მთავარი,სიახლეები

აჭარის მთავრობა ბათუმში ერთ ჰექტარზე მეტ ფართობს და შენობებს ყიდის

04.02.2023 • 4204
აჭარის მთავრობა ბათუმში ერთ ჰექტარზე მეტ ფართობს და შენობებს ყიდის

აჭარის მთავრობა ბათუმში, კოწია ერისთავის ქუჩაზე, #14-ში მდებარე შენობას და მიწის ნაკვეთს პირობიანი აუქციონით ყიდის.

ქონების ნაწილი თვითნებურად არის დაკავებული და აქ რვაწევრიანი ოჯახი ცხოვრობს. რა ბედი ელის ამ ოჯახს ქონების გაყიდვის შემდეგ, ამ კითხვაზე ჯერ პასუხი არ გვაქვს.

აუქციონი 15 თებერვალს უნდა დასრულდეს.

გასაყიდი ფართობის ფასი 10 855 კვ.მეტრია, შენობების საერთო ფართობი კი 938.6 კვ. მეტრი. ქონების საწყისი ფასი 1 მილიონ 520 000 ლარია, ბიჯი 35 000 ლარი. ქონების შემძენმა საპრივატიზებო საფასური სამ ეტაპად 2024 წლის ივნისამდე უნდა გადაიხადოს.

ბათუმის მერიის ინფორმაციით, უძრავი ქონება შემოღობილია და დაცულია შპს ,,ბაკარა პლიუსის“ მიერ. შენობებში დამონტაჟებულია სამაცივრე დანადგარები, სასაკლაო მეურნეობისათვის საჭირო მოწყობილობები და პერსონალის ცხოვრებისა და დასვენებისათვის საჭირო ინვენტარი.

ფოტო: აჭარის ფინანსთა და ეკონომიკის სამინისტრო

ფოტო: აჭარის ფინანსთა და ეკონომიკის სამინისტრო

 

აუქციონის პირობის მიხედვით, ქონების შემსყიდველმა, ხელშეკრულების გაფორმებიდან ერთი წლის განმავლობაში შესყიდულ ნაკვეთზე მშენებლობის ნებართვა უნდა მიიღოს. ნებართვა არ უნდა ითვალისწინებდეს საცხოვრებელი სახლების ან აპარტამენტების მშენებლობას. ნებართვის მიღებიდან 3 წლის განმავლობაში კი შემსყიდველმა აქ ობიექტი [ სავარაუდოდ საწარმო] უნდა აამოქმედოს, სადაც დასაქმებულთა 90 პროცენტი საქართველოს მოქალაქე იქნება.

საერთო ჯამში შემსყიდველმა აქ 500 000 ლარის ინვესტიცია  უნდა განახორციელოს, ობიექტს კი პროფილი 15 წლის განმავლობაში უნდა შეუნარჩუნოს.

აჭარის ფინანსთა და ეკონომიკის სამინისტროს ინფორმაციით, გასაყიდ მიწის ნაკვეთზე ერთ-ერთ შენობაში რვაწევრიანი ოჯახი ცხოვრობს, შენობის ნაწილში კი ოფისია განთავსებული.

გადაბეჭდვის წესი


ასევე: