Batumelebi

ხვალ, 26 აპრილს, ბათუმში, შოთა რუსთაველის სახელმწიფო უნივერსიტეტთან გაიმართება საერთო საზოგადოებრივი განხილვა, თუ რატომ არის „ქართული ოცნების“ კანონი რუსული.

დისკუსია დაიწყება 17 საათზე, ღია სივრცეში, კითხვა-პასუხის რეჟიმში.

დისკუსიის შემდეგ კი, 19:00 საათზე, დაიწყება მსვლელობა – „კი ევროპას, არა რუსულ კანონს“.

რუსული კანონის შესახებ რეგიონებში საერთო საზოგადოებრივი განხილვები იმართება. განხილვებში მონაწილეობას იღებენ სამოქალაქო ორგანიზაციების, პოლიტიკური პარტიების, აკადემიური სფეროს წარმომადგენლები, რომლებიც საზოგადოებას უხსნიან, რატომ არის „ქართული ოცნების“ მიერ ინიციირებული კანონი რუსული, როგორ აშორებს ქვეყანას ევროკავშირს და რა დამატებით საფრთხეებს მოუტანს საქართველოს მისი მიღება.

დისკუსია ღიაა ნებისმიერი დაინტერესებული პირისთვის.

2023 წლის 7-9 მარტის მოვლენების შემდეგ, როცა ფართომასშტაბიანი საპროტესტო აქციების გამო “ქართულმა ოცნებამ” თავისივე მხარდაჭერილი კანონპროექტი ჩააგდო, პირობაც დადო, რომ რუსულ კანონი დღის წესრიგში აღარასდროს დაბრუნდებოდა. მმართველმა პარტიამ ეს პირობა ერთ წელში დაარღვია და 2024 წლის აპრილში იგივე კანონი, განსხვავებული სახელწოდებით, კვლავ დააინიციირა. 

ყველა საერთაშორისო პარტნიორის კრიტიკისა და ქვეყნის შიგნით, მოქალაქეთა პროტესტის მიუხედავად, 17 აპრილს, საპარლამენტო უმრავლესობამ კანონი პირველი მოსმენით მიიღო. ერთ კვირაზე მეტია მოქალაქეები პარლამენტის შენობასთან რუსული კანონის გასაპროტესტებლად იკრიბებიან და მრავალათასიან აქციებს აწყობენ.

„უცხოური გავლენის გამჭვირვალეობის შესახებ“ პროექტი ზიანს აყენებს ქვეყნის მომავალს და წარმოადგენს დაბრკოლებას ევროინტეგრაციის გზაზე“ – ოპოზიციის ფრაქცია აჭარის უმაღლეს საბჭოს რუსული კანონის წინააღმდეგ რეზოლუციით მიმართავს და პროექტის უკან გაწვევას ითხოვს.

„საქართველოს კონსტიტუციის 78-ე მუხლის შესაბამისად კონსტიტუციურმა ორგანოებმა თავიანთი უფლებამოსილების ფარგლებში უნდა მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად. ამავე დროს, კვლევებით დასტურდება, რომ საქართველოს მოსახლეობის არჩევანი, სწორედ ევრვოკავშირსა და ნატოში გაწევრიანებაა, რაც უზრუნველყოფს საქართველოს უსაფრთხოებას, გრძელვადიან სტაბილურობას და მშვიდობას“ – ნათქვამია მიმართვაში.

აჭარის უმაღლესი საბჭოს „ერთიანი ნაციონალური მოძრაობის“ ფრაქციის შეფასებით, კანონის მიზანი მედიის გაჩუმება და სამოქალაქო საზოგადოების დისკრედიტაციაა:

„ჩვენ კარგად ვხედავთ, რომ ივანიშვილი და მისი ხელისუფლება გახდა მთავარი დაბრკოლება ქვეყნის დემოკრატიული განვითარებისა და ევროინტეგრაციის გზაზე. რუსული კანონის მიღებით მათ უნდათ გააჩუმონ თავისუფალი მედია და მოახდინონ სამოქალაქო საზოგადოების დისკრედიტაცია, რათა ხმამაღლა აღარ ისმოდეს: ქვეყანაში არსებული პრობლემები ,,მოსახლეობის უკიდურესი გაჭირვება, ის რომ მასიურად ტოვებენ ქვეყანას ახალგაზრდები, არ ისმოდეს კრიტიკა კორუფციულ ფაქტებზე. როცა გვესაუბრებიან გამჭვირვალეობაზე გადახედონ საჯარო დაწესებულებების კანცელარიებში რატომ მალავენ ინფორმაციას კორუფციულ ფაქტებზე, მათი საქმიანობის გამჭვირვალეობაზე.“

ფრაქციაში მიიჩნევენ, რომ ასეთ დროს აუცილებელია აჭარის უმაღლესმა საბჭომ გამოხატოს თავისი პოზიცია.

„დღეს ჩვენ წარვადგენთ უმაღლესი საბჭოს მიმართვას საქართველოს პარლამენტისადმი, რომლითაც მოვუწოდებთ: უკან გაიწვიონ რუსული კანონი.

ასევე, გადაიდგას 9 ნაბიჯი ევროპისკენ, რაც გულისხმობს კომპლექსური რეფორმების განხორციელებას . ამ მიმართვის კენჭისყრისას პიროვნულად უნდა გადაწყვიტოს თითოეულმა დეპუტატმა: მხარს უჭერენ ევროინტეგრაციას თუ რუსულ კანონს, მხარს უჭერენ საქართველოს დემოკრატიულ განვითარებას თუ რუსული რეპრესიული სისტემის გაძლიერებას. ამიტომ მოვუწოდებთ ქართული „ოცნების“ გუნდს, სწრაფად იქნას განხილული წარდგენილი მიმართვა და კარგად დაფიქრდნენ საკუთარ პოზიციაზე, რას ეტყვიან ისინი საკუთარ ამომრჩეველს, ახალგაზრდებსა და საქართველოს პარტნიორ, მეგობარ ქვეყნებს.“

რეზოლუციის მოთხოვნებია:

• უკან იქნას გაწვეული/ჩაგდებული „უცხოური გავლენის გამჭვირვალეობის შესახებ“ კანონპროექტი;
• შესრულდეს საზოგადოების წინაშე აღებული ვალდებულება, რომ არ იქნება ინიციირებული და მიღებული მსგავსი კანონპროექტი;
• საქართველოს კონსტიტუციის 78-ე მუხლის აღსრულების უზრუნველსაყოფად სწრაფად იქნას გადადგმული 9 ნაბიჯი ევროპისკენ, რაც გულისხმობს კომპლექსური რეფორმების განხორციელებას და ანტიდასავლური კამპანიის წინააღმდეგ ბრძოლისკენ ეფექტური ნაბიჯების გადადგმას.

რეზოლუციას ენმ-ის ფრაქცია უმაღლეს საბჭოში დღეს დაარეგისტრირებს. ამის პარალელურად ფრაქცია რიგგარეშეს სხდომის ჩანიშვნას ითხოვს.

„გვილეწავენ ყველაფერს, აი, ეს არის მომავალი საქართველო – დალეწილი, ეს არის აგენტობა, ეს არის რუსული კანონი,“ – საკუთარი საშაურმის ჩალეწილ ვიტრინაზე მიგვითითებს მოქალაქე ვაჟა თავართქილაძე.

ჩამტვრეულ ვიტრინაში ჯერ კიდევ იკითხება მოქალაქის საპროტესტო გზავნილები, მაგალითად, „ბიძი, 10 – 10 კილოგრამს თუ დაგვიმატებთ, ჩვენც წამოვალთ!“

საშაურმის ვიტრინა ბათუმში, ქალაქის ცენტრში, გორგილაძის ქუჩაზე, 25 აპრილს, დაახლოებით დილის 4 საათზე ჩალეწეს.

ვაჟა თავართქილაძე გვიყვება, რომ ვიტრინა ძალაყინით შეიარაღებულმა, შენიღბულმა პირმა ჩალეწა და მშვიდად განაგრძო გზა. მალევე საშაურმესთან საპატრულოს ეკიპაჟი მისულა, რომელსაც საშაურმეს მორიგე თანამშრომელმა მომხდარის შესახებ უთხრა.

„მათ არ უცდიათ შეჩერება ამ პირის, რომელმაც ფეხით მშვიდად განაგრძო გზა, ეტყობა, პოლიცია იმიტომ მოვიდა, რომ ჩვენ არ გვეხმაურა, ან ჩვენ დავეკავებინეთ.

ოპერაცია ჩამიტარეს მე, შეთანხმებული სპეცრაზმის და პოლიციის მიერ. რა თქმა უნდა, უნდათ, რომ შემაშინონ და პროტესტი ჩაკლან, ვინმეს ხმის ამოღება რომ აღარ მოუნდეს,“ – მიიჩნევს ვაჟა თავართქილაძე.

ვაჟა თავართქილაძე ის მოქალაქეა, რომელმაც ბათუმში, გორგილაძის ქუჩის დასაწყისში მდებარე, საკუთარი საშაურმის ვიტრინაზე  2023 წელს გამოაკრა განცხადება: „ბათუმის ზონდერი მერი ხალხის მტერი“.

კონსტიტუციით გარანტირებული გამოხატვის თავისუფლებით სარგებლობისთვის იგი მოსამართლე ალექსანდრე გოგუაძემ 1000 ლარით დააჯარიმა. მოსამართლემ მოქალაქე პროტესტის გამოხატვისთვის რომ უკანონოდ დააჯარიმა, ეს სააპელაციო სასამართლომ დაადასტურა.

მოგვიანებით ვაჟა თავართქილაძემ წინასაარჩევნო პერიოდში საპატრიარქოს დაფინანსების გაზრდა გააპროტესტა იმ ფონზე, როცა სკოლებში მოსწავლეებს შიათ.

ვაჟა თავართქილაძის თქმით, დღევანდელ ინციდენტამდე დაახლოებით 10 დღით ადრე, საშაურმეში ერთი პირი შევიდა და ვიტრინაში გამოკრული განცხადებები ჩამოხია. სამართალდამრღვევისთვის ბათუმის საქალაქო სასამართლოში მოსამართლე ხათუნა ბოლქვაძეს მხოლოდ გაფრთხილება მიუცია.

„აქ მქონდა გაკრული განცხადება: „ბიძი, 10 – 10 კილოგრამს თუ დაგვიმატებ, ჩვენც წამოვალთ,“ – ჩამსხვრეულ ვიტრინაში განცხადებების ხელახლა გაკვრას ცდილობს ვაჟა თავართქილაძე. – „ვგულისხმობ იმას, რომ ხალხს ყიდულობს და ძალად მიჰყავს თავის აქციაზე, ზოგს ხახვს მისცემს, ზოგს – კარტოფილს, ან რუსული მზესუმზირას ზეთს.

ამ ბანერზე ეწერა „29-ში ბათუმში სუფთა ჰაერია, ისუნთქეთ თავისუფლად“.

ვგულისხმობ იმას, რომ ბათუმიდან გავა მონურად მორჩილი საზოგადოება, რომელიც ყიდის თავის ღირსება და თავისი ინტერესების საწინააღმდეგოდ და ივანიშვილის მილიარდების დასაცავად წავა თბილისში.

ჩემპიონატზე რომ გავიდა ჩვენი საამაყო ნაკრები, არავითარი ჯილდო, ისევ დაპირებები: თუ ქვეჯგუფიდან გახვალთ, მოგცემთ 30 მილიონსო იმის იმედად, რომ ჯგუფი ვერ გავა ქვეჯგუფიდან. ამიტომაც ასეთი ბანერი მოვამზადე: „ნაკრები ფინალს თუ მოიგებს, ვჩუქნი 100 ქარხანას,“ – გვიყვება ვაჟა თავართქილაძე.

ეს მოქალაქე ბათუმში მოსამართლე ალექსანდრე გოგუაძემ რომ პროტესტის გამოხატვის გამო უკანონოდ დასაჯა, დადასტურდა ქუთაისის სააპელაციო სასამართლოს გადაწყვეტილებით. ვაჟა თავართქილაძე ამბობს, რომ სწორედ კრიტიკული მედიაში ამ ამბის გაშუქების და „საერთაშორისო გამჭვირვალობა საქართველოს“ აქტიურ ჩართვის შემდეგ გახდა იძულებული სასამართლო კონსტიტუციით გარანტირებული გამოხატვის თავისუფლება დაეცვა.

„ამიტომაც უნდათ რუსული კანონით მედიის და არასამთავრობო ორგანიზაციების გაქრობა,“ – მიიჩნევს მოქალაქე ვაჟა თავართქილაძე. ის დარწმუნებულია, რომ მის საშაურმეზე თავდასხმა სამართალდამცველებთან შეთანხმებული იყო.

„არ დაედევნნენ ფეხით მიმავალ კაცს, კაცს, რომელიც სპეცრაზმელის ეკიპირებით მოვიდა აქ, ხელთათმანებით, ნიღბით…

ჯერ მომიგზავნეს ვიღაც და ჩამომიხიეს ბანერი, რომ არ შევშინდი და მაინც გამოვაკარი ახალი ბანერი, ახლა სპეცრაზმელი მომიგზავნეს.

ავტორიტარული, ტოტალური, დიქტატორული რეჟიმის ხელში როცა ხვდება კანონი, როგორც უნდა ისე შემოატრიალებენ ამ კანონს. თუ ახლა ხულიგნურად თავს დამესხნენ, მერე უკვე კანონიერად დაგვესხმებიან თავს. რუსეთი უკვე წიგნების დაწვაც დაიწყეს. გაგახსენდათ ჰიტლერი? ამას ვებრძვი მე, ეს არ მინდა მე,“ – უთხრა ვაჟა თავართქილაძემ „ბათუმელებს“.

შინაგან საქმეთა სამინისტროს პრესცენტრში ვერ გვითხრეს, დაიწყო თუ არა გამოძიება ამ შემთხვევაზე.

დღეს, 25 აპრილს, ავტომობილი 3 წლის ბავშვს დაეჯახა. ავარიის შედეგად ბავშვი დაიღუპა.

შემთხვევა მახინჯაურში მოხდა.

შსს-ს ინფორმაციით, გამოძიება სსკ-ის 276-ე მუხლით მიმდინარეობს, რაც გულისხმობს, ავტომობილის, ტრამვაის, ტროლეიბუსის, ტრაქტორის ან სხვა მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც ადამიანის სიცოცხლის მოსპობა გამოიწვია.

საქართველოს რკინიგზის ინფორმაციით, აღდგომის დღესასწაულთან დაკავშირებით, ბათუმისა და ფოთის მიმართულებით დამატებითი რეისები დაინიშნება.

დამატებით რეისებზე ბილეთების შეძენა შესაძლებელია 2, 3, 4 და 6 მაისს თბილისი-ფოთის მიმართულებით. ხოლო პირველიდან 6 მაისის ჩათვლით კი, თბილისი-ბათუმის მიმართულებით.

ბილეთების შეძენა დაინტერესებულ პირებს შეუძლიათ როგორც ელექტრონულად, ასევე სალაროებში.

ბათუმში ჰაერში მტვრის ნაწილაკების შემცველობის მაჩვენებელი 2024 წლის 25 აპრილის მონაცემებით გაუარესებულია.

გარემოს ეროვნული სააგენტოს ინფორმაციით ჰაერის დაბინძურება „უდაბნოს მტვრის მასების გავრცელებით არის განპირობებული“.

„24 აპრილიდან დედაქალაქში და  საქართველოს ზოგიერთ რაიონში ატმოსფერულ ჰაერში ფიქსირდება მყარი ნაწილაკების [PM10, PM2.5] შემცველობის მატება, რაც ძირითადად ტრანსსასაზღვრო დაბინძურებას უკავშირდება და სამხრეთიდან და სამხრეთ-აღმოსავლეთიდან უდაბნოს მტვრის მასების გავრცელებით არის განპირობებული“ – აცხადებს გარემოს ეროვნული სააგენტო.

გარემოს ეროვნული სააგენტოს ატმოსფერული ჰაერის ხარისხის პორტალის მიხედვით, ბათუმში დღეს ჰაერში მტვრის ნაწილაკების შემცველობის მაჩვენებელი არის „ცუდი“ და „ძალიან ცუდი“:

მტვრის ნაწილაკების გავლენა ჯანმრთელობაზე: თვალის გაღიზიანება, ასთმა, ბრონქიტი, ფილტვის დაზიანება, სიმსივნე, მძიმე ლითონებით მოწამვლა, უარყოფითი ზემოქმედება გულსისხლძარღვთა სისტემაზე.

რა არის ამ ნაწილაკების ჰაერში გაფრქვევის ძირითადი წყარო და რა გავლენა აქვს მას ჯანმრთელობაზე, იხილეთ ამ ბმულზე:

• ჰაერში მტვრის შემცველობის მაჩვენებელი ბათუმში გაუარესდა

„თუ რუსულ კანონს მიიღებენ, მე არ ვიცხოვრებ ასეთ საქართველოში. წავალ ოჯახით, დავტოვებ აქაურობას, რადგან „რუსეთი“ არ არის ჩვეულებრივი სიტყვა, ამის უკან არის ტერორიზმი, ეს არის კრიმინალი, ეს არის შიში, ტერორი და ჩემს შვილებს ვერ გავზრდი აქ“, – ამბობს გიორგი ტუღუში, ბათუმის მერიის მუნიციპალური ინსპექციის თანამშრომელი, მწერალი.

„ბათუმელები“ მას „ქართული ოცნების“ მიერ ხელმეორედ ინიციირებულ რუსულ კანონპროექტზე ესაუბრა და ჰკითხა, როგორც საჯარო მოხელე და ამ ქვეყნის მოქალაქე, ხედავს თუ არა საშიშროებას ამ კანონში.

„მე დიდი ხანია, რაც საჯარო მოხელე ვარ, წინა ხელისუფლების დროსაც ვმუშაობდი საჯარო უწყებაში და ვერ ვიტყვი, რომ ჩემთვის გამოხატვის თავისუფლება ვინმეს შეუზღუდია.

იმ საჯარო მოხელეებს კი, ვინც არ გამოხატავენ საკუთარ აზრს, ვფიქრობ უფრო თვითცენზურა აქვთ, რადგან არ უნდა დაგვავიწყდეს, რომ სტალინურმა რეჟიმმა, რომელიც ჩვენს მშობლებს, ბებიებს და ბაბუებს მართავდა, გაუმძაფრა შეგრძნება შიშებზე.

ეს გენეტიკური მეხსიერებაა და ეს თვითცენზურაა ჩაბუდებული ბევრ ადამიანში დღესაც.

ამიტომ, ვერც იმას ვიტყვი, რომ ამ ადამიანებს ვინმე თბილისში წასვლას აიძულებს აქციაზე, რომელიც ხელისუფლებამ დაგეგმა 29 აპრილს. ჩემამდე არავინ მოსულა, არც ჩემს მეგობრებთან და არ უთქვამს, რომ უნდა წავიდეთ აქციაზე. ალბათ პარტაქტივზეა გათვლილი ეს აქცია და ამიტომ“, – ამბობს გიორგი ტუღუში.

მისი აზრით, „ქართული ოცნების“ მიერ დაგეგმილი აქცია, ჰაერის ნაყვაა და შედეგს ვერ გამოიღებს.

„იმ ხალხს, რომელიც დღეს რუსთაველზე დგას რუსული კანონის წინააღმდეგ, ხელისუფლება საკუთარ ხალხად არ თვლის. მაგრამ ჩვენი შვილების არჩევანი არის ევროპა და ჩვენ ვდგავართ შვილების გვერდით.

მაგრამ არიან ისეთი ადამიანებიც, მაგალითად მწერალთა სახლებში, საჯარო დაწესებულებებში, საპატრიარქოში, ვისი არჩევანიც არის რუსეთი.

არის ისეთი ხალხიც, ვინც იძახის, რომ ეს ყველაფერი თეატრია და შემდეგ, როცა სიღრმეებში შედიხარ და ეუბნები, რა თეატრზეა საუბარი, იქნებ ესეც გვითხრან, იცინიან, ან გეუბნებიან. „მოგცლია“ – რაღაც ასეთი დამოკიდებულებაა.

რაც შეეხება რუსულ კანონს, აქ ყველაფერი არის ძალიან მარტივად. პუტინმა პროდასავლურად განწყობილი ოპოზიცია სწორედ ამ კანონის მეშვეობით მოგუდა, აფხაზეთში არსებობდა თავისუფლების კუნძულები არასამთავრობოების სახით და სწორედ ამ კანონით განადგურდნენ.

უფრო გასაგებიც რომ იყოს რუსული კანონის მიზნები, მარტივი მაგალითი შეგვიძლია დავასახელოთ. მაგალითად, თუ რომელიმე კეთილშობილური მიზნებით შექმნილი არასამთავრობო ორგანიზაცია ბელგიიდან მე გადმომირიცხავს 5000 ევროს, ამ კანონის არსებობის შემთხვევაში, ხელისუფლებას თავისუფლად შეეძლება მიმაწებოს ესა თუ ის იარლიყი და პირდაპირ ამბობენ, რა იარლიყსაც მოგვაწებებენ – ეს არის აგენტი.

ახლა ამბობენ გავლენის მქონე, რაც იგივეა დოქს საითაც უნდათ, იქიდან მიაბნევენ სახელურს.

რა თქმა უნდა, მე არ ვეთანხმები ამ კანონის მიღებას, რადგან ეს იქნება საქართველოს სუვერენიტეტის დასასრული. ჩვენ ძალიან კარგად უნდა გვესმოდეს, რომ საზოგადოების რაღაც ნაწილს, მთლიანობაში არ შეუძლია სურათის დანახვა, მაგრამ აქ  აღარ არის საუბარი იმაზე, ეს პარტია მოგწონს თუ ის, არამედ სასწორზე დგას ჩვენი ქვეყნის ევროპული მომავალი“, – ამბობს გიორგი ტუღუში.

ევროპარლამენტარებმა არაერთი განცხადება გააკეთეს და მკაფიოდ მოუწოდეს „ქართულ ოცნებას“ არ მიიღონ რუსული კანონი, წინააღმდეგ შემთხვევაში, საქართველოსთვის არ გაიხსნება ევროკავშირში გაწევრიანებისთვის მოლაპარაკებების ფანჯარა.

როგორ ფიქრობთ, რატომ ჯიუტობს „ოცნება“? – ვკითხეთ გიორგის.

„უნდა გვესმოდეს, რომ ჩვენ მივედით დასავლეთთან და ვთხოვეთ დახმარება. ისინი არ მოსულან ჩვენთან და არ დაუგლეჯიათ კალთები. დასავლეთის ქვეყნებს აქვთ ძალიან მძლავრი ეკონომიკა, დიადი კულტურა, მაგრამ რადგანაც ჰუმანისტურ საწყისებზე დგას ევროპა, თუ ქართველ ერს უნდა ჩვენს ოჯახში, დაე იყოს. ეს არის.

და ახლა უნდათ, რომ რუსულ პროპაგანდისტულ მანქანას, კრემლისტურს, დახატოს ამის საპირისპირო, რომ თურმე გვართმევენ იდენტობას და რაღაც ასეთი.

ჟან პოლ სარტრის, კამიუს, ჰაიდეგერის და იასპერსის ერებს არაფერში არ სჭირდება ქართული იდენტობა.

აქ ძალიან მარტივია ყველაფერი – თქვენ მოდიხართ ჩემს ოჯახში და გეუბნებით, რომ ვიქეიფოთ, ჩემი თავი შემოგევლოს, დავლიოთ, მაგრამ ოთახში ორი წლის ბავშვი მყავს და სიგარეტს ნუ მომიწევ. ანალოგიური სიტუაცია გვაქვს აქაც.

ევროკავშირთან ინტეგრაციის დროს უნდა მოხდეს ეროვნული კანონის ჰარმონიზაცია ევროკავშირის კანონმდებლობასთან, თუ გვინდა ამ ოჯახში ყოფნა. თუ არ გვინდა ევროპულ ოჯახში ვიარსებოთ, მაშინ რატომ წერია საქართველოს კონსტიტუციაში, რომ ქართველი ერის არჩევანი არის ევროატლანტიკური სივრცე?“ – ამბობს გიორგი ტუღუში.

თქვენი აზრით, რა გააჩერებს რუსულ ძალას? – ვკითხეთ მას.

„ნაპოლეონი ამბობდა, რომ დაუმარცხებელია ჯარი, არმია, რომელსაც ერი უძღვება წინ.

თუმცა, არ უნდა დაგვავიწყდეს, რომ რუსული პროპაგანდა ძალიან ძლიერია და ჩვენი საზოგადოების ნაწილში, ღრმად აქვს ფესვები გადგმული ამ პროპაგანდას. ამიტომ დგას დღეს რუსთაველზე, ვთქვათ 20 ათასი მოქალაქე და არა ორი მილიონი.

გავითვალისწინოთ კონფორმიზმიც – მე თუ მაქვს დღეს პური და ღვინო, ესე იგი ყველაფერი კარგადაა. უფრო სწორად, ეს პლატონის გამოქვაბულია, როცა ზიხარ და გგონია, რომ სხვაგან არაფერია ამ გამოქვაბულის გარდა.

ამ ნაჭუჭშიც ზის ბევრი დღეს, მაგრამ არსებობს სხვა ფერებიც და ეს ფერებიც უნდა ვნახოთ. ხელისუფლების წარმომადგენლების შვილები დგანან ამ აქციებზე… წარმოიდგინეთ, როგორი მძაფრი მოთხოვნა უნდა იყოს კრემლისგან, რომ ასეთ რაღაცებს აკეთებენ“.

თქვენ თუ წარმოგიდგენიათ ცხოვრება ისეთ საქართველოში, სადაც რუსული კანონი იქნება? – ვკითხეთ გიორგი ტუღუშს. „არა“ – გვიპასუხა მან.

„თუ ეს კანონი მივიღეთ, საქართველოს სუვერენიტეტი დასრულდება და საქართველოს ხელისუფლებაც დასრულდება დასავლეთისთვის იმ დღესვე.

მე არ ვიცხოვრებ ასეთ საქართველოში. წავალ ოჯახით, დავტოვებ აქაურობას, რადგან „რუსეთი“ არ არის ჩვეულებრივი სიტყვა, ეს არის ტერორიზმი, ეს არის კრიმინალი, ეს არის შიში, ტერორი და ჩემს შვილებს ვერ გავზრდი აქ“, – ამბობს გიორგი ტუღუში.

„რუსეთი ოკუპანტია. ჩვენი გზა ევროპაშია. არა რუსულ კანონს!” – ხმამაღლა გაისმა ბათუმის სახელმწიფო დრამატული თეატრის სცენიდან 23 აპრილის საღამოს.

მსახიობებმა სცენიდან გააპროტესტეს რუსული კანონი, მას შემდეგ რაც პაოლო ჯინოვეზეს პიესის მიხედვით დადგმული სპექტაკლი „თამაში“ ითამაშეს.

„სასამართლოში გავარკვევთ,“ – მსახიობების თქმით, ასეთი იყო თეატრის სამხატვრო ხელმძღვანელის ალექსანდრე ქანთარიას პირველი რეაქცია მათი პოზიციის დაფიქსირების შემდეგ.

თუმცა, როცა მსახიობებმა მას დაკონკრეტება სთხოვეს, რას გულისხმობდა „სასამართლოში გარკვევაში“, სამხატვრო ხელმძღვანელს დამატებითი განმარტება აღარ გაუკეთებია.

როგორც „ბათუმელებისთვის“ გახდა ცნობილი, დღეს, 24 აპრილს „თამაშში“ მონაწილე მსახიობები სამხატვრო ხელმძღვანელმა დაიბარა და მათგან ახსნა-განმარტება მოითხოვა.

„არ ვიცი რა სახის რეაგირება ექნება“, – ამბობს „ბათუმელებთან“ რეჟისორი და მსახიობი ოთო ქათამაძე.

„ყველა მსახიობი, ვინც გუშინ დრამატული თეატრის სცენაზე იდგა და თავისი პოზიცია გამოხატა, შევხვდით [ალექსანდრე ქანთარიას]. ყველა მსახიობმა დავაფიქსირეთ ჩვენი აზრი, რომ უკანონო არაფერი არ გაგვიკეთებია.

მას არ უთქვამს, რომ რაღაც სასჯელი იქნება ან რამე ზომებს მიიღებს, მსგავსი რამ არ უთქვამს.

ჩვენ ხელშეკრულებაში გვაქვს მუხლი, რომელიც მსგავს აქტივიზმს გვიკრძალავს. შეხვედრაზე [ალექსანდრე ქანთარიამ] ამ მუხლზე მიუთითა – ხელშეკრულებაში გიწერიათ ეს და რატომ გააკეთეთო.

მე ვუთხარი, რომ არ ვცნობდი ამ მუხლს, რომ ეს არის არადემოკრატიული, არაკონსტიტუციური და შრომით ხელშეკრულებაში არ უნდა იწერებოდეს ისეთი რამ, რაც ადამიანს სიტყვის და თავისი პოზიციის თავისუფლად გამოხატვაში უშლის ხელს.

დასის გამგემ, თეონა ლორთქიფანიძემ, დაწერა მოხსენებითი ბარათი, სადაც აღწერა რაც მოხდა გუშინ, სპექტაკლის შემდეგ. დანარჩენი არაფერი არ ვიცი. მსახიობებს არაფერი არ დაგვიწერია,“ – გვითხრა ოთო ქათამაძემ.

„ბათუმელები“ კომენტარისთვის დაუკავშირდა ბათუმის სახელმწიფო დრამატული თეატრის სამხატვრო ხელმძღვანელს ალექსანდრე ქანთარიას.

რა იყო თქვენთვის მიუღებელი მსახიობების ქმედებაში? – ჰკითხა „ბათუმელებმა“ ბათუმის დრამატული თეატრის ხელმძღვანელს.

„იცით რა, ეს ჩვენი შიდა საქმეა და კომენტარის გარეშე,“- მოკლე პასუხით შემოიფარგლა ალექსანდრე ქანთარია.

20 დღეზე მეტია საქართველოს მოსახლეობის დიდი ნაწილი რუსულ კანონს აპროტესტებს, რომლის მიღებასაც „ქართული ოცნება“ გეგმავს.

პროტესტი არის როგორც ქუჩებში, ისე სხვადასხვა დაწესებულებებში. რუსული კანონის საწინააღმდეგოდ გამოვიდა თეატრალური საზოგადოება.

თბილისში, ქუთაისში, ზესტაფონში, ოზურგეთში და გუშინდელი დღის შემდეგ უკვე ბათუმშიც, მსახიობებმა რუსული კანონი გააპროტესტეს და თქვეს, რომ „საქართველოს მომავალი ევროპაშია“.

• რა ხდება 

2024 წლის 3 აპრილს, ცნობილი გახდა, რომ „ქართული ოცნება“ კვლავ აპირებს რუსული კანონის მიღებას.

ეს კანონპროექტი 2023 წლის მარტში მასობრივი პროტესტის შემდეგ “ოცნებამ” უკან გაიწვია და პირობა დადო, რომ მას აღარასოდეს დაუბრუნდებოდა. ხელისუფლებამ პირობა დაარღვია, ხალხი მოატყუა და კანონპროექტი განსახილველად პარლამენტში დააბრუნა.

ანალოგიურმა კანონმა რუსეთში გააქრო ყველა დემოკრატიული ინსტიტუტი და გაამყარა პუტინის რეჟიმი.

საერთაშორისო დიდოსტატი, საქართველოს ნაკრების წევრი, მოჭადრაკე ნინო ბაციაშვილი რუსული კანონის წინააღმდეგია, რადგან, მისი აზრით, ეს კანონი საქართველოს მეგობრებს დააკარგვინებს და დააშორებს ევროპას.

„ჩვენ, მოჭადრაკე ქალთა ნაკრებმა შარშანაც გამოვხატეთ ჩვენი პოზიცია და რა თქმა უნდა, უარყოფითი იყო ჩვენი დამოკიდებულება რუსულ კანონთან დაკავშირებით. წელს ნამდვილად გამაოგნა, როცა გავიგე, რომ თავიდან აპირებდნენ ამ კანონის შემოტანას.

მაშინ როცა ეს ერთი წელი უნდა გამოგვეყენებინა იმისთვის, რომ ევროპას უფრო დავახლოებოდით და წინ წავსულიყავით ევროინტეგრაციის გზაზე, ახლა უკან-უკან მივდივართ და ამ კანონის შემოღება დაგვაშორებს საერთოდ.

მეც ევროპის ჩემპიონატზე ვარ ახლა, ევროპაში დავდივართ და ვისაც შეხება აქვს ევროპასთან, ყველა ხვდება, რომ ჩვენი კეთილდღეობის გზა ევროპაზე გადის, ამიტომ რუსული კანონი ძალიან გვაშორებს ამ გზას.

ეს კანონი ყველა მოქალაქეს ძალიან ცუდ მდგომარეობაში გვაყენებს. ევროპიდან დაფინანსებულ ორგანიზაციებს, რომლებიც ხალხს ეხმარებიან, შეექმნათ პრობლემები, რაც ძალიან ცუდია.

ჩემი იმედი მაინც ახალგაზრდები არიან. მათ უნდა გამოხატონ საკუთარი აზრი, უფრო უშიშარნი არიან და რაც უფრო მეტი ხალხი გამოხატავს პროტესტს, მით უფრო კარგი იქნება“ – ამბობს ნინო ბაციაშვილი „ბათუმელებთან“.

• რა ხდება?

მმართველმა პარტიამ მიცემული პირობა დაარღვია და ე.წ. რუსულ კანონის ჩაგდებიდან ერთი წლის შემდეგ კანონპროექტი ისევ დააბრუნა. „ქართული ოცნების” მიერ 3 აპრილს დარეგისტრირებულ კანონპროექტში „უცხოური გავლენის გამჭვირვალობის შესახებ“, გასულ წელს „ხალხის ძალის“ მიერ ინიციირებული და საპარლამენტო უმრავლესობის 76 დეპუტატის მხარდაჭერილი კანონისგან განსხვავებით, ტერმინი „უცხოური გავლენის აგენტი“ ჩანაცვლებულია „უცხოური ძალის ინტერესების გამტარებლით“.

კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის” სტატუსებს მიანიჭებს.

საქართველოს საერთაშორისო პარტნიორებმა, აშშ-ის, ევროკავშირისა და ევროპის საბჭოს ჩათვლით, შეშფოთება გამოთქვეს საქართველოს ხელისუფლების მიერ შარშან „უპირობოდ“ გაწვეული კანონპროექტის ხელახალი ინიციირების გამო. დასავლელი პარტნიორები საქართველოს მოუწოდებენ, უარი თქვას აღნიშნული კანონის მიღებაზე, რადგან ის ხელს შეუშლის საქართველოს ევროპულ პერსპექტივას.

მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან.

მესამე დღეა ბათუმში ზღვაში დაკარგულ ახალგაზრდას უშედეგოდ ეძებენ.

17 წლამდე მოზარდი ზღვაში შესვლის შემდეგ გაუჩინარდა.

სამაშველო სამსახურის ინფორმაციით, დაკარგულის ძებნა ისევ მიმდინარეობს.

საქართველოში აშშ-ს საელჩოს ინფორმაციით, საზღვრის უსაფრთხოების გასაძლიერებლად, შემოსავლების სამსახურს თანამედროვე ტექნიკური აღჭურვილობა გადაეცა.

ტექნიკური აღჭურვილობა 13 მილიონი დოლარის ღირებულებისაა.

ტექნიკის გადაცემას აშშ-ს ელჩი რობინ დანიგანიც ესწრებოდა.

თანამედროვე აღჭურვილობა ხელს შეუწყობს კონტროლის გაძლიერებას საზღვარზე, რათა თავიდან იყოს აცილებული უკანონო ვაჭრობისა და გავრცელების შემთხვევები.

„რუსული კანონის მიღების შემთხვევაში ბევრი ახალგაზრდა დაკარგავს განვითარების და წინსვლის საშუალებას.

მეც მიმიღია მხარდაჭერა არასამთავრობო ორგანიზაციისგან და ზუსტად ეს მხარდაჭერა იყო ჩემთვის განვითარების სტარტი, რადგან სანამ არ გავხდებოდი ამ ორგანიზაციის პროგრამების მონაწილე, დავიწყებდი ორგანიზებულ ტრენინგებზე დასწრებას, შემდეგ ანაზღაურებად სტაჟირებას, იქამდე არაფერი არ ვიყავი, მხოლოდ ჩვეულებრივი დიასახლისი.

ამ კანონის მიღების შემდეგ მსგავსი რაღაცები, რაც იყო ჩემი განვითარების საფუძველი, ფიზიკურად ვერ იარსებებს.

მაშინ გადავწყვიტე სწავლის გაგრძელება, მაშინ დავინახე განათლების საჭიროება და მაშინ დავიწყე საკუთარი თავის განვითარებისთვის ბრძოლა. თუ არასამთავრობო ორგანიზაციების მხარდაჭერას წაგვართმევენ, სხვები ვეღარ მოახერხებენ განვითარდნენ ისე, როგორც მე.

რუსული კანონი გააქრობს შესაძლებლობებს”, – გვეუბნება ლელა ვასაძე.

ლელა სამართლის ფაკულტეტის პირველ კურსელი და სამი შვილის დედაა ხულოდან. მან 29 წლის ასაკში გადაწყვიტა მიეღო უმაღლესი განათლება. ლელას შესახებ “ბათუმელებმა” გასულ წელს წერდა.

ქალის თქმით, მთიან სოფლებში მცხოვრები მოსახლეობისთვის კრიტიკული მედიისა და არასამთავრობო ორგანიზაციების არსებობა შესაძლოა ითქვას, რომ კიდევ უფრო მნიშვნელოვანია, რადგან მათი ხმით სხვები ნაკლებად ინტერესდებიან.

„იმ საშუალებების გაუქმება, რასაც ჩვენთვის ქმნიან არასამთავრობო ორგანიზაციები, ძალიან მძიმე შედეგებს მოიტანს არა მხოლოდ ამ ორგანიზაციებისთვის, არამედ ჩვენთვის, აქ მცხოვრები ჩვეულებრივი ადამიანებისთვის. ჩვენ გვჭირდება და ჩვენთვის მნიშვნელოვანია ამ ორგანიზაციების პროექტებში ჩართვა, მათგან დაფინანსების მოპოვება თუ სხვა სახის მხარდაჭერა.

კრიტიკული მედიის არ არსებობა ავტომატურად შექმნის რეალურ ინფორმაციაზე ხელმიუწვდომლობას. ინფორმაციულ ვაკუუმს. დავკარგავთ რეალური ინფორმაციის მიღების შესაძლებლობას. თუ აღარ გვექნება კრიტიკული მედია, ავტომატურად მივიღებთ იმ ინფორმაციას, რაც აწყობს ვიღაცას, არ აქვს მნიშვნელობა ვინ იქნება ეს. ვიღაცას რაც აწყობს, ჩვენ დავინახავთ მხოლოდ იმას”, – ამბობს ლელა.

მისი თქმით, რუსული კანონის მიღება ქვეყანაში უამრავი სამუშაო ადგილის განადგურებასაც გამოიწვევს, რაც არანაკლებ მნიშვნელოვანია.

„მე ახლა სამართალს ვსწავლობ და სწავლის დასრულების შემდეგ საერთოდ არ ვაპირებ საჯარო სექტორში წასვლას, ამიტომ, მთელი ოთხი წლის შრომა შესაძლოა წყალში ჩამიყაროს ამ კანონმა“ – ამბობს ლელა.

•  რა ხდება

მმართველმა პარტიამ მიცემული პირობა დაარღვია და ე.წ. რუსულ კანონის ჩაგდებიდან ერთი წლის შემდეგ კანონპროექტი ისევ დააბრუნა. „ქართული ოცნების” მიერ 3 აპრილს დარეგისტრირებულ კანონპროექტში „უცხოური გავლენის გამჭვირვალობის შესახებ“, გასულ წელს „ხალხის ძალის“ მიერ ინიციირებული და საპარლამენტო უმრავლესობის 76 დეპუტატის მხარდაჭერილი კანონისგან განსხვავებით, ტერმინი „უცხოური გავლენის აგენტი“ ჩანაცვლებულია „უცხოური ძალის ინტერესების გამტარებლით“.

კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის” სტატუსებს მიანიჭებს.

საქართველოს საერთაშორისო პარტნიორებმა, აშშ-ის, ევროკავშირისა და ევროპის საბჭოს ჩათვლით, შეშფოთება გამოთქვეს საქართველოს ხელისუფლების მიერ შარშან „უპირობოდ“ გაწვეული კანონპროექტის ხელახალი ინიციირების გამო. დასავლელი პარტნიორები საქართველოს მოუწოდებენ, უარი თქვას აღნიშნული კანონის მიღებაზე, რადგან ის ხელს შეუშლის საქართველოს ევროპულ პერსპექტივას.

მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან.

თბილისის სახელმწიფო უნივერსიტეტის სტუდენტებმა ირაკლი კობახიძეს დაფაზე დაუტოვეს წარწერა – „არა რუსულ კანონს!“.

ერთ-ერთი სტუდენტი, რომელმაც კობახიძეს წარწერა დაუტოვა, პოლიტიკური მეცნიერებების ფაკულტეტის სტუდენტი დათო ჩხობაძეა.

„ირაკლი კობახიძე ლექციებს ატარებს ყოველ შაბათ დღეს, დილით.

სავარაუდოდ, წაშლიან ამ წარწერებს შაბათამდე, მაგრამ სამართლის სტუდენტები, ვისაც კობახიძე უკითხავს ლექციას, ხვალიდან აპირებენ პეტიციის შედგენას და ხელმოწერების შეგროვებას, რომ კობახიძემ აღარ გააგრძელოს საქმიანობა თსუ-ში.

ჯაბა სამუშია და რექტორატი ალბათ არც ამ მოთხოვნას გაითვალისწინებს, მაგრამ ჩვენ გვინდა ამით ვაჩვენოთ ჩვენი პოზიცია“- ამბობს დათო ჩხობაძე „ბათუმელებთან“.

მისი თქმით, კობახიძის ლექციაზე სტუდენტებს არ აძლევენ შესაძლებლობას დასვან კრიტიკული კითხვები.

„მას ლექციებზე დაჰყვებიან თანმხლები პირები, დაახლოებით 10-12 ადამიანი, რომლებიც არც თსუ-ს სტუდენტები არიან, არც ზოგადად, სტუდენტები და ცდილობენ აუდიტორიებში ცენზურის დაწესებას, რომ ზედმეტი კითხვებით არ შეაწუხონ კობახიძე.

ეს პირები არიან დიდუბე-ჩუღურეთის რაიონული ორგანიზაციის და „ქართული ოცნების“ ახალგაზრდული აქტივი“ – ამბობს დათო ჩხობაძე.

მისი თქმით, ირაკლი კობახიძე აქტივისტებთან ერთად ლექციებზე გასული წლის საპროტესტო აქციებიდან დადის.

„როცა რუსული კანონის საწინააღმდეგო პროტესტები დაიწყო, იქიდან მოყოლებული დაჰყვება ეს ხალხი კობახიძეს ლექციებზე.

უნივერსიტეტი არ არის ძალადობის ადგილი, განათლების და კრიტიკული აზროვნების ჩამოყალიბების კერაა, მაგრამ მათ არ სურთ მოისმინონ კრიტიკული შეფასებები და ვინც ამას გაბედავს, ფიზიკურად უსწორდებიან და გაუსწორდნენ კიდეც ჩვენს მეგობარს, ნიკო მანაგაძეს.

ირაკლი კობახიძის რეაქცია კი ამ ძალადობაზე იყო ღიმილი. აი, ეს არის მისი სახე“-ამბობს დათო ჩხობაძე.

გასული წლის მარტის მასობრივი აქციების შემდეგ „ქართულმა ოცნებამ“ ისევ დააბრუნა პარლამენტში განსახილველად უცხოური გავლენის აგენტების შესახებ რუსული კანონპროექტი, მიუხედავად იმისა, რომ მანამდე პირობა დადო, აღარასდროს დაუბრუნდებოდნენ ამ კანონს.

პირობის დარღვევას საზოგადოება ისევ მასობრივი პროტესტებით გამოეხმაურა. საპროტესტო აქციები თითქმის ყოველდღე მიმდინარეობს პარლამენტის წინ, თბილისში და საქართველოს სხვა ქალაქებშიც.

რუსულ კანონს, „ქართული ოცნების“ წევრებმა პირველი მოსმენით უკვე დაუჭირეს მხარი. საპროტესტო აქციები გრძელდება.

ბათუმში ხელოვნური კუნძულის მოწყობასთან დაკავშირებით კომპანია „ამბასადორი ბათუმი აილენდის“ მიერ გარემოს ეროვნულ სააგენტოში წარდგენილი დოკუმენტაცია [გზშ] სააგენტომ დაახარვეზა და კომპანიას 2 თვის ვადა მისცა ხარვეზების გამოსასწორებლად.

ხარვეზების გამოსწორების გარდა, სააგენტო „ამბასადორს“ წერს, რომ კომპანიამ წარმოადგინოს დეტალური ინფორმაცია იმ საკითხებსა თუ შენიშვნებზეც, რაც ამ პროექტთან დაკავშირებით აქვს საზოგადოებას.

ხელოვნური კუნძულის მოწყობის პროექტის გარემოზე ზემოქმედების შეფასების [გზშ] ანგარიშთან დაკავშირებით სააგენტომ გარემოსდაცვითი გადაწყვეტილება უნდა მიიღოს.

გარემოსდაცვითი შეფასების კოდექსით, გარემოსდაცვითი გადაწყვეტილება გარემოზე ზემოქმედების შეფასებისადმი დაქვემდებარებული საქმიანობის განხორციელების სავალდებულო წინაპირობაა. ანუ, ხელოვნური კუნძულის მშენებლობის დასაწყებად ასეთი გადაწყვეტილება აუცილებელია.

„ამბასადორის“ მიერ წარდგენილ გზშ-ს დოკუმენტზე კი გარემოს სააგენტოს სხვადასხვა სახის 36 შენიშვნა აქვს.

„გთხოვთ, ორი თვის ვადაში უზრუნველყოთ დაზუსტებული/დამატებითი ინფორმაციის სააგენტოში წარმოდგენა. აღნიშნული შენიშვნების გათვალისწინებით, დაზუსტებული ინფორმაციის/დოკუმენტაციის წარმოდგენამდე სააგენტო მოკლებულია შესაძლებლობას იმსჯელოს გარემოსდაცვითი გადაწყვეტილების გაცემის თაობაზე“ – მიწერეს „ამბასადორს“ სააგენტოდან 2024 წლის 19 აპრილს.

„2024 წლის 12 იანვარს ბათუმის მერიაში გამართულ, გზშ-ის ანგარიშის საჯარო განხილვისას, დამსწრე საზოგადოების მხრიდან გამოითქვა შენიშვნები/მოსაზრებები დაგეგმილ საქმიანობასთან დაკავშირებით, რომელიც მათ შორის ეხებოდა პროექტის მშენებლობა-ექსპლუატაციის შედეგად ვიზუალურ-ლანდშაფტურ ზემოქმედებას.

ასევე, ადმინისტრაციული წარმოების ეტაპზე გზშ-ის ანგარიშთან დაკავშირებით წარმოდგენილია ,,საქართველოს მწვანეთა მოძრაობა/დედამიწის მეგობრები – საქართველოს, ასოციაცია „ფლორა და ფაუნას“, „ბათუმის თავისუფლების მოედნის“ წევრების, ურბანისტ გიორგი აბაშიძისა და სოციოლოგ იაგო კაჭკაჭიშვილის წერილობითი შენიშვნები.

აღნიშნულიდან გამომდინარე, აუცილებელია წარმოდგენილ იქნეს საჯარო განხილვაზე დასმული საკითხებისა და სააგენტოში წარმოდგენილი შენიშვნების გათვალისწინების შესახებ დეტალური ინფორმაცია/დოკუმენტაცია შესაბამისი ცხრილის სახით“ – წერს სააგენტო „ამბასადორს“.

„ამასთან, დოკუმენტის შესავალ ნაწილში აღნიშნულია, რომ კუნძულის შემდგომი განაშენიანების დეტალური გეგმის მომზადება და ადგილობრივი თვითმმართველობის ორგანოებთან შეთანხმება დაგეგმილია პროექტის შემდგომ ეტაპზე. ასევე მითითებულია, რომ პირველი ფაზის პერიოდში დაგეგმილია დამცავი მოლების და ხელოვნური კუნძულის ტერიტორიის მოწყობა.

ვინაიდან, გზშ-ის ანგარიშში დეტალურად არ არის განხილული კუნძულის განაშენიანებასთან და საჭირო ინფრასტრუქტურის მოწყობასთან დაკავშირებული საკითხები და მათი ზემოქმედება გარემოსა და ქალაქზე, მათ შორის ზეგავლენა მისასვლელ გზებსა და ქალაქის ურბანულ პროცესებზე, სააგენტო აღნიშნული ადმინისტრაციული წარმოების პროცესში იმსჯელებს პირველი ფაზის ფარგლებში დაგეგმილ დამცავი მოლებისა და ხელოვნური კუნძულის მოწყობის თაობაზე“ – აღნიშნულია სააგენტოს წერილში.

გარემოს ეროვნული სააგენტო ასევე აქვეყნებს საზღვაო ტრანსპორტის სააგენტოს წერილს ხელოვნური კუნძულის გზშ-თან დაკავშირებით.

„აღნიშნული ხელოვნური კუნძული წარმოადგენს განსაკუთრებული მნიშვნელობის ობიექტს, შესაბამისად უნდა ჩატარდეს რიგი საექსპერტო კვლევები და გაიცეს დასკვნები. წარმოდგენილი გარემოზე ზემოქმედების შეფასების ანგარიშის 4.10.8 პუნქტი განიხილავს კუნძულის შემადგენელი მოლების ზემოქმედებას ბათუმის საზღვაო ნავსადგურზე, თუმცა აღნიშნული ზემოქმედების დასადასტურებელი კვლევების დამადასტურებელი, მათ შორის კომპეტენტური საზღვაო ინსტიტუტის [ლაბორატორიის] დასკვნა არ არის მითითებული.

აქვე უნდა აღინიშნოს, რომ სააგენტოს მიერ არაერთხელ იქნა დაფიქსირებული პოზიცია აღნიშნული კუნძულისათვის საჭირო ტალღმჭრელების მოწყობასთან დაკავშირებით. კერძოდ, იქვე განლაგებულ ბათუმის შიდა და გარე ნავსადგურის სანავსადგურე ობიექტებზე, საშტორმო ამინდის დროს ზღვის ჩრდილოეთიდან და ჩრდილო-დასავლეთიდან მომავალი, ტალღების ზემოქმედების განსაზღვრის მიზნით.

აგრეთვე, სააგენტო მიზანშეწონილად მიიჩნევს აღნიშნული პროექტის მიმდინარეობის თაობაზე ინფორმაცია მიეწოდოს პროექტის მომიჯნავე შპს „ბათუმის ნავთობტერმინალს“, შპს „ბათუმის საზღვაო ნავსადგურს“, შპს „ტერმინალ-1“-სა და შპს „იბერია ლიმითედის“ ადმინისტრაციას“ – აღნიშნულია საზღვაო ტრანსპორტის სააგენტოს წერილში.

აქვე აღსანიშნავია, რომ ცოტა ხნის წინ გარემოს ეროვნულმა სააგენტომ კერძო კომპანია „ტერმინალ 1“-ს, სთხოვა, რომ მის მიერ დაგეგმილი საქმიანობა „ამბასადორი ბათუმი აილენდთან“ შეათანხმოს.

შავ ზღვაში ხელოვნური კუნძულისა და ნახევარკუნძულების მოსაწყობად კომპანია „ამბასადორი ბათუმი აილენდს“ სახელმწიფომ ზღვაში 1 443 223 კვ/მ ტერიტორია 65 წლით, აღნაგობის უფლებით გადასცა.

ხელოვნური ნახევარკუნძულის, როგორც „ნაპირდამცავი ჯებირის“ მშენებლობა „ამბასადორმა“ 2022 წელს გზშ-ს გარეშე დაიწყო.

ხელშეკრულებით, კომპანიას აღებული აქვს ვალდებულება, პროექტის ფარგლებში შექმნას ორი ხელოვნური ნახევარკუნძული და ერთი ხელოვნური კუნძული და მოაწყოს მათზე შესაბამისი ინფრასტრუქტურა. ამავე ხელშეკრულებით, „ამბასადორმა“ არანაკლებ 100 მილიონი აშშ დოლარის ინვესტიცია უნდა განახორციელოს.

„ამბასადორს“, ხელშეკრულებით ნაკისრი ვალდებულებების შესრულების შესაბამისად, ხელოვნურ კუნძულს და ნახევარკუნძულებს საქართველოს მთავრობა საბოლოოდ საკუთრებაში სიმბოლურ 1 ლარად გადასცემს.

დაახლოებით ერთი თვის წინ, მთავრობამ შპს „ამბასადორი ბათუმი აილენდს“, რომელიც ბათუმში ხელოვნურ კუნძულს და ნახევარკუნძულებს აშენებს, ახალი საბანკო გარანტიის წარმოდგენის ვადა 18 თვით გადაუვადა.