სოფლად დაფინანსების მისაღებად აჭარის სოფლის მეურნეობის სამინისტროში 9 მარტის მდგომარეობით 137 განაცხადია შესული. სამინისტროს პრესსამსახურის ინფორმაციით, განაცხადების/პროექტების შეტანის ბოლო ვადა 2021 წლის 20 მარტია.
აჭარის მუნიციპალიტეტებში [ბათუმის გარდა] მცხოვრებ ფერმერებს, ასევე იურიდიულ პირებს, შეუძლიათ აირჩიონ რისი შეძენა სურთ, მაგალითად, მოტობლოკის, რომელიმე სხვა სასოფლო-სამეურნეო ტექნიკის, სათბურის, ნერგების და მიიღონ დაფინანსება. ამისთვის დაინტერესებულმა პირმა სამინისტროში პროექტი/განაცხადი უნდა წარადგინოს.
პროგრამის ფარგლებში დაფინანსდება პროექტები 500-დან 40 ათას ლარამდე. პროექტის მთლიანი ღირებულების 20 პროცენტი თავად ფერმერმა უნდა დაფაროს, 80 პროცენტს კი სამინისტრო გადაიხდის.
განაცხადის შეტანა შეუძლია როგორც კერძო, ასევე იურიდიულ პირს, რომელსაც აჭარის მუნიციპალიტეტებში საკუთრებაში აქვს მინიმუმ 1000 კვ/მ ფართობის მიწის ნაკვეთი.
განაცხადის წარდგენა ასევე შეუძლია ნებისმიერ პირს, რომელსაც აჭარის ტერიტორიაზე მრავალწლიანი იჯარით აქვს აღებული სასოფლო-სამეურნეო მიწის ნაკვეთი.
პროგრამისთვის ჯამში 982 ათას 342 ლარია გათვალისწინებული აჭარის ბიუჯეტში. აქედან უშუალოდ ბენეფიციართა პროექტების დასაფინანსებლად – 907 ათას 342 ლარი.
სამინისტროში განმარტავენ, რომ წარდგენილი ყველა პროექტი [ეს იქნება ტექნიკის შეძენა, სათბურის, ნერგების შესყიდვა თუ სხვა] ერთად იყრის თავს სპეციალურ კომისიაში, რომელიც გამარჯვებულს გამოავლენს.
„ყველა პროექტი მოდის კონკურენციაში ერთმანეთთან… გააჩნია პროექტის კვალიფიციურობას, თუ როგორ არის წარმოდგენილი პროექტი და როგორ არის დასაბუთებული მისი მდგრადობა. ძირითადად, ამის მიხედვით და პროგრამით გაწერილი კრიტერიუმების შესაბამისად შეარჩევს კომისია პროექტებს“, – ამბობენ სამინისტროში.
ამავე თემაზე:
როგორ შევავსოთ განაცხადი სოფლად დაფინანსების მისაღებად – სამინისტროს განმარტება
