ბათუმში, „იაფი სახლის“ ერთ-ერთ კორპუსში, რომელიც ჯავახიშვილის ქუჩის N78-ის მიმდებარედ მერიამ ააშენა, მოქალაქეები შეიჭრნენ. სამართალდამცავებმა ისინი ძალის გამოყენებით გამოიყვანეს. სახლის ეზოში ახლა ათობით მოქალაქე და სამართალდამცავები არიან მობილიზებულები.

ბათუმის მერიის მიერ აშენებული ხელმისაწვდომი „იაფი სახლის“ კორპუსებში, ბათუმის ბიუჯეტით დამტკიცებული ქვეპროგრამის მიხედვით, 2021 წელს ქალაქის მერიამ საცხოვრებელი ბინა 80 ოჯახს უნდა გადასცეს. მერიაში „ბათუმელებს“ უთხრეს, რომ ოჯახებს/ბენეფიციარებს ხელმისაწვდომი საცხოვრისის [იაფი სახლის] პროგრამის ფარგლებში შეარჩევენ. მერიაში ამ პროგრამის ფარგლებში ბინის მსურველთა 245 განაცხადია შესული.

ცნობილია ის ძირითადი კრიტერიუმები, რასაც უნდა აკმაყოფილებდეს ხელმისაწვდომი საცხოვრისის პროგრამის მონაწილე, თუმცა ამ კრიტერიუმებს ბინის ყველა მსურველი ვერ აკმაყოფილებს.

„იაფი სახლის“ პროექტის ფარგლებში აშენებულ კორპუსებში შეჭრილი მოქალაქეები მიიჩნევენ, რომ მერია მათ უსამართლოდ ექცევა და ისინიც იმსახურებენ მოხვდნენ სიაში, რის მიხედვითაც ბინის საფასური მცირე თანხით მომავალმა მესაკუთრემ 15 წლის განმავლობაში უნდა დაფაროს.

„150 ლარს ვიხდი ახლა ქირაში, კატა არ ჩერდება, ისეთი სახლია, რომ მოვკვდე, ჩემს შვილს პატრონი აღარ ეყოლება, სახლიც არ დარჩება. უნარშეზღუდულია, წერა-კითხვა არ იცის. ადრე დავდიოდი და სიგარეტს ვყიდდი. გადავიხდი მეც მაგ 200 ლარს თვეში, რომ ვიმათხოვრო, გადავიხდი, ოღონდ მომცენ ბინა”, – ამბობს გოგუცა ელიაშვილი, ერთ-ერთი მოქალაქე, რომელიც დღეს „იაფი სახლის კორპუსში“ სხვებთან ერთად შეიჭრა.

„ჩვენ არ ვართ რეციდივისტები, ტყუილად არაფერს ვითხოვთ. მე, ქმარი და შვილიშვილები ნაქირავებ ერთ ოთახში, ხუთნი ვცხოვრობთ ერთად. ხან ვაშლს ვყიდით, ხან რას. სოციალური დახმარება არ გვაქვს. ესაა ქვეყანა? გაღატაკებულები ვართ. როცა ხმები სჭირდებოდათ, მიიღეს. ზედა ლეღვაში ვცხოვრობდით, გადაყირავებულია სახლი, უკანონოდ არაფერს ვითხოვთ, გეოლოგის დასკვნაც გვაქვს, 2 კომლი ვცხოვრობდით იქ ერთ სახლში, 15 წელია ამ დღეში ვართ, დაგაკმაყოფილებთო, მაგრამ არაფერი”, – ამბობს „იაფ სახლში“ შეჭრილი კიდევ ერთი მოქალაქე, რომელიც ასევე სამართალდამცავებმა გამოიყვანეს სახლიდან ეზოში.

ამავე თემაზე:

საქართველოს ფინანსთა სამინისტროს საგამოძიებო სამსახურმა  დიდი ოდენობით ყალბი ფულის დამზადება-გასაღების ფაქტზე ოთხი პირი დააკავა.

საგამოძიებო სამსახურის ცნობით, გამოძიებით დადგინდა, რომ ბრალდებულებმა საქართველოს სხვადასხვა რეგიონში არსებულ სავაჭრო ობიექტებსა და სწრაფი გადახდის აპარატების მეშვეობით გაასაღეს ჯამში 11 300 ლარის ოდენობის 113 ცალი ყალბი 100-ლარიანი კუპიურა.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მე-3 და მე-4 ნაწილებით, რაც სასჯელის სახით ითვალისწინებს თავისუფლების აღკვეთას 10-დან 15 წლამდე ვადით.

ფეხბურთში საქართველოს ეროვნული ლიგის მესამე ტურში დინამო ბათუმმა თბილისის დინამო დაამარცხა ანგარიშით 1:0. გამარჯვების მომტანი გოლი დინამო ბათუმის ნახევარმცველმა, გიული მანჯგალაძემ გაიტანა. ამ გამარჯვებით დინამო ბათუმს 7 ქულა აქვს და დროებით პირველ ადგილზე გადადის.

გუნდებს შორის მატჩი დღეს, 9 მარტს, დინამო არენაზე გაიმართა.

აჭარის განათლების მინისტრმა, მაია ხაჯიშვილმა არ გამოიყენა თავისი უფლებამოსილება და ბათუმის ბულვარში 16-სართულიანი მშენებლობა არ შეაჩერა. სამაგიეროდ ადმინისტრაციულ საჩივარზე პასუხით დაადასტურა, რომ „ამბასადორის“ შესაძლო ფინანსური ზიანი უფრო ადარდებს, ვიდრე ბათუმის ბულვარის, როგორც კულტურული მემკვიდრეობის ძეგლის დაზიანება.

EMC- სა და „ბათომისთვის“ გაგზავნილ წერილებში, სადაც ის მშენებლობის შეჩერების შემთხვევაში კომპანიის შესაძლო ზიანზე წუხს, გამოჩნდა მინისტრის წინასწარი განწყობაც, რა შეიძლება იყოს სამინისტროს გადაწყვეტილება საჩივრის განხილვის შემდეგ.

მაია ხაჯიშვილი საერთოდ არ უშვებს, რომ შესაძლოა ნებართვა გაბათილდეს და თუ კომპანიას გაცილებით მეტი სამუშაო ექნება შესრულებული, უფრო დიდ  ფინანსურ ზარალს მიიღებს, ვიდრე შეჩერების შემთხვევაში.

მეტიც, მაია ხაჯიშვილი მიიჩნევს, რომ ბულვარში მშენებლობის შეჩერება რეგიონის სოციალურ ფონს დაამძიმებს.

ადმინისტრაციული საჩივრით „ბათომმა“ და EMC-მ მინისტრს 26 თებერვალს მიმართეს და ითხოვეს შეისწავლოს ბულვარში 16-სართულიანი კომპლექსის სამშენებლო ნებართვის კანონიერება. მანამდე კი მშენებლობის შეჩერება მოითხოვეს.

ამონარიდი აჭარის განათლების მინისტრის წერილიდან, რომელიც არასამთავრობოებს გაუგზავნა:

„სამინისტროში წარდგენილი დოკუმენტაციისა და მოქმედი კანონმდებლობის ანალიზის საფუძველზე ცალსახად დაადგინეს, რომ შპს ,,ამბასადორი ბათუმმა“, რომელსაც გააჩნდა კანონიერი ნდობა აღმჭურველი ხასიათის ადმინისტრაციულ-სამართლებრივი აქტების მიმართ, მათ საფუძველზე განახორციელა სამართლებრივი და ფინანსური ხასიათის მოქმედებები და აქტის მოქმედების შეჩერება მიაყენებდა მნიშვნელოვან მატერიალურ ზიანს.“

 მინისტრის განმარტებით, ზიანი გამოიხატება შემდეგში:

„სამუშაოების შეჩერების შემთხვევაში, შპს ,,ანაგი“ [მშენებელი კომპანია – ავტ] უფლებამოსილი იყო ცალმხრივად შეეწყვიტა შპს ,,ამბასადორი ბათუმთან“ დადებული ნარდობის ხელშეკრულება [ნარდობის ხელშეკრულებით კომპანია კისრულობს ვალდებულებას შეასრულოს ხელშეკრულებით გათვალისწინებული სამუშაო წინასწარ განსაზღვრული პირობების თანახმად, ხოლო შემკვეთი ვალდებულია გადაუხადოს შეთანხმებული საზღაური – ავტ.]. ხელშეკრულების შეწყვეტის შემთხვევაში, შპს ,,ამბასადორი ბათუმს“ ეკისრებოდა როგორც მიყენებული ზიანის საკომპენსაციო თანხა, ასევე ჯარიმა. ამასთანავე, შეწყდებოდა შრომითი ხელშეკრულებები დაქირავებულ პერსონალთან, რაც გამოიწვევდა პანდემიის პირობებში არსებული სოციალური ფონის დამძიმებას პროექტის ფარგლებში დასაქმებული პირებისა და მათი ოჯახებისთვის.“

მინისტრის თქმით, წარმოდგენილი მასალებით ერთმნიშვნელოვნად დადგინდა, რომ:

შპს ,,ამბასადორი ბათუმის“ მიერ, მიღებული ნებართვის საფუძველზე, განხორციელდა მასშტაბური ხასიათის ფინანსური ოპერაციები და შესრულდა მოცულობითი სამუშაოები, რის შედეგადაც უფლებააღმჭურველი აქტი გარკვეულ ნაწილში აღსრულდა, ხოლო დარჩენილი, მიმდინარე სამუშაოების შეჩერება გამოიწვევდა მნიშვნელოვან მატერიალურ ზიანს, რომლის ანაზღაურების უზრუნველყოფის მექანიზმი ადმინისტრაციულ ორგანოს არ გააჩნდა. საპირწონედ არსებობდა მხოლოდ საჩივრის განხილვამდე აქტის შეჩერების მოთხოვნა. როგორც წესი, აქტის შეჩერების მიზანია, აქტის ბათილად ცნობის შემთხვევაში არ გართულდეს მისი აღსრულება. აქედან გამომდინარე, წარმოადგენს ერთგვარ მექანიზმს ადმინისტრაციულ საჩივართან დაკავშირებით მიღებული გადაწყვეტილების აღსრულების უზრუნველყოფის თვალსაზრისით.

ზემოთ ჩამოთვლილი და კიდევ რამდენიმე არგუმენტით აჭარის განათლების, კულტურისა და სპორტის სამინისტრომ არ დააკმაყოფილა​ EMC-ისა და “საზოგადოება ბათომის” მოთხოვნა.

რას ამბობს კანონის მუხლი, რომლითაც მინისტრი თავის გადაწყვეტილებას ამართლებს

აჭარის განათლების მინისტრი, მაია ხაჯიშვილი ასევე განმარტავს, რომ მას არ შეეძლო მშენებლობის შეჩერება საქართველოს „ნებართვებისა და ლიცენზირების“ კანონის 35-ე მუხლის შესაბამისად და განმარტავს: „მაღალი საზოგადოებრივი ინტერესის გამო, სამინიტროს ბრძანებით დასაბუთდა, თუ რატომ არ იქნა მიღებული ,,ლიცენზიებისა და ნებართვების შესახებ“ საქართველოს კანონის 35-ე მუხლისაგან განსხვავებული გადაწყვეტილება და რატომ არ შეჩერდა გასაჩივრებული აქტის მოქმედება.“

კანონის იმ თავში, რომელზეც მინისტრი მიუთითებს, სიტყვა-სიტყვით წერია:

ადმინისტრაციული საჩივრის ან სარჩელის წარდგენის შემთხვევაში ნებართვის გაცემის, მის გაცემაზე უარის თქმის ან მისი გაუქმების შესახებ გადაწყვეტილება არ შეჩერდება, თუ ნებართვის გამცემი ან საჩივრის [სარჩელის] განმხილველი ადმინისტრაციული ორგანო ანდა სასამართლო არ მიიღებს სხვა გადაწყვეტილებას.

EMC- ის იურისტის, ვლადიმერ ქუთათელაძის განმარტებით, ეს მუხლი იმას გულისხმობს, რომ გასაჩივრება ავტომატურად არ აჩერებს პროცესს, თუმცა შესაბამისი გადაწყვეტილების მიღება სამინისტროს შეეძლო:

„როგორც წესი, ადმინისტრაციული აქტი, მისი გასაჩივრების მომენტიდან ჩერდება, მაგრამ არის გამონაკლისი, როცა გასაჩივრება ავტომატურად არ იწვევს გაჩერებას. იქვე არის მინაწერი, რომ მხარის მოთხოვნით ადმინისტრაციულ ორგანოს ან სასამართლოს შეუძლია შეაჩეროს ის. სამინიტროს ამის სრული რესურსი და ბერკეტი აქვს. თუმცა ეს არის მათი დისკრეციული უფლება, ანუ კანონი არჩევანის საშუალებას აძლევს, შეუძლია შეაჩეროს ან არ შეაჩეროს.“

EMC-ის შეფასებით ამ გადაწყვეტილებით სამინისტრომ არ გაითვალისწინა, რომ მშენებლობით შეუქცევადი ზიანი ადგება კულტურული მემკვიდრეობის ძეგლს, რომლის მნიშვნელობა და ღირებულება ქალაქისთვის შეუფასებელია. მეტიც, მისი დასაბუთება ემყარება მხოლოდ კომპანიის ინტერესისა და მისი ფინანსური ზარალის შესახებ მსჯელობას.

„ჭყონდიდის ეპარქიაში მომხდარი დაპირისპირება აქამდე არსებული კონფლიქტის გაგრძელებაა… მეუფე სტეფანე წარმოადგენს საპატრიარქოს, რომელიც უპირისპირდება მეუფე პეტრეს. არავინ იცის, წავა თუ არა მეუფე პეტრე ვა-ბანკზე და როდის,“ – მიიჩნევს თეოლოგი მირიან გამრეკელაშვილი. მას ჭყონდიდის ეპარქიაში სასულიერო პირებს შორის მომხდარ ფიზიკურ დაპირისპირებაზე ვესაუბრეთ.

• ბატონო მირიან, ბოლო პერიოდში სასულიერო პირებს შორის არაერთი ღია კონფლიქტი ვნახეთ. თქვენი ინფორმაციით, რა ხდება ამჯერად – ეს იყო არსებული კონფლიქტების გაგრძელება, თუ რამე ახალი მიზეზია? 

ეს დაპირისპირება აქამდე არსებული კონფლიქტების გაგრძელებაა, ფორმები შეიცვალა, მაგრამ მიზეზი ახალი არ არის. აქამდე ფიზიკური შეხლა-შემოხლა ამ კონფლიქტებს თან არ ახლდა და გუშინდელ ინციდენტში ეს იყო სიახლე – საჯარო ცემა-ტყეპა სამღვდელოებაში.

ამ ეპარქიაში სიტუაცია დაიძაბა მას შემდეგ, როცა მეუფე პეტრე გადაიყვანეს ეპარქიიდან [მეუფე პეტრე ცაავა 2019 წლის ოქტომბერში გაათავისუფლეს სინოდის წევრობიდან, როცა მან ჰომოფობიური ენით განაცხადა, რომ სხდომაზე პატრიარქი ილია II „პედერასტიასა და მამათმავლობაში ამხილა“.] ის გადაიყვანეს ეპარქიიდან, რომელიც წლების განმავლობაში მის მიერ იყო ფორმირებული.

მეუფე პეტრეს ნაცვლად დანიშნეს მეუფე გრიგოლ კაცია, რომელიც იყო რუსეთუმე, თუმცა მას ეყო ჭკუა და მოხერხება, არ დაეწყო ძირეული ცვლილებები. როგორც ჩანს, მეუფე გრიგოლი ხედავდა, რომ კონფლიქტი მაინც მწიფდებოდა და უკან, წალკაში დაბრუნდა.

მის ნაცვლად დანიშნეს მეუფე სტეფანე. ის დაცინვისა და შარჟის ობიექტი არაერთხელ გახდა სამართლიანად.

• ვინ არის მეუფე სტეფანე? 

მეუფე სტეფანე [კალაიჯიშვილი] არის წარმოშობით ახალციხის მიდამოებიდან და გამოირჩევა ფუნდამენტალისტური შეხედულებებით. ის საკმაოდ მოუმზადებელია თავის პროფესიაში და ცნობილია იზოლაციონისტური პოზიციებით. მას ასეთი გამართლებაც კი მოჰყავს, რომ კოსმოსში, შეზღუდულ სივრცეშია სიცოცხლე, რომელშიც კოსმონავტები იმყოფებიან, იზოლაცია არის სასიცოცხლოდ მნიშვნელოვანიო.

ის არის ხშირად დაცინვის ობიექტი, რადგან არაადეკვატური პოზიციებით გამოირჩევა, მაგალითად, სიზმარი, რომელიც მან უქადაგა მრევლს და რომლის მიხედვითაც მან ჟანგიანი მახვილით განგმირა ნიანგები. ეს მან მიიჩნია ნიშნად, რომ ქართველი ერი დაამარცხებს კორონას.

ამ დონის პიროვნებაზეა საუბარი და ეს ართულებს მის სერიოზულად, ავტორიტეტად აღქმას.

• რა მიზნით დანიშნეს მეუფე სტეფანე ჭყონდიდის ეპარქიაში? 

ეს არ იყო საპატრიარქოს მხრიდან გამიზნული ნაბიჯი, ან სტრატეგია, მაგრამ რადგან კაცია იქ არ გაჩერდა და უკან წავიდა, ვიღაც უნდა გამოეგზავნათ. ამ შემთხვევაში ისარგებლეს ტერიტორიული პრინციპით, ვინც უფრო ახლოს იყო. ცაგერი და ლენტეხი მიბმულია, როგორც ცნობილია, სამეგრელოს რეგიონს და სთხოვეს, რომ წასულიყო.

• გუშინდელ სხდომაზე მეუფე სტეფანემ ორ დიაკონს – კონსტანტინე გაბისონიას და პეტრე ღუდუშაურს მღვდელმსახურება შეუჩერა, ანანია კალანდიას კი, ბოლო გაფრთხილება მისცა. რამდენად დასაბუთებული იყო ეს გადაწყვეტილება და რა მიზანს ემსახურებოდა მღვდელმსახურების დასჯა? 

ეს გადაწყვეტილება ამ ეპარქიის მხრიდან საერთოდ არ იყო დასაბუთებული… მეუფე სტეფანე ჩასულიც კი არ იყო ეპარქიაში, რომ გადაწყვიტა რაღაც ცვლილებების განხორციელება და მოითხოვა სხვა ტაძრებში მსახური დიაკვნები გადასუყლიყვნენ საკათედრო ტაძარში, ანუ მისი პირადი დიაკვნები გამხდარიყვნენ. ამით დაიწყო ეს დაპირისპირება. მანამდე ეს დიაკვნები გამოირჩეოდნენ მეუფე პეტრეს მიმართ ლოიალური დამოკიდებულებით. ერთ-ერთი მათგანი ტიროდა კიდეც, როცა მეუფე პეტრე გაუშვეს და ამბობდა, პატრიაქი კი მიყვარს, მაგრამ ჯოჯოხეთში ვერ წავყვებიო.

ჩემი ინფორმაციით, მეუფე სტეფანე წარმოადგენს საპატრიარქოს და გუშინდელი დაპირისპირება არის საპატრიარქოს და მეუფე პეტრეს შორის დაპირისპირების გაგრძელება. პირადი შეუთავსებლობა რომ ჰქონდეს მეუფე სტეფანეს, ასეთი არ მსმენია. აღმოჩნდა, რომ ეპარქიის სამღვდელოება არის ლოიალური მეუფე პეტრეს მიმართ. ისინი დარწმუნებულნი არიან მის სიმართლეში, დარწმუნებულნი არიან ასევე, რომ ის დაისაჯა უსამართლოდ. ეპარქიის სამღვდელოება ამ მდგომარეობას არ ეგუება, ისინი მეუფე პეტრეს დასჯას არ იღებენ, როგორც მისაღებ გადაწყვეტილებას.

• რის მიღწევა სურს ამჯერად მეუფე პეტრეს? 

გუშინდელი დაპირისპირებიდანაც მკაფიოდ ჩანს, რომ ჭყონდიდის ეპარქიის სამღვდელოებას გააჩნია შინაგანი პროტესტი და პროტესტი ექნებოდათ, ვინც არ უნდა დაენიშნათ იქ. ის, რომ საქმე მიჩუმათდა, არ ნიშნავს იმას, რომ ადამიანები ამას შეეგუენ. პროტესტი არ არის ამოწურული ეკლესიის შიგნით.

თემა, რომელზეც პეტრე საუბრობდა, ძალიან უხერხულია და მე პირადად ვემიჯნები ადამიანების დევნას და შევიწროებას სექსუალური ნიშნით, მაგრამ აღმოჩნდა, რომ მეუფე პეტრემ მაღალი იერარქიის წარმომადგენლების სექსუალური ცხოვრების ამსახველი ვიდეოკადრები, თუ ასეთი საერთოდ არსებობს, საკმაოდ ბლომად დაუტოვა საკუთარ სამღვდელოებას, როგორც კონტრიარაღი, საჭიროების შემთხვევაში რომ გამოიყენონ.

• თქვენი ინფორმაციით, ამ თემაზე იყო საუბარი ეპარქიის გუშინდელ სხდომაზე? 

სავარაუდოდ გუშინ მეუფე სტეფანემ სცადა, რომ ჩაეტარებინა კრება, მან ყველა დაიბარა კრებაზე. ამ დროს უკვე არსებობდა ძალიან დიდი დაძაბულობა. კრებაზე დაისვა საკითხი, რამდენად სამართლიანად დასაჯეს მეუფე პეტრე. სამღვდელოებამ თავის არგუმენტად მოიყვანა ვიდეოკადრები და როგორც მეუფე ლუღლუღებდა, აჩვენეს კიდეც მას ეს კადრები. აქ გამოავლინეს მორალისტური რეაქცია და სცემეს იმ სამღვდელოებას, ვინც მეუფეს კადრები აჩვენა. ვისაც სცემეს, ეს ჯგუფი გამოვარდა გარეთ და შემდეგ ყველამ ვნახეთ, რაც მოხდა – მოაჯირი გადატყდა და ხალხი გადმოცვივდა.

• რა შეიძლება მოხდეს ახლა? 

ახლა რეალურად ძალიან რთული და სულელური სიტუაციაა: მოგეხსებათ, რომ პირადი ცხოვრების ამსახველი კადრების გავრცელება არის დასჯადი ქმედება, მეუფე პეტრე რომ წავიდეს ვა-ბანკზე და თქვას: მე თუ ვტყუი, მაშინ ეს ხალხმა განსაჯოს და ეს კადრები გაასაჯაროვოს, მაშინ მის წინააღმდეგ სისხლისსამართლებრივი დევნა უნდა დაიწყოს. მეუფე პეტრემ ძალიან კარგად იცის, როგორ პროკურატურასთან და სასამართლოსთან ექნება შემდეგ საქმე.

ერთადერთი რამ, რაც შეიძლება მომხდარიყო, იყო სინოდალური მოსმენა, რადგან ამ ვიდეოების ნახვას ამ შემთხვევაში ექნებოდა შიდა მოსმენის სახე და პროკურატურა თუ ვინმეს დაიჭერდა, მაშინ მთელი სინოდი უნდა დაეკავებინა. რა განვითარება შესაძლოა მოჰყვეს ამ დაპირისპირებას, რთული სათქმელია.

რაღაც მომენტში ვფიქრობ, რომ მეუფე პეტრე იძულებული გახდება წავიდეს გადამწყვეტ და პრინციპულ საკითხზე, რადგან დღეს რა მოცემულობაც გვაქვს, გამოდის, რომ ის არის ცრუ ბრალმდებელი და ჭორებსაყოლილი ადამიანი. ადამიანმა თავისი ლოგიკიდან გამომდინარე დასდო ბრალი პატრიარქს, რასაც კიდევ ერთხელ ვემიჯნები, მაგრამ ამის დამამტკიცებელი არგუმენტი საზოგადოებას დღემდე არ უხილავს, ამიტომ ის ეცდება სიტუაცია როგორმე სათავისოდ შეცვალოს.

• ამ ვითარებაში რა როლი აქვს „დეკანოზ მამალაძის საქმეს“? 

ეს საქმე, ცხადია, არის მიბმული ამ თემატიკაზე, სწორედ მამალაძის დაკავების შემდეგ გააქტიურდა ეს თემა, მაგრამ მამალაძის დაკავება არის მაგალითი მეუფე პეტრესთვის, როგორ შეიძლება მოექცნენ – შესაძლოა, ციხიდან ხმის გაღების საშუალებაც აღარ ჰქონდეს. მართალია, მამალაძე რაღაც წერილებს ციხიდან იწერება, მაგრამ ეს წერილები პირდაპირ არაფერს ამბობს, მამალაძე ვერ მიდის გადამწყვეტ ნაბიჯზე, არ ვიცით, რის გამო, ოჯახის უსაფრთხოება, თუ რა არის.

ეს სიტუაცია ჰგავს დაახლოებით ამბავს, როცა ამერიკაში ან იტალიაში მაფიას უპირისპირდებოდნენ ადამიანები და როცა ისინი მოწმეებად გამოდიოდნენ სასამართლოში, ამის სანაცვლოდ მათი ოჯახის წევრებს ხოცავდნენ.

• ეკლესიას რა რესურსი აქვს, რომ არსებული პროტესტი ამოწუროს? 

თუ სიტუაციას უკან გადაიყვანენ და მეუფე სტეფანეს ჩასვლამდელ სტატუს-კვოს აღადგენენ, მაშინ შესაძლოა წვრილფეხა სამღვდელოებამ აღარ ითავოს ეს კონფლიქტები, მაგრამ კომენტარებიდან ჩანს, რომ ეს ვიდეოკადრები არსებობს. ეს არის გამოძიების დაწყების საფუძველი. გამოდის, რომ ვიღაცამ უკანონოდ მოიპოვა სხვისი პირადი ცხოვრების ამსახველი კადრები.

თუ გამოძიება დაიწყება, მაშინ სიტუაცია ბევრად დაიძაბება და ამ შემთხვევაში მეუფე პეტრესაც არაფერი დარჩება, გარდა ვა-ბანკისა – ეს ადამიანები, რომლებიც თავად აღაღტკინა, რაღაცნაირად უნდა დაიცვას, თუ ღირსება გააჩნია.

• გუშინდელი დაპირისპირების შემდეგ საპატრიარქომ აქცენტი გააკეთა კერძო საკუთრებაში შეჭრაზე. პრესსსპიკერმა ანდრია ჯაღმაიძემ განაცხადა, რომ „ეს იყო მცდელობა ეპარქიის რეზიდენციაში მიმდინარე კრების დროს გარედან შეჭრის…“ 

ანდრია ჯაღმაიძე იმდენად შეუსაბამო პოზიციაზე იმყოფება, რომ მას შინაგანი ან სხვაგვარი მზაობა არ გააჩნია, თუნდაც პროსაპატრიარქო პოზიციები გამოხატოს. რეზიდენცია როგორ შეიძლება პირადი საკუთრება იყოს, როცა სიტყვები „რეზიდენცია“ და „კათედრა“ ნიშნავს საჯარო შეკრების ადგილს, ეს არის სათემო კუთვნილება.

საპატრიარქოს ვერ წარმოუდგენია ჟურნალისტების ასეთი ჩართულობა, ეს აღიზიანებთ მათ ყველაზე მეტად. მათი სურვილია, რომ მედია არ ჩაერთოს და საშუალება მიეცეთ ერთმანეთს გაუსწორდნენ, თუნდაც ცემა-ტყეპით ერთმანეთში მოგვარდნენ, ჟარგონით რომ ვთქვათ. ამის  საშუალება რომ არ ეძლევათ, ამის გამოა საპატრიარქო გაბრაზებული. სინამდვილეში, ეკლესიის ფეხქვეშ გათელვა იყო ის, რაც კრების შიგნით ხდებოდა.

• რა სტრატეგიაზე გადავა საპატრიარქო და მასთან დაპირისპირებული მეუფე პეტრე? 

საპატრიარქოს სტრატეგია არის ეს: „ძაღლი ყეფს, ქარავანი მიდის“… საპატრიარქო სამღვდელოების პროტესტს დღემდე აიგნორებს. მე გამოვრიცხავ, რამე შეიცვალოს. მათი მიზანია, როგორმე ეს თემა არ გახდეს საჯარო პატრიარქის გარდაცვალებამდე.

თუ პატრიარქი გარდაიცვალა და დაიწყო მისი სამარკო ნიშნით გადამუშავება, როგორც წმინდანის, შემდეგ უკვე კადრების და სხვა მასალების გამოყენებით შეუძლებელი იქნება რაიმეს დამტკიცება, ან სიტუაციის შეცვლა. მხარე, რომელიც გარდაცვლილ პატრიარქზე რაიმეს თქმას გაბედავს, ვერაფერს მოიგებს. ამ სქემით საპატრიარქოში შიში არ აქვთ, რომ მეუფე პეტრე ვა-ბანკზე წავა, თუმცა რატომ არ აქვთ ეს შიში, არ ვიცი: დააშინეს, არ დააშინეს, ან როგორ აქვთ ეს ამბავი გადაწყვეტილი. ფაქტია, რომ ამ დრომდე მეუფე პეტრეც ბევრ საკითხზე საჯაროდ მსჯელობისას ბოლომდე ჩვენს ინფორმირებას არ ახდენს.

___

ჭყონდიდელი მიტროპოლიტი სტეფანე [კალაიჯიშვილი] პირადი ცხოვრების ამსახველი ვიდეო კადრების შესახებ, რომელსაც საეკლესიო პირები ბოლო პერიოდში მუდმივად განიხილავენ

„ენერგო-პრო ჯორჯიას“ ინფორმაციით, ხვალ, 10 მარტს, ელექტროენერგია შეეზღუდება აბონენტების გარკვეულ ნაწილს ხუთ მუნიციპალიტეტში.

ხელვაჩაურში შუქი გაეთიშება შემდეგ სოფლებს: კირნათს, მარადიდს, მირვეთს, ქედქედსა და მიმდებარე სოფლებს 13:00-დან 18:00 საათამდე.

ქობულეთში სოფლებს: ხალას, ჩაისუბანს, ბობოყვათს, კვირიკესა და მიმდებარე სოფლებს.

ასევე, – დ.აღმაშენებელის, რუსთაველის, კოსტავას, ნინოშვილის, ქიაჩელის, პოპოვისა და მიმდებარე ქუჩებს.  ფიჭვნარის, ჩოლოქისა და დაბა ჩაქვის დასახლებების ნაწილს 11:00-დან 17:00 საათამდე მონაკვეთში.

ქედაში  სოფლებს: დოლოგანს,ზუნდაგას, მახუნცეთსა  და მიმდებარე სოფლებს 11:40-დან 18:30 საათამდე მონაკვეთში.

შუახევში სოფლებს: გომარდულს, ბარათაულს, ჭვანას, ჟანივრს, მახალაკიძეებს, კარაპეტსა და მიმდებარე სოფლებს. ასევე, დაბა შუახევის ნაწილს – 13:30-დან 18:30 საათამდე.

ხულოში სოფლებს: თაგოს, განახლებას, ჩაოს, დიოკნისს, ბოძაურსა და მიმდებარე სოფლებს – 10:30-დან 20:00 საათამდე მონაკვეთში.

საქართველოში სქესობრივი ჯანმრთელობისა და რეპროდუქციული ჯანმრთელობის საკითხები სკოლაში არ ისწავლება. დასავლეთის ქვეყნებში, სადაც სქესობრივი განათლების საკითხებზე ინფორმაციას ბავშვებსა და მოზარდებს სკოლა აწვდის, ასწავლიან იმასაც, თუ როგორ შეიძლება ამოიცნო სექსუალური ძალადობის ნიშნები, სექსუალური შევიწროება და ა.შ.

როგორ ფიქრობთ, უნდა იღებდეს თუ არა მოსწავლე ინფორმაციას სკოლაში სქესობრივი განათლებისა და რეპროდუქციული ჯანმრთელობის შესახებ?

მიიღეთ მონაწილეობა „ბათუმელების“ გამოკითხვაში. მონაწილეობა ანონიმურია.

საჭიროა თუ სკოლაში სქესობრივი განათლება?

სად უნდა მიიღოს ინფორმაცია ბავშვმა სექსუალური ძალადობის ამოცნობის შესახებ?

როგორ მოიქცევით, თუ გაიგებთ ბავშვზე სექსუალური ძალადობის შესახებ?

ამავე თემაზე:

დასაქმების ხელშეწყობის სახელმწიფო სააგენტოს  ინფორმაციით, დაიწყო გერმანიიდან ვაკანსიების გამოგზავნის და კონკრეტულ ვაკანსიებზე კანდიდატების შერჩევის პროცესი.

ამ დროისთვის დასაქმების სააგენტოში დაახლოებით 300 ვაკანსიაა გერმანიიდან შესული, მათგან 50 ვაკანსიაზე კანდიდატები აპრილის დასაწყისში უნდა გაემგზავრონ, დანარჩენი ვაკანსიები კი მაისში, მეტწილად კი ივნისში დასაქმებას გულისხმობს.

სააგენტოს ინფორმაციით, თითოეული ვაკანსია 3-თვიან სამუშაო პერიოდს მოიცავს: მოსავლის აღებას, შემდეგ დასაწყობებას, დახარისხებას, შეფუთვას.

სააგენტოს ინფორმაციით, ამ დროისთვის სპეციალურ ვებგვერდზე 95 632 პირია რეგისტრირებული. კანდიდატთა უმრავლესობა დედაქალაქიდანაა, მეორე პოზიციას კი აჭარის რეგიონი იკავებს. სააგენტო აქცენტს პირველ ეტაპზე რეგიონებზე გააკეთებს, ვინაიდან რეგიონებში მცხოვრებლებს სოფლის მეურნეობის სექტორში და ასევე საზღვარგარეთ სეზონურ სამუშაოზე მუშაობის მეტი გამოცდილება აქვთ.

„რეგისტრირებულთა რაოდენობა მნიშვნელოვნად აჭარბებს ვაკანსიებისას, ამიტომ, ჩვენ შემდეგი პრინციპი ავიღეთ – შემოსული ვაკანსიები თანაბრად უნდა გადავანაწილოთ რეგიონებზე. სქემა აბსოლუტურად გამჭვირვალეა, გერმანულ მხარესთანაა შეთანხმებული – უშუალოდ გერმანული მხარეა პროცესში ჩართული,“ – განმარტავს ნინო ველთაური, დასაქმების ხელშეწყობის სააგენტოს ხელმძღვანელი.

ნინო ველთაური ამბობს, რომ ვინაიდან აჭარის მცხოვრებლებს, როგორც სოფლის მეურნეობის სექტორში, ისე საზღვარგარეთ, კერძოდ, თურქეთში სეზონურად მუშაობის გამოცდილება აქვთ, რაც ერთ-ერთი წინაპირობაა, პირველ ეტაპზე მოქალაქეები აჭარის მუნიციპალიტეტებიდან შეარჩიეს:

„თითოეულ მუნიციპალიტეტში რეგისტრირებული მოქალაქეები დავყავით ასაკობრივ ჯგუფებად, დავაბალანსეთ სქესის მიხედვით, რათა თანაბარი რაოდენობა ყოფილიყო წარმოდგენილი. ასევე გავითვალისწინეთ გამოცდილება, გერმანული ან ინგლისური ენის საბაზისო ცოდნა და შემდეგ უკვე შემთხვევითობის პრინციპით ამოვარჩიეთ დაახლოებით 450 კანდიდატი, რომლებსაც დავუგზავნეთ შეტყობინებები და აჭარის მუნიციპალიტეტებში ინდივიდუალურ გასაუბრებაზე სააპლიკაციო ფორმების შესავსებად დავიბარეთ. ამ პროცესში აქტიურად დაგვეხმარა აჭარის დასაქმების სააგენტო.

ინდივიდუალური კომუნიკაციისას გავაცანით კონკრეტული ვაკანსია, მისი პირობები, ანაზღაურება, ხარჯები და თანხმობის შემდეგ შევავსეთ აპლიკაციები“.

სააგენტოს ხელმძღვანელის განმარტებით, ივსება ორი დოკუმენტი – განაცხადის ფორმა კონკრეტულ ვაკანსიაზე და სოციალური დაზღვევის ფორმა. ორივე ფორმა გერმანული მხარის მიერ არის მოწოდებული და მათი შევსება სავალდებულოა, სოციალური დაზღვევის ფორმის საფუძველზე ახდენენ იდენტიფიცირებას, დასაქმებულს სოციალური დაზღვევის გადასახადი ეხება თუ არა.

ნინო ველთაურის ინფორმაციით, 25 ვაკანსიაზე 80 აპლიკანტი შეარჩიეს, შევსებული დოკუმენტები გერმანულ მხარეს გადაუგზავნეს და ამ დროისთვის სააგენტო მოლოდინის რეჟიმშია:

„დამსაქმებლებმა სახელობითად უნდა წარმოგვიდგინონ შერჩეული ადამიანების სია, თუ ვისთან გააფორმებენ შრომით ხელშეკრულებას“.

სააგენტოს ინფორმაციით, აჭარის შემდეგ, 9-10 მარტს გურიის სამივე მუნიციპალიტეტში ჩატარდება ჯგუფური კონსულტაციები:

„შეტყობინებები გაგზავნილია 450 აპლიკანტთან, რომლებიც იმავე პრინციპით შეირჩნენ. შემდეგ გვინდა გადავინაცვლოთ ზემო იმერეთის მუნიციპალიტეტებში და ეტაპობრივად ყველა რეგიონი მოვიცვათ“.

ვაკანსიებს გერმანიიდან დასაქმების ხელშეწყობის ეროვნულ სააგენტოში კვლავ ელიან.

გერმანიაში სეზონურ სამუშაოებზე დასაქმების მსურველთა პორტალზე დარეგისტრირებული მოქალაქეებიდან პირველ ეტაპზე გერმანიაში მხოლოდ 500 დასაქმდება.

გარდა ამისა, გერმანული მხარის მიერ გამოქვეყნებულ ცნობაში წერია, რომ გერმანიაში სოფლის მეურნეობის სფეროში 2021 წლის პირველი იანვრიდან მინიმალური ხელფასი განისაზღვრა – 9.50 ევროდ [სრული ჯამი; გადასახადების ჩათვლით], ხოლო ამავე წლის ივლისიდან იგი 9.60 ევრო გახდება.

ამავე თემაზე: 

დევნილები და ეკომიგრანტები, რომლებიც მეწარმეობით არიან დაკავებული, საქმიანობის გაფართოებისთვის საჭირო ძირითადი საშუალებების შესაძენად 7500 ლარის ფარგლებში დაფინანსდებიან. ინფორმაციას ამის შესახებ დევნილთა, ეკომიგრანტთა და საარსებო წყაროებით უზრუნველყოფის სააგენტო ავრცელებს.

სააგენტოს ცნობით, ჯამში, გრანტს 25 მეწარმე მიიღებს, რომლებიც მინიმუმ ერთი დევნილის ან ეკომიგრანტის დასაქმების ვალდებულებას აიღებენ.

პროგრამაში მონაწილეობა შეუძლიათ იმ იძულებით გადაადგილებულ პირებს, რომლებიც სამეწარმეო საქმიანობას აჭარის, შიდა ქართლის, მცხეთა-მთიანეთისა და სვანეთის რეგიონებში ეწევიან.

სააგენტოს ინფორმაციით: პროგრამაში მონაწილეობა შეუძლია დევნილს და ეკომიგრანტს, რომელსაც ბიზნესი რეგისტრირებული აქვს 2021 წლის 1-ელ იანვრამდე და ბიზნესი არის მოქმედი.

პროგრამაში მონაწილეობის მსურველთა განაცხადების მიღება დღეს, 9 მარტს, დაიწყო და 31 მარტის ჩათვლით გაგრძელდება.

ბიზნესგეგმა, თანდართულ დოკუმენტაციასთან ერთად, სააგენტოში, მის ტერიტორიულ სამმართველოებსა და შესაბამის მუნიციპალიტეტებში მიიღება [მაგალითად, აჭარაში:  ბათუმი, ლ. ასათიანის ქ.N25; ქობულეთი, დ. აღმაშენებლის გამზ. N141; ხულო, ტბელ აბუსერიძის ქ.N1;.], ბიზნესგეგმის გაგზავნა შესაძლებელია სააგენტოს ელექტრონულ ფოსტაზეც.

დოკუმენტაციის სრული ჩამონათვალისა და ბიზნესგეგმის აპლიკაციის სანახავად, გადადით ამ ბმულზე.

საქართველოს პრემიერ-მინისტრი ირაკლი ღარიბაშვილი ამერიკის შეერთებული შტატების ელჩს საქართველოში კელი დეგნანს შეხვდა. მთავრობის პრესსამსახურის ინფორმაციით, მთავრობის ადმინისტრაციაში გამართულ შეხვედრაზე საქართველო-აშშ-ის ორმხრივი თანამშრომლობის დღის წესრიგში არსებული საკითხები განიხილეს, საუბარი შეეხო ქვეყანაში განვითარებულ პოლიტიკურ პროცესებსაც, „სადაც აღინიშნა, რომ მნიშვნელოვანია, მსოფლიოსა და რეგიონში  არსებული გამოწვევების ფონზე,   მხარეებმა მიმართონ ძალისხმევა საქართველოში მიმდინარე პოლიტიკური პროცესების კონსტრუქციულ, დიალოგის რეჟიმში წარმართვისკენ“.

„გვსურს, პოლიტიკური კრიზისი სწრაფად განიმუხტოს, რათა საქართველო დაუბრუნდეს მის წინაშე მდგარ სხვა მნიშვნელოვან გამოწვევებს, მათ შორის ეკონომიკური მდგომარეობის აღდგენას.

შეერთებული შტატები გააგრძელებს საქართველოს მხარდაჭერას, რათა ქვეყანამ შეძლოს ეკონომიკის ამოქმედება, ახალი კორონავირუსის პანდემიაზე რეაგირება და, რა თქმა უნდა, უსაფრთხოების ძლიერ ნიშნულზე შენარჩუნება,“ – განაცხადა კელი დეგნანმა პრემიერ-მინისტრთან შეხვედრის შემდეგ.

შეხვედრისას ასევე ყურადღება დაეთმო რეგიონში უსაფრთხოების კუთხით არსებულ ვითარებას და საქართველოს ოკუპირებულ ტერიტორიებზე შექმნილ მძიმე მდგომარეობას –  „ძალიან პროდუქტიული შეხვედრა გვქონდა საქართველოს პრემიერ-მინისტრთან. შეერთებულ შტატებსა და საქართველოს ყოველისმომცველი დღის წესრიგი გააჩნიათ და ჩვენთვის მნიშვნელოვანია, ამ ინიციატივებზე მუშაობა გაგრძელდეს ახალი პრემიერ-მინისტრის ხელმძღვანელობით.

კიდევ ერთხელ დავადასტურეთ საქართველოს სუვერენიტეტისა და ტერიტორიული მთლიანობის მიმართ ძლიერი მხარდაჭერა“, – თქვა კელი დეგნანმა.

მთავარი ფოტო: შეხვედრა საქართველოს მთავრობის ადმინისტრაციაში / ფოტო: მთავრობის პრესსამსახური

ნამახვანიჰესთან დაკავშირებით მინისტრებს – ნათია თურნავასა და ლევან დავითაშვილს დარგობრივი ეკონომიკისა და ეკონომიკური პოლიტიკისა და გარემოს დაცვისა და ბუნებრივი რესურსების კომიტეტების სხდომაზე უსმენენ დეპუტატები და საკითხით დაინტერესებული პირები.

ამ შეხვედრაზე ერთ-ერთმა დეპუტატმა, ბეჟან წაქაძემ მინისტრებს იმაზე უსაყვედურა, რომ ისინი დეპუტატის სატელეფონო ზარებს არ პასუხობენ.

ბეჟან წაქაძე: „მე შეხვედრა მქონდა ჩემს ამომრჩეველთან, რომლებიც ტყიბულის აი იმ გესის მიდამოებში ცხოვრობენ და იქ განწყობა არის ასეთი: ყველა კითხვა, რომელიც დასმულია და ყველა კითხვა ისმის საზოგადოებიდან, ამ კითხვაზე კონკრეტულად უნდა იქნას პროფესიონალური პასუხი გაცემული. მე მგონია, რომ აქ ძალიან მნიშვნელოვანია ჩართულობა და ცოტა ადრე უნდა დაგვეწყო ყოველივე ეს.

მე მივმართავ ორივე მინისტრს, რაც ნაკლები გექნებათ პატივცემულო მინისტრებო თქვენს ტელეფონებზე, წითელი, პასუხგაუცემელი ტელეფონები, რაც ნაკლები გექნებათ, მით ნაკლები იქნება ასეთი შეხვედრები, არ დაგვჭირდება იმიტომ, რომ ეს ძალიან ადრე უნდა დაგვეწყო.

სხვათა შორის, მინდა ვისარგებლო შემთხვევით და როდესაც დეპუტატი ურეკავს მინისტრს ერთჯერ, ორჯერ, სამჯერ და მესიჯს წერს, ის არ რეკავს მარტო როგორც ბეჟან წაქაძე და როგორც ერთი დეპუტატი. რეკავს 150 ათასი ამომრჩეველი, რომელსაც აინტერესებს… ბეჟან წაქაძე არასდროს თქვენთან არ დარეკავს თავიანთი პირადი საქმით, ამიტომ კეთილი ვინებოთ და გავცეთ პასუხი, როცა მოიცლი მაშინ. მე არ ვამბობ იმ წუთში აიღოთ ტელეფონი.

ამის შედეგია ყოველივე ეს და მოგიწოდებთ მინისტრებო, რომ კიდევ ერთხელ, სისტემატიურად იმუშავეთ მოსახლეობასთან და ნაკლები პრობლემები გვექნება ისეთი, როგორიც დღეს გვაქვს.

ბეჟან წაქაძის აზრით, „ჩვენ თუ გვინდა ქვეყნის ეკონომიკური განვითარება, აუცილებელია ყოველწლიურად მინიმუმ 100 მეგავატი ელექტროგესების მშენებლობა, რომ ტემპი ავუწყოთ იმ ეკონომიკურ ზრდას, რომელიც ქვეყანაში მიმდინარეობს და იმედია, რომ გაცილებით უფრო განვითარდება. ფინანსური კუთხით ეს პროექტი არის კრიტიკულად მნიშვნელოვანი და აუცილებელი ქვეყნისათვის“.

ტყიბული, თერჯოლა, ზესტაფონის მაჟორიტარი, ბეჟან წაქაძე ასევე გამოეხმაურა იმ თურქოფობიურ განცხადებებსაც, რასაც ნამახვანიჰესის მშენებლობის მოწინააღმდეგე ზოგიერთი ჯგუფი ავრცელებს. მაჟორიტარი ამბობს, რომ სწორედ ამიტომ ყველა კითხვას უნდა გაეცეს პასუხი. „ყველა კითხვებზე უნდა იქნას გაცემული პასუხი საზოგადოების მხრიდან, მაგრამ მე არამგონია, რამე ქსენოფობიური რამე იყვეს. შეიძლება იმიტომ, რომ რამოდენიმე გაბრაზებულმა ადამიანმა რაღაც თქვა, მაგრამ არამგონია რომ ეს იყვეს…“

აჭარის განათლების მინისტრი მაია ხაჯიშვილი ბათუმის ბულვარში „ამბასადორი ბათუმის“ 16-სართულიან მშენებლობას არ აჩერებს. მინისტრმა ამ გადაწყვეტილების შესახებ არასამთავრობო ორგანიზაციებს უკვე ოფიციალურად აცნობა.

ორგანიზაცია „ბათომი“, მოძრაობა „დაიცავი ბათუმის ბულვარი“ და სხვა ორგანიზაციები, ასევე მოქალაქეები, რომლებიც ბათუმის ბულვარში 16-სართულიან მშენებლობას ეწინააღმდეგებიან, აჭარის განათლების, კულტურისა და სპორტის მინისტრს, მაია ხაჯიშვილის სთხოვდნენ მშენებლობის შეჩერებას.

შესაბამისი ადმინისტრაციული საჩივრით „ბათომმა“ და EMC-იმ მინისტრს 26 თებერვალს მიმართეს.

აქტივისტების მოთხოვნაა მინისტრმა შეისწავლოს მისი ქვემდგომი სტრუქტურის, აჭარის კულტურული მემკვიდრეობის სააგენტოს გადაწყვეტილება, ხოლო ვიდრე შეისწავლის, შეაჩეროს მშენებლობა. იგივეა ადმინისტრაციული საჩივრის მოთხოვნაც.

აჭარის განათლების სამინისტროს ინფორმაციით, განათლების მინისტრმა, მაია ხაჯიშვილმა „ბათომის“ მიმართვასთან დაკავშირებით 2 მარტს გამოსცა ბრძანება ადმინისტრაციული წარმოების დაწყების თაობაზე, საბოლოო გადაწყვეტილების მიღების ვადად კი ერთი თვე განსაზღვრა.

სამინისტროს ინფორმაციით, მინისტრის ბრძანებით ადმინისტრაციულ წარმოებაში დაინტერესებულ პირებად ჩაერთნენ  სსიპ აჭარის კულტურული მემკვიდრეობის დაცვის სააგენტო და შპს „ამბასადორი ბათუმი“. დაინტერესებულ პირებს მოსაზრების წარმოსადგენად  5 დღის ვადა განესაზღვრათ.

ადმინისტრაციულ საჩივართან დაკავშირებით საბოლოო გადაწყვეტილების მისაღებად მინისტრი ზეპირ მოსმენას გამართავს ერთი თვის ვადაში.

საქართველოს პროკურატურის განცხადებით, საჯაროდ გავრცელებული ფარული ჩანაწერების საფუძველზე გამოძიება დაიწყო კერძო საუბრის უნებართვო ჩაწერის ან/და მიყურადების, ასევე კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის უკანონოდ გამოყენებისა და გავრცელების ფაქტებზე, საქართველოს სისხლის სამართლის კოდექსის 158-ე მუხლის 1-ლი და მე-2 ნაწილებით გათვალისწინებული დანაშაულის ნიშნებით.

„საქმეზე მიმდინარე გამოძიების ფარგლებში ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვებისა და გავრცელების კანონიერების დასადგენად. გავრცელებული ჩანაწერების ავთენტურობის დადგენის მიზნით დაინიშნება შესაბამისი ექსპერტიზები.

გამოძიების შედეგების შესახებ ეცნობება საზოგადოებას“ – აცხადებს პროკურატურა.
___________________

„ტვ პირველმა“ გაავრცელა აუდიოჩანაწერები, რომლებშიც, ტელეარხის ინფორმაციით, ამჟამინდელი პრემიერ-მინისტრი ირაკლი ღარიბაშვილი, ბიძინა ივანიშვილის ვაჟი ბერა ივანიშვილი და სახელმწიფო დაცვის სპეციალური სამსახურის უფროსი ანზორ ჩუბინიძე ერთმანეთთან ათანხმებენ, როგორ უნდა დაისაჯონ სოციალურ ქსელებში ბერა ივანიშვილის მისამართით დაწერილი უარყოფითი კომენტარების ავტორები.

მასალები გავიდა გადაცემაში „ნოდარ მელაძის შაბათი“. მელაძე ამბობს, რომ გადაცემის გუნდმა არ იცის ჩანაწერების შექმნის თარიღი და არც ის, თუ რა ვითარებაში ჩაწერეს ისინი, ვინაიდან წყაროს, რომელმაც მასალები ტელეარხს მიაწოდა, ეს დეტალები არ დაუკონკრეტებია. ტელეარხის ჟურნალისტების თქმით, ჯამში, მათ ხელში აღმოჩნდა 4 აუდიოფაილი, რომლებითაც „სსკ-ის რამდენიმე მუხლის დარღვევა დგინდება“.

აღნიშნული ჩანაწერების ავთენტიკურობა დადგენილი არ არის და ეთერში გასვლის შემდეგ მის შესახებ ჯერ არ უსაუბრიათ ბერა ივანიშვილსა და ირაკლი ღარიბაშვილს, რომლებიც, სავარაუდოდ, საუბრის უშუალო მონაწილეები არიან. საუბრის კიდევ ერთი სავარაუდო მონაწილე ანზორ ჩუბინიძე კი ამბობს, რომ ჩანაწერების გავრცელების მიზანი მმართველი გუნდის გამიზნული დისკრედიტაციაა.

„ეს იყო გამიზნული პროვოკაცია დაფუძნებული რაღაც ჩანაწერებზე, თუმცა ჩემთვის გასაოცარი იყო სიღრმე უტიფრობისა და აბსურდულობისა. აბსურდული მცდელობა, დაარწმუნონ ქართველი საზოგადოება, რომ ანზორ ჩუბინიძე კარდაკარ, ქუჩა-ქუჩა ბავშვებს დასდევს და უსწორდება – ამას იუმორის გარეშე ვერ მივიღებ. საზოგადოებამ შეაფასოს ეს ბრალდება. საფუძველი არის გამიზნული დისკრედიტაცია მმართველი გუნდის და ძალოვანი სტრუქტურების ხელმძღვანელების“, – განაცხადა ანზორ ჩუბინიძემ გადაცემა „იმედის კვირაში“

„ქართული ოცნების“ განცხადებით, ჩანაწერები „კუდის“ მიერაა მოპოვებული 2010-2011 წლებში. მმართველ პარტიაში ჩანაწერების გავრცელებას მოლაპარაკებების ჩაშლის მიზნით ხსნიან.

საქართველოს ფინანსთა მინისტრმა სისტემურ-ელექტრონული ფორმით ლატარიის, აზარტული ან/და მომგებიანი თამაშობის მოწყობის ნებართვის მფლობელის მიერ მოთამაშის რეგისტრაციის, იდენტიფიკაციისა და ვერიფიკაციის ახალი წესი დაამტკიცა, რომელიც 2021 წლის პირველი მარტიდან შევიდა ძალაში.

ელექტრონული ფორმით ლატარიის ან/და აზარტული/მომგებიანი თამაშობების მომწყობი [ოპერატორი] ვალდებულია მოთამაშის რეგისტრაციისას მოახდინოს მისი იდენტიფიკაცია და ვერიფიკაცია.

პირის იდენტიფიკაცია ნიშნავს ისეთი საიდენტიფიკაციო მონაცემების მოპოვებას, რომლებიც ამ პირის მოკვლევისა და სხვა პირისგან გამორჩევის საშუალებას იძლევა; ხოლო ვერიფიკაცია − ისეთი ინფორმაციის (დოკუმენტის) მოპოვებას, რომელიც პირის საიდენტიფიკაციო მონაცემების სიზუსტის გადამოწმების საშუალებას იძლევა.

ოპერატორის მიერ მოთამაშის პირისპირ (არაელექტრონულად) იდენტიფიკაციასა და ვერიფიკაციაზე ვრცელდება საქართველოს ფინანსური მონიტორინგის სამსახურის უფროსის ბრძანებით დამტკიცებული „ანგარიშვალდებული პირის მიერ კლიენტის იდენტიფიკაციისა და ვერიფიკაციის წესი“.

მოთამაშის რეგისტრაციის, იდენტიფიკაციისა და ვერიფიკაციის წესი სრულად ნახეთ ამ ბმულზე

ახალი წესის მიხედვით, ოპერატორი ვალდებულია:

• არ დაუშვას მოთამაშე სათამაშოდ და არ მიიღოს თანხა ან/და ფსონები ამ წესის შესაბამისად იდენტიფიკაციისა და ვერიფიკაციის გარეშე;
• გამოიყენოს მოთამაშეთა შესახებ ინფორმაციის აღრიცხვის პროგრამული (ელექტრონული) უზრუნველყოფა;
• სრულფასოვანი შემოწმების მიზნით, მის მიერ დადგენილი უსაფრთხოების ზომების დაცვით, უზრუნველყოს სანებართვო პირობების შემოწმებაზე უფლებამოსილი პირის წვდომა მოთამაშეთა შესახებ ინფორმაციის აღრიცხვის შიდა სისტემაზე;
• არ დაუშვას ერთი და იგივე პირისათვის ორი ან მეტი სათამაშო ანგარიშის გახსნა;
• შეინახოს იდენტიფიკაციისა და ვერიფიკაციის მიზნით მოპოვებული დოკუმენტები კანონმდებლობით დადგენილი წესითა და ვადით და დასაბუთებული მოთხოვნის საფუძველზე წარუდგინოს უფლებამოსილ ორგანოებს;
• განახორციელოს მოთამაშის ვერიფიკაცია მისი რეგისტრაციისას და რისკზე დაფუძნებული მიდგომით;
• მოთამაშის ვერიფიცირების დამადასტურებელი დოკუმენტები/ინფორმაცია შეინახოს იმგვარად, ინფორმაციის შესაბამის მატარებელზე, რომ საჭიროების შემთხვევაში უზრუნველყოს მოთამაშის რეგისტრაციის თარიღისთვის მისი ვერიფიცირების დასაბუთება;
• ვებგვერდზე ამ წესის შესაბამისად ვერიფიცირებული მოთამაშისათვის ხელმისაწვდომი გახადოს მინიჭებული უნიკალური კოდი.

მოთამაშის ვერიფიკაცია შესაძლებელია შემდეგი წესებით:

[checklist]

• ვებგვერდზე მოთამაშის ვერიფიკაციის მიზნით საჭიროა წარმოდგენილ იქნეს მოთამაშის ფოტოსურათი, გადაღებული ამ მოთამაშის დოკუმენტთან ერთად, სადაც გარკვევით იკითხება დოკუმენტის საიდენტიფიკაციო მონაცემები, ჩანს ფოტოსურათი და მოთამაშის სახე;
• ვიდეოზარის მეშვეობით მიღებული გამოსახულება პირის იდენტიფიკაციის შესაძლებლობას უნდა იძლეოდეს;
• მოთამაშესთან უშუალო კონტაქტის გზით, რა დროსაც ოპერატორი პირისპირ მოახდენს მის ვერიფიკაციას;
• მოთამაშის აქტიურ ტელეფონის ნომერზე მოკლევადიანი ერთჯერადი კოდის მოკლე ტექსტური შეტყობინების სახით გაგზავნის გზით. ლატარიის ორგანიზატორის შემთხვევაში, ასევე ელექტრონულ ფოსტაზე გაგზავნილი მოკლევადიანი ერთჯერადი კოდის მოკლე ტექსტური შეტყობინების სახით გაგზავნის გზით;
• ტექნოლოგიური გადაწყვეტით, რომელიც იყენებს ბიომეტრიულ მონაცემებს გადაღებულ ფოტოსურათსა და საიდენტიფიკაციო დოკუმენტის ფოტოსურათზე ან/და სახელმწიფო სერვისების განვითარების სააგენტოს მონაცემთა ელექტრონული ბაზიდან მიღებულ ფოტოსურათზე გამოსახული პირის იდენტურობის დასადგენად.

[/checklist]

2021 წლის 1-ელ მარტამდე რეგისტრირებული მოთამაშეების იდენტიფიკაცია/ვერიფიკაციისთვის მოქმედებს შემდეგი წესი:

• თუ 2021 წლის 1-ელ მარტამდე რეგისტრირებულ მოთამაშეს ვერიფიკაცია გავლილი აქვს ზემოთ ჩამოთვლილი რომელიმე წესის შესაბამისად, ასეთი მოთამაშე 2022 წლის 1-ელ იანვრამდე ითვლება კანონის შესაბამისად იდენტიფიცირებულად და ვერიფიცირებულად;
• თუ 2021 წლის 1-ელ მარტამდე რეგისტრირებულ მოთამაშეს ვერიფიკაცია გავლილი არ აქვს აღნიშნული რომელიმე წესის შესაბამისად, მაშინ 2021 წლის 1-ელ აპრილამდე ასეთი მოთამაშის აქტიურ ტელეფონის ნომერზე მოკლევადიანი ერთჯერადი კოდის მოკლე ტექსტური შეტყობინების გაგზავნის გზით ვერიფიცირების შემთხვევაში, ეს მოთამაშე 2022 წლის 1-ელ იანვრამდე ჩაითვლება კანონის შესაბამისად იდენტიფიცირებულად და ვერიფიცირებულად;

2022 წლის 1-ლი იანვრის შემდეგ კი, მოთამაშე მხოლოდ იმ შემთხვევაში [იმ მომენტიდან] ჩაითვლება კანონის შესაბამისად იდენტიფიცირებულად და ვერიფიცირებულად, როდესაც ის დააკმაყოფილებს ყველა ქვემოთ ჩამოთვლილ მოთხოვნას [ამ მოთხოვნების დაკმაყოფილების დროის მიუხედავად]:

• გავლილი აქვს ვერიფიკაცია ზემოთ ჩამოთვლილი რომელიმე წესის შესაბამისად;
• გააქტიურებული აქვს ტელეფონის ნომერი მოკლე ტექსტური შეტყობინების სახით გაგზავნილი მოკლევადიანი ერთჯერადი კოდით;
• საქართველოს მოქალაქის შემთხვევაში, პირის საიდენტიფიკაციო მონაცემები გადამოწმებულია სსიპ – სახელმწიფო სერვისების განვითარების სააგენტოს მონაცემთა ელექტრონულ ბაზაში.

ფინანსთა მინისტრმა ლატარიის, აზარტული ან/და მომგებიანი თამაშობის სისტემურ-ელექტრონული ფორმით მოწყობის შემთხვევაში თანხის ანგარიშზე შეტანის და ანგარიშიდან გატანის ახალი წესიც დაამტკიცა, რომელიც ძალაში ასევე 2021 წლის პირველი მარტიდან შევიდა.

ეს წესი შეგიძლიათ ნახოთ ამ ბმულზე

ამ წესის მიხედვით, სათამაშო ანგარიშზე თანხის შეტანა და გატანა შესაძლებელია მხოლოდ „რეგისტრაციის, იდენტიფიკაციისა და ვერიფიკაციის წესის“ შესაბამისად ვერიფიცირებული მოთამაშეებისთვის;

ოპერატორი ვალდებულია ვერიფიკაციის დასრულებამდე არ მიიღოს ან/და არ გასცეს თანხა მოთამაშის ანგარიშიდან; არ დაუშვას მოთამაშეებს შორის სათამაშო ანგარიშებზე თანხის გადარიცხვა, ლიცენზირებული ფინანსური ინსტიტუტის გვერდის ავლით.

ამასთან, ოპერატორმა უნდა უზრუნველყოს „მოთამაშეების მიერ სათამაშო ანგარიშზე თანხის შეტანისა და გატანის ოპერაციების მის სისტემაში სრულად აღრიცხვა, სისტემატიზება და შენახვა იმგვარად, რომ საჭიროების შემთხვევაში შესაძლებელი იყოს მათ შესახებ ინფორმაციის გონივრულ ვადაში მოძიება და ამოღება“.

—

საქართველოში 2020 წლის მარტის თვიდან არც ერთი სლოტკლუბი და კაზინო არ მუშაობს. პანდემიის გამო მათი მუშაობა მთავრობამ 2020 წლის მარტში შეაჩერა, თუმცა შეზღუდვა არ შეხებია ონლაინკაზინოებსა თუ სხვა ელექტრონულ აზარტულ/მომგებიან თამაშობებს.

აჭარაში 2021 წლის პირველი მარტიდან, ხოლო სხვა რეგიონებში პირველი აპრილიდან სათამაშო ბიზნესს შეუძლია მუშაობა განაახლოს. თუმცა ბათუმში კაზინოები, დიდი ალბათობით, მუშაობას იქამდე არ განაახლებენ, ვიდრე თურქეთთან სახმელეთო საზღვარი [სარფი] არ გაიხსნება.

ამ თემაზე: