Batumelebi

შემოსავლების სამსახურის განცხადებით, საბაჟო გამშვებ პუნქტ „ყაზბეგში“ ფინანსთა სამინისტროს შემოსავლების სამსახურის საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს თანამშრომლების მიერ უცხო ქვეყნიდან შემოტანილი 42 500 კგ. ხახვისა და 20 000 კგ. კარტოფილის შემოწმების შედეგად, პროდუქტებში მცენარეთა სიჯანსაღისა და სურსათის უვნებლობის მოთხოვნებთან შეუსაბამობა გამოვლინდა.

„ასევე, გაბრუნებას დაექვემდებარა საბაჟო გამშვებ პუნქტში – „წითელი ხიდი“ უცხო ქვეყნიდან შემოტანილი 20 735 კილოგრამი კივი. ტვირთს თანმხლები დოკუმენტაციის შეუსაბამობა გამოუვლინდა.“ – აცხადებს სამსახური.

საქართველოს მთავრობის N463 დადგენილების შესაბამისად, ზემოაღნიშნული ტვირთები უკან, ექსპორტიორ ქვეყანაში გაბრუნებას დაექვემდებარა.

ფინანსთა სამინისტროს საგამოძიებო სამსახურის ინფორმაციით, ყალბი დოკუმენტებით სახელმწიფო ბიუჯეტის კუთვნილი თანხის თაღლითურად დაუფლების ფაქტზე ორ პირს ბრალი წარუდგინეს.

„ბრალდებულებმა, უკანონო მატერიალური სარგებლის მიღების მიზნით, მათი მართვის ქვეშ მყოფი კომპანიების სახელით გაწერეს ყალბი ანგარიშ-ფაქტურები, რის შედეგადაც თავისივე კომპანიების სახელზე შექმნეს ჯამში 346 367 ლარის ყალბი აქტივი, საიდანაც 337 144 ლარის ყალბი აქტივი სრულად იქნა გამოყენებული ბიუჯეტის მიმართ არსებული საგადასახადო ვალდებულებების დასაფარად.

ხოლო, 9 223 ლარის ფიქტიურ აქტივს ბრალდებულები თაღლითური გზით დაეუფლნენ“ – წერს საგამოძიებო.

გამოძიება მიმდინარეობს საქართველოს სისხლის სამართლის კოდექსის 210-ე მუხლის მე-2 ნაწილის „ა“, 185-ე მუხლის მე-2 ნაწილის „ა”, მე-3 ნაწილის „ბ“ და 180-ე მუხლის მე-2 ნაწილის „ბ“ ქვეპუნქტით, რაც სასჯელის სახედ ითვალისწინებს თავისუფლების აღკვეთას 4-დან 7 წლამდე ვადით.

შინაგან საქმეთა სამინისტროს ამ დრომდე არ დაუწყია გამოძიება ბათუმის დელფინარიუმთან გუშინ, 5 თებერვალს, მომხდარ შემთხვევაზე: დელფინარიუმის დაცვის თანამშრომლებმა მშვიდობიანი შეკრების მონაწილეებს პლაკატი წაართვეს და ქვაფენილზე ათრიეს.

შსს-ს პრესცენტრში ვერ გვითხრეს, რის გამო დატოვა რეაგირების გარეშე სამართალდამცავმა უწყებამ ფიზიკური ძალადობის ეს შემთხვევა.

დელფინარიუმთან აქცია არასამთავრობო ორგანიზაცია „ვეგან ჯორჯიამ“ მოაწყო ლოზუნგით – „დელფინარიუმი ციხეა“. მშვიდობიანი შეკრების მონაწილეებთან დელფინარიუმის დაცვის თანამშრომლები მივიდნენ და ტერიტორიის დატოვება მოსთხოვეს, შემდეგ ფიზიკური ძალის გამოყენებით პლაკატი წაართვეს, სიტყვიერი შეურაცხყოფა მიაყენეს და ქვის ფილებზე ათრიეს.

„ვწუხვართ“ – მოგვწერეს დღეს, 6 თებერვალს, ბათუმის დელფინარიუმიდან, სადაც ვიკითხეთ, რა რეაგირება მოჰყვა დელფინარიუმის თანამშრომლების მხრიდან ჩადენილ ძალადობას.

„ვწუხვართ დელფინარიუმის დაცვის თანამშრომლებისა და საქართველოსა და რუსეთის მოქალაქეებს შორის გუშინ მომხდარი ინციდენტის გამო. დელფინარიუმის ადმინისტრაცია დაელოდება გამოძიების შედეგებს,“ – მოგვწერეს ბათუმის დელფინარიუმის ოფიციალურ ფეისბქუჩათში. დელფინარიუმის პრესცენტრში ჩვენს სატელეფონო ზარს არ უპასუხეს, ცხელ ხაზზე კი, დაგვპირდნენ, რომ თავად დაგვიკავშირდებოდნენ, თუმცა არავინ დაგვკავშირებია.

აქ გვინდოდა გვეკითხა, მაგალითად, დაიწყო თუ არა საქმისწარმოება დელფინარიუმმა ძალადობის ამ შემთხვევაზე.

„როცა ასეთ ფაქტებზე რეაგირება არ ხდება, ეს იწვევს ძალადობრივი ქმედების წახალისებას. სახელმწიფო და ამ შემთხვევაში სახელმწიფოს წარმოადგენს შსს, ახალისებს ძალადობას. სახელმწიფოს აქვს ვალდებულება, მშვიდობიანი აქციის მონაწილეები დაიცვას,“ – ამბობს პაატა დიასამიძე, საიას აჭარის ფილიალის ხელმძღვანელი.

საიას იურისტის თქმით, ამ კონკრეტულ შემთხვევაში იკვეთება სისხლის სამართლის კოდექსის 161-ე მუხლის შემადგენლობა, რაც გულისხმობს შეკრების ან მანიფესტაციის მოწყობის ანდა მასში მონაწილეობის უფლების განხორციელებისათვის უკანონოდ ხელის შეშლას ძალადობით, ძალადობის მუქარით ან სამსახურებრივი მდგომარეობის გამოყენებით.

ეს მუხლი ითვალისწინებს სასჯელის სახით ჯარიმას, ან გამასწორებელ სამუშაოს ვადით ერთ წლამდე, ან/და თავისუფლების აღკვეთას ვადით ორ წლამდე.

პაატა დიასამიძე ყურადღებას ამახვილებს ბოლოდროინდელ ტენდენციაზე, როცა სამართალდამცავი უწყება არათუ რეაგირებს კონსტიტუციით გარანტირებული უფლების ხელყოფის შემთხვევებზე, არამედ თავად არღვევს ადამიანის უფლებებს, მაგალითად, მოქალაქე ზურაბ ქარჩავას ასევე მშვიდობიანი აქციის ფორმით სურდა აჭარის მთავრობის სახლთან პროტესტის გამოხატვა, თუმცა მას 2022 წლის 29 დეკემბერს პოლიციელებმა კარავი ჩამოართვეს და დააკავეს.

სამართალდარღვევის ოქმი, რომელიც ზურაბ ქარჩავას დაკავების დროს პოლიციელებმა შეადგინეს, ამ დრომდე არ შესულა სასამართლოში. არც რომელიმე პოლიციელი დაუსჯია ვინმეს ამ საქმეზე.

„ეს ფაქტობრივი აღიარებაა, რომ არანაირი სამართალდარღვევა არ ყოფილა ზურაბ ქარჩავას მხრიდან.

სახელმწიფოს მხრიდან არასათანადოდ, უმნიშვნელო ფაქტად აღიქმება კონსტიტუციით დაცულ სფეროში ჩარევა. მსგავს შემთხვევებზე უნდა ხდებოდეს მყისიერი და ადეკვატური რეაგირება, უმოქმედობა კი, ახალისებს ძალადობრივ ქმედებას,“ – გვითხრა პაატა დიასამიძემ, საიას აჭარის ფილიალის ხელმძღვანელმა.

დღეს, 5 თებერვალს, ბათუმში, დელფინარიუმთან მშვიდობიანი აქცია გაიმართა ლოზუნგით – „დელფინარიუმი ციხეა“.

აქციის ორგანიზატორი არასამთავრობო ორგანიზაცია „ვეგან ჯორჯია“ იყო. აქციის მონაწილეები და აქტივისტები დელფინარიუმის არსებობას აპროტესტებდნენ.

„თბილისიდან ჩამოვედი ჩემს მეგობარ, თანამებრძოლ აქტივისტებთან ერთად. დელფინარიუმი არის ერთ-ერთი ყველაზე სასტიკი დაწესებულება, ისევე როგორც ცირკი და ზოოპარკი, სადაც ხდება ცხოველებისადმი არასათანადო მოპყრობა.

ჩამოვედით აქ, რათა გავაპროტესტოთ აღნიშნული და მოსახლეობას მივაწოდოთ ინფორმაცია იმის შესახებ, თუ რა გზას გადის დელფინი მანამ, სანამ შეასრულებს გარკვეულ პერფორმანსს. ამას წინ უძღვის დელფინის ჩამოშორება საკუთარი საცხოვრებელი გარემოსგან, ოჯახისგან მოწყვეტა, ისინი იღუპებიან მალე.

ჩვეულებრივ პირობებში, როცა დელფინს შეუძლია დღეში 100 კილომეტრამდე იცუროს, დელფინარიუმში ისინი მთელ ცხოვრებას პატარა, ჩაკეტილ აუზში ატარებენ, რის გამოც  განიცდიან მენტალურ და ფიზიკურ ტანჯვას.

დავამზადეთ ფლაერები ქართულ და ინგლისურ ენაზე, სადაც არის ინფორმაცია იმის შესახებ, რომ დელფინარიუმი არის ციხე და დელფინები იტანჯებიან ტყვეობაში“. – უთხრა ბათუმელებს აქციის ერთ-ერთმა მონაწილემ, ნინი ტურიაშვილმა.

აქციის მონაწილეების თქმით, დელფინები რეაბილიტაციის შემდეგ მათ ბუნებრივ არეალში უნდა დაბრუნდნენ, ხოლო ისეთი დაწესებულება, როგორიც დელფინარიუმია, უნდა დაიხუროს.

მშვიდობიანი აქციის მიმდინარეობისას მონაწილეებთან დელფინარიუმის დაცვის თანამშრომლები მივიდნენ და აქციის მონაწილეებს ჯერ ტერიტორიის დატოვება მოსთხოვეს, მოკლე ხანში კი, ფიზიკური ძალის გამოყენებით შეეცადნენ პლაკატი წაერთმიათ მათთვის, რა დროსაც აქციის მონაწილეები ასფალტზე ათრიეს და მათ სიტყვიერი შეურაცხყოფაც მიაყენეს.

ადგილზე გამოიძახეს საპატრულო პოლიცია. „ბათუმელები“ ინფორმაციას შს სამინისტროში აზუსტებს.

ბათუმის დელფინარიუმი ბათუმის მერიას ეკუთვნის. 2021 წლის ნოემბრის მონაცემებით, დელფინარიუმში 20 დელფინი ბინადრობს.

დღეს ბათუმელ გარემოვაჭრე ქალებზე, 77 წლის თინიკო მელაძესა და 81 წლის თამარა გიორგაძეზე მოგიყვებით.

თამარა – 30, თინიკო კი 15 წელია რაც გარემოვაჭრეები არიან. ორივეს ქუჩაში წინ პატარა დახლი უდგას და ყიდიან: პარკებს, სავარცხლებს, ხელსახოცებს, წებოებს, ელემენტებსა და ასეთ წვრილმანებს.

როცა თინიკოს შევხვდით, იგი ცელოფნის გრძელ პარკს სარეცხის სამაგრი სარჭებით პატარა, ძველი მაგიდის კიდეებს ამაგრებდა. საუბარზე დაგვთანხმდა, დახლზე გასაყიდი ნივთების ამოლაგება დაიწყო და პარალელურად გვიყვებოდა იმის შესახებ, რომ პროფესიით მედდაა, კლინიკაშიც უმუშავია და იმაზე, თუ რატომაა იძულებული სიცივეში, ქარში მთელი დღე 5-სართულიანი კორპუსის კედელთან, ქუჩის კიდეში იდგეს და ყიდდეს ნივთებს, რომელსაც, მისი თქმით, ბევრი მყიდველი არც ჰყავს.

„ამ მთავრობის შემხედველი რა უნდა გავაკეთო, რა ვიცი, არ ეხმარებიან არავის. მე ისეთი ხალხი ვნახე ტელევიზიაში, სახლიც რომ არ ჰქონიათ და ქუჩაში ათენებენ ღამეს. ძალიან მეტკინა გული.

პენსიონერი, ასაკოვანი, მარტოხელა ვარ. რომ მივედი სოციალური დახმარება მომცეთ იქნებ-მეთქი, ქულა მეტი გაქვსო, არ მომცეს. ძველებური ავეჯის, რაღაც ჯართი საწოლისა და ტელევიზორის მეტი არაფერი მაქვს, მაგრამ ქულა მაღალი გაქვსო.

ქმარი რომ მყოლოდა, 2 პენსიით ვირჩენდით თავს, არ გამოვიდოდი, მაგრამ რა ვქნა, უცებ დამაკლდა ქმარი გულის შეტევით. ეს ცხოვრება ვერ აიტანა.

6 შვილი, შვილიშვილები, შვილთაშვილები მყავს, მაგრამ ყველას ოჯახები, თავიანთი პრობლემები აქვთ. დღეს ისეთი დაძაბული ცხოვრებაა ამ ქვეყანაში, მე როგორ უნდა მომხედონ, ისინიც წვალობენ, ბანკის ვალები, ეს, ის… და ვარ ასე, ვწვალობ და ვჯახირობ მარტო.

მე როგორ უნდა დავეხმარო [შვილებს], მარტო პენსია მაქვს და აქ რას გავაკეთებ, 5-6 ლარი.

არ მეყო პენსია და ამიტომ გამოვედი გარეთ. კი არ მინდა, არ შემიძლია გარეთ გამოსვლა, მაგრამ თავს ზევით ძალა არ არის, უნდა შევძლო და თავი ვირჩინო.

ერთი წერტილი მაქვს ამორჩეული, მოვალ აქ, დავდგები და ვყიდი წვრილმან ნივთებს, რომლებიც ნისიად მომაქვს.

შაქარს ვიყიდი, პურს ვიყიდი, თავი ხომ უნდა ირჩინო. ხომ ხედავთ, ცეცხლის ფასი ეკიდება ყველაფერს. კარაქი, ყველი… ყველაფერი ძალიან ძვირია.

ნამდვილად არ ვარ კმაყოფილი დღევანდელი ცხოვრებით, ძალიან ცუდ სიბერეს მოვესწარი“, – გვითხრა თინიკომ.

თინიკო 15 წელია ცხოვრობს ბათუმში, გვითხრა, რომ მანამდე გურიაში ცხოვრობდა.

თინიკო წუხს, რომ დილით სახლიდან 12, პირველ საათამდე ადრე ვაჭრობისთვის გამოსვლას ვერ ახერხებს, რადგან აუცილებლად უნდა დალიოს წამლები დილაობით. ვერც გვიანობამდე მუშაობს, ეშინია, სიბნელეში სახლისკენ მიმავალი გზა არ აებნეს.

ავდარშიც იძულებულია სახლში დარჩეს, რათა ჯანმრთელობის მდგომარეობა არ გაუუარესდეს.

თინიკო ამბობს, რომ მარტო ცხოვრობს: „ყველა შორს არიან წასულ-წამოსულები. ჩემი შვილი საზღვარგარეთ წავიდა. აქ რომ იმუშავა, ხელფასი არავინ არ გადაუხადა და არაფერი. საზღვარგარეთ წავიდა და დამეკარგა“.

თინიკოს დახლის ახლოს დგას თამარა გიორგაძის დახლიც.

თამარა დილით ადრე იწყებს მუშაობას და დახლსაც შებინდების შემდეგ ალაგებს, თუმცა მიუხედავად ამისა, მეც მხოლოდ 5-6 ლარს თუ გამოვიმუშავებო – გვითხრა.

წლების წინ თამარა საკონსერვო ქარხანაში მუშაობდა. ეს ქარხანა 30 წლის წინ დაიხურა და მას შემდეგ გარემოვაჭრეობით ვირჩენ თავსო – ამბობს თამარა.

„რა უნდა გაყიდო, ყველას ასე აქვს [ნივთები გასაყიდად] გამოტანილი ქუჩაში. ჩემისთანა მილიონი გარემოვაჭრეა.

რა უნდა გააკეთო პენსიით. 250 ლარი წამლებში არ მყოფნის. აქაც, [გარემოვაჭრედ] წამლების გულისთვის ვარ გამოსული. გული მაწუხებს.

ჩემი ძმისშვილის სახლში ვცხოვრობ, შვილები არ მყავს.

საკვების ფასი გაიზარდა. ფული ვის ჰყოფნის ახლა. ფულს ფასი, კურსი აღარ აქვს.

ძვირიან პროდუქტებს ვერ ვყიდულობ. ხორცს ვერ იყიდი, ვერც ყველს, ძვირია. 20 ლარი ღირს ერთი კილო ყველი და ამხელა ნაჭერს ხომ არ იყიდი [ხელებით გვაჩვენებს მომცრო ოთხკუთხედის ფორმას].

ბოლოს ხორცი არ ვიცი როდის ვჭამე“, – გვითხრა ქალმა.

თამარა მხოლოდ კვირა დღე არ გამოდის ქუჩაში სავაჭროდ, ეკლესიაში დავდივარ კვირაობითო, ასე გვითხრა.

ქობულეთის სანაპიროზე, აღმაშენებლის #285-ში შპს „ქობულეთი რიზორთი“ მრავალფუნქციური ობიექტის მშენებლობას გეგმავს. პროექტის  განაშენიანების დეტალური გეგმა [გდგ] მერიის ინიცირებით ქობულეთის საკრებულომ 31 იანვარს დაამტკიცა ისე, რომ დოკუმენტი საჯაროდ არ გამოუქვეყნებიათ.

იმის გამო, რომ განაშენიანების დეტალური გეგმა არ გაასაჯაროვეს, არ ვიცით, ზუსტად რა მასშტაბის შენობის ან შენობების აშენებას გეგმავს აქ კომპანია – ეს ინფორმაცია წარმომადგენლობითმა ორგანომ საკუთარ ამომრჩეველს დაუმალა. 

განკარგულების პროექტის მიხედვით მხოლოდ იმის გარკვევა შეიძლება, რომ ზღვასთან ახლოს, ყოფილი სასტუმრო „კოლხეთის“ ტერიტორიაზე მრავალფუნქციური ობიექტი უნდა აშენდეს. მშენებელ კომპანიას, შპს „ქობულეთი რიზორთს“, აქ 2 ჰექტრამდე ფართობი [ 19 767 კვ. მეტრი] აქვს დარეგისტრირებული.

შპს „ქობულეთი რიზორთის“  მიერ წარდგენილი განაშენიანების დეტალური გეგმის დამტკიცების თაობაზე დადგენილების პროექტი და მასთან დაკავშირებული რამდენიმე დოკუმენტი  საკრებულოს ერთ-ერთმა წევრმა გამოგვიგზავნა, განაშენიანების დეტალური გეგმა [გდგ] კი არც მისთვის მიუწოდებიათ.

მიუხედავად იმისა, რომ საჯაროობასა და ღიაობას საკრებულოს თვითმმართველობის კოდექსი ავალდებულებს, განკარგულებების პროექტების გამოქვეყნების პრაქტიკა ქობულეთის საკრებულოს ჯერ კიდევ არ აქვს დანერგილი.  სხდომაზე დასამტკიცებელი საკითხების პროექტებს ქობულეთის საკრებულო ვებგვერდზე არც  მათი დამტკიცების შემდეგ აქვეყნებს, ქვეყნდება მხოლოდ ჩამონათვალი.

• როგორ დამალა განაშენიანების გეგმა ქობულეთის მერიამ 

ამ შემთხვევაში ქობულეთის მერიამ  დამალა განაშენიანების დეტალური გეგმა, არ გამოაქვეყნა და დაჟინებული მოთხოვნის მიუხედავად ის არც ჩვენ მოგვაწოდა, მიუხედავად იმისა, რომ მერიას, როგორც წარმომადგენლობით ორგანოს, მსგავსი შინაარსის დოკუმენტის არამხოლოდ  გასაჯაროების, არამედ მისი საჯაროდ განხილვის, დაინტერესებულ მოქალაქეებთან შეხვედრის უზრუნველყოფის ვალდებულებაც აქვს.

არაერთი მცდელობის მიუხედავად ქობულეთის მერიის პრესსამსახურმა ვერ მოგვაწოდა ბმული, სადაც დოკუმენტი ატვირთული იქნებოდა ვერც მისი ჩვენთვის გადმოგზავნა შეძლო. ქობულეთის მერის მოადგილე დავით ვერულიძე კი სატელეფონო საუბარში გვიმტკიცებდა, რომ კანონით მოთხოვნილი პროცედურა დაცულია და დოკუმენტი ატვირთულია. „მე როგორც ვიცი, არის“ – გვითხრა მან.

იმის დასამტკიცებლად, რომ კანონით მოთხოვნილი პროცედურა დაცულია, მერის მოადგილემ, დავით ვერულიძემ ორი ბმული გადმოგვიგზავნა. აქედან ერთზე  შპს „ქობულეთი რიზორთის“ დირექტორის განცხადებაა ატვირთული, რომლითაც ის ქობულეთის მერს, ლევან ზოიძეს სამშენებლო მოედანზე საინფორმაციო ბანერის განთავსების თაობაზე ატყობინებს, მეორე ბმულზე კი სხვა კომპანიის და  შესაბამისად, სხვა პროექტის შესახებაა ინფორმაცია განთავსებული.

მოგვიანებით ქობულეთის მერიის პრესსამსახურში განგვიმარტეს, რომ დოკუმენტს მერიის არქიტექტურისა და სივრცითი მოწყობის სამსახური „საკანონმდებლო მაცნეზე“ გამოაქვეყნებდა და იქ შეგვეძლებოდა დოკუმენტს გავცნობოდით. ასე სამსახურის უფროსის მოვალეობის შემსრულებელმა, ნათია ბასილაშვილმა გადაწყვიტა.  პრესსამსახურმა გვითხრა ასევე, რომ დოკუმენტს „მალე“ ატვირთავდნენ.

ნათია ბასილაშვილი არქიტექტურის სამსახურის უფროსის მოვალეობას ასრულებს, მას შემდეგ რაც ეს თანამდებობა ასლან ქათამაძემ დატოვა. განაშენიანების დეტალური გეგმის საჯაროდ განხილვის მოწყობა, მანამდე კი დოკუმენტის გასაჯაროება, მისი მოვალეობაც არის, თუმცა როგორც ჩანს სამსახურის უფროსის მოვალეობის შემსრულებლისთვის კანონის მოთხოვნა არაფერს ნიშნავს.

საკანონმდებლო მაცნეზე „მალე“ ატვირთეს მხოლოდ  დამტკიცებული დადგენილება, განაშენიანების გეგმა კი, სხვა პროექტებისგან განსხვავებით, ამჯერად არც საკანონმდებლო მაცნეზე გამოაქვეყნეს. მეტი სიზუსტისთვის ბმულის გადამოწმება სხვა ორგანიზაციებსაც ვთხოვეთ, მათაც დაგვიდასტურეს, რომ შპს „ ქობულეთი რიზორთის“ განაშენიანების დეტალური გეგმა საკანონმდებლო მაცნეზე ატვირთული არ არის.

გარდა იმისა, რომ წარმომადგენლობით ორგანოს საჯაროობის პრინციპის დაცვას თვითმმართველობის კოდექსი ავალდებულებს, სივრცის დაგეგმარების ნებისმიერი დოკუმენტის გამოქვეყნების წესს ნებართვის გამცემ უწყებას ასევე ავალდებულებს საქართველოს მთავრობის 260-ე დადგენილება.

მთავრობის დადგენილების მიხედვით, სივრცის დაგეგმარებასთან დაკავშირებული ნებისმიერი პროექტის საჯარო განხილვა სავალდებულოა.  საჯარო განხილვის შესახებ ინფორმაცია ინიციატორის ოფიციალურ ვებგვერდზე უნდა გამოქვეყნდეს საჯარო განხილვამდე არანაკლებ 30 სამუშაო დღით ადრე. ამ წესით ასევე დადგენილია, რას უნდა მოიცავდეს განცხადება საჯარო განხილვის შესახებ.

„ნებისმიერ პირს აქვს უფლება, მონაწილეობა მიიღოს სივრცის დაგეგმარების გეგმების/ქალაქთმშენებლობითი გეგმების კონცეფციის/ პროექტის განხილვის პროცესში ორგანიზებულ საჯარო განხილვებში, რომელიც იმართება ინფორმაციის გამოქვეყნებიდან არაუგვიანეს 40 სამუშაო დღისა.

ასვე, ქალაქმშენებლობითი დოკუმენტების შემუშავების წესის მიხედვით საჯარო განხილვის დასრულებიდან არანაკლებ 15 სამუშაო დღის განმავლობაში ნებისმიერ პირს აქვს უფლება, ინიციატორს წერილობით წარუდგინოს საკუთარი შენიშვნები გეგმარებით დოკუმენტთან დაკავშირებით.

• რა კავშირი აქვს კახი კალაძეს შპს „ქობულეთი რიზორთ დიველოფმენთთან“

მიწის ნაკვეთი, რომელზეც მშენებლობაა დაგეგმილი, თბილისის მერმა კახა კალაძემ 2019 წელს 10 მილიონ აშშ დოლარად გაყიდა, თუმცა საჯარო რეესტრის ამონაწერში ის კრედიტორად ფიქსირდება. საქმე ისაა, რომ  ხელშეკრულების მიხედვით, მყიდველმა, შპს „ქობულეთი რიზორთ დიველოფმენთმა“  კახა კალაძეს 10 მილიონი დოლარი [ეკვივალენტი ლარში] 5 წლის განმავლობაში უნდა გადაუხადოს:

„ნასყიდობის ფასის სრულად გადახდამდე, შპს „ქობულეთი რიზორთ დიველოფმენთს“ გამყიდველის წერილობითი თანხმობის გარეშე არ აქვს უფლება, განახორციელოს შპს „კოლხეთის“ კაპიტალში 100%-იანი წილის მთლიანად ან ნაწილობრივი გასხვისება ან/და უფლებრივად დატვირთვა. საფუძველი: 02.12.2019წ. წილის ნასყიდობის ხელშეკრულება.

„ქობულეთი რიზორთის“ 100 პროცენტი „ქობულეთი რიზორთ დეველოპმენტს“ ეკუთვნის. ამ კომპანიას რამდენიმე მესაკუთრე ჰყავს, მათ შორის არის საქართველოს პარლამენტის ყოფილი წევრი „ოცნებიდან“ – თენგიზ წულაია.

31 დეკემბერს ქობულეთის საკრებულომ  კიდევ ერთი განაშენიანების გეგმა დაამტკიცა – პროექტი მეგობრობის ქუჩაზე სამი საკადასტრო ერთეული გაერთიანებას [ N10, N12, N14-ში]  და აქ მრავალფუნქციური კომპლექსის მშენებლობას ითვალისწინებს. ეს დოკუმენტი ქობულეთის საკრებულოს არ დაუმალავს და ის საკანონმდებლო მაცნეზე ატვირთეს.

• „მახინჯი პრაქტიკა და კანონდარღვევა“ – საიას შეფასება

„ეს არის არა მხოლოდ  მახინჯი პრაქტიკა, არამედ კანონის დარღვევა“ – ასე აფასებს ქობულეთის  მერიისა და საკრებულოს მიერ გდგ დოკუმენტის დამალვას საქართველოს იურისტთა ასოციაციის [საია] ბათუმის ორგანიზაციის თავმჯდომარე.

პაატა დიასამიძე თავადაც უწევს მონიტორინგს როგორც ქობულეთის, ასევე აჭარაში მოქმედი სხვა მუნიციპალიტეტების მუშაობას და ამბობს, რომ არამხოლოდ გდგ დოკუმენტი, არამედ დადგენილებებისა და განკარგულებების პროექტები საჯარო და მისაწვდომი უნდა იყოს ნებისმიერი დაინტერესებული მოქალაქისთვის:

„საკრებულოს მეშვეობით ჩვენ ვახორციელებთ წარმომადგენლობით დემოკრატიას.

როცა ჩვენს მიერ არჩეული დეპუტატის მიერ ხდება გადაწყვეტილების მიღება საზოგადოების, ამომრჩევლის წინაშე, ის ანგარიშვალდებულია ამომრჩეველთან და ისეთ მნიშვნელოვან თემებზე გადაწყვეტილების მიღებისას, რაც საზოგადოებას ეხება,  მით უმეტეს, როცა ეს ქალაქის განაშენიანებასთან არის კავშირში, საზოგადოების ჩართულობა აუცილებელია გადაწყვეტილებების მიღებისას. ეს ნიშნავს, რომ ხელმისაწვდომი უნდა იყოს ყველა ინფორმაცია.

როცა გადაწყვეტილების შემდეგაც დოკუმენტის ხელმისაწვდომობაზე პრობლემაა… ვნახეთ ჩვენ, რომ მაცნეზეც კი არ აქვთ განთავსებული, გარდა დადგენილებისა. ამ დადგენილებაში არაფერი იკითხება იმის გარდა, რომ დამტკიცდა პროექტი, რომელიც დადგენილებას თან ახლავს. მაგრამ მაცნეზე ეს დანართი არ არის. მით უმეტეს, რომ მიმართეთ ამ დოკუმენტზე და არ მოგცეს.

ეს არის მახინჯი პრაქტიკა. რა ფორმითაც არ უნდა მოგეთხოვათ დოკუმენტი, რომელიც ვებგვერდზე უნდა იყოს განთავსებული, ყველა შემთხვევაში უნდა მიგეღოთ“.

კიდევ ერთი საინტერესო დეტალი:  საყურადღებოა ისიც, რომ 31 იანვარს საკრებულომ კიდევ ერთი გდგ დოკუმენტი დაამტკიცა, რომელიც ატვირთა კიდეც. საიას აჭარის ორგანიზაციის თავმჯდომარის შეფასებით, ეს დამატებითი ეჭვების საფუძველი შეიძლება იყოს:

„ეჭვი გვიჩნდება უკვე, რომ რაღაც ინფორმაცია დამალეს. მით უმეტეს, რომ იციან, რომ საზოგადოებაში კითხვა გაჩნდა და ამაზე თქვენ მათ ესაუბრეთ ტელეფონით, თუმცა ამ კითხვებს რეაგირება არ მოჰყვა.

ეს ეჭვებს ამძაფრებს. ეს არის კანონის დარღვევა“.

ბათუმში შოთა რუსთაველის სახელმწიფო უნივერსიტეტში სწავლის საფასურის გადაუხდელობის გამო სტატუსშეჩერებულ სტუდენტებზე ბსუ-ს წარმომადგენლობითმა საბჭომ იანვრის ბოლოს გადაწყვეტილება მიიღო.

• საბჭოს გადაწყვეტილებით, სტუდენტებს შეჩერებული სტატუსი იმ შემთხვევაში აღუდგებათ, თუ უნივერსიტეტში შიდა მობილობისას სწავლის საფასურს დაფარავენ.

ამ შემთხვევაში სტუდენტის სტატუსის დასაბრუნებლად ახალგაზრდებს ფაქტობრივად 10 დღე აქვთ – ბსუ-ში შიდა მობილობა 2023 წლის 6 თებერვალს იწყება და 15 თებერვალს მთავრდება.

თუ დავალიანებას სტატუსშეჩერებული სტუდენტები შიდა მობილობის დამთავრებამდე ვერ დაფარავენ, მათ შეუძლიათ სტუდენტის სტატუსის გააქტიურება, ოღონდ:

• პირადი განცხადების საფუძველზე სტატუსშეჩერებულ სტუდენტს – იმ შემთხვევაში შეუძლია სტატუსის აღდგენა, თუკი შესაბამისი სემესტრის დაწყებამდე [გამონაკლის შემთხვევებში – არაუგვიანეს სემესტრის დაწყებიდან 14 დღეში] სრულად დაფარავს სწავლის საფასურის დავალიანებას;
• დამამთავრებელი სემესტრის სტუდენტს კი – იმ შემთხვევაში, თუკი მას სტატუსის შეჩერებამდე სრულად აქვს შესრულებული შესაბამისი პროგრამის მოთხოვნები, სრულად დაფარავს სწავლის საფასურის დავალიანებას და წარმოადგენს განცხადებას კვალიფიკაციის მინიჭების თაობაზე.

ბსუ-ს წარმომადგენლობითი საბჭოს ახალი გადაწყვეტილებით:

• „სწავლის საფასურის დავალიანების მქონე დამატებითი სემესტრის სტუდენტს უწყდება ბსუ-ს სტუდენტის სტატუსი“.

ამავე გადაწყვეტილების მიხედვით:

• 2021-2022 სასწავლო წლის შემოდგომის სემესტრის ჩათვლით სწავლის საფასურის დავალიანების მქონე იმ სტუდენტთა მიმართ, რომლებსაც გადაუვადდათ სწავლის საფასურის გადახდა 2022 წლის 30 ივნისი/30 ივლისი/30 აგვისტოს ჩათვლით, მათთან გაფორმებული შეთანხმებების თანახმად, ასევე გააგრძელეს სწავლა 2021-22 სასწავლო წლის გაზაფხულის სემესტრში და 2022-23 სასწავლო წლის შემოდგომის სემესტრში და დამატებით დაერიცხათ მომდევნო სემესტრების სწავლის საფასურის დავალიანება, ბსუ-ს რექტორის 2023 წლის 13 იანვრის №01-02/03 ბრძანებით განსაზღვრული სტუდენტის სტატუსის შეჩერების/შეწყვეტის შესახებ ბრძანება გამოიცეს იმ შემთხვევაში, თუკი 2023 წლის 24 მარტის ჩათვლით ვადაში სრულად არ დაფარავენ მათზე დარიცხულ სწავლის საფასურის დავალიანებას.
• 100 ლარზე მეტი ოდენობით ბსუ-ს სწავლის საფასურის დავალიანების მქონე იმ სტუდენტთა მიმართ, რომელთა მიმართ ბსუ-ს რექტორის 2023 წლის 18 იანვრის №01-08/06 ბრძანებით 2022-2023 სასწავლო წლის შემოდგომის სემესტრში დაიწყო ადმინისტრაციული წარმოება, სტუდენტის სტატუსის შეჩერების შესახებ ბსუ-ს რექტორის ბრძანება გამოიცეს იმ შემთხვევაში, თუკი 2023 წლის 24 თებერვლის ჩათვლით ვადაში სრულად არ დაფარავენ მათზე დარიცხულ სწავლის საფასურის დავალიანებას.
• 2022-23 სასწავლო წლის შემოდგომის სემესტრის ჩათვლით პერიოდში სწავლის საფასურის დავალიანების მქონე იმ პირების მიმართ, რომლებსაც 2021-22 სასწავლო წლის გაზაფხულის სემესტრში ან 2022-23 სასწავლო წლის შემოდგომის სემესტრში არ ჰქონდათ აქტიური სტუდენტის სტატუსი, თუმცა კვლავ ერიცხებათ სწავლის საფასურის დავალიანება [კურსდამთავრებულები ან სხვა კატეგორიის სტუდენტები], მათ მიმართ საქმისწარმოება განხორციელდეს ბსუ-ს რექტორის და ადმინისტრაციის ხელმძღვანელის გადაწყვეტილებების/სამართლებრივი აქტების შესაბამისად, მათ შორის სწავლის საფასურის დავალიანების მქონე პირებთან გააფორმონ სწავლის საფასურის გადახდის განწილვადების თაობაზე [ასეთის საჭიროების შემთხვევაში].“

4 თებერვალს მსოფლიოში კიბოსთან ბრძოლის დღე აღინიშნება. საქართველოში ყოველწლიურად, საშუალოდ, კიბოთი ავადობის დაახლოებით 10 000 ახალი შემთხვევა ფიქსირდება. ათასობით ადამიანი ებრძვის კიბოს და ამარცხებს კიდეც.

„ბათუმელები“ კლინიკა „მედცენტრში“ ესაუბრა პაციენტებს, რომელთაც კიბო დაამარცხეს. ყველა მათგანის კიბოზე გამარჯვების ისტორია განსხვავებულია, თუმცა მთავარი, რაც ამ ისტორიებს აერთიანებს, დროული მკურნალობა და გამარჯვების რწმენაა.

• „ქიმიის დროსაც კი ვმღეროდი“ – მაკა

„კიბო განაჩენი არ არის, რომელი სტადიაც არ უნდა იყოს. მე ვიბრძოლე და დავამარცხე“- ამბობს „ბათუმელებთან“ 35 წლის მაკა კურცხალიძე. ის გვიყვება საკუთარ გამოცდილებაზე, რწმენაზე, რამაც დაავადებაზე გამარჯვება შეაძლებინა.

„ერთ დღეს ჩემს სხეულში, მკერდში რაღაც უცხო სხეული გაჩნდა. კლინიკაში წავედი და ბიოფსიაც გავიკეთე. რამდენიმე დღეში ექიმმა დამირეკა და კლინიკაში დამიბარა.

სკამზე დამსვა და მითხრა: „მაკა, ძლიერი უნდა იყო. მკერდის ავთვისებიანი სიმსივნე აღმოგაჩნდა, მეორე სტადია.

გავშეშდი, როცა ეს მითხრა ექიმმა. ხმა ვეღარ ამოვიღე. ასე წამოვედი სახლში. ორი დღე ძალიან გამიჭირდა, თუმცა შემდეგ ჩემს ჯანმრთელობაზე ფიქრი დავიწყე,“ – გვიყვება მაკა.

მაკა ამბობს, რომ ძალიან გრძელი და ლამაზი თმა ჰქონდა, ამიტომ როცა ექიმმა უთხრა, რომ ქიმიოთერაპიის დროს თმა გაცვივდებოდა, ძალიან განიცადა.

„ეს იყო შოკისმომგვრელი ჩემთვის. მაგრამ ექიმმა მითხრა, თმას ჩივი, სიცოცხლეს უნდა აფასებდეო.

ვნანობ, რომ თმა თავიდანვე არ გადავიპარსე. მოკლედ შევიჭერი და როცა ცვენა დამიწყო, ამან ძალიან იმოქმედა. ამიტომ ეს შეცდომა არავინ არ უნდა დაუშვას ასეთ დროს. სჯობს, თავიდანვე გადაიპარსო თმა.

გავიკეთე 8 ქიმიოთერაპია, რა თქმა უნდა, ამ ყველაფერს თავისი უკურეაქცია აქვს. იყო პერიოდი, როცა ძალიან სუსტად ვიყავი, როცა წყალს ვეხებოდი, თითქოს დენი მარტყამდა, ისეთი შეგრძნება მქონდა. ფეხის გულებში თითქოს ბურთებს ვგრძნობდი, მიჭირდა სიარულიც,“ – ამბობს მაკა.

მისი თქმით, ახლობლებისა და ოჯახის წევრების თანადგომა ასეთ დროს ძალიან მნიშვნელოვანია, მაგრამ საკუთარ თავზე უკეთ ვერავინ დაგეხმარება.

„შეეცადეთ, აკეთოთ ის, რაც ყველაზე მეტად გიხარიათ, რაც თქვენ გიყვართ, იქნება ეს სიმღერა თუ სხვა რამ, ამაზე გადაიტანეთ ყურადღება. თქვენ თვითონ უნდა იპოვოთ ძალა თქვენივე თავში.

მე მიყვარდა სიმღერა და ქიმიების დროსაც კი ვღიღინებდი, ვმღეროდი, ლაივებს ვრთავდი, ფოტოებს ვიღებდი. და ყველაზე მეტად მიყვარდა, როცა თავს ვიწესრიგებდი. დღე არ გავიდოდა, მაკიაჟი რომ არ გამეკეთებინა და ეს იყო ჩემი სტიმული“.

მისი თქმით, დღეს, განვითარებული მედიცინის პირობებში, ადამიანმა უნდა დაიჯეროს, რომ კიბოსთან გამკლავებას შეძლებს. თუ წამალს არ მიიღებ, არ იმკურნალებ, შეიძლება ჩვეულებრივმა გრიპმაც მოგისწრაფოს სიცოცხლეო – ამბობს მაკა.

„და კიდევ, რწმენა, რწმენა არის მთავარი. არასდროს დამიდანაშაულებია ვინმე, არასდროს მითქვამს – რატომ მაინც და მაინც მე?“ – ამბობს მაკა.

მისი თქმით, მეორე სტადიის სიმსივნის დროს, მკერდის მოკვეთა რეკომენდებულია, თუმცა მაკას შემთხვევაში ასე არ მოხდა.

„მე ვიბრძოლე და გავიმარჯვე.

თმა არ გაქვს, არ გაქვს წარბები, ეს ძალიან საშინელია ქალისთვის, მაგრამ როცა დაიწყებს თმა, წარბები და წამწამებიც ზრდას, თავიდან იბადები.

ვფიქრობ, გავლამაზდი კიდეც და სიცოცხლე უფრო დავაფასე“ – ამბობს მაკა.

ის მადლიერებით ახსენებს შვილებს და მეუღლეს, რომლებმაც მისცეს ძალა ამ დაავადებასთან ბრძოლაში.

„ძალიან მაგარი მეუღლე მყავს, რომელიც გვერდით მედგა. ღამეებს ათევდა, დღე და ღამე სულ ჩემთან იყო და მეამაყება. არასდროს მაგრძნობინებდა, რომ რაიმეზე ცუდად მეფიქრა,“-გვითხრა მაკამ.

• „დავიჯერე, რომ განვიკურნებოდი“ – ასლანი 

ასლან შაინიძე 57 წლისაა და სოფელ კვირიკეში ცხოვრობს. მას 6 წლის წინ კუჭის სიმსივნე დაუდგინეს, მესამე სტადია.

„მეტროში“ ვმუშაობდი და ერთ დღეს ტკივილი დამეწყო კუჭში, საკვებსაც ვეღარ ვიღებდი. ძალიან განვიცადე დიაგნოზი, რადგან ერთი თირკმელი არ მქონდა და ამის გამო, ოპერაციაზეც უარი ვთქვი. ქიმიოთერაპია დავიწყე და ხალხურ მედიცინასაც ვიყენებდი. ექვსი წელი გავიდა და საბოლოოდ, სიმსივნე გაქრა.

მეც არ ველოდი ასეთ შედეგს,“ – გვითხრა ასლან შაინიძემ.

მისი თქმით, ამ დროს, ბუნებრივია, რომ ადამიანის ცხოვრება იცვლება. იცვლება მისი ხასიათი, ემოციური მდგომარეობა, თუმცა საბოლოოდ, პაციენტი მაშინ იმარჯვებს, თუ შინაგან ძალებს იკრებს.

„ჩემს ძმასაც გამოუვლინდა ეს დაავადება და ძალიან განიცდიდა. მარტო ამაზე ლაპარაკობდა, დარდობდა და ემოციებში იყო.

ვცდილობდი, დამემშვიდებინა, ვეუბნებოდი, ძმაო, ხომ ხედავ 6 წელია ვმკურნალობ და კარგად ვარ-მეთქი, მაგრამ ემოციურად დამარცხდა და სამწუხაროდ, სამ თვეში გარდაიცვალა.

მეც მქონდა ემოციური სისუსტე, მიუხედავად იმისა, რომ ოჯახის წევრებიც მეხმარებოდნენ და ნათესავებიც, მაინც არავის ნახვა აღარ მინდოდა, თუმცა დავძლიე ეს მდგომარეობა.

დავიჯერე, რომ განვიკურნებოდი. აღარ ვფიქრობდი ჩემს დაავადებაზე და ვცდილობდი სხვა რამეზე, უფრო სასიამოვნო თემებზე გადამეტანა ყურადღება. ვფიქრობდი მომავალზე“ – ამბობს ასლანი.

მისი თქმით, ამ ბრძოლაში, ბუნებრივია, იცვლება ადამიანების ცხოვრება, ზიანდები როგორც ფინანსურად, ასევე ემოციურად, მაგრამ, „იმარჯვებ იმ შემთხვევაში, როცა შენს შიშებს სძლევ,“- გვეუბნება ასლან შაინიძე.

• „ვთქვი, რომ ჩემი დრო არ გასულა“ – არტური

კიბო დაამარცხა არტურ მარგარიანმაც. ის სომხეთის მოქალაქეა, თუმცა რამდენიმე წელია საქართველოშია და ბათუმში ცხოვრობს.

„7 წლის წინ ძალიან ცუდად ვიგრძენი თავი, გამოკვლევებზე თბილისში წავედი და მითხრეს, რომ მესამე სტადიის ლიმფომის სიმსივნე მქონდა. 5-6 თვის სიცოცხლე მითხრეს. ზრდასრული ადამიანი ვარ, მაგრამ ცრემლები წამომივიდა, ავტირდი“ – გვიყვება არტური.

შვიდი წელი იბრძოლა და დღეს ამბობს, რომ კიბო საბოლოოდ დაამარცხა.

„ასი პროცენტით განკურნებული ვარ, მაშინ, როცა თვეების სიცოცხლეს მეუბნებოდნენ.

ძალიან დამეხმარნენ მეგობრები, ახლობლები. ინტერნეტში ჩემთვის ფინანსები მოიძიეს. გარკვეული ანალიზები კი სახელმწიფომ დამიფინანსა და ამის ძალიან მადლობელი ვარ. ჩემს ქვეყანაში არ ვარ, მაგრამ აქ ვგრძნობდი თანადგომას და მხარდაჭერას როგორც ექიმების მხრიდან, ასევე ადამიანების მხრიდან,“ – ამბობს არტური.

ისევე როგორც მაკა და ასლანი,  არტურიც მიიჩნევს, რომ მძიმე დაავადებასთან ბრძოლის დროს ძალიან დიდი მნიშვნელობა აქვს შინაგან რწმენას.

„მე ვთქვი, რომ ჩემი დრო არ გასულა. მაშინ, როცა არავის სჯეროდა, რომ გადავრჩებოდი, მე მქონდა შინაგანი რწმენა, რომ გადავრჩებოდი.

მთავარია, გჯეროდეს ღმერთის, გჯეროდეს ექიმების და საკუთარი თავის.

არც შრომა შემიწყვეტია, ცემენტის მძიმე ტომრებს ვეზიდებოდი და მაინც ვფიქრობდი დადებითზე“ – ამბობს არტური.

ქუთაისში საქალაქო ტრანსპორტით მგზავრობა გაძვირდა. გაზრდილი ტარიფი შეეხო როგორც მუნიციპალურ ავტობუსებს, ისე სამარშრუტო ტაქსებს.

ავტობუსით მგზავრობა ამიერიდან 40 თეთრის ნაცვლად 60 თეთრი ეღირება, ხოლო „მარშუტკით“ მგზავრობა – 50 თეთრის ნაცვლად 60 თეთრი.

მგზავრობის გაძვირებაზე გადაწყვეტილება ქუთაისის მუნიციპალიტეტის საკრებულომ მიიღო. საკრებულოში უმრავლესობა მმართველ პარტიას, „ქართულ ოცნებას“ აქვს.

„ცვლილების მიზანია მოსახლეობისთვის საიმედო და ხარისხიანი სატრანსპორტო მომსახურების მიწოდება,  სამგზავრო ავტოსატრანსპორტო საშუალებების  მოვლა-შენახვის პირობების გაუმჯობესება და მათი გამართული ტექნიკური მდგომარეობის უზრუნველყოფა,“ – ასე ახსნა ქუთაისის საკრებულომ ტარიფის გაზრდის აუცილებლობა.

როგორც „ბათუმელებს“ ქუთაისის მერიაში უთხრეს, ცვლილება ძალაში 10 დღეში შევა.

ქუთაისში მგზავრებს გაზრდილი ტარიფის გადახდა 13 თებერვლიდან მოუწევთ.

შინაგან საქმეთა სამინისტროს ინფორმაციით, 15 წლის გოგოზე ძალადობის და ქორწინების იძულების ბრალდებით ერთი პირი დააკავეს.

„ერთი პირი დაკავებულია ცხელ კვალზე, გამოძიება მიმდინარეობს სსკ-ის 150-ე პრიმა და 126-ე პრიმა მუხლებით“- თქვეს შსს-ში.

აღნიშნული მუხლები  გულისხმობს ოჯახის წევრის მიმართ, კერძოდ, არასრულწლოვნის მიმართ ძალადობას და არასრულწლოვნის იძულებით ქორწინებას.

როგორც შსს-ში გვითხრეს, არასრულწლოვანი გოგო უსაფრთხო ადგილზეა გადაყვანილი.

ადგილობრივი მედიის ცნობით, მარნეულში 15 წლის გოგო 2 თებერვალს გაუჩინარდა. მედიის ცნობით, მოზარდი იძულებით დანიშნეს, რის გამოც 15 წლის გოგო სახლიდან გაიქცა. „მარნეულის რადიოს“ ინფორმაციით, დაკავებულია არასრულწლოვნის ოჯახის წევრი.

შემთხვევა მარნეულის მუნიციპალიტეტის ერთ-ერთ სოფელში მოხდა.

ტელეკომპანია „პირველის“ კორესპონდენტი ნატო გოგელია ამბობს, რომ ოზურგეთში, კიტა მეგრელაძის ქუჩაზე არსებულ მის საცხოვრებელ სახლში ორჯერ შევიდნენ უცხო პირები და სახლი გაქურდეს და დაარბიეს.

ნატო გოგელიას თქმით, პირველად 31 იანვარს და მეორედ გუშინ, 2 თებერვალს, შეაღწიეს მის ბინაში.

„პირველად ვიფიქრე, რომ ეს ჩვეულებრივი ქურდობა იყო, რადგან წაიღეს მიმღები, ტელევიზორი და „ფლეშკა“, მაგრამ 2 თებერვალს ღირებული არაფერი წაუღიათ, უბრალოდ დარბეული იყო ბინა, ყველაფერი გადმოყრილი იყო კარადებიდან.

მიზანმიმართულად გააფუჭეს და დაამსხვრიეს ნივთები, უთოებს დააჭრეს დენის კაბელები,“- ამბობს ნატო გოგელია „ბათუმელებთან“.

მის თქმით, სამ დღეში ორჯერ შეღწევა სახლში ეჭვს ბადებს, რადგან, მისი თქმით,  პოლიცია სახლთან ახლოს იმყოფებოდა.

მას ვკითხეთ, რამდენად შეიძლება უკავშირდებოდეს ეს შემთხვევები მის პროფესიულ საქმიანობას. ნატო გოგელია ამბობს, რომ „ეს შემთხვევა არ ჰგავს ჩვეულებრივ ქურდობას, როცა სახლს არბევენ, ამსხრევენ და ყირაზე აყენებენ ყველაფერს“.

მისი თქმით, გამოძიება 31 იანვარს დაიწყო, თუმცა მეორე დღეს მისი სახლი ისევ დაარბიეს.

მომხდართან დაკავშირებით განცხადება გაავრცელა საქართველოს ჟურნალისტური ეთიკის ქარტიამ, სადაც ნათქვამია, რომ ბოლო პერიოდში ჟურნალისტებზე გახშირებული თავდასხმების გამომწვევი ფაქტორები და მედიის წარმომადგენლების მიმართ ჩადენილი დანაშაულების გამოძიება გაჭიანურებულია.

„ქარტია მოუწოდებს საგამოძიებო უწყებებს, სწრაფად და ეფექტიანად შეისწავლონ ნატო გოგელიას სახლში ქურდობის ფაქტები. ამასთან, მნიშვნელოვანია დადგინდეს, ხომ არ უკავშირდება აღნიშნული ფაქტები ჟურნალისტის პროფესიულ საქმიანობას“ – აცხადებს ქარტია.

მომხდართან დაკავშირებით „ბათუმელები“ შსს-ში ინფორმაციას აზუსტებს.