერვისის სააგენტოს პრესცენტრთან დაკავშირებას ვცდილობდით, თუმცა აქ ჩვენს სატელეფონო ზარს არ უპასუხეს.

„თუ მოქალაქემ პირადობის მოწმობა დაკარგა, ამის შესახებ მან აუცილებლად უნდა აცნობოს შინაგან საქმეთა სამინისტროს, რაზეც დაიწყება გამოძიება. ეს არის საჭირო იმისთვის, რომ დაკარგული პირადობის გამოყენება არ მოხდეს. გამოძიების დაწყების შემდეგ მოქალაქეს შეუძლია აიღოს ცნობა, რომელიც ადასტურებს იმას, რომ მან პირადობა დაკარგა და მიმდინარეობს გამოძიება. შესაბამისად, მას ვეღარ დააჯარიმებენ,“ – განმარტავს „ახალგაზრდა იურისტთა ასოციაციის“ აჭარის ფილიალის ხელმძღვანელი, პაატა დიასამიძე,

რაც შეეხება პირადობის მოწმობის ვადის გასვლას – საია-ს იურისტი ამბობს, რომ ვადაგასული პირადობით შესაძლებელია პირის იდენტიფიცირება. შესაბამისად, პოლიცია ვერ დააჯარიმებს მოქალაქეს, რომლის პირადობის მოწმობასაც საგანგებო პირობების დროს გაუვიდა ვადა და მოქალაქე ახალი პირადობის მოწმობის აღებას ობიექტურად ვერ შეძლებდა.

სახელმწიფო სერვისების სააგენტოს ინტერნეტგვერდის მიხედვით, ახალი პასპორტის დამზადება დისტანციურ რეჟიმში მხოლოდ იმ საქართველოს მოქალაქეებისთვისაა შესაძლებელი, რომლებიც ამჟამად საზღვარგარეთ იმყოფებიან. მათთვის პასპორტს ორ დღეში დაამზადებენ. ახალი პასპორტის ღირებულება 205 ლარია. ახალ პასპორტს უცხოეთში მცხოვრები საქართველოს მოქალაქე გადამზიდავი კომპანიის საშუალებით მიიღებს.

დაავადებათა კონტროლისა და საზოგადოებრივი ჯანდაცვის ცენტრის დირექტორის მოადგილის, პაატა იმნაძის თქმით, საქართველოში COVID-19 აღმოაჩნდა პაციენტს, რომელიც სახლიდან არ გადიოდა.

„ერთი შემთხვევა გვაქვს ამ ეტაპზე, ეს არის შემთხვევა, როდესაც საქმე გვაქვს ხანდაზმულ პაციენტთან, რომელიც პრაქტიკულად სახლიდან არ გამოდიოდა და მხოლოდ შვილი და შვილიშვილი მოძრაობდნენ გარეთ. ამიტომ ამ შემთხვევის მოკვლევას განსაკუთრებული ყურადღებით ვეკიდებით“, – განაცხადა პაატა იმნაძემ ბრიფინგზე, დღეს, 3 აპრილს.

მისი თქმით, ასევე მიმდინარეობს ახალი შემთხვევების კონტაქტების ინტენსიური კვლევა:

„ესენია, ეგრეთ წოდებული ბანკის საცავის კლასტერების გაგრძელება, კონტაქტების მოძიების შედეგად დადგენილი კიდევ ერთი შემთხვევა ასევე დაკავშირებულია ბოლნისის გაგრძელებასთან“, – განაცხადა პაატა იმნაძემ.

მისი თქმით, აუცილებელია მთელ ქვეყანაში გამკაცრდეს საკარანტინო ზომები:

„ისევ და ისევ ჩანს, რომ ჩვენი მოქალაქეების ნაწილი მაინც ვერ იაზრებს რასთან გვაქვს საქმე და რა შეიძლება მოხდეს ქვეყანაში, თუ მაქსიმალურად არ დავემორჩილებით რჩევებს,“ – ამბობს იმნაძე.

პაატა იმნაძე, ასევე, აცხადებს, რომ 37 გრადუსი არ არის ტემპერატურა, რის გამოც ადამიანი უნდა შეშფოთდეს. მისი თქმით, 112-ს ექიმთან კონსულტაციის მიზნით იმ პირებმა უნდა მიმართონ, რომელთა ტემპერატურა 37,5 ან მეტია:

„არსად არ წერია, რომ 37 გრადუსი არის ტემპერატურა, რომელზეც უნდა შეშფოთდეს ადამიანი. 37,5 და მეტი არის, როდესაც კონსულტაცია უნდა მიიღოს ადამიანმა. მარტო ესეც არ არის საკმარისი იმისთვის, რომ იყოს საეჭვო შემთხვევა,“ – ამბობს პაატა იმნაძე.

ამავე თემაზე: 

https://netgazeti.ge/news/440250/

აჭარის მთავრობის თავმჯდომარის, თორნიკე რიჟვაძის განცხადებით, აჭარის მთავრობა სამი თვის განმავლობაში ხელფასის 1/3 გადარიცხავს კორონავირუსთან ბრძოლის ფონდში.

„აჭარის მთავრობა, მინისტრთა კაბინეტის სრული შემადგენლობით, უერთდება გუშინ „ქართული ოცნება – დემოკრატიული საქართველოს“ პოლიტიკური გუნდის მიერ მიღებულ გადაწყვეტილებას, რომელიც გულისხმობს, რომ შემდეგი სამი თვის განმავლობაში ჩვენი ხელფასებიდან ერთი მესამედი ჩაირიცხება კორონავირუსთან ბრძოლის ფონდში.

პანდემიას  როგორც ჩვენს ქვეყანაში, ისე მსოფლიოში, ახლავს ბევრი პრობლემა, ჩვენი ქვეყნის ბევრ მოქალაქეს შეექმნა რიგი პრობლემები. მნიშვნელოვანია ჩვენი ერთიანობა, ჩვენი სოლიდარობა და ამ ნაწილში, დარწმუნებული ვარ, არაერთი სხვა უწყებაც აგვიბამს მხარს. მაქვს მოლოდინი, რომ ხელისუფლების ყველა დონეზე მოხდება ჩართვა ამ პროგრამაში, ვინაიდან, ჩვენი ბრძოლა ამ ინფექციასთან მოითხოვს ერთიან ძალისხმევას,“ – განაცხადა რიჟვაძემ.

ინიციატივას აჭარაში უერთდება არა მარტო აღმასრულებელი გუნდი, არამედ აჭარის უმაღლესი საბჭოც.

„ქართული ოცნების“ ხელისუფლების წარმომადგენლები რომ სამი თვის განმავლობაში ხელფასის 1/3-ს კორონავირუსთან ბრძოლის ფონდში გადარიცხავენ, ამის შესახებ გუშინ, 2 აპრილს, გამართულ ბრიფინგზე პარტიის აღმასრულებელმა მდივანმა ირაკლი კობახიძემ განაცხადა.

 

საქართველოს ეკონომიკისა და მდგრადი განვითარების მინისტრის, ნათია თურნავას ინფორმაციით, ამ დროისათვის  უკვე მზადაა და სამინისტროს ვებგვერდზეა ატვირთული სპეციალური აპლიკაციები  ბიზნესისთვის, იმ კომპანიებისთვის, რომლებიც არიან დროებით შეზღუდულ რეჟიმში ან გაჩერებული. მინისტრის განმარტებით, ეს ეხება როგორც სამშენებლო კომპანიებს, ასევე საშენი მასალების ინდუსტრიას და სხვა ბიზნესებს, რომელთა საქმიანობის სფერო ჯერჯერობით არ არის იმ ჩამონათვალში, რომელთაც მთავრობამ მუშაობის გაგრძელების უფლება მისცა.

„ეს მარტივი ფორმებია, სადაც  იქნება ასახული კონკრეტული კომპანიის მზადყოფნა დაიცვას თავისი მომხმარებლები და თანამშრომლები,“ – განაცხადა თურნავამ.

მინისტრის ინფორმაციით, კომპანიების კონტროლის მიზნით შექმნილია მობილური ჯგუფები, რომლებშიც შედიან: ჯანდაცვის სამინისტროს დაქვემდებარებაში მყოფი შრომის ინსპექცია, ეკონომიკის სამინისტროს ტექნიკური ზედამხედველობის სამსახური და შესაბამისი მუნიციპალური ინსპექციები:

„ეს იმისთვის გაკეთდა, რომ  რესურსი გვეყოს და სწრაფად გადავამოწმოთ ბევრი ბიზნესი ერთდროულად, როგორც კი ჩვენ დავრწმუნდებით, რომ კონკრეტულ ბიზნესში დაცულია  მარტივი პირობები, რაც დადგენილია ჯანდაცვის სამინისტროს მიერ, კომპანიის მონაცემებს სპეციალურ შტაბს წარვუდგენთ, რომელიც მიიღებს გადაწყვეტილებას“.

მინისტრის თქმით, გადამოწმების პროცესს რამდენიმე დღე დასჭირდება: „თუმცა ეს დრო ჩვენ ყველას გვჭირდება, რომ დავყოთ მაქსიმალურად სახლებში, ეს არის ის აუცილებელი მსხვერპლი, რასაც ბიზნესები გაიღებენ იმისთვის, რომ თვითონ და მათი თანამშრომლები დარჩნენ უსაფრთხოდ,“ – განაცხადა ნათია თურნავამ.

მინისტრმა დღევანდელ გამოსვლაში განსაკუთრებული ყურადღება გაამახვილა უსაფრთხოების წესების დაცვის სავარაუდო მოთხოვნაზე მომავალში, რომელიც, მისი აზრით, გლობალურად გაჩნდება ეკონომიკის მიმართულებებში. თურნავა ამბობს, რომ ყველაზე მეტად კონკურენტული უსაფრთხო ბიზნესი იქნება. მან მოუწოდა ბიზნესმენებს, დახვდნენ ამ პროცესს მომზადებული.

ამ დროისთვის ეკონომიკის სამინისტროს ვებგვერდზე სამი სხვადასხვა აპლიკაციაა განთავსებული: სამშენებლო მასალებისა და საბითუმო ვაჭრობის მწარმოებელი კომპანიებისთვის, სამშენებლო კომპანიებისა და მეწარმე სუბიექტებისთვის.

საგანგებო მდგომარეობის პერიოდში მუშაობის გაგრძელების ნებართვის მოსაპოვებლად კომპანიებმა, რომლებსაც ამ დროისთვის საქართველოს მთავრობის დადგენილებით შეზღუდული აქვთ საქმიანობის განხორციელების უფლება,  საქართველოს ეკონომიკისა და მდგრადი განვითარების სამინისტროს ოფიციალური ვებგვერდიდან –  www.economy.ge  უნდა  ჩამოტვირთონ სარეგისტრაციო ფორმა, შეავსონ და გაგზავნონ ელექტრონული ფოსტის მისამართზე – construction@moesd.gov.ge.

კომპანიებმა თბილისის ადმინისტრაციულ საზღვრებში მშენებლობის უფლების გაგრძელებისთვის უნდა მიმართონ თბილისის მუნიციპალიტეტის მერიას მისამართზე – build@tbilisi.gov.ge.

სარეგისტრაციო ფორმაში მათ უნდა წარადგინონ ინფორმაცია იმ ობიექტების ან სუბიექტის შესახებ, სადაც სჭირდებათ სამუშაოების გაგრძელება. ამ კომპანიებმა  უნდა აიღონ პასუხისმგებლობა ჯანდაცვის სამინისტროს მიერ გაცემული რეკომენდაციებისა და წესების შესრულება-დაცვაზე.

ამის შემდეგ ეკონომიკისა და მდგრადი განვითარების სამინისტრო, თბილისის შემთხვევაში კი მუნიციპალიტეტი, მოახდენს შესაბამისი ობიექტების შემოწმებას და იმ შემთხვევაში, თუ დადასტურდება წარმოდგენილი ინფორმაცია, აღძრავს შუამდგომლობას საქართველოს მთავრობასთან ამ ობიექტის საქართველოს მთავრობის მიერ განსაზღვრულ შესაბამის სიაში დამატებასთან დაკავშირებით.

წესებისა და რეკომენდაციების დარღვევის შემთხვევაში, ეკონომიკურ სუბიექტზე გამოიწერება ადმინისტრაციული ჯარიმა და შეუჩერდება საქმიანობის განხორციელების უფლება.

„ჩვენ შევძლებთ კონკრეტული ციფრების დასახელებას, კონკრეტული თანხების შეთავაზებას მხოლოდ მას შემდეგ, რაც ჩვენ შევძლებთ შევაფასოთ, აპრილის თვეში რამდენმა ადამიანმა აღარ აიღო მარტის თვის ხელფასი. შესაბამისად, მაისში შევძლებთ იმის შეფასებას, თუ რამდენმა დაკარგა სამსახური აპრილში,“ – განაცხადა ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა.

მისი თქმით, დახმარების პაკეტი, რომელსაც სახელმწიფო ბიზნესს სთავაზობს, ადამიანებს მისცემს შესაძლებლობას, შეინარჩუნონ სამუშაო ადგილები.

კითხვაზე, როგორ აპირებს სახელმწიფო გაიგოს, რამდენმა ადამიანმა დაკარგა სამუშაო და რა ფორმით დაეხმარება მათ, მაია ცქიტიშვილი პასუხობს:

„შემოსავლების სამსახურში აღირიცხება საშემოსავლო გადასახადი, ასეთი სახის გადამხდელთა რაოდენობის შემცირებით ჩვენ შევძლებთ შევაფასოთ, თუ რამდენმა ადამიანმა ვერ მიიღო ხელფასი. მხოლოდ ამის შემდეგ გვეცოდინება იმ ადამიანების რაოდენობა, ვინც სამუშაო დაკარგა და შემდგომში შევძლებთ შევაფასოთ, თუ რა მოცულობის თანხებთან შეიძლება გვქონდეს საქმე და რა თანხები იქნება საჭირო ამ ადამიანების დასახმარებლად, იმ შესაძლებლობებიდან გამომდინარე, რაც სახელმწიფო ბიუჯეტს ექნება.

ამიტომ, დღეს არ ვსაუბრობთ იმაზე, თუ  სად და ვის უნდა მიმართონ ამა თუ იმ პირებმა, ჯერ გვჭირდება საკმარისი ინფორმაცია იმისთვის, რომ შევაფასოთ, რა რაოდენობის ადამიანებს შეიძლება დასჭირდეთ დახმარება,“ – ამბობს ცქიტიშვილი.

მისი თქმით, სწორედ ამ ინფორმაციის მიღების შემდეგ შეძლებს სახელმწიფო განსაზღვროს, რა ფინანსური რესურსი უნდა გამოყოს და თითოეული ადამიანისთვის რა სახის კომპენსაცია გაითვალისწინოს.

სპორტის საერთაშორისო დღის აღსანიშნავად განათლების, კულტურისა და სპორტის სამინისტრო რამდენიმე კონკურსს აცხადებს.

პირველი კონკურსის სახელწოდებაა – „მე ვრჩები სახლში და ვვარჯიშობ“.

კონკურსში მონაწილეობის მსურველებმა უნდა ჩაწერონ საკუთარი ან ოჯახის წევრის ვარჯიშის ვიდეორგოლი და ატვირთონ საკუთარ Facebook, Instagram ან Twitter-ის გვერდზე, მონიშნონ „საქართველოს ეროვნული ფედერაცია სპორტი ყველასათვის / SportForAll“ და დაწერონ 3 აუცილებელი ჰეშთეგი:

#სპორტისდღე2020

#PeaceAndSport

#დარჩისახლში

კონკურსის აუცილებელი პირობაა  2 ადამიანის გამოწვევა. ვიდეორგოლი სოციალურ ქსელში უნდა განთავსდეს 3-დან 10 აპრილის ჩათვლით.

დასაწყისში სამინისტრო გამოავლენს 10 ყველაზე შემოქმედებით და საინტერესო ვიდეოს, რომელთა ავტორებიც სიმბოლურ საჩუქრებს მიიღებენ. „შემდეგ ეტაპზე ამ ათი ვიდეოდან გამარჯვებულს გამოავლენს ცნობილი სპორტსმენებისგან შემდგარი ჟიური. კონკურსის გამარჯვებული დაჯილდოვდება სპეციალური პრიზით, სამახსოვრო საჩუქრებით და სპორტსმენების ავტოგრაფებით,“ – აცხადებს სამინისტრო.

ამ დღის ფარგლებში სამინისტრო მეორე, – ნახატების კონკურსსაც აცხადებს, ოღონდ სკოლის მოსწავლეებისთვის. მოსწავლეებმა, 3-დან 10 აპრილის ჩათვლით, ელექტრონულ ფოსტაზე  sportdep@mes.gov.ge უნდა გააგზავნონ ნახატი მოცემული თემებიდან ერთ-ერთზე:

• გენდერული თანასწორობა და სპორტი
• მშვიდობა და სპორტი

ნამუშევრები გამოქვეყნდება საქართველოს ეროვნული ფედერაციის – „სპორტი ყველასათვის“ ფეისბუქის გვერდზე. გამარჯვებულებს 3 ასაკობრივ კატეგორიაში (I-IV კლასები, V-IX კლასები, X-XII კლასები) სამინისტრო გამოავლენს. გამარჯვებული მოსწავლეები დაჯილდოვდებიან სიმბოლური საჩუქრებით.

დამატებით ნომინაციაში – „სპორტსმენის რჩეული ნახატი“, საუკეთესო ნახატის ავტორს გამოავლენს ცნობილი სპორტსმენი და გადასცემს სიმბოლურ საჩუქარს.

და კიდევ ერთი, ესეების კონკურსი სკოლის მოსწავლეთა შორის (V-XII კლასები):

სკოლის მოსწავლეებმა, 3-დან 10 აპრილის ჩათვლით, ელექტრონულ ფოსტაზე  sportdep@mes.gov.ge უნდა გააგზავნონ ესე მოცემული თემებიდან ერთ-ერთზე:

• „გენდერული თანასწორობა და სპორტი“
• „მშვიდობა და სპორტი“

ესე არ უნდა აღემატებოდეს 300 სიტყვას. გამარჯვებულები 2 ასაკობრივ კატეგორიაში (V-IX კლასები, X-XII კლასები) გამოვლინდებიან და სიმბოლური საჩუქრებით დაჯილდოვდებიან.

6 აპრილი მსოფლიო სპორტის საერთაშორისო დღეა. საერთაშორისო ორგანიზაციის „მშვიდობა და სპორტი“ გადაწყვეტილებით, სპორტის დღისადმი მიძღვნილი ღონისძიებები და აქტივობები  ონლაინსივრცეში გადაინაცვლებს.  წელს ამ ღონისძიების მთავარი მესიჯი მსოფლიო მასშტაბით იქნება „მე ვრჩები სახლში და ვვარჯიშობ“.

საქართველოში 24 ონლაინკლინიკა იქნება, სადაც მოქალაქეები კორონავირუსთან დაკავშირებული მომსახურების მიღებას შეძლებენ. კლინიკები პირველადი ჯანდაცვის ბაზაზე გაიმართა. 24 კლინიკიდან 15 თბილისში იქნება, დანარჩენი კი – რეგიონებში. მათ შორის, ბათუმსა და ქუთაისში ორ-ორი ონლაინკლინიკაა გახსნილი.

„ყველა კლინიკა დაფარავს როგორც ქალაქის, ასევე სოფლის მოსახლეობას. ონლაინკლინიკაში ზარი გადამისამართდება 112-ის მიერ.

როდესაც მოქალაქე მაღალი ტემპერატურის ან საეჭვო რესპირაციული სიმპტომების გამო მიმართავს 112-ს, ზარი გადამისამართდება საოჯახო მედიცინის ცენტრში, სადაც მოქალაქეს დაელაპარაკება მაღალკვალიფიციური ოჯახის ექიმი და შედგება სრული სატელეფონო კონსულტაცია,  რომელიც მოიცავს ყველა ელემენტს, ის, რაც შეიძლება შესრულდეს პირადი კონსულტაციის პროცესში,“ – განაცხადა საქართველოს ჯანდაცვის მინისტრის მოადგილემ თამარ გაბუნიამ. 

მისი თქმით, მსგავსი მოდელი მესამე წელია წარმატებით მუშაობს გრიპის ეპიდემიის შემთხვევების დროს.

„მოდელი არის კარგი, გვაძლევს იმის საშუალებას, რომ მაქსიმალურად დავიცვათ პაციენტი არასაჭირო ჰოსპიტალიზაციისგან და არააუცილებელი მიმართვისგან სამედიცინო ქსელში, ასევე, დავიცვათ პირველადი ჯანდაცვის ქსელი ზედმეტი  და არააუცილებელი კონტაქტისგან პაციენტებთან, რომლებიც შეიძლება იყვნენ ინფექციის მატარებლები.

საჭიროების შემთხვევაში შეგვიძლია დავგეგმოთ  გონივრულად, მომზადებულად და ინფექციის კონტროლის წესების ზუსტად დაცვით ბინაზე ვიზიტი ან ვუზრუნველყოთ  პაციენტის გადამისამართება უკვე შესაფერის კოვიდ  კლინიკაში, სადაც სრული მობილიზაციაა იმისათვის, რომ მივიღოთ მხოლოდ ცხელებიანი პაციენტი, მივიღოთ მხოლოდ კოვიდდადასტურებული შემთხვევები და მათ ჩაუტარდეთ შესაფერისი მკურნალობა,“ – თქვა თამარ გაბუნიამ პირველ აპრილს გამართულ ბრიფინგზე.

ე.წ.  ცხელების კლინიკებზე საუბრისას  მინისტრის  მოადგილემ განმარტა, რომ  ცხელების კლინიკების იდეა ემყარება მოსაზრებას – ყველა კლინიკა უნდა იყოს მზად ცხელებიანი პაციენტის  უსაფრთხოდ მისაღებად.

„მიუხედავად ჩვენი მცდელობისა, რომ პაციენტების ნაკადი იმართოს და გადამისამართდეს ე.წ. კოვიდ კლინიკებში, მაინც შესაძლებელია მოხდეს ისე, რომ სიცხიანმა პაციენტმა, განსაკუთრებით რაიონულ დონეზე, სადაც უბრალოდ სხვა სამედიცინო მიმწოდებელი არ არის, მიმართოს კლინიკას, კლინიკა უნდა იყოს მომზადებული.

სავალდებულო მოთხოვნაა ყველა კლინიკისთვის, რომ ჰქონდეს სულ მცირე ერთი  გამოყოფილი ოთახი იმისთვის, რომ მან ინფექციის წესების კონტროლის დაცვით, იზოლირებულად მართოს საეჭვო ინფექცია. ამ შემთხვევაში საქმე გვაქვს ცხელებასთან, რომელიც შესაძლებელია უკავშირდებოდეს COVID-19-ს. ასეთ დროს მთავარი აქცენტი იქნება სწრაფ დიაგნოსტიკაზე, კლინიკები იქნებიან აღჭურვილი დიაგნოსტირების შესაძლებლობებით.

სწორედ ამ კლინიკებიდან დაიწყება პირველ  რიგში იმ პერსონალის ტრენინგი, ვინც უნდა აიღოს ნაცხი და ადგილზე შეძლოს  სწრაფი ტესტის  გამოყენებით ტესტირება. თუ არ დადასტურდა COVID-19, პაციენტი განაგრძობს მკურნალობას ზოგადი პროფილის ჰოსპიტალში, დარჩება ადგილზე ან გადავა ბინაზე. თუ დადასტურდა, ამ შემთხვევაში ის წამოვა დიდ ქალაქებში, მომზადებულ  კლინიკებში, რომლებიც დღეს უკვე წარმატებით ართმევენ თავს კოვიდის შემთხვევების მართვას. ზოგიერთ რაიონში, სადაც არის ორი  ან მეტი კლინიკა, ბევრად უფრო რაციონალური იქნება ერთი კლინიკის  სრულად მობილიზება მხოლოდ ცხელებიანი პაციენტების მართვისთვის, აქ სხვა პაციენტი უბრალოდ აღარ მივა, მაგრამ იქ, სადაც არის მხოლოდ  ერთი კლინიკა, ასეთ შემთხვევაში ფასდება კლინიკის მზაობა იმისთვის, რომ მან მოახერხოს უსაფრთხოდ ცხელებიანი პაციენტების მიღება,“ –  განაცხადა თამარ გაბუნიამ.

მისივე თქმით, უახლოეს დღეებში დასრულდება ყველა რაიონული კლინიკის იდენტიფიცირება  და უკვე  ზუსტად იქნება ცნობილი, რომელი კლინიკა რა მოცულობით გამოყოფს  საწოლ ფონდს ცხელებიანი პაციენტების მართვისთვის.

ბათუმში „ცხელების ცენტრი“ ბათუმის ინექციურ საავადმყოფოშია გახსნილი.

კორონავირუსით დაავადებული პაციენტებიდან, რომლებიც ბათუმში მკურნალობენ, ერთ-ერთის მდგომარეობა ისევ განსაკუთრებით მძიმეა. კლინიკა „მედალფაში“ 3 აპრილის მდგომარეობით 7 პაციენტია, ვისაც COVID-19 დაუდასტურდა და მკურნალობის კურსს გადის, ერთი პაციენტი კი უკვე გამოჯანმრთელდა.

„ის 70 წელს გადაცილებულია და დღესაც იმყოფება მართვით სუნთქვაზე, თუმცა სასიცოცხლო მაჩვენებლები ნორმალურია. კიდევ ერთი პაციენტის მდგომარეობა საშუალოდ მძიმეა, რადგან მას ორმხრივი პნევმონია აქვს, თუმცა დინამიკა გვაქვს გაუმჯობესებისკენ. სამ პაციენტს აქვს ნაწილობრივი პნევმონია, მათი მდგომარეობაც უმჯობესდება. დაავადებული ექთნის დინამიკაც კარგია,“ – უთხრა „ბათუმელებს“ ლევან ანთაძემ, კლინიკა „მედალფას“ რეგიონულმა მენეჯერმა.

აჭარის ჯანდაცვის სამინისტროს ინფორმაციით, გუშინ ინფექციურ საავადმყოფოში შეყვანილი 13 პაციენტიდან არც ერთს არ დაუდასტურდა კორონავირუსი. ამ დროისთვის კლინიკაში რჩება კიდევ 8 ადამიანი, რომლის ანალიზის პასუხსაც დღის ბოლოს ელოდებიან.

აჭარის რეგიონში კარანტინში რჩება 2050-მდე პირი. კარანტინს დღეს, 3 აპრილს, დატოვებს 15 პირი. თვითიზოლაციაში რჩება 70-ზე მეტი მოქალაქე.

კორონავირუსით დაავადების მაჩვენებელი ქვეყნის მასშტაბით 148-მდე გაიზარდა. მათგან გამოჯანმრთელდა 27.

კორონავირუსის  პანდემიის გამო და კომენდანტის საათის ამოქმედების მიუხედავად, ხელისუფლება ამ დრომდე თავს არიდებს იმას, რომ მართლმადიდებელ ეკლესიას კანონით შეუზღუდოს ღვთისმსახურება, რაზეც თავად ეკლესია, მსოფლიო სასულიერო ინსტიტუტებისგან განსხვავებით, კატეგორიულ უარს ამბობს.

კომენდანტის საათმა, რომელიც 31 მარტიდან ამოქმედდა, ამჯერად მორწმუნეებისთვის მხოლოდ ის შეცვალა, რომ ისინი იმ შემთხვევაში დაჯარიმდებიან, თუკი საღამოს 9-დან დილის 6-მდე ქუჩაში იმოძრავებენ, მათ შორის, მაშინ, როცა იტყვიან, რომ ტაძარში მიდიან.

კომენდანტის საათის მიუხედავად, ტაძარში ან რომელიმე სხვა სასულიერო დაწესებულებაში შეკრებილ მრევლს პოლიცია ვერ დააჯარიმებს.

„ეკლესიაში ხალხის შეკრებას იცავს რელიგიის და არა შეკრების და გამოხატვის თავისუფლება. შეკრებაზე დაწესებული შეზღუდვა არ გულისხმობს იმას, რომ ავტომატურად ეს შეზღუდვა სხვა კონსტიტუციურ უფლებაზე, რელიგიის თავისუფლებაზეც გავრცელდება. რელიგიის თავისუფლება შეკრების თავისუფლებისგან დამოუკიდებელი უფლებაა,“ – ამბობს პაატა დიასამიძე, „ახალგაზრდა იურისტთა ასოციაციის“ აჭარის ფილიალის ხელმძღვანელი.

საგანგებო რეჟიმის დროს გამოცემული დეკრეტით ვერ შეიზღუდებოდა რელიგიის თავისუფლება, რაც კონსტიტუციით არის გარანტირებული. თუმცა პაატა დიასამიძეს მიაჩნია, რომ „ყველაზე ეფექტური გადაწყვეტილება, რაც სახელმწიფოს უნდა გაეკეთებინა, ეს იყო საქართველოს კონსტიტუციის მე-16 მუხლის მე-2 ნაწილის გამოყენება, რომელიც თავად უშვებს რელიგიის თავისუფლების შეზღუდვას ჯანმრთელობის უფლების დასაცავად, ჩვეულებრივ და არა საგანგებო მდგომარეობაში,“ – ამბობს ის.

რატომ შეიძლება დაჯარიმდეს ადამიანი ქუჩაში, თუკი იგი ტაძარში მიდის, ან იქედან გამოდის და კონსტიტუციით გარანტირებული უფლებით სარგებლობს, რაც სახელმწიფოს არ შეუზღუდავს?

„საღამოს 9 საათიდან დილის 6-მდე გადაადგილების შეზღუდვა ირიბად ზღუდავს რწმენისა და აღმსარებლობის (რელიგიის) თავისუფლებას, მაგრამ ეს არ ნიშნავს ამ უფლების დაცულ სფეროში ჩარევას. კონსტიტუციით დაცულ რომელიმე უფლების შეზღუდვა ხშირ შემთხვევაში გარკვეულ გავლენას ახდენს სხვა კონსტიტუციურ უფლებაზე, თუმცა ეს თავისთავად არ ნიშნავს თავად ამ უფლებით დაცულ სფეროში ჩარევას, მის შეზღუდვას. ზოგიერთ შემთხვევაში ეს არის კონსტიტუციით დაცული უფლების შეზღუდვის გვერდითი ეფექტი, რაც მოცემულ შემთხვევაში გვაქვს სახეზე. ანუ 21:00 საათის შემდეგ ტაძარში წასვლა იზღუდება, რაც ირიბად ზღუდავს რელიგიის თავისუფლებას, მაგრამ ეს არის გადაადგილების თავისუფლების შეზღუდვის გვერდითი ეფექტი,“ – აღნიშნავს პაატა დიასამიძე.

სააღდგომო ლიტურგიის ამ ფორმით ჩატარებაზე, დღეს, 2 აპრილს, უკვე ისაუბრა ერთ-ერთმა დეკანოზმა, ვაკის მაცხოვრის ფერისცვალების სახელობის ტაძრის წინამძღვარმა, შალვა კეკელიამ. მან თქვა, რომ კომენდანტის საათის პირობებში მრევლი ტაძარში საღამოს 9-მდე მივა და დილის 6-მდე გაჩერდება.

საია-ს იურისტი ასევე ამბობს, რომ ტაძარში შეკრებილ ადამიანებს პოლიცია ვერც რომელიმე რეკომენდაციის შეუსრულებლობაზე მოსთხოვს პასუხს, მაგალითად, ორმეტრიანი დისტანციის დაუცველობაზე.

პატრიარქმა გუშინ, პირველ აპრილს ასევე თქვა, რომ ღვთისმსახურება ვერ შეჩერდება და მრევლს შეუძლია ტაძრების ეზოებში შეკრება. საია-ს იურისტის თქმით, ეზოებში შეკრებილ მრევლზეც ვრცელდება რელიგიის თავისუფლების სტანდარტი, რომლის შეზღუდვაზეც სახელმწიფომ უარი თქვა. შესაძლოა, სამართლებრივი დავებიც მივიღოთ, თუკი ტაძარს ეზო არ აქვს, მაგალითად, ბარბარეს ტაძარს ბათუმში.

„დავის საგანი იქნება ეს: ადამიანი რეალურად რელიგიურ რიტუალში მონაწილეობის მისაღებად არის მისული, თუ, მაგალითად, სასეირნოდ“, – დასძინა პაატა დიასამიძემ.

ამ თემაზე:

ვის ეკისრება პასუხისმგებლობა, თუ ზიარების შედეგად კორონავირუსი დაფიქსირდება?

See more

 

 

 

 

 

 

 

 

 

 

 

ამერიკაში კორონავირუსის გამო უმუშევრად დარჩენილი 10 მილიონამდე ადამიანი დარეგისტრირდა ბოლო 2 კვირის განმავლობაში, რაც ქვეყნისთვის უმუშევართა უპრეცედენტო რაოდენობაა. 2008 წლის ეკონომიკური კრიზისის დროს უმუშევრად დარჩენილთა რიცხვი შეადგენდა დაახლოებით 8 მილიონს.

გამოცემა Figaro-ის ამერიკელი კორესპონდენტის ინფორმაციით მხოლოდ 21-დან 28 მარტამდე 6 65-მა მილიონმა ადამიანმა მოითხოვა სახელმწიფოსგან დახმარება ხელფასისა და ზარალის კომპენსაციისთვის.

უმუშევრობის მიზეზი ამერიკაში, სხვა ქვეყნების მსგავსად, გამოცხადებული თვითიზოლაციის რეჟიმია.

ორ კვირაში უმუშევართა ასეთი დიდი რაოდენობის დარეგისტრირებას აშშ-ში ხსნიან იმითაც, რომ შესაძლებელია ონლაინდარეგისტრირდე უმუშევრად. ბოლო 10 წლის განმავლობაში ქვეყნებმა, სადაც უმუშევრობის დაზღვევა მოქმედებს, კლიენტებთან და სადაზღვევო სისტემებთან ურთიერთობის სისტემები დახვეწეს. 2008 წელს ამდენი უმუშევრის დარეგისტრირება ფიზიკურად ძალიან გაიწელებოდა დროში, რაც ახლა ძალიან სწრაფად მოხდა.

ფედერალურმა მთავრობამ ყოველკვირეული 600 დოლარი დაამატა თითოეული უმუშევრად დარჩენილისთვის. მაგალითად, ნიუ იორკის შტატში გასულ კვირას ყოველკვირეული უმუშევრობის ჩეკი, რომელსაც სახელმწიფო გასცემდა, იყო 500 დოლარი, ახლა კი ეს თანხა შეადგენს 1100 დოლარს. უმუშევრად დარეგისტრირებულთა რიცხვის სწრაფად ზრდას ამითაც ხსნიან.

_______________

ფოტო: ევროპის პრესფოტო სააგენტო.EPA/JUSTIN LANE

მას შემდეგ, რაც მთელ ქვეყანაში კარანტინი გამოაცხადეს და საზოგადოებრივი ტრანსპორტიც გააჩერეს, პრემიერ-მინისტრმა გიორგი გახარიამ განაცხადა, რომ კომპანიებმა, რომლებსაც მუშაობის გაგრძელების უფლება აქვთ, თავად უნდა უზრუნველყონ თანამშრომლების სამსახურამდე, შემდეგ კი სახლამდე მიყვანა. პრემიერმა განმარტა, რომ მათ ამისთვის სპეციალური ტრასპორტი უნდა დაიქირაონ.

შესაბამისი მომსახურების გაწევის მიზნით მუნიციპალურ  შპს-ს, ჯერჯერობით, მხოლოდ ერთი კომპანია გაურიგდა. ბათუმის მერიის ინფორმაციით, „საკონტეინერო ტერმინალმა“ დაიქირავა ტრანსპორტი თანაშრომლების გადაყვანის მიზნით, ბათუმის მერიის მიერ დაფუძნებული შპს „ბათუმის ავტოტრანსპორტისგან“.

„ავტოტრანსპორტს“ რა ფასად გაურიგდა „საკონტეინერო ტერმინალი“, ამის შესახებ მერიიდან ინფორმაცია არ მოგვაწოდეს.

შპს „ბათუმის ავტოტრანსპორტის“ ინფორმაციით, თანამშრომლების გადაადგილების მომსახურებისთვის ტრანსპორტის დაქირავების მიზნით, მერიის ორგანიზაციასთან მოლაპარაკებას კიდევ რამდენიმე კომპანია აწარმოებს: „ჯერ არ შევთანხმებულვართ, ამიტომ ჩამონათვალს ვერ მოგცემთ“, – გვითხრეს ბათუმის ავტოტრანსპორტში.

ინფორმაციის გადასამოწმებლად ჩვენ სააფთიაქო ქსელებსა და სასურსათო მაღაზიებსაც მივმართეთ. კომპანია „ავერსში“ გვითხრეს, რომ თანამშრომლებს გამოჰკითხეს და მათგან უმეტესობას გადაადგილებასთან დაკავშირებული პრობლემა არ აქვს: „ზოგი ახლოს ცხოვრობს, ზოგიერთი კი საკუთარი მანქანით გადაადგილდება. ვისაც აქვს პრობლემა, ჩვენ ვემსახურებით“.

კომპანია უზრუნველყოფს PSP -ს აფთიაქების ქსელის თანამშრომლების გადაყვანასაც: „მათ სპეციალური ტრასპორტი ემსახურებათ“, კომპანიაში გვითხრეს, რომ ეს პრობლემა დღის წესრიგში მაშინ დადგა, როცა ბათუმში ე.წ. სამარშრუტო ტაქსების მოძრაობა აიკრძალა, შესაბამისად კომპანია ამ დროიდან ზრუნავს თანამშრომლების ტრასპორტით მომსახურებაზე.

„ბათუმელებმა“ ამ პრობლემის შესახებ ჰკითხა სხვა სააფთიაქო ქსელებსაც. კომპანიების ნაწილმა დაპირებული პასუხი ამ საკითხზე არ მოგვაწოდა.

სუპერმარკეტების ქსელ „ნიკორაში“ გვითხრეს, რომ საგანგებო მდგომარეობის დაწყებისთანავე თანამშრომლებისთვის ავტობუსი დაიქირავეს. „ამ დრომდე თანამშრომლებს ეს ავტობუსი ემსახურებოდა, ჩვენთან საკმაოდ ბევრ თანამშრომელს აქვს პრობლემა გადაადგილებასთან დაკავშირებით. ახლა გვითხრეს, რომ ამხელა ტრანსპორტის გაადგილება არ იქნება შესაძლებელი. მოვილაპარაკეთ და გამოვყეთ ლიმიტი თანამშრომლებისთვის ტაქსებით გადასაადგილებლად“, – გვითხრა „ნიკორას“ წარმომადგენელმა.

იგივე პრობლემა დაუდგათ დღის წესრიგში იმ პირებს, რომლებიც სოფლებში ცხოვრობენ, მაგრამ ქალაქში მუშაობენ.

„დამიკავშირდა მოქალაქე, რომელიც მუშაობს ჰიპერმარკეტ „გორგიას“ დაცვაში. მართალია, მაღაზია დაკეტილია, მაგრამ დაცვას არ გაუჩერებია მუშაობა. მე შევთავაზე, რომ დაუკავშირდეს ვინმეს, ვისაც მსგავსი პრობლემა აქვს და ერთად მოაგვარონ… სხვა არაფერი შემიძლია“, – გვითხრა ხელვაჩაურის მერმა, ჯუმბერ ვარდმანიძემ.

ქედის მერი ლევან გორგილაძე კი საკუთარი მანქანით ემსახურება ქედის ერთ-ერთი სოფლის ექიმსა და მის ასისტენტს: „დილით რომ მივდივარ, მიმყავს, ადრე ოთხი ადამიანი მიმყავდა, მაგრამ ახლა არ შეიძლება“.

მერი ამბობს, რომ მსგავსი პრობლემით მას არავინ დაკავშირებია. „აუცილებლობის შემთხვევაში, მოქალაქეებს ჩვენ მოვემსახურებით, მე თუ არ მეცლება, მოადგილეს გავაგზავნი“, – გვითხრა ლევან გორგილაძემ. ქედის მერის აზრით, ეს პრობლემა დამსაქმებლებმა უნდა მოაგვარონ.

ჯერჯერობით, საზოგადოებრივი ტრანსპორტის გამოყენების/დაქირავების თხოვნით, გარდა ბათუმისა, აჭარის მუნიციპალიტეტებისთვის არავის მიუმართია.

საქართველოში  გამოცხადებული კარანტინი 31 მარტიდან შევიდა ძალაში, შეზღუდვა  შეეხო საზოგადოებრივ ტრანსპორტსაც, გადაადგილება შესაძლებელია მხოლოდ ტაქსით ან კერძო ავტომობილით. ამასთან, აკრძალულია გარეთ გასვლა 21:00 საათის შემდეგ.