გაერთიანებული სამეფოს დაზვერვა 6 თებერვლის ანგარიშში რუსეთის მიერ უკრაინის ანექსირებულ ტერიტორიებზე ადგილობრივი არჩევნების თარიღის გამოცხადებას მიმოიხილავს, როგორც ამ ტერიტორიების რუსიფიკაციის გეგმის გაგრძელებას.
2023 წლის პირველ თებერვალს რუსეთის ფედერაციის საბჭოს თავმჯდომარემ ვალენტინა მატვიენკომ განაცხადა, რომ რეგიონული არჩევნები უკრაინის ახლახან ანექსირებულ ტერიტორიებზე 2023 წლის 10 სექტემბერს, ანუ იმავე დღეს ჩატარდება, როგორც განსაზღვრულია რუსეთის დანარჩენ ტერიტორიაზე.
ბრიტანული დაზვერვის შეფასებით, ის ფაქტი, რომ ანექსირებულ ტერიტორიებზე არჩევნები რუსეთის რეგიონებთან ერთად ჩაინიშნა, ხაზს უსვამს რუსეთის ხელმძღვანელობის ამბიციას, ეს ტერიტორიები წარმოადგინონ ფედერაციაში ინტეგრირებულ ნაწილად.
გაერთიანებული სამეფოს დაზვერვის სამსახური ასევე აღნიშნავს, რომ ეს ნაბიჯი ოკუპირებული ტერიტორიების რუსიფიკაციის იმ მუდმივი მცდელობის გაგრძელებაა, რომელიც განათლების, კომუნიკაციებისა და ტრანსპორტირების სისტემებს მოიცავს.
ბრიტანული დაზვერვის ექსპერტების შეფასებით, მიუხედავად იმისა, რომ რუსეთში რეგიონულ დონეზეც კი აღარ არსებობს დემოკრატიული არჩევანი ამომრჩევლისთვის, ხელმძღვანელები, სავარაუდოდ, თავიანთ თავს უმტკიცებენ, რომ ახალი არჩევნები კიდევ უფრო ამართლებს ოკუპაციას.
