ხელოვნურად შეტანილი ხრეშით კი, ზღვამ პლაჟის შექმნა უკვე დაიწყო:
ბათუმის სანაპიროზე ხრეში უკვე ახალი ბულვარის გასწვრივ შეაქვთ. ხრეშის შეტანა აეროპორტის ასაფრენი ზოლის მიმდებარე ტერიტორიიდან დაიწყო და ამ დროისთვის, როგორც სამუშაოების მწარმოებელ კომპანია „ბონდი 2009“-ში გვითხრეს, 200 ათას კუბურ მეტრზე მეტი ხრეშია შეტანილი.
ზღვის სანაპირო ზოლის ხელოვნური კვებისთვის, შესაბამისად ხელოვნური პლაჟების მოსაწყობად, ჯამში კომპანიამ სანაპიროზე სულ 413 ათასი კუბური მეტრი ხრეში უნდა შეიტანოს.
სამუშაოებისთვის აჭარის ბიუჯეტიდან 5,6 მილიონი ლარი დაიხარჯება.
ბათუმის სანაპირო ზოლი ერთ-ერთი პრობლემური მონაკვეთია საქართველოს შავი ზღვის აკვატორიაში. ჭოროხის შესართავიდან ახალი ბულვარის მიმართულებით აქ ნაპირი ირეცხება, ბათუმის კონცხზე კი გროვდება დიდი რაოდენობით ნატანი, რომელიც დროთა განმავლობაში ზღვის სიღრმეში [ბათუმის კანიონში] იკარგება:
იმ ხრეშს, რომელიც შეაქვთ სანაპიროზე, ზღვა შტორმის დროს გადაანაწილებს ბათუმის პლაჟზე, საბოლოოდ კი, გარკვეულ ნაწილს თავს ბათუმის კონცხთან მოუყრის. რა რაოდენობით და რა პერიოდში – ეს დამოკიდებულია იმაზე, თუ როგორი შტორმული პროცესები განვითარდება სანაპიროზე მომავალში.
ვინაიდან სანაპიროზე ხრეშის ხელოვნურად შეტანა დაგვიანდა, მდინარე ჭოროხს კი, საკმარისი ნატანი ზღვაში ვეღარ შეაქვს, ზღვამ ახალი ბულვარის გასწვრივ ნაპირის წარეცხვა დაიწყო.
დოკუმენტში, რომლის მომზადებაშიც აჭარის ბიუჯეტიდან 19 700 ლარი დაიხარჯა და რომლის საფუძველზეც ამჯერად სანაპიროზე ხრეში შეაქვთ, აღნიშნულია ასევე, რომ
„ახლო მომავალში აუცილებლად უნდა შემუშავდეს [ბათუმის] სანაპიროს ექსპლოატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა“.