შინაგან საქმეთა სამინისტროს ინფორმაციით, 15 წლის გოგოზე ძალადობის და ქორწინების იძულების ბრალდებით ერთი პირი დააკავეს.
„ერთი პირი დაკავებულია ცხელ კვალზე, გამოძიება მიმდინარეობს სსკ-ის 150-ე პრიმა და 126-ე პრიმა მუხლებით“- თქვეს შსს-ში.
აღნიშნული მუხლები გულისხმობს ოჯახის წევრის მიმართ, კერძოდ, არასრულწლოვნის მიმართ ძალადობას და არასრულწლოვნის იძულებით ქორწინებას.
როგორც შსს-ში გვითხრეს, არასრულწლოვანი გოგო უსაფრთხო ადგილზეა გადაყვანილი.
ადგილობრივი მედიის ცნობით, მარნეულში 15 წლის გოგო 2 თებერვალს გაუჩინარდა. მედიის ცნობით, მოზარდი იძულებით დანიშნეს, რის გამოც 15 წლის გოგო სახლიდან გაიქცა. „მარნეულის რადიოს“ ინფორმაციით, დაკავებულია არასრულწლოვნის ოჯახის წევრი.
შემთხვევა მარნეულის მუნიციპალიტეტის ერთ-ერთ სოფელში მოხდა.