ბათუმში კორონავირუსით ინფიცირებული პირველი პაციენტი გამოჯანმრთელდა, – ინფორმაციას „მედალფას“ აჭარა-გურიის რეგიონული დირექტორი, ლევან ანთაძე ადასტურებს.
ახალგაზრდა ქალს გუშინ, პირველ აპრილს, შუალედური ტესტი ჩაუტარეს, რომლის პასუხი უარყოფითი იყო, დღეს განმეორებითმა ანალიზმაც უარყოფითი შედეგი აჩვენა. ეს იმას ნიშნავს, რომ პაციენტი გამოჯანმრთელდა. ის უახლოეს საათებში კლინიკას დატოვებს და რეკომენდაციის შესაბამისად, რამდენიმე დღე თვითიზოლაციაში იქნება.
დღეის მონაცემებით, საქართველოში კორონავირუსისგან კიდევ სამი პაციენტი გამოჯანმრთელდა. სულ გამოჯანმრთელებულთა ოდენობა კი, 2 აპრილის მდგომარეობით, 26-ია. ვირუსით ინფიცირებულთა რიცხვმა კი გასული დღე-ღამის განმავლობაში 13-ით მოიმატა.
პირველ აპრილს, დილით, ინფიცირებული იყო 117 პაციენტი, დღეს კი – 130-ია. გამომდინარე იქიდან, რომ 27 პირი უკვე გამოჯანმრთელდა, საქართველოს კლინიკებში 103 პირი რჩება, რომელთაც კორონავირუსი აქვთ.
ქვეყნის მასშტაბით კარანტინის რეჟიმში 5 550 ადამიანია, სტაციონარში მეთვალყურეობის ქვეშ კი 281 რჩება.
