აჭარაში სტიქიის შედეგების სალიკვიდაციოდ 2023 წელს დამატებით 10 მილიონი ლარი გამოიყოფა, რომელიც ექვსივე მუნიციპალიტეტზე [მათ შორის ბათუმზეც] გადანაწილდება.
„ეს 10 მილიონი არის ჯამში იმ საშემოსავლო გადასახადების გადაჭარბებით შესრულებიდან, რაც შემოვიდა აჭარის ბიუჯეტში და ემატება ამ დროისთვის არსებული ეკონომია სხვადასხვა პროგრამიდან“ – განაცხადეს აჭარის ფინანსთა და ეკონომიკის სამინისტროში.
ამავე სამინისტროს ინფორმაციით, თანხა მუნიციპალიტეტებზე გადანაწილდება იმ პრინციპით, „სადაც უფრო მეტი საჭიროება იქნება“. ამ საჭიროებას კი, შესაბამისი სამთავრობო კომისია გადაწყვეტს.
რაც შეეხება კონკრეტულ მოქალაქეებს, „როგორც წესი, მუნიციპალიტეტების მიერ ადგილზე ხდება მათი მდგომარეობის შესწავლა და თუ საჭიროა განსახლება – ოჯახი ჩაერთვება უსაფრთხო საცხოვრისით უზრუნველყოფის პროგრამაში. თუ შესაძლებელია დამეწყრილ ადგილზე ფერდსამაგრის მოწყობა, ან სხვა ტიპის გამაგრება, ამასაც ადგილზე შეისწავლიან და მიიღებენ გადაწყვეტილებას. შესაბამის ინფორმაციას კი, მუნიციპალიტეტები აწვდიან სამთავრობო შერეულ კომისიას, რომელიც სტიქიის შედეგების სალიკვიდაციოდაა შექმნილი“, – აცხადებენ აჭარის ფინანსთა სამინისტროში.
შერეულ სამთავრობო კომისიას აჭარის ჯანდაცვის სამინისტრო ხელმძღვანელობს.
სამინისტროში „ბათუმელებს“ უთხრეს, რომ ეს 10 მილიონი ლარი, ძირითადად, მიმართული იქნება 2023 წელს გამოწვეული სტიქიის შედეგების სალიკვიდაციოდ „ვინაიდან წინა წლების სტიქიის შედეგებიდან გამომდინარე დაგეგმილი ღონისძიებები უკვე გაწერილია მიმდინარე წლის ბიუჯეტში“.
რამდენი განაცხადი შევიდა 2023 წლის იანვრიდან დღემდე კომისიაში, აჭარის ჯანდაცვის სამინისტროში ვერ გვითხრეს.
„მუდმივად შემოდის კომისიაში განცხადებები და სხდომებიც პერიოდულად იმართება. ინფორმაციას სტიქიის შედეგად დაზარალებული კონკრეტული ოჯახების შესახებ, ასევე დაზიანებულ ინფრასტრუქტურაზე, როგორც წესი, კომისიას შესაბამისი მუნიციპალიტეტების მერიები აწვდიან. დეტალური მონაცემები, მათ შორის, წელს შემოსული განცხადებების რაოდენობა, დაზუსტდება მომდევნო სხდომისთვის და ამ ეტაპისთვის საჭირო ღონისძიებებიც გამოიკვეთება“, – გვითხრეს აჭარის ჯანდაცვის სამინისტროში.
კომისიის მორიგი სხდომის ჩატარების თარიღი ჯერ ჩანიშნული არ არის.
სტიქიის შედეგად დაზარალებულთა დასახმარებლად და ინფრასტრუქტურის აღსადგენად 2023 წელს დამატებით 10 მილიონი ლარი რომ გამოიყოფა, ამის შესახებ აჭარის მთავრობამ ინფორმაცია 2 აპრილს გაავრცელა:
- აჭარის ბიუჯეტი 2023 წელს საშემოსავლო გადასახადების სახით, ჯამში, 420 მილიონ ლარს ელოდება.
- 2023 წლის ბიუჯეტში სოციალური და სტიქიის შედეგად დაზარალებული ოჯახებისათვის საცხოვრებელი პირობებით უზრუნველყოფის პროგრამისთვის კი 17 მილიონი ლარია გათვალისწინებული.
ეს პროგრამა ბათუმში, მეჯინისწყლის დასახლებაში, ე.წ „ოცნების ქალაქის“ ტერიტორიაზე მრავალბინიანი საცხოვრებელი სახლების მშენებლობას ითვალისწინებს – „სოციალური და სტიქიის შედეგად დაზარალებული ოჯახებისათვის საცხოვრებელი პირობების გაუმჯობესების მიზნით“.
2023 წელს ბინების გადაცემა 582 ოჯახისთვის იგეგმება.
- ეკომიგრანტი ოჯახების საცხოვრებლით უზრუნველყოფის პროგრამის ფარგლებში კი, ბიუჯეტიდან „საექსპერტო დასკვნებით მოწოდებული საცხოვრებელი ფართობების შესყიდვა ხორციელდება“. ამისთვის წელს 4 მილიონ 80 ათასი ლარია აჭარის ბიუჯეტში გაწერილი.
რამდენი დაზარალებული ითხოვს ამ დროისთვის საცხოვრებელ სახლს, კონკრეტული რაოდენობა უცნობია. ასეთი ოჯახების შესახებ „მყარი სტატისტიკა“ აჭარის მთავრობას არც 3 თვის წინ ჰქონდა, როცა 2023 წლის რესპუბლიკური ბიუჯეტი დაამტკიცეს:
- „სახელმწიფოს მიერ ასობით ეკომიგრანტ ოჯახთა დაკმაყოფილების მიუხედავად, დაზარალებულთა რაოდენობა მნიშვნელოვნად მაინც არ მცირდება, ვინაიდან სტიქიური პროცესები უკონტროლოა და ყოველი უხვი ნალექის მოსვლის დროს აქტიურდება.
- „სტიქიური მოვლენების შედეგად დაზარალებული და გადაადგილებას დაქვემდებარებულ [ეკომიგრანტების] ოჯახების ერთიან ელექტრონულ მონაცემთა ბაზაში“ მუდმივად ხდება ახალი განაცხადების შევსება.
- მიმდინარე ეტაპზე 450-მდე განაცხადია განსახილველი, რომელთა დაზარალება დადასტურებულია შესაბამისი მუნიციპალიტეტების მიერ, ხოლო შესწავლასა და დაზარალების კატეგორიის მინიჭებას ითხოვს დამატებით 50-მდე ბენეფიციარი. ამდენად, ამ მიმართულებით მყარი სტატისტიკა არ შეიძლება გვქონდეს.
- უსაფრთხო გარემოში ადგილმონაცვლეობისათვის, ეკომიგრანტ ოჯახებს ესაჭიროება ფინანსური მხარდაჭერა. პროგრამის ბენეფიციარებს წარმოადგენენ ეკომიგრანტები, რომლებსაც შუამდგომლობს შესაბამისი თვითმმართველი ერთეულები, როგორც მათ ადმინისტრაციულ ტერიტორიაზე სტიქიის შედეგად დაზარალებულ ოჯახებს.
- ბენეფიციართა შერჩევას უზრუნველყოფს უფლებამოსილი კომისია“, – წერია პროგრამაში.
წელს, გაზაფხულის დადგომისთანავე, აჭარაში მეწყრული კერები გააქტიურდა. ბოლო მონაცემებით, საშიში ზონებიდან 200-მდე ოჯახია გაყვანილი.
ვრცლად ნახეთ ამ ბმულზე:
აჭარაში 192 ოჯახი მეწყერსაშიში ზონიდან გაიყვანეს – ეს რიცხვი შესაძლოა გაიზარდოს
