ბათუმის მერიისგან თავშესაფრითა თუ საცხოვრებელი ბინით უზრუნველყოფას ათასობით ოჯახი ითხოვს. მერიიდან გამოთხოვილი მონაცემების მიხედვით, მხოლოდ 2013 წლის იანვრიდან მიმდინარე წლის ნოემბრის ჩათვლით პერიოდში ასეთი 4567 განცხადებაა შესული. რა კატეგორიის ადამიანები ითხოვენ ბინებს? – მერიაში ამით არ ინტერესდებიან.
„როცა განცხადებას წერენ, მიზეზს არ ასახელებენ. ძირითადად წერენ – არ გამაჩნია საცხოვრებელი ფართობი, გთხოვთ მომცეთ ბინა. იქედან გამომდინარე, რომ ჩვენ კანონმდებლობა არ გვაძლევს უფლებას კერძო პირებს საკუთრებაში გადავცეთ უძრავი ქონება, ამ ოჯახების პირობების შესწავლა, ვფიქრობ, რაიმე შედეგს მაინც არ გამოიღებს“, – განაცხადა „ბათუმელებთან“ მერიის ქონების აღრიცხვისა და განკარგვის განყოფილების უფროსმა რეზო ხახვამ.
მისივე განცხადებით, ბათუმის მერიას მუნიციპალიტეტის საკუთრებაში არსებული საცხოვრებელი ბინები, ძირითადად, ინფრასტრუქტურული პროექტების განხორციელებისთვის სჭირდება [როცა ექსპროპრეაცია გარდაუვალია, ან ალტერნატიული ფართობი უნდა შესთავაზონ ასასახლებელ ოჯახს]. რეზო ხახვას თქმით, რომ არა საბინაო ფონდი, მერია ინფრასტრუქტურულ პროექტებს ვერ განახორციელებს.
„ბათუმელების“ ინფორმაციით, ქალაქის მერიას საკუთრებაში ასამდე დაკეტილი ბინა აქვს.
ბათუმში, შ. ხიმშიაშვილის ქუჩა N1-ში მდებარე 46 კვ/მ ფართობის ბინა კი, მერიამ მიმდინარე წლის სექტემბერში უპირობო აუქციონზე 51 700 ლარად გაყიდა.
გაყიდული ბინა კომპლექს „ბათუსის“ მოპირდაპირედ, „მაგდონალდსის“ გვერდით არსებულ კორპუსში მდებარეობს.
ბათუმის მერის პასუხი სოციალურად დაუცველებს
მერიას შეეძლო და მოვალეცაა გააჩნდეს ე.წ. სოციალური სახლები თუ ხელმისაწვდომი საცხოვრისი. „საერთაშორისო გამჭვირვალობა საქართველოს“ ანალიტიკოსის, ნათია ზოიძის განცხადებით, მერიას შეეძლო შეესწავლა ის ოჯახები, რომლებიც მისგან ბინას ითხოვენ და შეემუშავებინა მრავალწლიანი პროგრამა მკაცრად გაწერილი კონკრეტული კრიტერიუმებით, თუ ვინ ისარგებლებდა ამ პროგრამით: „ბათუმის მერია ვალდებულია ააშენოს სოციალური საცხოვრისი, მან უნდა ჩაატაროს ბაზრის კვლევაც, თუმცა, ბათუმის მერიას ამ პრობლემის მოგვარების მონდომებაც კი არ აქვს“.
ბათუმის მერიამ სამი წლის წინ დაიწყო საუბარი და გასულ წელს დააფინანსა ე.წ. „იაფი სახლის“ პროგრამა, თუმცა კრიტერიუმები დღემდე არ არის დამტკიცებული, ხოლო მშენებლობა იმ მიზეზით შეჩერდა, რომ მერიის მიერ ტენდერში გამარჯვებულად გამოვლენილი მშენებელი კომპანია გაუჩინარდა.
ხელახალი ტენდერი „ხელმისაწვდომი საცხოვრისის“ პროგრამის ფარგლებში საცხოვრებელი სახლის მშენებლობის გასაგრძელებლად ბათუმის მერიას ჯერ არ გამოუცხადებია. არადა, მერიაში შესული განცხადებების მიხედვით, ე.წ „იაფი სახლის“ პროგრამაში ჩართვას ამ ეტაპზე უკვე 800-მდე ოჯახი ითხოვს.
მერიის საფინანსო ეკონომიკური სამსახურის მონაცემებით:
- „540 კორესპონდენცია შეეხება „ხელმისაწვდომი საცხოვრისის“ [იაფი სახლი] პროექტში მონაწილეობის მიღებას. აქვე აღვნიშნავთ, რომ ჩვენი სამსახური ამ პროგრამით გათვალისწინებულ საცხოვრისში ფართობის შეძენის მსურველებს ამ ეტაპზე ცალკე არ აღრიცხავს“.
მერიის ჯანმრთელობისა და სოციალური დაცვის სამსახურის მონაცემებით კი,
- ვინაიდან „ქ. ბათუმის მუნიციპალიტეტში ჯერ არ არის დადგენილი საბოლოო კრიტერიუმები და არ არის განსაზღვრული ფართობის შეძენის მსურველთა აღრიცხვის მიზნით წარმოსადგენი დოკუმენტაციის ჩამონათვალი, შესაბამისად, საცხოვრისში [იაფი სახლი] ფართობის შეძენის მიზნით აღრიცხვაზე აყვანის თაობაზე განცხადებების მიღება არ დაწყებულა. ამ პროექტში მონაწილეობის სურვილი გამოთქვა და განცხადებით მოგვმართა 255-მა მოქალაქემ“.
„იაფ სახლთან“ დაკავშირებით ბათუმის მერიაში კომენტარის გაკეთება არავინ ისურვა.
ამავე თემაზე:
