Batumelebi | აჭარის მაუწყებლის საეთერო ბადე გაღარიბდა – ალტერნატიული პროფკავშირი განცხადებას ავრცელებს აჭარის მაუწყებლის საეთერო ბადე გაღარიბდა – ალტერნატიული პროფკავშირი განცხადებას ავრცელებს – Batumelebi
RU | GE  

აჭარის მაუწყებლის საეთერო ბადე გაღარიბდა – ალტერნატიული პროფკავშირი განცხადებას ავრცელებს

„აჭარის საზოგადოებრივი მაუწყებლის საეთერო ბადე უკიდურესად გაღარიბდა“ – განცხადებას ამის შესახებ საზოგადოებრივი მაუწყებლის აჭარის ტელევიზიისა და რადიოს ალტერნატიული პროფკავშირი აქვეყნებს.

ალტერნატიული პროფკავშირის განცხადებით, ამჟამად აჭარის ტელევიზია და რადიო ვერ პასუხობს საზოგადოების საჭიროებებს ინფორმაციული უზრუნველყოფის კუთხით:

„დაინტერესებული აუდიტორიისთვის შესაბამისი მოცულობით არ არის წარმოდგენილი არსებული ვითარების სოციალურ-ანალიტიკური პერსპექტივები, ხოლო საეთერო ბადეში არ აისახება მოქალაქეთა წინაშე წარმოქმნილი როგორც ყოველდღიური, ისე – სამომავლო პრობლემები სიღარიბის, უთანასწორობისა და დასაქმების კუთხით; ასევე, არ ჩანან სხვადასხვა უმცირესობის წარმომადგენლები ან ჯგუფები, რომლებსაც დამატებითი რისკ-ფაქტორების გათვალისწინებით, განსაკუთრებით უმძიმთ კრიზის გადატანა.

ისეთ ფორსმაჟორულ ვითარებაში, როგორშიც ქვეყანა ახლა იმყოფება, აჭარის საზოგადოებრივი მაუწყებლის ამგვარად ორგანიზებული საეთერო ბადე, აღვივებს მაუწყებლის ზოგადი იდეის მიმართ სკეპტიციზმსა და გულგრილობას. ზუსტად ახლა არსებობს იმის ისტორიული შანსი, რომ საზოგადოებრივმა მაუწყებელმა რეალურად აჩვენოს საკუთარი შესაძლებლობები, მთელი თავისი ძალისხმევა და სახალხო ფინანსები მიმართოს ხალხისვე საკეთილდღეოდ, ხოლო სკეპტიკურად განწყობილი ჯგუფები არათუ განამტკიცოს საკუთარ დამოკიდებულებებში, არამედ – დაარწმუნოს საწინააღმდეგოში,“ – აღნიშნულია განცხადებაში.

ალტერნატიული პროფკავშირი, რომელშიც მაუწყებლის 90-მდე თანამშრომელია გაერთიანებული, აჭარის ტელევიზიისა და რადიოს მენეჯმენტს მიმართავს საეთერო ბადეში მოდიფიცირებული ფორმატით აღადგინონ  ის შეჩერებული გადაცემები, რომლებსაც შეუძლიათ ადეკვატურად უპასუხონ საზოგადოებრივ საჭიროებებს და მისცენ დასაქმებულებს საკუთარი პროფესიული საქმიანობის განხორციელების შესაძლებლობა [უსაფრთხოების წესების მკაცრი დაცვის ფონზე].

„ამ ეტაპისთვის, მაუწყებლის ჟურნალისტების დიდ ნაწილს, მკაცრად აქვს შეზღუდული მაუწყებლის რესურსებთან [შენობა, ტექნიკური ბაზა და სხვა] წვდომა და შესაბამისად, ფიზიკურად ვერ ახორციელებს დაკისრებულ ვალდებულებას. ისე, როგორც არასდროს – საზოგადოებრივი მაუწყებელი უნდა ემსახურებოდეს ხალხს და ზრუნავდეს ერთი მხრივ – მოქალაქეთა ინფორმირებაზე, ხოლო მეორე მხრივ – მოსალოდნელი პრობლემების იდენტიფიცირებასა და გამოსავლის გზების ძიებაზე. კიდევ ერთხელ გვინდა მკაფიოდ დავაფიქსიროთ, რომ იმ შემთხვევაში, თუ შეჩერებული გადაცემები დაუბრუნდება სატელევიზიო ეთერს საგანგებო ვითარების ფონზე, ისინი არ იქნება გამოყენებული საგაფიცვო მიზნებისთვის,“ – აღნიშნულია განცხადებაში.

განცხადების თანახმად, აჭარის მაუწყებლის საეთერო ბადე, ხელმძღვანელი პირების გადაწყვეტილების საფუძველზე, რადიკალურად შეიცვალა 23 მარტიდან და გადაცემათა უმრავლესობა შეჩერდა განუსაზღვრელი ვადით.

„ამგვარი ქცევის ოფიციალურ მოტივად კორონავირუსის პანდემია და შესაბამისად – დასაქმებულთა უსაფრთხოების დაცვა დასახელდა.  მიუხედავად იმისა, რომ სრულად ვაცნობიერებდით არსებული ვითარების სერიოზულობას, იმთავითვე გამოითქვა მზაობა დისტანციურ რეჟიმზე გადასვლის შესახებ. შეჩერებულ გადაცემათა დიდ ნაწილს [თუ ყველას არა] ხელეწიფებოდა ფორმატის მოდიფიცირება და მაყურებლისთვის – კრიტიკულად მნიშვნელოვანი ინფორმაციის მიწოდება. დისტანციური მუშაობის ყველაზე დიდი გამოცდილებით შემოქმედებით გადაცემებს შორის #ჰეშთეგი გამოირჩეოდა. ჰეშთეგის გუნდის სახელით შესაბამისი განცხადება/მიმართვა 23 მარტსვე გავრცელდა, სადაც კიდევ ერთხელ დაფიქსირდა მზადყოფნა სახეცვლილი ფორმით ეთერში დარჩენის თაობაზე. სამწუხაროდ, მოსალოდნელი შედეგი ჯერჯერობით არ დამდგარა,“ –  აღნიშნულია განცხადებაში.

განცხადებაში აჭარის ტელევიზიისა და რადიოს ალტერნატიული პროფკავშირი ხაზს უსვამს იმ მოვლენებს, რაც წინ უძღოდა გადაცემების შეჩერებას.

„2 მარტს აჭარის საზოგადოებრივი მაუწყებლის ალტერნატიული პროფესიული კავშირის სახელით მენეჯმენტს ჩაბარდა საგაფიცვო დოკუმენტი, რომლის უმთავრეს მოთხოვნებს სარედაქციო დამოუკიდებლობისთვის სასიცოცხლო მექანიზმების შემუშავება, დასაქმებულთა შრომითი უფლებების დაცვის უზრუნველყოფა და იმ მოცემულობის აღდგენა იყო, რომელიც საშტატო ნუსხაში ცვლილების დამტკიცებამდე მოქმედებდა [მაია მერკვილაძე უნდა დაბრუნებოდა მთავარი გამოშვების რედაქტორის/სამსახურის უფროსის მოადგილის, ხოლო შორენა ღლონტი – ახალი ამბების სამსახურის უფროსის პოზიციას].

გაფიცვის უფლება 23 მარტს წარმოიშვა [ზუსტად ამ დღიდან გააჩერეს გადაცემათა სრული უმეტესობა], თუმცა, მანამ, ქვეყანაში არსებული კრიზის ფონზე დასაქმებულებმა თავადვე თქვეს [დროებითი] უარი ამ უფლების გამოყენებაზე და დაელოდნენ მედიაციის პროცესს. მედიაციის პროცესი, თავის მხრივ, ნიშნავს ჯანდაცვის სამინისტროს მიერ მხარეთა შორის კონსენსუსის მისაღწევად მედიატორის დანიშვნას. მას შემდეგ, რაც მედიატორთან ინდივიდუალური დისტანციური კომუნიკაცია შედგა და დაიწყო ერთობლივი შეხვედრის სამზადისი, მაუწყებლის დირექტორმა ჯანდაცვის სამინისტროს მედიაციის პროცესის შეწყვეტის მოთხოვნით მიმართა და უარი განაცხადა მედიაციაში მონაწილეობაზე. მისი მხრიდან, უარის მოტივად საგაფიცვო მოთხოვნების არარელევანტურობა დასახელდა.

მიგვაჩნია, რომ დირექტორის მსგავსი გადაწყვეტილება პოლიტიკურ ხასიათს ატარებს და აცდენილია მაუწყებლის ინტერესების დაცვას. კერძოდ: დირექტორს საგაფიცვო დოკუმენტი 2 მარტს ჩაბარდა და მას საკმაო დრო ჰქონდა მის გასაცნობად, თუმცა, მან მხოლოდ მაშინ გადაწყვიტა მედიაციაზე უარის თქმა [და დოკუმენტის არარელევანტურად ცნობა], როდესაც ეთერიდან გადაცემების მოხსნის თარიღი მოახლოვდა და შესაბამისად, ნათელი გახდა, რომ დასაქმებულებს აღარ ექნებოდათ ხელთ გაფიცვის მთავარი ბერკეტი – სატელევიზიო ეთერი [ამ ეტაპისთვის, გაცხადებული იყო, რომ დასაქმებულები არ გაიფიცებოდნენ, მაგრამ დირექტორი გაფიცვის თეორიულ შესაძლებლობასაც კი, დაუპირისპირდა მოლაპარაკებების დაწყების ნაცვლად]. მედიაციაზე უარის თქმა პირდაპირი მინიშნებაა იმაზე, რომ დირექტორი არ ცნობს ადეკვატურად დასაქმებულთა საჭიროებებს, მისთვის არ არის მნიშვნელოვანი მაუწყებლის თანამშრომლების სათქმელი და ის ბოროტად იყენებს მინიჭებულ ძალაუფლებას/არსებულ ვითარებას ალტერნატიული პროფესიული კავშირის წინააღმდეგ,“ – აღნიშნულია განცხადებაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com