ბათუმში ზღვის სანაპირო ზოლის ხელოვნური კვება 2022 წლის ნოემბერში დაიწყო. ათიათასობით ტონა ხრეში აეროპორტისა და ახალი ბულვარის მიმდებარედ, იმ ადგილებში შეიტანეს, რომელიც ზღვამ შტორმის დროს დაანგრია.
სანაპიროს ხელოვნური კვება დაგვიანებით დაიწყო, რის გამოც სხვა ადგილები წაირეცხა.
სანაპირო ზოლს ზღვა ამჯერად ახალ ბულვარში, აკვაპარკის მიმდებარედ ანგრევს:
ზღვისგან დანგრეული სანაპირო ახალ ბულვარში, აკვაპარკის მიმდებარედ. 4.02.2023წ.
პროექტის ფარგლებში ზღვაში, ჭოროხის დელტიდან ამოღებული 413 ათასი კუბური მეტრი ხრეში უნდა შეიტანონ, რაშიც აჭარის ბიუჯეტიდან 5,6 მილიონი ლარი დაიხარჯება.
რამდენად დაიცავს ხელოვნურად შეტანილი ხრეში სანაპიროს წარეცხვისგან და რა მანძილზე გადააადგილებს ამ ხრეშს ზღვა, ეს დამოკიდებულია შტორმულ პროცესებზე. სპეციალისტთა დასკვნებით კი, ბათუმის სანაპიროს დასაცავად ხრეშის ხელოვნურად შეტანა ყოველწლიურად იქნება აუცილებელი.
ხელოვნურად შეტანილ ხრეშს ზღვა პერიოდულად უკვე რეცხავს და პლაჟებსაც ქმნის, თუმცა, კვლავ რჩება ადგილები სანაპიროზე, რომელიც ირეცხება. მოსალოდნელი შტორმების შემთხვევაში კი, მაღალია ნაპირისა და შესაბამისი ინფრასტრუქტურის ნგრევის რისკიც.
რა მდგომარეობაა ხრეშის ხელოვნურად შეტანიდან დღემდე, ახალი ბულვარის გასწვრივ სანაპიროზე, ამას ფოტორეპორტაჟით გაჩვენებთ:
დანგრეული სანაპირო და ხელოვნურად შეტანილი ხრეში ახალ ბულვართან. 4.02.2023
ხელოვნურად შეტანილი ხრეში და ამ ხრეშით ზღვის ღელვის შედეგად შექმნილი პლაჟი ახალ ბულვართან. 4.02.2023
ხელოვნურად შეტანილი ხრეში და ამ ხრეშით ზღვის ღელვის შედეგად შექმნილი პლაჟი ახალ ბულვართან. 4.02.2023
ხელოვნურად მოწყობილი ტერიტორია დანგრეულ სანაპიროსთან, რომელსაც ზღვა უკვე რეცხავს:
აქ რამდენიმე კვირის უკან ზღვა იყო. დანგრეულ პრომენადსა და ზღვას შორის ეს ტერიტორია ხრეშის ხელოვნურად შეტანით შეიქმნა. 4.02.2023
ზღვა ახალ ბულვართან ხელოვნურად შეტანილ ხრეშს რეცხავს და პლაჟს ქმნის. სწორედ ამ მიზნით ხდება აქ ხრეშის შეტანა, რათა ზღვამ უკვე დანგრეული სანაპირო კვლავ არ წარეცხოს. 4.02.2023
ხრეში ხელოვნურად ამ ტერიტორიაზეც უნდა შეიტანონ. მიზანი ველობილიკის შენარჩუნებაა, ზღვამ რომ არ დაანგრიოს. ახალი ბულვარი, სადაც ზღვამ პრომენადი დაანგრია / 4.02.2023
დანგრეულ ტერიტორიებს და დაზიანებულ ინფრასტრუქტურას რაც შეეხება, ბულვარის ადმინისტრაციაში თავის დროზე განაცხადეს, რომ აღდგენა მხოლოდ მაშინ დაიწყება, როცა სანაპირო ზოლში ზღვის ხელოვნური კვების სამუშაოები დასრულდება.
ახალი ბულვარიდან აეროპორტის ზოლამდე მონაკვეთში აშენებულმა ნაპირდამცავმა ნაგებობამ ეს ზოლი პლაჟის გარეშე დატოვა. აქ რომ პლაჟი იყოს, ხრეშის შეტანა ყოველწლიურადაა საჭირო.
პლაჟი კი, აქ თავად ამ ნაგებობის დასაცავადაცაა აუცილებელი, რომელიც ლოდებითაა აშენებული.
ნაპირდამცავი ნაგებობა ახალი ბულვარის გასწვრივ. 4.02.2023
მიმდინარე პროექტის ფარგლებში შეტანილი ხრეშით ნაპირდამცავი ნაგებობის გარკვეულ ადგილებში ხელოვნური პლაჟები მოეწყო, თუმცა, ზოგიერთ ადგილებში ზღვა ამ ნეგებობას ნელ-ნელა ისევ შლის:
ლოდებით მოწყობილი ნაპირდამცავი ნაგებობა, რომელსაც ზღვა ნელ-ნელა შლის / 4.02.2023
ლოდებით მოწყობილი ნაპირდამცავი ნაგებობა, რომელსაც ზღვა ნელ-ნელა შლის. 4.02.2023
ხელოვნურად შეტანილი ხრეშით ზღვის მიერ მოწყობილი პლაჟი ბათუმის აეროპორტის ასაფრენი ზოლის მიმდებარედ:
დაახლოებით 2 თვის წინ აქ ზღვა დამცავ ნაგებობამდე აღწევდა და პლაჟი საერთოდ არ იყო. პლაჟი ხელოვნურად შეტანილი ხრეშით წარმოიქმნა. ბათუმის სანაპირო აეროპორტის ასაფრენი ზოლის მიმდებარედ. 4.02.2023
ბათუმის სანაპირო აეროპორტის ასაფრენი ზოლის მიმდებარედ. 4.02.2023
დოკუმენტში, რომლის მომზადებაშიც აჭარის ბიუჯეტიდან 19 700 ლარი დაიხარჯა და რომლის საფუძველზეც ამჯერად სანაპიროზე ხრეში შეაქვთ, აღნიშნულია ასევე, რომ
„ახლო მომავალში აუცილებლად უნდა შემუშავდეს [ბათუმის] სანაპიროს ექსპლუატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა“.
ამ თემაზე ვრცლად:
