100 ბინა და 300-მდე განაცხადი – ისევ უცნობია, ვის შეხვდება ბინა იაფ სახლში

ბათუმში, ჯავახიშვილის ქუჩაზე, იაფი სახლის პროგრამის ფარგლებში აშენებულ ოთხ კორპუსში ბინები დაკეტილია. მერიაში აცხადებენ, რომ პროგრამის მეორე ეტაპის ფარგლებში განაცხადების მიღება დასრულდა და ახლა მათი გადარჩევა-გადამოწმების პროცესი მიმდინარეობს.

ჯავახიშვილის ქუჩაზე, 4-ხუთსართულიან 4 კორპუსში მერიამ 100 ბინა უნდა გაანაწილოს. შესაბამისი კომისიის გადაწყვეტილებას კი 294 ოჯახი ელოდება.

მერია ამ ეტაპზე ვერ აზუსტებს დაახლოებით რა ვადაში შეძლებს კომისია განაცხადების კრიტერიუმებთან შესაბამისობის მიხედვით გადარჩევას და გადაწყვეტილების მიღებას. როგორც განმარტეს, შესწავლა ეტაპობრივად მიმდინარეობს და პროცესის დასრულება დამოკიდებულია ხარვეზების შევსებაზე – საჭიროების შემთხვევაში დამატებითი დოკუმენტაციის წარდგენის ვადებზე.

გარდა ამისა, აპლიკანტებს ასევე აქვთ გასაჩივრების უფლება უარის მიღებიდან 5 დღის ვადაში, რის შემდეგაც საკითხს საპრეტენზიო კომისია განიხილავს.

ბათუმის მერმა 2021 წლის მარტში გამოსცა  ბრძანება „პროგრამით დაინტერესებული პირების განაცხადების მიღების მეორე ეტაპის დაწყების თაობაზე“. შესაბამისად, განაცხადების გადასარჩევად დრო ნამდვილად ჰქონდათ.

განაცხადების შემსწავლელ კომპანიას, რომელიც მერიამ ტენდერით შეარჩია, ხელშეკრულების შესაბამისად, მომსახურების ვადა აქვს წლის ბოლომდე. ეს იმას ნიშნავს, რომ წლის ბოლოსთვის კომისიას აპლიკანტების გადარჩევა დასრულებული ექნება.

პროგრამის პირველ ეტაპზე მერიამ ბინა 80 ოჯახს, თვითმმართველობის არჩევნების წინ გადასცა. ბინების გასაღებები „ოცნების“  მერობის კანდიდატმა მთავრობის თავმჯდომარესთან ერთად ტელევიზიების კამერების წინ ჩააბარა მესაკუთრეებს.

ამავე თემაზე:

ვის შეუძლია „იაფი სახლის“ პროგრამაში მონაწილეობა – შეცვლილი კრიტერიუმები