მოსახლეობის ნაწილს 3 თვის კომუნალურ გადასახადებს დავუფარავთ – გახარია

პრემიერ-მინისტრის განცხადებით, საქართველოს ყველა მოქალაქეს, რომელიც თვეში მოიხმარს 200 კილოვატზე ნაკლებ ელექტროენერგიას და 200 კუბზე ნაკლებ ბუნებრივ გაზს, სამი თვის განმავლობაში – მარტში, აპრილსა და მაისში სრულად დაუფინანსდება კომუნალური გადასახადები.

„აქ შედის, რა თქმა უნდა, დასუფთავებისა და წყლის გადასახადიც. დღევანდელი მდგომარეობით, დღეს ჩვენ ბიუჯეტში მოვახდინეთ 2 მილიარდი ლარის მობილიზება და ეს არის მხოლოდ დასაწყისი. ჩვენ გვესმის, რომ გარკვეული დროის შემდეგ შესაძლოა აღმოვჩნდეთ ისეთი გამოწვევების წინაშე, რომ ეს დახმარება იყოს გასაზრდელი.

გარდა ამისა, საქართველოს შემთხვევაში, უკიდურესად მნიშვნელოვანია რაციონალურად გამოვიყენოთ თითოეული ის ლარი, რომლის მობილიზებაც ბიუჯეტში მოხერხდა,“ – განაცხადა გიორგი გახარიამ.

მისი თქმით, აღნიშნულ 2 მილიარდ ლარში არ შედის კორონავირუსთან ბრძოლისთვის გამოყოფილი თანხები. ამისთვის ბიუჯეტში ცალკე – 351 მილიონი ლარია მობილიზებული.