ქობულეთის მუნიციპალიტეტის სოფელ ჩაისუბანში ადიდებულმა მდინარემ ხიდი წაიღო. სოფლის მოსახლეობის ინფორმაციით ეს იყო დროებითი ხიდი, რომლითაც მოსახლეობას უნდა ესარგებლა ვიდრე ახალ ხიდს მოაწყობდნენ. არსებული ხიდი 2 დღის წინ დაშალა ტენდერში გამარჯვებულმა კომპანიამ, რომელმაც სოფელში ახალი ხიდი უნდა ამოაწყოს.
„ ვერც მანქანით და ვერც ფეხით ვერ გადავადგილდებით, სამი სოფლის მოსახლეობა, ჩაისუბანი, ხალა და გორგაძეები. მდინარე ადიდა და დროებითი ხიდი წაიღო წყალმა. ახალი ხიდი უნდა გავიკეთონ, მადლობელი ვართ მაგრამ 2 თვე ცუდი ამინდებია მოსალოდნელი და ხიდის გარეშე რა ვქნათ“- ამბობს სელმან დავითაძე.
ჩაისუბნის მცხოვრებლების ინფომაციით ადგილზე ჯერ მთავრობის წარმომადგენლები არ მისულან:
„ველოდებით ტელევიზიას, მთავრობიდან ვინ უნდა მოვიდეს, დღეს შაბათია, უფროსობა ისვენებს. მაგათი შეწუხება როგორ შეიძლება. ყველამ იცის რაც მოხდა, რწმუნებულმაც იცის.“