მაღალმთიან აჭარაში შესწავლილი მეწყრული ზონების შესახებ უკვე გაეგზავნა გეოლოგიური დასკვნების დიდი ნაწილი ხულოს, შუახევისა და ქედის მუნიციპალიტეტებს.
ამის შესახებ „ბათუმელები“ მამუკა ფუტკარაძეს ესაუბრა, აჭარის გარემოსდაცვის და ბუნებრივი რესურსების სამმართველოს გეოლოგიური სამსახურის უფროსს.
მისი თქმით, ხულოს მუნიციპალიტეტში დასკვნები უკვე მომზადდა სოფელ ჭერისა და გურძაულის შესახებ, ხოლო რიყეთის თემისა და მიმდებარე სოფლების შესახებ გეოლოგიური დასკვნები, სავარაუდოდ, მომავალი კვირის დასაწყისში გაიგზავნება.
დასკვნების ნაწილი გაგზავნილია შუახევის სოფელ ბუთურაულში, ნაწილი კი, მამუკა ფუტკარაძის თქმით, შუახევში დღეს, 30 მარტს გაიგზავნა.
ქედაში დასკვნები მეწყრული, კრიტიკული ზონების შესახებ უკვე სრულად მიეწოდა მუნიციპალიტეტის მერიას.
„ჩვენ მიერ გაგზავნილ ახალ დასკვნებში არის, როგორც პრაქტიკული მონაცემები, ასევე მითითებულია მეწყერსაწინააღმდეგო პროფილაქტიკური ღონისძიებები.
არიან ოჯახები, რომელთა განრიდებაც საჭიროა საცხოვრებელი სახლებიდან. მაგალითად, ქედაში 30-32 ოჯახია, შუახევში – 70 ოჯახამდე. ეს მიმდინარე პროცესების მიხედვით გეუბნებით, თორემ ისე შესაძლოა უფრო მეტიც იყვნენ“, – ამბობს მამუკა ფუტკარაძე.
იგი აღნიშნავს, რომ მართალია, ამ ეტაპზე ყველა კრიტიკული მეწყრული ზონა მოინახულა გეოლოგთა ჯგუფმა მაღალმთიან აჭარაში, თუმცა თოვლის დნობის გამო სიტუაცია ყოველდღიურად იცვლება.
„ჩვენ ვსწავლობთ მუნიციპალიტეტებიდან შემოსული მომართვის საფუძველზე მოქალაქეთა საცხოვრებელი სახლების მდგომარეობას.
იმ შემთხვევაში კი, როდესაც ფორსმაჟორული სიტუაციაა და გვატყობინებენ, ყოველ მიზეზგარეშე ავდივართ ადგილზე, არ ველოდებით მუნიციპალიტეტის მომართვას“ – გვითხრა მამუკა ფუტკარაძემ.
გეოლოგი განმარტავს იმასაც, რომ მოქალაქეებს შეუძლიათ დარეკონ საქართველოს გარემოს დაცვისა და სოფლის მეურნეობის ცხელ ხაზზე – 1501-ზე ან 112-ში მეწყრული პროცესებისგან შექმნილი პრობლემის შესახებ.
„ცხელი ხაზის ოპერატორი პირდაპირ მე მატყობინებს, რომ ამ მოქალაქეს ეს პრობლემა აქვს და სანამ მუნიციპალიტეტიდან გვეტყვიან, ჩვენ ვახდენთ შესაბამის რეაგირებას“ – გვითხრა მან.
„ბათუმელებმა“ მაღალმთიანი აჭარის მუნიციპალიტეტების მერიებს ჰკითხა, თუ გაეგზავნათ მოქალაქეებს გეოლოგიური დასკვნა და მუნიციპალიტეტებში მოქმედი პროგრამით, რომელიც საჭიროების შემთხვევაში ბინის ქირით უზრუნველყოფას ითვალისწინებს, ამჟამად რამდენი ოჯახი სარგებლობს.
ქედის მუნიციპალიტეტის პრესსამსახურში გვითხრეს, რომ გეოლოგიური დასკვნა თითოეულ მოქალაქეს გაეგზავნა და ამ ეტაპზე ოჯახები, რომლებიც მეწყერსაშიშ ზონაში ცხოვრობენ, გაყვანილი არიან ქირით.
„დეტალური კვლევების და დასკვნების დასრულების შემდეგ მერია უზრუნველყოფს დაზარალებული ოჯახების საცხოვრებლით უზრუნველყოფის პროგრამაში ჩართვას“, – მოგვწერეს პრესსამსახურიდან.
მერიის ცნობით, ქედაში ჯამში 72 ოჯახია ქირით გაყვანილი და მათგან 66 ოჯახი – მეწყერსაშიშ ზონებში ცხოვრების გამო. დარჩენილი 6 ოჯახი კი, სახლის სიძველის გამო ჩართულია „ძველი სახლის ახლით ჩანაცვლების პროგრამაში“.
„სოფელ გულებში გეოლოგიური დასკვნის საფუძველზე ტერიტორია საჭიროებს დეტალურ კვლევას, რის საფუძველზეც დადგინდება შემდგომი ნაბიჯები“, – მოგვწერეს ქედის მერიის პრესსამსახურიდან.
გეოლოგიური დასკვნების მოქალაქეებისთვის გადაგზავნას ადასტურებენ შუახევის მერიაშიც. „ყველა დასკვნა მიღებულია და დაგზავნილია“, – განგვიმარტეს პრესსამსახურში.
შუახევში ქირით საცხოვრებლად 84 ოჯახია გაყვანილი. აქედან 78 ოჯახი – მეწყერსაშიშ ზონაში ცხოვრების გამო.
„ეს რიცხვი შეიცვლება გეოლოგიური დასკვნების მიღების მიხედვით, რადგან გეოლოგიური დასკვნები კიდევ შემოდის“, – აზუსტებენ მერიაში. პროგრამით მოსარგებლე 84 ოჯახიდან 3 – სიძველით ამორტიზებულ საცხოვრებელ სახლში, 3 ოჯახი კი ზვავსაშიშ ზონაში ცხოვრების გამოა გადაყვანილი საცხოვრებლად ქირით.
ხულოში ბინის ქირით უზრუნველყოფის პროგრამით 61 ოჯახი სარგებლობს, მათგან 13 თავშესაფრის არმქონეა, ხოლო 48 – სტიქიის შედეგად დაზარალებული.
„გეოლოგიური დასკვნა ამ დროისთვის შემოსულია 5 ოჯახზე, რომლებსაც მუნიციპალიტეტი უხდის ქირას“, – მოგვწერეს ხულოს პრესსამსახურიდან.
ქედაში, შუახევსა და ხულოში, ბოლო პერიოდში განვითარებული მეწყრული პროცესების გამო, მოქალაქეები ხშირად მიმართავენ მერიას გეოლოგების მოწვევის, დეტალური კვლევების და ქირით გაყვანის საკითხებთან დაკავშირებით.
მთავარ ფოტოზე: მეწყრული პროცესი ხულოს სოფელ ბეღლეთში
