ბათუმში, გოგოლის ქუჩის მონაკვეთის [მაიაკოვსკის ქუჩიდან ნონეშვილის ქუჩამდე], აქვე არსებული ხიდისა და ე.წ. „ბარცხანის ხიდის“ სარეაბილიტაციო სამუშაოებისთვის 2 718 690 ლარით ტენდერია გამოცხადებული.
პროექტის მიხედვით, გოგოლის ქუჩის ამ მონაკვეთში არსებული ფილების ნაცვლად დააგებენ ასფალტის საფარს, მოაწყობენ ბორდიურებსა და ტროტუარრბს, რეაბილიტაცია ჩაუტარდება მდინარე ბარცხანაზე არსებულ ხიდს.
კონკრეტულად ქუჩის ამ მონაკვეთისთვის ბათუმის 2021 წლის ბიუჯეტში 1 475 804 ლარია გათვალისწინებული.
რაც შეეხება ბარცხანის ხიდს, მერიამ პროექტი 2016 წელს შეისყიდა, თუმცა სარეაბილიტაციო სამუშაოები ხიდზე ამ დრომდე არ დაწყებულა. მოგვიანებით აუცილებელი გახდა ცვლილებების შეტანა პროექტშიც. მერიამ ტენდერი რამდენჯერმე გამოაცხადა, თუმცა უშედეგოდ.
წელს ამ ხიდის სარეაბილიტაციოდ 1 022 600 ლარია გამოყოფილი.
მერიის საქალაქო ინფრასტრუქტურისა და კეთილმოწყობის სამმართველომ გოგოლის ქუჩის მონაკვეთისა და ხიდების რეაბილიტაციაზე ამჯერად გაერთიანებული ტენდერი გამოაცხადა. წინადადებების მიღება 21 მარტს დაიწყება და 26 მარტს დასრულდება.
სამუშაოები ტენდერში გამარჯვებულთან ხელშეკრულების გაფორმებიდან 2021 წლის 15 დეკემბრის ჩათვლით პერიოდში უნდა დასრულდეს.
