„გმირი თუ ანტიგმირი, ისტორია განსჯის ამას მხოლოდ, მაგრამ მჯერა ღვთის წყალობის, რომ ეს იქნება უახლესი ისტორია და არ დაგვიანდება შეფასება. წყალგამყოფი გმირობასა და ანტიგმირობას შორის აუცილებლად გამოჩნდება,“ – ასე დაიწყო თავისი პირველი საჯარო ინტერვიუ მეუფე პეტრე ცაავამ, რომელიც დღეს კათოლიკოს პატრიარქმა მღვდელმთავრობიდან გადააყენა. პეტრე ცაავასთან ინტერვიუ „მთავარმა არხმა“ ჩაწერა.
ინტერვიუს დაწყებამდე, მეუფე პეტრემ განაცხადა, რომ 31 ოქტომბერს, სინოდის სხდომაზე მას სურდა 1105 წელს მიღებული რუის-ურბნისის საეკლესიო კრების ძეგლისწერიდან მე-18 კანონი წაეკითხა. საქართველოს პატრიარქმა კი მას ამის უფლება არ მისცა.
მეთვრამეტე კანონი, რომლის წაკითხვაც პეტრე ცაავას დღეს გამართულ სინოდის სხდომაზე სურდა, მოიცავს ე.წ. სოდომური ცოდვის აღწერას (მართლმადიდებლური ეკლესია სოდომურ ცოდვად აღიქვამს ორი მამაკაცის რომანტიკულ და სქესობრივ კავშირს).
პეტრემ მე-18 კანონი „მთავარი არხის“ პირდაპირ ეთერში წაიკითხა. პეტრე ცაავას თქმით, მას შემდეგ, რაც ამ კანონის წაკითხვის უფლება სინოდის სხდომაზე არ მისცეს, კათალიკოს პატრიარქმა გამოაცხადა თავისი გადაწყვეტილება პეტრე ცაავას მღვდელმთავრობიდან გადაყენების შესახებ.
ჟურნალისტის კითხვაზე, თუ რა უნდოდა ამით ეთქვა და რატომ ჩათვალეს, რომ ამით [მე-18 კანონის წაკითხვით] შეურაცხყოფას აყენებდა სინოდს და თავად პატრიარქს, პეტრე ცაავამ უპასუხა:
„ამით ვამბობდი იმას, რომ… ეს მათი არჩევანია. თუ მათ საკუთარ თავზე მიიღეს, შეურაცხყოფას ვაყენებდი ე.ი. ეს თვითლუსტრაცია ხომ? ეგრე გამოდის მარტივია ლოგიკა. თუ მე მეთვლებოდა ეს ბრალდებად, ნებისმიერის მიმართ, იქ მსხდომის, თავმჯდომარის [საქართველოს პატრიარქის] ჩათვლით, რჯულის კანონის თანახმად, ორი ან სამი მოწმე, რომელიც არ არის მხილებული ცრუ ბრალდებაში, საკმარისია, რომ დამტკიცებულად ჩაითვალოს ბრალდება.
მე ვითხოვე, რომ მომეცით კურთხევა, ხვალ 12 საათზე გავაგრძელოთ სინოდის სხდომა, მე მოვიყვან მოწმეებს, რომელიც ჩემს ბრალდებას დაადასტურებენ და ამაზე ისაუბრებენ. მე მოვითხოვე პატრიარქისგან, რომ ის ყოფილიყო გარანტი რჯულის კანონის აღსრულებისა. კანონიკური სამართლის აღსრულების გარანტი იყო მეფე. დღეს მეფე არ გვყავს, ან უნდა იყოს ხელისუფლება ან კათოლიკოს პატრიარქი,“ – თქვა პეტრე ცაავამ.
რატომ იყო აუცილებელი დღეს სინოდის სხდომაზე ეს თემა გეხსენებინათ?
“მე მისაყვედურეს, რომ მე შეურაცხყოფას ვაყენებდი კათალიკოს პატრიარქს და ამის გამო უნდა მომეხადა ბოდიში.
საშუალება არ მომეცა მამალაძის საკითხი გამერკვია. დღეს მიიღეს გადაწყვეტილება თუ მიაღებინეს, რომ ეშუამდგომლათ მამა გიორგის გასათავისუფლებლად. მე ვუთხარი, რომ სჯობს გვიან ვიდრე არასდროს, აქვს ამას გამართლება. მაგრამ სამი წლის წინ ამას ვამბობდით და როდესაც მე მაბრალებთ, რომ რაც მიმდინარეობს ეკლესიის ეს დისკრედიტაციის მთელი სამწლიანი ბრძოლა და როგორც დაზარალდა ეკლესია, ამას როცა მე მაბრალებთ, ე.ი. საკუთარი თავი უნდა დაიდანაშაულოთ. სამი წლის წინ ვითხოვდი, გიორგი მამალაძე გაგვესამართლებინა რჯულის კანონით.
პირადად პატრიარქმა გამოაცხადა ჩემი გადაყენების შესახებ გადაწყვეტილება. წინასწარ ნაფიქრი იყო მღვდელმთავარი. სამი წლის წინ როდესაც პირველად უნდოდათ ჩემი ჭყონდიდის ეპარქიიდან გადმოყვანა, როგორც ჩემთვის ცნობილია ქალბატონი მდივან რეფერენტი [შორენა თეთრუაშვილი] თავად სთავაზობდა ჭყონდიდელობას”.
მეუფე პეტრე ამბობს, რომ მას პატრიარქისთვის შეურაცხყოფა არ მიუყენებია.
„ღირსების ხარჯზე, მართლმადიდებლობის ხარჯზე… პატრიარქს ვუთხარი, თქვენ ხართ მამა, რაღაც უპირობო კერპს ქმნიან თქვენგან, მაგრამ მე ვამბობ, რომ ჯერ მიყვარს უფალი იესო ქრისტე და მისი სიმართლე, სამშობლო, საქართველო და მერე თქვენ, როგორც მაღალი იერარქი. მაგრამ ღმერთზე და სამშობლოზე წინ ვერ დაგაყენებთ.
როდესაც დავიწყე ამ თემას შევეხე, პიდარასტიის თემას… არ ვთვლი, რომ ამ ტერმინის გამო უნდა მოვუხადო ბოდიში. ახალგაზრდა ჭაბუკის გამხრწნელობა ეს არის პიდარასტია. საეკლესიო ტერმინი. ეს არის ტერმინი, როგორც არის მოხსენიებული. ეს არის ამის შინაარსობრივი მნიშვნელობა. თუ ვინმე ბრკოლდება მე ვითხოვ პატიებას, მაგრამ მე ვარქმევ ყველაფერს თავის სახელს.
პატრიარქმა მითხრა, წავიდე მონასტერში სინანულისთვის, მაგრამ მე ვუთხარი, ვინაიდან თქვენ ღებულობთ უსამართლო გადაწყვეტილებას და არ ხართ გარანტი რჯულის კანონის… თუ მე რჯულის კანონს ვარღვევ, მაშინ მითხარით, მე ვითხოვ ჩემი ბრალდების დამტკიცებას. მომეცით ხვალ დრო 12 საათამდე და მე მოვიყვან მოწმეებს, რომელიც იტყვიან, ანუ დამტკიცდება ჩემი ბრალდება. ხვდებით. თქვენ არ მაძლევთ ამის საშუალებასთქო“.
მეუფე პეტრე ცაავა ამბობს, რომ ჯერ არ იცის გაასაჩივრებს თუ არა მსოფლიო საპატრიარქოში საქართველოს კათოლიკოს პატრიარქის გადაწყვეტილებას.
„უფალს მივენდობი.. მე ვთხოვდი უფალს, რომ მალე დადგეს დღის წესრიგში და ეკლესიის გაჯანსაღების პროცესი გაგრძელდეს. ეს არის შეუქცევადი პროცესი. ეკლესიამ პატრიარქის ხელმძღვანელობით და წმინდა სინოდმა დაუშვა საბედისწერო შეცდომა ჩემთან მიმართებაში და ამ უსამართლობასთან მიმართებაში”.
