ბათუმის მერიამ ე.წ. „ბარცხანის ხიდის“ რეაბილიტაციის პროექტი 2016 წელს შეისყიდა, თუმცა სარეაბილიტაციო სამუშაოები ხიდზე ამ დრომდე არ დაწყებულა. ამ პერიოდში კი, აუცილებელი გახდა ცვლილებების შეტანა პროექტშიც. მერიამ ტენდერი რამდენჯერმე გამოაცხადა, თუმცა, უშედეგოდ.
ბარცხანის ხიდი / 16.01.2021
„ხიდის არსებული მდგომარეობა იმდენად მძიმეა, რომ ხიდზე სარეაბილიტაციო სამუშაოების ჩატარება ძალზე კვალიფიციურობას მოითხოვს“, – აღნიშნული იყო სატენდერო დოკუმენტებში.
ხიდის რეაბილიტაციას მერია თავიდან 778 140 ლარად გეგმავდა. გასულ, 2020 წელს, ეს თანხა 1 069 100 ლარამდე გაიზარდა, თუმცა ტენდერი არ შედგა – მონაწილეობა არავინ მიიღო.
ბარცხანის ხიდი / 16.01.2021
ბათუმის 2021 წლის ბიუჯეტის პროექტში ხიდის სარეაბილიტაციოდ 1 022 600 ლარია გამოყოფილი. მომსახურების შესყიდვაზე ტენდერი მერიას ჯერ არ გამოუცხადებია.
ბოლო ტენდერის პირობაში აღნიშნული იყო, რომ რეაბილიტაციის დროს ხიდზე მოძრაობა არ ჩაიკეტება [ჯერ ხიდის ერთ ნახევარს ჩაუტარდება რეაბილიტაცია მთელ სიგრძეზე, ხოლო შემდეგ – მეორე ნახევარს. შესაბამისად, ხიდის ცალ მხარეს იქნება მოძრაობა]. ხიდის სიგრძე 366.3 მეტრია.
ბათუმის შემოვლითი გზის აშენებამდე აღნიშნულ ხიდზე გაგრძელდება სატრანზიტო მოძრაობა.
ბარცხანის ხიდი / 16.01.2021
ბათუმის ტერიტორიაზე სარფიდან ავტომანქანები ტრანზიტით შემდეგი მარშრუტით მოძრაობენ: კვარიათი-გონიო-აეროპორტის გზატკეცილი-ბაგრატიონის-ერისთავის-გოგოლის-ნონეშვილის[ბარცხანის ხიდი]-დიმიტრიადის ქუჩები- თამარ მეფის გამზირი-მახინჯაური [იგივე მარშრუტია მახინჯაურიდან სარფამდე მიმართულებითაც. ამ მარშრუტის ალტერნატივა კი მახინჯაური-სარფის ახალი მაგისტრალი იქნება].
აღნიშნულ მარშრუტზე საქართველოს საავტომობილო გზების დეპარტამენტი მდინარე ყოროლისწყალზე მდებარე ხიდის რეაბილიტაციას გეგმავს [სამუშაოები დაწყებულია];
ბათუმის ბიუჯეტის მიხედვით კი, 2021 წელს იგეგმება როგორც ბარცხანის ხიდის, ასევე ბაგრატიონის ქუჩისა და გოგოლის ქუჩის ბონი-ბარცხანის მონაკვეთის რეაბილიტაციაც:
https://batumelebi.netgazeti.ge/news/323126/
