ბათუმში. ე.წ. „ოცნების ქალაქში“ 700-ზე მეტი ოჯახი ცხოვრობს, რომლებიც ელექტროენერგიის გადასახადს საერთო მრიცხველის მიხედვით იხდიან.
„ენერგო-პრო ჯორჯიას“ დასახლებაში 7 საერთო მრიცხველი აქვს დამონტაჟებული. ოჯახები კომპანიას დენის საფასურს ამ საერთო მრიცხველების მიხედვით უხდიან, პარალელურად თავიანთი მრიცხველებიც აქვთ. საერთო ჩვენებას [შესაბამისად გადასახადს] ისინი ამ ინდივიდუალური მრიცხველების მიხედვით ინაწილებენ.
შეეხება თუ არა ამ ოჯახებს სახელმწიფო სუბსიდია, მაშინ, როცა მთავრობა დენის გადასახადს გადაუხდის აბონენტს, რომელმაც თვეში 200 კილოვატი ან ამაზე ნაკლები [ანუ 36,4 ლარის ან ნაკლები თანხის] ელექტროენერგია მოიხმარა?
„ოცნების ქალაქში“ რეგისტრირებულ საერთო მრიცხველებზე ჩვენება 200 კილოვატზე გაცილებით მეტია, ოჯახების უმეტესობა კი, როგორც თავად ამბობენ, 24-30 ლარის დენს ხარჯავენ.
ამ საკითხზე „ენერგო-პრო ჯორჯიაში“ კონკრეტული პასუხი ვერ გაგვცეს.
„ეს ოჯახები ჩვენს აბონენტებად ფაქტობრივად არ ითვლებიან. თავის დროზე საერთო მრიცხველების დამონტაჟება და მათთვის ამ ფორმით დენის მიწოდება ადგილობრივი მთავრობის შუამდგომლობის საფუძველზე მოხდა და ჩვენი კომპანიის მხრიდან კეთილი ნების გამოხატულება იყო“, – გვითხრეს „ენერგო-პროში“.
„ბათუმელები“ აჭარის მთავრობას დაუკავშირდა.
„დასახლებაში მცხოვრები ყველა ოჯახი, ვინც აკმაყოფილებს შესაბამის კრიტერიუმს, ისარგებლებს სახელმწიფო სუბსიდიით“, – გვითხრეს აჭარის მთავრობის პრესსამსახურში.
ამ თემაზე:
მოსახლეობის ნაწილს 3 თვის კომუნალურ გადასახადებს დავუფარავთ – გახარია
