Batumelebi

„რატომ ნიკა მელია? – მიმაჩნია, რომ „ნაციონალური მოძრაობა“ იქნება და უნდა იყოს ის მთავარი ძალა, რომელიც შეძლებს ავტოკრატიული რეჟიმის ჩამოშლას და ამ ქვეყანაში პოლიტიკური მართლმსაჯულების დასრულებას, რასაც მარტო ვერ შეძლებ. საჭიროა ერთი დიდი პოლიტიკური ერთობის გაკეთება“, – ასე ახსნა „ერთიანი ნაციონალური მოძრაობს“ ბათუმის ორგანიზაციის თავმჯდომარემ, გიორგი კირთაძემ, პარტიის მოქმედი თავმჯდომარისთვის ღიად გამოცხადებული მხარდაჭერა.

ენმ-ის თავმჯდომარის არჩევნებში ნიკა მელია, ლევან ხაბეიშვილი, გიორგი მუმლაძე და ნონა მამულაშვილი მონაწილეობენ.

ერთიანი ნაციონალური მოძრაობის თავმჯდომარის არჩევნებზე უშუალოდ ხმის მიცემა 28 იანვრის 10:00 სთ-ზე დაიწყება და 30 იანვრის 10:00 სთ-ზე დასრულდება.

პარტიის ბათუმის ორგანიზაციის თავმჯდომარე და ისინიც, ვინც დღეს მასთან ერთად ნიკა მელიას მხარდაჭერა ღიად დააფიქსირა, მიიჩნევენ, რომ ის „ყველაზე მეტად ასხივებს, რომ შეუძლია დიდი ოპოზიციური ერთობის ორგანიზება.“

გიორგი კირთაძე 15 წელზე მეტია, რაც ამ პარტიის წევრია, 10 წელზე მეტი, რაც პარტიის ბათუმის ორგანიზაციას ხელმძღვანელობს, იყო საკრებულოს წევრი, შემდეგ კი მისი თავმჯდომარე და უმაღლესი საბჭოს მოქმედი წევრია. მას, როგორც ერთ-ერთ ლიდერს, წლები აკავშირებს პარტიის იმ წევრებთან, რომლებიც სხვაგვარად ფიქრობენ და აცხადებენ, რომ პარტიაში „ცვლილებების დრო“ სწორედ ახლაა.

„წარმოდგენილი კანდიდატებიდან ყველას ვუდასტურებ პატივისცემას. მიმაჩნია, რომ ისინი აბსოლუტურად  მნიშვნელოვანი ადამიანები არიან „ნაციონალური მოძრაობისა“ და ქვეყნისთვის“, – ამბობს კირთაძე და გვარწმუნებს, რომ სჯერა – პარტია არჩევნების შემდეგ არ გაიყოფა.

მაგრამ ამბობს, რომ თუ ნიკა მელია გაიმარჯვებს, დარჩება და „ბრძოლას გააგრძელებს“, თუ სხვა „დარჩება და ბრძოლას გააგრძელებს ავტოკრატიის წინააღმდეგ, მაგრამ ორგანიზაციის ხელმძღვანელი არ იქნება. ახალი თავმჯდომარე მოვა თავისი გუნდით“.

მისი თანაპარტიელები, რომლებიც ნიკა მელიას მხარს არ უჭერენ, სოციალურ ქსელებში კრიტიკულად შეაფასეს ბათუმის ორგანიზაციის თავმჯდომარის დღევანდელი ბრიფინგი. გიორგი კირთაძემ კი არც ამჯერად უღალატა ჩვეულ თავშეკავებას, რასაც ვერ ვიტყვით მირდატ ქამადაძეზე. ბათუმში მელიას მხარდამჭერთა ახლადშექმნილი შტაბის ხელმძღვანელმა, გაცილებით ღიად და რადიკალურადაც კი შეაფასა ვითარება. ის არც პარტიის აჭარის ორგანიზაციის ხელმძღვანელის, ლევან ვარშალომიძის კრიტიკას მორიდებია.

„ნიკა მელია იმიტომ, რომ ამ ქვეყანაში გაგრძელდეს თავისუფალი პოლიტიკა და ერთხელ და სამუდამოდ დასრულდეს პოლიტიკური პროცესების კულისებიდან მართვა. ეს, სამწუხაროდ, შეინიშნება ჩვენ პარტიაში სხვადასხვა კანდიდატებთან… დღეს ქვეყანაში საჯარო, თავისუფალი პოლიტიკის დროა, რომელსაც წარმატებით ახორციელებს ნიკა მელია. არავითარ შემთხვევაში არ უნდა დავუშვათ, რომ პარტიაში არაფორმალური მმართველობა იყოს, რის წინააღმდეგაც ვიბრძვით ბიძინა ივანიშვილის წინააღმდეგ.“

• გავრცელებულ ჩანაწერებზე 

„ყველაფერი საეჭვოდ დაემთხვა ერთმანეთს“, – ნიკა მელიას ფარული ჩანაწერების გავრცელებას ასე აფასებს მირდატ ქამადაძე, თუმცა ასევე აცხადებს, რომ არ იცის, ვინ დგას ამის უკან:

„ვინ დგას ამის უკან ამაზე კონკრეტული მტკიცებულება ჯერჯერობით არ გამაჩნია. მე მაქვს პრეტენზია, რომ ქართულ პოლიტიკაში ეს სტანდარტიც უნდა დამკვიდრდეს, ხელი უაპელაციოდ არ გავიშვიროთ ერთმანეთის წინააღმდეგ თუ მტკიცებულებები არ გვაქვს. საზოგადოების გონიერ ნაწილს შეუძლია დასვას კითხვა და პასუხი იქნება მარტივი, ყველაფერი ძალიან საეჭვოდ დაემთხვა ერთმანეთს. ეს ეჭვები უნდა გაქარწყლდეს. ჩვენი მთავარი ამოცანაა, რომ ქართულ პოლიტიკაში ფარული ჩანაწერების პოლიტიკა დასრულდეს, ეს იქნება შიდაპარტიული თუ საჯარო პოლიტიკა. თუ ჩვენ პრეტენზია გვაქვს და სწორად და სამართლიანად გვაქვს პრეტენზია ბიძინა ივანიშვილის მმართველობის წინააღმდეგ, ერთ-ერთი პრეტენზიაა, რომ არაფორმალურად მართავს ის ქვეყანას და ჩანაწერებით ებრძვის პოლიტიკურ ოპონენტებს.“

მირდატ ქამადაძე დარწმუნებულია, რომ „ჩანაწერები მოპოვებული და ფაბრიცირებულია სუსის მიერ“. თუმცა ასევე ფიქრობს, რომ „მისი გამოყენება შიდაპარტიულად ვიღაცას დასჭირდა ძალაუფლების მოპოვებისთვის: „ნაციონალური მოძრაობის“ წევრია თუ სხვა, ნებისმიერი საშიშია, თუ ფაბრიცირებული ჩანაწერებით იბრძვის.“

• ლევან ვარშალომიძე –  „მმართველი კულისებიდან“

დღევანდელ ბრიფინგზე ბათუმის ორგანიზაციაში პირველად გაისმა ხმამაღალი საყვედურები ლევან ვარშალომიძის მიმართ. ამ დრომდე ის, ყოველ შემთხვევაში ჟურნალისტებთან, აჭარაში უპირობო ლიდერად სახელდებოდა. მირდატ ქამადაძემ ლევან ვარშალომიძე მათ შორის მოიხსენია, ვისაც წარმოუდგენია, რომ პარტიაში დემოკრატიული პროცესები არის პარტიისთვის დამღუპველი:

„ჩვენ პერსონალური დაპირისპირება არავისთან გაგვაჩნია, ჩვენ გვაქვს იდეური და ღირებულებითი განსხვავება. ჩვენ მიგვაჩნია, რომ შეუძლებელია მთავარი ოპოზიციური პარტია განვითარდეს და ძალა მოიკრიბოს, თუ პარტიაში არ იქნება დემოკრატიული პროცესები. ამ ადამიანებს მიაჩნიათ, რომ ზემოთ, ვერტიკალი რასაც გადაწყვეტს, იმას ასრულებ“.

მირდატ ქამადაძის თქმით, ლევან ვარშალომიძის ეს პოზიცია საჯარო შეხვედრაზე აჭარის უმაღლესი საბჭოს წევრმა ენმ-დან ელგუჯა ბაგრატიონმა გააჟღერა: „მან პირდაპირ თქვა, რომ ახმოვანებდა ლევან ვარშალომიძეს და პარტიაში დემოკრატიული პროცესები არის მიუღებელი.“

მირდატ ქამადაძეს დღეს ჰკითხეს, თუ გადაამოწმა მან ეს ინფორმაცია ლევან ვარშალომიძესთან, რაზეც მან განაცხადა:

„საუბარი რომ შევძლოთ, ეს ადამიანები, ვისაც პოლიტიკა აინტერესებს, უნდა გამოვიდნენ კულისებიდან. თუ გამოვა ეს ხალხი გარეთ, მოვახერხებთ საუბარს. თუ დარჩებიან კულისებში კანდიდატები და ჩვენ, საზოგადოებას შეეცდებიან თვალი აგვიხვიონ თითქოს უკან არავინ არ დგას, საჯარო პოლიტიკა არ აინტერესებს თურმე… საჯარო პოლიტიკა არ აინტერესებს ბიძინა ივანიშვილსაც“.

დღესვე, ბრიფინგზე ითქვა, რომ ლევან ვარშალომიძე, ვანო მერაბიშვილთან და დავით კეზერაშვილთან ერთად ენმ-ის თავმჯდომარეობის კანდიდატის – ლევან ხაბეიშვილის უკან დგას.

• „შტაბის გახსნა გავიგე, მაგრამ ლევან ვარშალომიძეზე ისრების გადატანა ვერ“ – ლევან ანთაძე

აჭარის უმაღლესი საბჭოს წევრი ლევან ანთაძე ამბობს, რომ მისთვის გასაგებია ნიკა მელიას მხარდამჭერი შტაბის გახსნა, მაგრამ გაუგებარია, რატომ გადაიტანეს პარტიის წევრებმა ისრები პარტიის აჭარის ორგანიზაციის თავმჯდომარეზე:

„იმის გამო, რომ ხაბეიშვილს უჭერს მხარს? კანდიდატების შტაბის გახსნაში ვერ ვხედავ პრობლემას, მაგრამ არ ვიცი, რატომ დაიწყო მცდელობით, რომ ლევან ვარშალომიძეს ჩრდილი მიაყენოს, ეს არის ჩემთვის გაუგებარი. ნამდვილად არ ვიცი, რატომ გადაწყვიტეს ასე ემოქმედათ მეგობრებს. მე ნამდვილად არ მომისმენია და პირველად მესმის ლევან ვარშალომიძეზე მსგავსი მოსაზრებები. მირდატ ქამადაძის გამოსვლებში იყო რაღაც ტონები, მაგრამ პირდაპირ არავის ულაპარაკია ჩემთან და არც სხვასთან. სასაცილო მგონია იმის თქმა, რომ ლევან ვარშალომიძე კულისებიდან მართავს. ჩვენ ხომ აჭარაში ვცხოვრობთ და ვიცით ვინ რა გააკეთა, თუნდაც იგივე ლევან ვარშალომიძემ“.

ლევან ანთაძის ინფორმაციით, ვარშალომიძეს 30 დეკემბერს ჰქონდა შეხვედრა აჭარის ორგანიზაციის წევრებთან, 31 დეკემბერს კი  თათბირი ბათუმის აქტივთან:

„რა არაფორმალურ მმართველობაზე ვსაუბრობთ. არჩევნებში თუ აჭარის ორგანიზაციის მმართველი არ არის ჩართული, აბა ვინ არის? – ეს ყველაზე მსხვილი ორგანიზაციაა საქართველოს მასშტაბით. შტაბის დაფუძნებაზე რომ ცდილობ ლევან ვარშალომიძე გააშავო, ეს გაუგებარია ჩემთვის. ან მელიას რაში აწყობს ლევან ვარშალომიძის გაშავება. ლევან ვაშალომიძე შეიძლება ერთს უჭერდეს მხარს, ან მეორეს. ამაში რა არის გასაკვირი. გიორგი კირთაძე თუ მელიას უჭერს მხარს, რატომ არ შეიძლება სხვამ მეორეს დაუჭიროს მხარი. ან ვანო მერაბიშვილს მისი შეხედულება რომ ჰქონდეს გასამტყუნია?“

რაც შეეხება ჩანაწერების გავრცელებას, ლევან ანთაძის თქმით, მას ეჭვი აქვს, რომ ჩანაწერები სუსმა გაავრცელა. მან ასვე დაგვიდასტურა, რომ 30-31 დეკემბერს ლევან ვარშალომიძესთან გამართულ შეხვედრებს გიორგი კირთაძე არ ესწრებოდა.

• საკრებულოს წევრები გაუგებრობაში არიან – რეზო ხარაზი

ბრიფინგს ბათუმის საკრებულოს წევრებიც ესწრებოდნენ. საკრებულოს „ერთიანი ნაციონალური მოძრაობის“ ფრაქციის თავმჯდომარის, ნოდარ დუმბაძის განცხადებით, ფრაქცია ნიკა მელიას უჭერს მხარს. ფრაქციის ყველა წევრი ბრიფინგს არ დასწრებია, მათ შორის იყო რეზო ხარაზიც. ის ნიკა მელიას მხარდამჭერი არ არის და მიიჩნევს, რომ ფრაქციაში „ცვლილებების დროა“.

„კიდევ ერთხელ დარწმუნდა ჩვენი საზოგადოება და თითოეული ჩვენგანი ვრწმუნდებით, რომ ეს არჩევნები იყო აუცილებელი. პარტიაში მთავარი მუშაობაა, თუ შეგიძლია საქმე აკეთო, იმის დრო არ დაგრჩება, რომ ჭორაობას აჰყვე, რაღაცები გამოიგონო, დადგე და ილაპარაკო. პარტიამ რომ გამართულად იმუშაოს, სტრუქტურა და გამოცდილი ადამიანებია საჭირო. სამწუხაროდ, ბოლო წლებში ვნახეთ უმოქმედობა და ეს აისახება არჩევნებზეც. დღეს ვნახეთ, რომ პარტიის მცირე ჯგუფმა გააკეთა განცხადება, ჩემთვის პატივსაცემია ნებისმიერი, ვინც მხარს უჭერს ნიკა მელიას, მაგრამ ვფიქრობ, რომ მელიამ ამოწურა ყველა შესაძლებლობა. დღეს სხვა რესურსი სჭირდება „ნაციონალურ მოძრაობას“.

2016 წელს პარტიის გაყოფამ ვერაფერი დააკლო „ნაციონალურ მოძრაობას“, კიდევ უფრო გაიზარდა და გაძლიერდა… დღეს ვხედავთ ვარშალომიძეზე აქცენტირებულ თავდასხმას, ახლა ვიღაცებს ეს დასჭირდათ, საზოგადოების უმრავლესობა გასცემს ამას პასუხს ამ არჩევნებზე. რაც შეეხება „თავისუფლების კვარტალს“, მის სულისჩამდგმელი თავიდან ბოლომდე ლევან ვარშალომიძე იყო თავისი რესურსით. ვისაც თითი თითზე არ დაუკარებია ამ წლების განმავლობაში და სატელევიზიო ინტერვიუებით შემოიფარგლებოდა, მათ მინდა მოვუწოდო თავი დაანებონ ლაფის სროლას“, – ამბობს რეზო ხარაზი.

• ხვალ აჭარაში მხარდამჭერები ლევან ხაბეიშვილს ხვდებიან

ლევან ანთაძის ინფორმაციით, ხვალ, 15 იანვარს, მხარდამჭერებს ბათუმში ლევან ხაბეიშვილი შეხვდება.

___

ამავე თემაზე:

ბათუმში ნიკა მელიას მხარდამჭერი შტაბი შეიქმნა. შტაბს ბათუმის საკრებულოს ყოფილი წევრი მირდატ ქამადაძე უხელმძღვანელებს. ამის შესახებ დღეს, 14 იანვარს, ერთიანი ნაციონალური მოძრაობის ბათუმის ორგანიზაციიის ხელმძღვანელმა გიორგი კირთაძემ განაცხადა.

მან ასევე განმარტა, რომ იმ დროს, როცა საქართველოს მესამე პრეზიდენტის, მიხეილ სააკაშვილის გადასარჩენად პარტიამ საერთაშორისო მხარდაჭერის მოპოვება შეძლო, შიდაპარტიული არჩევნების დრო არ იყო, თუმცა, რადგან არჩევნები დანიშნულია ის უნდა ჩარტარდეს, ხოლო პროცესი უნდა იყოს გამჭვირვალე.

გიორგი კირთაძის თქმით ბათუმის ორგანიზაციაში პარტიის წევრების უმრავლესობა ნიკა მელიას უჭერს მხარს.

მირდატ ქამადაძემ თავის გამოსვლაში აქცენტი გააკეთა იმაზე, რომ „პარტია უნდა იმართებოდეს დემოკრატიულად და არა კულისებიდან“.

ორგანიზაციის ხელმძღვანელებმა ბრიფინგზე გავრცელებულ კადრებთან დაკავშირებულ კითხვებსაც უპასუხეს.

ბრიფიგს ბათუმის საკრებულოს წევრებიც ესწრებოდნენ. საკრებულოს „ერთიანი ნაციონალური მოძრაობის“ ფრაქციის თავმჯდომარის, ნოდარ დუმბაძის განცხადებით, ფრაქცია ნიკა მელიას უჭერს მხარს.

2022 წლის 9 ნოემბერს ცნობილი გახდა, რომ „ნაციონალური მოძრაობის“ წევრები პარტიაში შიდა არჩევნების ჩატარებას ითხოვენ, რომელიც შეეხება თავმჯდომარეს, პოლიტიკურ საბჭოსა და პოლიტიკურ სამდივნოს.

„ნაციონალური მოძრაობის“ წევრები აცხადებენ, რომ მათი აზრით, თანაპარტიელთა ნაწილის მიერ პარტიაში შიდა არჩევნების ჩატარების საჯაროდ მოთხოვნა არასწორი იყო.

რაც შეეხება „ნაციონალური მოძრაობის“ თავმჯდომარის არჩევნებს, პარტიის მოქმედმა თავმჯდომარემ, ნიკა მელიამ შიდაპარტიული არჩევნების ჩატარებისა და მასში მონაწილეობის მზადყოფნა გამოთქვა.

ენმ-ის თავმჯდომარის არჩევნებში მონაწილეობენ ნიკა მელია, ლევან ხაბეიშვილი  გიორგი მუმლაძე და ნონა მამულაშვილი.

ერთიანი ნაციონალური მოძრაობის თავმჯდომარის არჩევნებზე ამომრჩეველთა რეგისტრაცია  უკვე დაიწყო და 26 იანვრის 10:00 სთ-მდე გაგრძელდება .

პარტიის განცხადებით, რეგისტრაცია, ისევე, როგორც ხმის მიცემა, განხორციელდება ელექტრონულად, უნიკალური ტექნოლოგიური პლატფორმის, „ბლოკჩეინის“ სისტემის გამოყენებით.

14 იანვარს, ღამით, ბათუმში მერიის შპს „სანდასუფთავების“ საწყობში ხანძარი გაჩნდა. საწყობი ადლიის დასახლებაში მდებარეობს და ხანძარი დაახლოებით ღამის 2 საათისთვის გაჩნდა.

ხანძრის შედეგად, როგორც „ბათუმელებს“ სახანძროში უთხრეს, არავინ დაშავებულა.

შენობაში, სადაც ხანძარი გაჩნდა, „სანდასუფთავების“ სხვადასხვა ინვენტარი იყო დასაწყობებული.

ამ დროისთვის უცნობია ხანძრის გამომწვევი მიზეზი და ზარალის ოდენობა. „ბათუმელები“ დეტალებს აზუსტებს და მიღებისთანავე აქვე მოგაწვდით.

საქართველოს ფინანსთა სამინისტროს საგამოძიებო სამსახურის ინფორმაციით, ამავე სამსახურის თანამშრომლებმა, შემოსავლების სამსახურის საბაჟო დეპარტამენტის წარმომადგენლებთან კოორდინაციით, გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, მიმდინარე წლის იანვრის დასაწყისში, საქართველოს საბაჟო საზღვარზე განსაკუთრებით დიდი ოდენობით არადეკლარირებული ოქროს საიუველირო ნაკეთობების შემოტანის სამი ფაქტი გამოავლინეს.

„გამოძიებით დადგინდა, რომ აზერბაიჯანის მოქალაქეებმა, რომლებიც სატვირთო ავტომანქანებით, თურქეთიდან აზერბაიჯანის მიმართულებით ახორციელებდნენ სხვადასხვა სახის საქონლის ტრანზიტულად ტრანსპორტირებას, საბაჟო-გამშვები პუნქტი „სარფი“-ს გავლით, საბაჟო კონტროლისაგან მალულად, საქართველოში შემოიტანეს საერთო ჯამში 6 კილოგრამამდე ოქროს საიუველირო ნაკეთობები, რომელთა საბაჟო ღირებულება აღემატება 500 000 ლარს.

საქმეებზე გამოძიება მიმდინარეობს საქართველოს სისხლის სამართლის კოდექსის 214-ე მუხლის მე-2 ნაწილით, რაც ითვალისწინებს თავისუფლების აღკვეთას 5-დან 7 წლამდე ვადით.“ – აცხადებს საგამოძიებო სამსახური.

9 წლის ლუკა სკოლიდან ოჯახის წევრებთან ხშირად რეკავს მას შემდეგ, რაც ბათუმის მე-16 სკოლა დაანგრიეს და ახალი შენობის მშენებლობის სამუშაოები დაიწყეს. მოზარდი ასე ამოწმებს, არიან თუ არა ოჯახის წევრები უსაფრთხოდ. „როგორ ხართ სახლში, კარგად ხომ ხართ?“ – კითხულობს ის. უსაფრთხოებასთან დაკავშირებული განცდები მოზარდს მას შემდეგ გაუძლიერდა, როცა სახლთან ახლოს მე-16 სკოლის შენობა ჯერ დაანგრიეს, შემდეგ კი მის ადგილზე ახლის მშენებლობა დაიწყეს.

ბიჭის დედის თქმით, „ლუკა ერთ-ერთი იმ ბავშვის სკოლელია, რომელიც ბათუმში, 26 მაისის ქუჩაზე სახლის ჩამონგრევის შედეგად დაიღუპა [ბავშვის სახელი შეცვლილია. ჩვენი მისვლის დროს მამამ ბავშვები სახლიდან საგანგებოდ წაიყვანა, რომ ჩვენი საუბარი არ მოესმინათ].

ლუკას ოჯახის წევრებმა ძალიან სცადეს, რომ ჯერ ნგრევის, შემდეგ კი მშენებლობის პროცესის შესაძლო გავლენის შესახებ საცხოვრებლის უსაფრთხოებაზე ვარაუდები ბავშვებთან არ განეხილათ. არ გამოუვიდათ. ლუკამ იცის, რომ ვიბრაცია, რომელსაც სკოლის მშენებლობა იწვევს, მისი კორპუსისთვის შესაძლოა დამატებითი საფრთხის მიზეზი იყოს – კორპუსს ავარიული სახლის სტატუსი აქვს.

ლუკას დედა გვიყვება, რომ ბოლო პერიოდში ბავშვმა ტელეფონში ისეთი ახლობლების ნომრებიც ჩაიწერა, რომლებიც ამ დრომდე არ ჰქონია, მათ შორის არის მაგალითად დეიდა, რომელიც უცხოეთში ცხოვრობს: „რამე რომ მოხდეს?“ – ეს ლუკას სიტყვებია.

ლუკას დედა ამ ამბავს ემოციურად გვიყვება, ხმა ეცვლება, ჩერდება, ცრემლს იწმენდს… მასთან ერთად არიან მეზობლებიც, რომლებსაც „ბათუმელებისთვის“ ანალოგიური ამბები აქვთ მოსაყოლი.

ლუკას ოჯახი #16-ე სკოლის მიმდებარედ ცხოვრობს. მათი კორპუსი ავარიული სახლების ნუსხაშია – ექსპერტიზის დასკვნის მიხედვით მასში ცხოვრება სახიფათოა. აქ ამბობენ, რომ სახლი აშენებიდან მალევე გადაიხარა და „თავიდანვე შეაფასეს როგორც ავარიული“, მაგრამ სიცოცხლისთვის საშიში არ ყოფილა. ახლა კი შიშობენ, რომ ავარიული სახლის გვერდით ახალი მშენებლობა მის მდგომარეობას დაამძიმებს.

სახლის მდგრადობის შესწავლის მოთხოვნით მაიაკოვსკის 3ა-ში მცხოვრებლებმა ბათუმის მერიას ჯერ კიდევ ავარიული სახლების პროგრამის შექმნამდე მიმართეს. მათივე ინფორმაციით, მერია სახლის გამაგრებასაც განიხილავდა, თუმცა ხარჯების დათვლის შემდეგ ახლის მშენებლობა გადაწყვიტეს. ავარიული სახლების პროგრამის დაწყების შემდეგ მერიამ ამ კორპუსის ექსპერტიზაც თავად შეისყიდა.

დასკვნის მიღებიდან მალევე კორპუსის ამხანაგობამ მერიისგან ოფიციალური წერილი მიიღო, რომ კორპუსის „ავარიული სახლების პროგრამაში“ ჩართვის მიზნით მესაკუთრეთა ასპროცენტიანი თანხმობა სჭირდება. შეთანხმების პროცესი დროში გაიწელა მთელი რიგი პრობლემების გამო, რომლებიც ანალოგიურია ყველა ავარიულ სახლში მცხოვრებლებისთვის. შემდეგ კი კორპუსის მიმდებარედ სამშენებლო სამუშაოები დაიწყო, რამაც კორპუსში მცხოვრებლები ააფორიაქა.

„სამუშაოები სერიოზულ ვიბრაციას იწვევს, ამიტომაც ახლა განსაკუთრებით გვეშინია. მერიის წარმომადგენლები დაგვპირდნენ, რომ სკოლის მშენებლობა არ დაიწყებოდა, ვიდრე ჩვენი კორპუსის პრობლემა არ გადაწყდებოდა. სახლის გვერდით გაბურღვითი სამუშაოც ჩაატარეს, გრუნტი უნდა შევისწავლოთო. ასევე გვითხრეს, რომ პროექტი შეისყიდა მერიამ, მაგრამ რა პროექტია, როდის უნდა დაიწყოს მშენებლობა, ჩვენ რას გვიპირებენ, დაზუსტებით არაფერი ვიცით. ისიც გვითხრეს, რომ უკვე შენდება კორპუსები და იქ შემოგვთავაზებენ, აქ კი შეიძლება სკვერს გავაკეთებთო“, – გვიყვება ნინო მეძმარიაშვილი, ავარიული სახლში მცხოვრები.

„ამ ამბის შემდეგ ღამეებს ვათენებ, ძალიან ვნერვიულობ“, – ამბობს შორენა გიორგაძე.

არ არსებობს დასკვნა, რომლის მიხედვითაც შესაძლებელია იმის დადგენა, რა გავლენა შეიძლება ჰქონდეს სამშენებლო პროცესს ავარიულ სახლზე. სამხარაულის ექსპერტიზის ორივე დასკვნის მიხედვით, სახლი მდგრადობის თვალსაზრისით არადამაკმაყოფილებელია, მისი ცალკეული ნაწილები კი ავარიული და საფრთხის შემცველი. ექსპერტები აქცენტირებენ მიშენებებზე, რომლებიც ავარიულ სახლზე ფიქსირება. ამ მიშენებების კანონიერებაზე დაზუსტებული ინფორმაცია არ გვაქვს. ადგილზე ამბობენ, რომ „ძველი, 30 წლის წინანდელი მიშენებებია“.

ექსპერტი წერს ასევე, რომ მდგომარეობა ნებისმიერ დროს შესაძლოა გაუარესდეს:

სალომესა და მისი მეზობლების ინფორმაციით, მერიამ მათ „ქირით გაყვანა“ შესთავაზა, თუმცა ამ დრომდე ავარიულ კორპუსში რჩებიან.

„600-800 ლარს გადაგიხდით ქირის ღირებულებას, ვიდრე ახალაშენებულ კორპუსში ბინებს გადმოგცემთო. 800 ლარის ფარგლებში ბინის დაქირავება დღეს ბათუმის გარეუბანშიც კი ჭირს. ხუთი ან ხუთზე მეტ-წევრიანი ოჯახი კი ამ ფასად ბინის დაქირავებას საერთოდ ვერ შეძლებს. ისიც შემოგვთავაზა მერიის წარმომადგენელმა, თქვენ დაამატეთო. დავამატებთ, ვისაც შეგვიძლია, მაგრამ 3 წელი ვერ დასრულდება ახალი ბინა და შევძლებთ? – ყველა ვერც ახლა შეძლებს დამატებას. ამ სამი წლის განმავლობაში ისევ რომ მოიმატოს ქირის ფასმა რა ვქნათ? ძალიან ბევრი პრობლემაა დღის წესრიგში, რაზეც პასუხები არ გვაქვს“, – ამბობს სალომე.

სკოლის მშენებლობის დაწყების შემდეგ კორპუსის მცხოვრებლებმა ბათუმის მერს, არჩილ ჩიქოვანს კიდევ ერთი წერილით მიმართეს:

ერთ-ერთი მცხოვრების, ეკა ბუბუტეიშვილის თქმით, მათთვის მთავარი უსაფრთხოებაა და სამშენებლო კომპანიისგან არ ითხოვენ პირობების გაუმჯობესებას თუ ფართობების გაზრდას:

„თუ ვინმე დადებს დასკვნას და აიღებს პასუხისმგებლობას, რომ ჩვენ საფრთხე არ გვემუქრება, აქ დავრჩებით. პრობლემა არ გვაქვს. მაგრამ ვინ არის პასუხისმგებელი, რომ რყევების გამო, რასაც სამშენებლო სამუშაოები იწვევს, ჩვენ არაფერი გვემუქრება?“

იმავეს ამბობს როზა ბუბუტეიშვილიც: „ვიცით, რომ ბათუმში ბევრი სახლია ავარიულ მდგომარეობაში და შეიძლება უარეს მდგომარეობაშიც, მაგრამ ჩვენ გარემოება შეგვეცვალა სკოლის სამუშაოების გამო. სრულ ინფორმაციას არავინ გვაწვდის, არიან ისეთი მეზობლებიც, რომლებიც ამბობენ, რომ პროექტი მართლაც არსებობს, ნანახი აქვთ და ის 12-სართულიანია“.

ბათუმის მერიაშიც აცხადებენ, რომ მაიაკოვსკის #3ა-ში ავარიული სახლის პროექტი უკვე შეისყიდეს, რომლის მშენებლობაზეც ტენდერი უახლოეს პერიოდში გამოცხადდება. თუმცა პროექტის ესკიზი არ გვაჩვენეს. არც ის გვითხრეს, ვინ იმუშავა პროექტზე და არც შესყიდვის კოდი მოგვაწოდეს. როგორც ჩანს მერიაში მოსახლეობის წუხილი მათი კორპუსის ირგვლივ განვითარებულ მოვლენებზე დიდად არ ადარდებთ, ყოველ შემთხვევაში მათთვის დაზუსტებული ინფორმაციის მისაწოდებლად თავს არავინ იწუხებს.

მერიის პასუხი უცვლელად:

„მაიაკოვსკის ქუჩაზე, #3-ა-ში არსებულ კორპუსთან დაკავშირებით, უკვე შეძენილია პროექტი, რომელზეც უახლოეს პერიიოდში გამოცხადდება ტენდერი.. მოსახლეობის ალტენატიულ ფართში გადასაყვანად მობინადრეებისთვის შეთავაზებულია ქირის ოდენობა, რომელიც განსაზღვრულია საკრებულოს მიერ, მუნიციპალიტეტის ადმინისტრაციულ ერთეულებში, ზონირების რუკის შსაბამისად, ბინების დაცლის შემდეგ დაიწყება შესაბამისი პროცედურების განხორციელება ავარიული სახლების პროგრამის ფარგლებში.

მაიაკოვსკის #3ა-ში 45 ოჯახი ცხოვრობს, ავარიული სახლების ნუსხაშია გვერდითი კორპუსიც, რომელიც ამავე ქუჩაზე #2-ში მდებარეობს.

ელექტროენერგიის მომხმარებლები ენერგოკომპანიისგან იღებენ მოკლე ტექსტურ შეტყობინებებს დენის მოხმარების წესებში ცვლილებების შესახებ. შეტყობინებაში ასევე აღნიშნულია, რომ შეიცვალა ხელშეკრულების პირობები და ცვლილებები არ ეხება მიწოდების ტარიფებს.

„გაცნობებთ, რომ სემეკის მიერ „ელექტროენერგიის საცალო ბაზრის წესებში“ შეტანილი იქნა ცვლილებები, რომელთა ნაწილიც ამოქმედდა 2022 წლის 29 დეკემბერს. შედეგად შეიცვალა ელექტროენერგიის მიწოდების ხელშეკრულების სტანდარტული პირობები. ცვლილებები არ ეხება მიწოდების ტარიფს“, – „ეპ ჯორჯია მიწოდებას“ მოკლე ტექსტური შეტყობინება.

რა შეიცვალა?

ელექტროენერგიის საყოფაცხოვრებო და არასაყოფაცხოვრებო მომხმარებლები მოხმარებული დენის საფასურს შესაბამისი კომპანიის მიერ ქვითრის მომზადებიდან 15 დღის შემდეგ იხდიან. სემეკის ახალი დადგენილებით, არასაყოფაცხოვრებო მომხმარებლებისთვის ეს წესი შეიცვალა.

ახალი ცვლილების მიხედვით, 2023 წლის იანვრიდან, მიმწოდებელსა და არასაყოფაცხოვრებო მომხმარებელს, გარდა მცირე საწარმოსი, შეუძლიათ მიწოდების ხელშეკრულებით შეთანხმდნენ მომსახურების საფასურის გადახდის სხვა ვადაზე. ამ შემთხვევაში, მომსახურების საფასურის გადახდის ვადა არ უნდა იყოს ქვითრის მომზადებიდან 5 კალენდარულ დღეზე ნაკლები.

სემეკის დადგენილებით, „იმ შემთხვევაში, თუ მომხმარებელი განსაზღვრულ ვადაში სრულად არ გადაიხდის მომსახურების საფასურს ან მიმწოდებელი და მომხმარებელი არ შეთანხმდებიან ვალდებულების ეტაპობრივ შესრულებაზე, მიმწოდებელი უფლებამოსილია, შესაბამის სისტემის ოპერატორს მოსთხოვოს ამ მომხმარებლისთვის [დენის] მიწოდების შეწყვეტა [ამ პუნქტის მიზნებისთვის, გადახდა ჩაითვლება სრულად, თუ მომსახურების საფასურის ოდენობას აკლია 2 ლარი ან ნაკლები]“.

ამასთან, „თუ უნივერსალური მომსახურების მიმწოდებელი არ იყენებს [მისთვის მინიჭებულ] უფლებამოსილებას და საყოფაცხოვრებო მომხმარებლის მიერ მომსახურების საფასურის დადგენილი წესით გადაუხდელობის შემთხვევაში, არ წარუდგენს შესაბამის სისტემის ოპერატორს მიწოდების შეწყვეტის თაობაზე მოთხოვნას, კომისია [სემეკი] უფლებამოსილია, საყოფაცხოვრებო მომხმარებლის მოთხოვნის შემთხვევაში, განსაზღვროს მომსახურების საფასურის გადახდის ეტაპობრივი გეგმა.

კომისიის მიერ განსაზღვრული მომსახურების საფასურის გადახდის ეტაპობრივი გეგმით გათვალისწინებული ვალდებულების შესრულების ვადა არ უნდა აღემატებოდეს უნივერსალური მომსახურების მიმწოდებლის ავტორიზაციის ვადას“.

ელექტროენერგიის სფეროში დღეს მოქმედი კანონმდებლობით, დენის „მიწოდების ხელშეკრულებით განსაზღვრული ვალდებულებების შეუსრულებლობისთვის მიწოდების ხელშეკრულებით შეიძლება გათვალისწინებულ იქნეს პირგასამტეხლო“.

თუმცა, პირგასამტეხლოს დაკისრება დაუშვებელია საყოფაცხოვრებო მომხმარებლისთვის [მოსახლეობისთვის] და ეს წესი მხოლოდ არასაყოფაცხოვრებო მომხმარებლებზე ვრცელდება.

სემეკის ახალი დადგენილებით კი, „მომხმარებელს პირგასამტეხლოს გადახდის მოთხოვნა უნდა წარედგინოს შესაბამისი ვალდებულების შეუსრულებლობის ფაქტის დადგომის მომდევნო საანგარიშო პერიოდში. მიმწოდებლის მიერ პირგასამტეხლოს მოთხოვნის უფლების გამოუყენებლობა ჩაითვლება ამ უფლებაზე უარად“.

მოქმედი წესებით, გარკვეულ შემთხვევებში დენის მიმწოდებელს უფლება აქვს მოსთხოვოს [როგორც არასაყოფაცხოვრებო ისე საყოფაცხოვრებო] მომხმარებელს დეპოზიტის წარდგენაც.

სემეკის ახალი დადგენილებით, 2023 წლის 1-ლი თებერვლიდან:

„მიმწოდებელი ვალდებულია, დეპოზიტის დასაბუთებული მოთხოვნა ასახოს ქვითარში, შესაბამისი საფუძვლის მითითებით.

ამასთან, მიმწოდებელი ვალდებულია:

• მომხმარებლის მიერ 12-თვიანი უწყვეტი პერიოდის განმავლობაში მომსახურების საფასურის გადახდის ვადის ორჯერ დარღვევის შემთხვევაში, მომხმარებელს აცნობოს მომსახურების საფასურის გადახდის ვადის მესამედ დარღვევისას დეპოზიტის მოთხოვნის უფლების შესაძლო გამოყენების შესახებ;
• მომსახურების საფასურის გადაუხდელობის საფუძვლით მიწოდების შეწყვეტის შემთხვევაში, მიმწოდებელმა, მიწოდების შეწყვეტიდან 3 თვის შემდეგ, მომხმარებელს უნდა აცნობოს მომსახურების საფასურის 5 ან მეტი თვის განმავლობაში გადაუხდელობის შემთხვევაში, დეპოზიტის მოთხოვნის უფლების შესაძლო გამოყენების შესახებ“.

—

„ელექტროენერგიის საცალო ბაზრის წესები“ სემეკმა 2020 წლის აგვისტოში დაამტკიცა და მასში ცვლილებები იმავე წლის ნოემბერში შეიტანა. ამ ცვლილებების ძალაში შესვლის დღიდან კი, ძალადაკარგულად გამოცხადდა „ელექტროენერგიის (სიმძლავრის) მიწოდებისა და მოხმარების წესები.“

შესაბამისად, დენის მიწოდება-მოხმარებას დღეს „ელექტროენერგიის საცალო ბაზრის წესები“ არეგულირებს, რომელშიც სემეკმა ცვლილება რამდენჯერმე შეიტანა.

ყაზახეთის ყოფილ პრეზიდენტს, ნურსულთან ნაზარბაევს საპატიო სენატორისა და „ერის მამის“ („ელბასი“) წოდებები ჩამოართვეს – ამის შესახებ „მედუზა“ იუწყება.

პარლამენტის ზედა პალატის, სენატის თავმჯდომარის, მაულენ აშიმბაევის განცხადებით, საპატიო სენატორის წოდება, საკონსტიტუციო სასამართლოს გადაწყვეტილების შესაბამისად, სენატის რეგლამენტიდან ამოიღეს.

სასამართლოს გადაწყვეტილებითვე, ძალადაკარგულად გამოცხადდა კანონი „პირველი პრეზიდენტის შესახებ“, რომლითაც ნაზარბაევს პრივილეგიებისა და გარანტიების გარდა, „ელბასის“ წოდება მიანიჭა.

სენატის თავმჯდომარე მაულენ აშიმბაევმა უკვე მოიწვია პარლამენტის ორივე პალატის სხდომა, რომელზეც კანონს საბოლოოდ გააუქმებენ. სხდომა 13 იანვარს უნდა შედგეს.

ნურსულთან ნაზარბაევი ყაზახეთს პრეზიდენტის რანგში 28 წლის განმავლობაში მართავდა. მანამდე, საბჭოთა პერიოდშიც, თავად იყო ამ ქვეყნის პირველი პირი – ცეკას პირველი მდივანი. 2010 წელს კი მას „ერის მამის“ წოდება მიენიჭა. გასული წლის საპროტესტო აქციებამდე, 82 წლის ნაზარბაევი ქვეყნის უშიშროების საბჭოს თავმჯდომარე იყო. ის ხელმძღვანელობდა მმართველ პარტიასაც.

2022 წლის იანვარში ყაზახეთში მასშტაბური ანტი-სამთავრობო გამოსვლები დაიწყო, რომლის დროსაც 200-ზე მეტი ადამიანი დაიღუპა. მომიტინგეთა ერთ-ერთი მოთხოვნა ნაზარბაევის ხელისუფლებიდან ჩამოშორება იყო. მოგვიანებით, ყაზახეთის ხელისუფლებამ ჩაატარა რეფერენდუმი საკონსტიტუციო ცვლილებების შესახებ, რომლის შედეგადაც ნაზარბაევმა და მისმა ოჯახის წევრებმა რიგი პრივილეგიები დაკარგეს.

___

შემოსავლების სამსხურის ინფორმაციით, საბაჟო გამშვებ პუნქტში ,,ყაზბეგი“, ფინანსთა სამინისტროს შემოსავლების სამსახურის საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს თანამშრომლების მიერ, რუსეთის ფედერაციის მხრიდან შემოტანილი 42 250 კილოგრამი კარტოფილის შემოწმების შედეგად, პროდუქტში მცენარეთა სიჯანსაღისა და სურსათის უვნებლობის მოთხოვნებთან შეუსაბამობა გამოვლინდა.

„ამავე საბაჟო გამშვებ პუნქტზე, კანონით დადგენილი კონტროლის პროცედურების განხორციელებისას, ფიტოსანიტრების მიერ, შეჩერებული იქნა 69,867 კუბური მეტრი დახერხილი ხის მასალა.

აღნიშნული მცენარეული წარმოშობის ტვირთი არ შეესაბამებოდა ფიტოსანიტარიულ ნორმებს. საქართველოს მთავრობის N463 დადგენილების შესაბამისად, ზემოაღნიშნული საქონელი უკან, ექსპორტიორ ქვეყანაში გაბრუნებას დაექვემდებარა.“

ბათუმში, ზღვის სანაპიროზე, თამარის დასახლების #1-ში მდებარე ნაკვეთი, რომლის ფართობიც ერთ ჰექტარზე მეტია [16 433 კვ.მეტრი], აჭარის მთავრობამ 16 მილიონ 500 000 ლარად გაყიდა. ქონების საწყისი ღირებულება 10 მილიონ 500 000 ლარი იყო, თუმცა მისი ფასი კონკურენციის პირობებში 6 მილიონით გაიზარდა. ელექტრონული ვაჭრობა 24-ე ბიჯის დადების შემდეგ შპს „სიტი გაიდის“ გამარჯვებით დასრულდა.

შპს „სიტი გაიდი“ 2022 წლის პირველ დეკემბერს დააფუძნეს, კომპანიის ასი პროცენტის მფლობელი კომპანია „ალიანსის“ დამფუძნებლის, გია ბიწაძის მეუღლე, მედეა ბოჭორიშვილია.

აუქციონის პირობების მიხედვით, კომპანიამ საპრივატიზებო საფასური 3 ეტაპად, წინასწარ გაწერილი გრაფიკის მიხედვით, 2024 წლის ივნისამდე უნდა გადაიხადოს. გარდა ამისა, კომპანიამ შესყიდულ ნაკვეთზე 15 მილიონი ლარის ღირებულების ინვესტიციის განხორციელების ვალდებულება აიღო.

აუქციონის პირობის მიხედვით, კომპანიამ აქ მშენებლობა უნდა დაიწყოს, თუმცა პირობაში დაზუსტებული არ არის შენობის ფუნქცია, მიუხედავად იმისა, რომ ნაკვეთი საცხოვრებელ ზონაშია – ამ დროისთვის არ ვიცით, კომპანია აქ საცხოვრებელი კორპუსის აშენებას გეგმავს თუ სასტუმროს.

აუქციონის პირობების მიხედვით, „სიტი გაიდმა“ სამშენებლო პროექტის ესკიზი, შენობის გაბარიტებისა და მოსაპირკეთებელი მასალების შესახებ მონაცემები აჭარის ფინანსთა და ეკონომიკის სამინისტროს ხელშეკრულების გაფორმებიდან 12 თვის ვადაში უნდა წარუდგინოს.  გარდა ამისა, კომპანიამ 24 თვეში, ბათუმის მერიასთან შეთანხმებით, ობიექტის მშენებლობის ნებართვის მიღება და არაუგვიანეს 48 თვის ვადაში მისი ექსპლუატაციაში მიღება-ამოქმედება უნდა შეძლოს.

მიწის ნაკვეთს [ზღვის მხარეს] სახელმწიფოს საკუთრებაში არსებული ტერიტორია ესაზღვრება, რომლის ფართობიც 5 859კვ.მეტრია. დოკუმენტებით დგინდება, რომ სამინისტროს ამ ნაკვეთის გასხვისებაც სურდა, მაგრამ ნაკვეთი საინჟინრო დაცვის მუდმივი მეთვალყურეობის ზოლშია [„საქართველოს ზღვისა და მდინარეთა ნაპირების რეგულირებისა და საინჟინრო დაცვის შესახებ კანონის შესაბამისად] და მასზე სამშენებლო სამუშაოები საქართველოს საავტომობილო გზების დეპარტამენტთან შეთანხმებას საჭიროებს.

დოკუმენტების თანახმად, გზების დეპარტამენტმა აჭარის მთავრობას აცნობა, რომ ნაკვეთის გასხვისების წინააღმდეგი არ არის.

ამავე თემაზე:

ბათუმის ზღვის აკვატორიაში დღეს, 11 იანვარს, ოცამდე თევზმჭერი გემია, რომლებიც ქაფშიას იჭერენ.

საქართველოში შავ ზღვაზე თევზჭერის ლიცენზიას 5 ქართული კომპანია ფლობს. ლიცენზიები 2016-2019 წლებშია გაცემული. აქედან ერთი კომპანიის ლიცენზიის ვადა 2026 წელს იწურება, დანარჩენი 4 კომპანიის ლიცენზიების მოქმედების ვადა კი, 2036 წლამდეა.

თევზჭერის ქართველი ლიცენზიატები ძირითადად თურქული კომპანიების გემებს ქირაობენ და ისე საქმიანობენ.

ამავე თემაზე: