„აპირებთ თუ არა სააღგომო ლიტურგიაზე დასწრებას?” – ჰკითხა დღეს „ბათუმელებმა“ აჭარის მთავრობის თავმჯდომარეს თორნიკე რიჟვაძეს და აჭარის უმაღლესი საბჭოს თავმჯდომარეს, დავით გაბაიძეს.
„ვინაიდან ქვეყანაში მოქმედებს შეზღუდვები, სამწუხაროდ, დიდი ალბათობით, წელს ჩვენ ვერ მოვახერხებთ წასვლას,“ – თქვა კითხვის პასუხად თორნიკე რიჟვაძემ.
„მეც ასევე,“ – თქვა დავით გაბაიძემ.
დღეს, 3 აპრილს, თორნიკე რიჟვაძემ და დავით გაბაიძემ „ქართული ოცნების“ აჭარის რეგიონულ ოფისში ბრიფინგი გამართეს. მათი განცხადებით, აჭარის მთავრობა და უმაღლესი საბჭო სამი თვის განმავლობაში ხელფასის 1/3 გადარიცხავს კორონავირუსთან ბრძოლის ფონდში.
21 მარტიდან საქართველოში კორონავირუსის პრევენციის ღონისძიებების ფარგლებში საგანგებო მდგომარეობაა გამოცხადებული. 30 მარტს წესები გამკაცრდა და კარანტინი გამოცხადდა. ასევე 31 მარტიდან ქვეყანაში ამოქმედდა კომენდანტის საათი.